¹ Vakurona va mbunga kriste ame kuna kumutjangera nutape makorangedo kukwenu ashi, ame, name mukurona unyenu wa mbunga kriste ntani ame mbangi ya ukareli ogho ana kuhepero runyando mwa Kristus, ntani name nganu kawana upingwa wa uyerere wendi opo ngashoroka: ² Karenu vashita va ndjwi da Karunga odo atapa kukwenu, di kungenu nashihoro, yira momu avi shanena Karunga - kapishi vikare yira vya mutininiko, ruwanenu mutikitemo shiruwana sha Karunga, anwe kapi mwa ruwanenga mfuto ya kunyata. ³ Kapishi mukare yira anwe vahona va vantu ovo vatapa mumaghoko ghenu. Nane ngoli, karenu mutape shihonena shashiwa mu mbunga kriste. ⁴ Mposhi opo ngashoroka mushita wa mukurona, ngamukadwate nkata ya shina uhompa ya uyerere yakupira kudjonauka. ⁵ Nanwe nka, vanuke, limburukenu kuva kurona venu. Anwe na muvantje, kudidipitenu mukare na ukaro wa uhunga. Mukondashi Karunga kwa nyenga va kukunenepita and ghuye kufera nkenda va kukudidipita. ⁶ Karenu muna kudidipita kushipara sha Karunga mu nkondo dendi mposhi ngaka munenepite opo ngashitikamo shirugho. ⁷ Tapenu vinka vyenu navintje kukwendi mukondashi ghuye kumupakera mbili. ⁸ Kotokenu, karenu muna vangara. Mbyovyoshi muna nkore wenu Satana kuyendaura yire Nyime wa kununga , ashana-shane ogho avhura kukupawira. ⁹ Karenu muna koro mulipuro. Rwanitenu Satana. Mukondashi anwe mwayiva ashi vakriste va unyenu vamu udjuni na untje navo kwa shimba ma udito gha kufana weno. ¹⁰ Anwe ngamukara muma hepeko shirugho shashifupi tupu, makura Karunga wa nkenda nayintje, ogho amuyito mu uyerere wendi wa naruntje mwa Kristus, ngaka muwapeka, ngaka munkondopeka, ntani ngaka mupameka ngamu kakakare palitateko lya kukora. ¹¹ Ghuye ngaka pangere naruntje na naruntje. Amen. ¹² Silvanus kwa mbatera nutjange yino ntjangwa tumwa yayifupi, ame namutjangera numu pukurure ashi ghuye ghunyetu ogho twahuguvara. Ame kuna kumukorangeda na kumupa umbangi ashi nkenda ayi mwakara nayo ndjo nkenda ya ushili ya Karunga. Karenu muna koro mumwayo. ¹³ Ghunyenu wa mukamali wa mu mbunga Kriste yamu Babiloni, oyi atoghorora Karunga yira momu amutoghorora anwe, ana mukundupo. Monande, Markus naye, ana mukundupo. Kukunda-kundenupo na shihoro shakuku ncumita shamu na ukriste. ¹⁴ Mbili yikare nanwe na muvantje mwa hameno mwa Kristus.