¹ Nanwe shi, makamali muna hepa kulimburukwa ku va kafumu venu. Anwe limburukwenu na mpili vakafumu venu kapi vapura mu nkango da Karunga, vavo ngava kushiura mukonda ya ukaro wavakamali vavo, vavo vahana kuwana marongo kehe ghano. ² Mukonda shi vavo ngava mona ukushuki wenu ntani nomo mwafumadeka Karunga. ³ Makuwapayikiro ghenu kapishi ghakare tupu gha pantunda ya rutu yira huki da kutunga ufughuli, viranda vya ngorodo vya ndiro, vidwata vya ufughuli vya ndiro. ⁴ Nane ngoli, renkenu muntu wa munda ya rutu rwenu a kare ana wapa munda ya mutjima na ufughuli wa mpepo ya kukarererapo ya mbili, vino mbyo vya fumanopo kushipara sha Karunga. ⁵ Mukondashi shirugho shina kapito vakamali va kupongoka ovo kaliro na lihuguvaro mwa Karunga, vavo vakalire na shikoda sha weno ntani kava kulimburukwa nga kuva kafumu vavo. ⁶ Kutantashi Sara naye kwa limburukire kwa Abrahamu kamu twenyanga ashi Hompa wandi. Anwe ntantani muna kara vana-vendi nkene kumuruwana uhunga anwe mupire kukara naghoma wa ma udito kehe ghano. ⁷ Nanwe nka, va kafumu karenu na ukonentu wa vakamali venu, ntani muyive ashi vavo kwato nkondo, muna hepa kuva fumadeka. Vafumadekenu mukondashi navo ngava kawana kumwe nanwe upingwa wa Karunga wa monyo wa naruntje. Ruwanenu vino vitikemo mposhi ndapero denu dikare dina vyukiliri - kapishi dikare dina kulimbi. ⁸ Mukuhulilira, kukwenu na muvantje, karenu namuvantje na mutjima umwe tupu, maghayaro kumwe tupu, na shihoro sha mu ukriste, na nkenda, ntani na likudidipito. ⁹ Kapishi kukuhokwa-hokwa mukuruwana udona, ndi mukutuka-tuke. Mulivhango lyavi vyavidona, anwe muna hepa kutapa matungiko kwa navantje, mukondashi anwe Karunga kwamu twenyedera matungiko, ogho ngamu kawana kumeho. ¹⁰ Yira momu tupu atanta mantjanwa ashi, "Nkene shi ove wa hora liparu lyoye ntani mbyo wa shana ngaghu kaparuke mayuva ghamawa gha kumeho ghuna hepa kushayeka kughamba udona na kughamba vimpempa. ¹¹ Shayekenu kuruwana udona mutameke kuruwana uhunga. Shanenu muwane mbili anwe muyitikitiliramo. ¹² Hompa Karunga kukenga kehe uno wa kulimburuka kukwendi, ntani ghuye kutambura ndapero yendi. Ano ngoli Hompa kudivyuka kehe uno wa kuruwana udona." ¹³ Mpwali umwe wa kuvhura kumu ruwana udona ndi nkeneshi anwe kwakondjeranga kuruwana uhunga? ¹⁴ Ano ngoli nkeneshi anwe amukara mumahepeko mukonda ya uhungami wenu, Karunga ngamupa lirago murwa mwapongoka. Kapishi mukare na ghoma ndi kapishi mutjire vantu ashi kuvhura vamu ruwane udona. Kapishi mukare na Utjirwe. ¹⁵ Nane ngoli, fumadekenu mupongore Kristus akare Hompa wa mu liparu lyenu. Anwe kuwapayikirenu kehe pano mukutapa lilimbururo lya uhunga kwa kehe uno wa kumupura ashi mushingonone lihuguvaro olyolya karo mumwenu. Anwe viruwanenu mu uhunga na mbili na lifumadeko. ¹⁶ Anwe karenu na liywi lyaliwa lya mumutjima ashi nampili vamushwaure ovo vakumughamba mwa mudona mukonda ya ukaro wenu wa ghuwa wa uhunga mwa Kristus vavo ngava kufe ndjoni mukumurundira ashi anwe kwa ruwananga urunde. ¹⁷ Ghuwa unene, nkeneshi amulimburuka kwa Karunga makura mugwanekere na mahepeko mukonda ya kuruwana uhunga kupitakana omo muruwana udona ngamuhepe udona. ¹⁸ Mukondashi Kristus kwa fera ndjo detu rukando rumwe tupu. Ghuye muhungami kwa tufera, atwe vandjoni, mposhi atuyite kwa Karunga. Ghuye kwa mudipayire pa rutu, ano ngoli Karunga aka muvhumbura ku ufe pa mpepo. ¹⁹ Ano ngoli Kristus wapa mpepo, kwa yendire aka yuvitire mpepo odo vatulire modorongo. ²⁰ Vavo kapi valimburukire kwa Karunga pashirugho sha Nowa opo atungire wato wa unene, ano ngoli Karunga kwa kalire na lididimiko navo, ntani Karunga kwa popiliremo tupu monyo da vantu vava sheshu unene - vatano nava tatu - ovo vaparukiro ku ruhandjo rwa mema. ²¹ Ghano mema gha ruhandjo kuna kara yira ndyo liyoyero lyenu olyolya lya popero monyo denu diparuke weno - kapishi likusho lya kukusha rudiro rutunde murutu, nane ngoli mwalino likusho atwe kwa shungida Karunga atupe liywi lyaliwa lya mumutjima - likusho lya kupitira mu livhumbuko lya Jesus Kristus. ²² Kristus kuna shungiri weno ku rulyo rwa Karunga. Ghuye kwa ronda mbyo ayenda muliwiru. Mbyo vamupa apangere vana nkondo navantje, mapangero na ghantje, va Engeli navantje, na mapangero gha mpepo nadintje dikare munda ya lipangero lyendi.