¹ Weno shuvenu ngoli udona na untje, na vimpempa, na ukupaki, na mfudu ntani na marundiro. ² Anwe karenu yira vakeke, mukare kehe pano na ndjara ya kunwa mashini ghapa mpepo, mpo ashi ngamukure ngamu kawane liparu lyanaruntje, ³ mukondashi anwe mwa mona kare nkenda ya Hompa. ⁴ Yenu kwa Hompa ku liwe lya monyo oli vavhukuma vantu, mbyovyoshi Karunga kwali toghorora mbyo alitura ashi lyalyo nga likare mulyo unene. ⁵ Yenu ngoli muyakare yira mawe gha monyo vaya mutungire ntembeli ya mpepo ngamu kare mbunga ya vaPristeli va kupongoka vaku djamba ndjambo ya kupongoka ya kuvhura kuyenda Karunga kumutjima kupitira mwa Jesus Kristus. ⁶ Matjangwa kwa tanta ashi: "Kenga, Ame kuna kutura mu Sioni liwe lyamu likovhu, oli vatoghorora likare lya mulyo wa unene. Kehe uno ngapuro mumwendi kapi ngava mufita ntjoni." ⁷ Kukwenu anwe mwa puro mwa Hompa olino liwe lya kara na mulyo unene. Ano ngoli ku kwavo ovo vapiro kuditambura mbo datamba dino nkango ashi, "Liwe olyo vashwena vatungi, ndyo ndyolyo liwe lya mulikovhu lya mulyo wa unnene," ⁸ ntani nka ashi, "Ku kwavo ovo vapiro kulimburuka ku nkango dendi lyalyo ndyo liwe olyo lyava pundukitango vantu ntani ndyo liwe olyo lya gandango vantu." Mukondashi vavo ku pundukamo morwa kapi valimburuka ku nkango da Karunga - yira momu adi tapire ku kwavo. ⁹ Ano ngoli anwe vantu va Karunga, mbunga ya Karunga, muhoko ogho atoghorora mukare mbunga ya vapristeli ya uHompa, muhoko wa kupongoka, vantu va Karunga ovo atoghorora ashi muyuvite vitetu vyendi ntani ghuye ndje amuyito mutunde mumundema muye mughukenu wendi wa kutetukita. ¹⁰ Pakare kapi mwa kalire muhoko, ntantani muna kara muhoko wa Karunga. Pakare kapi mwa yivire nkenda ya Karunga, ntantani vana mufere nkenda. ¹¹ Vakwetu vakuhora, ame kuna kumu korangeda ashi anwe va genda ntani vana virongo va muno mu udjuni walye mwa kengereranga marutu ghenu, mulipangero lya madogho ghapa rutu arwanite mpepo yenu. ¹² Karenu ngoli na ukaro wa ghuwa mukatji kava pagani, vavo vavo ngava murundira ashi anwe muva ndjoni, mposhi ngava dimburure viruwana vyenu vya uhunga kumwe ngava fumadekerepo Karunga opo ngamoneka muliyuva lyendi. ¹³ Hompa kuna shana ashi mulimburuke kwa kehe lipangero lya vantu. Limburukenu kuva Hompa nava pangeli na vantje, ¹⁴ ndi po va pangeli ovo vatuma va futite va kuruwana udona ntani vavo kupandayika va kuruwana uhunga. ¹⁵ Mbyovyoshi mushihoro sha Karunga, ashi nkene amu ruwana uhunga ngamu mwenikida vantu ovo vaghambango nkango da udona na ugova. ¹⁶ Karenu ngoli yira vantu va kumanguruka, na mpili momu mwa manguruka anwe shimpe vakareli va Karunga, kapishi muruwanite umanguruki wenu ashi muruwane udona. ¹⁷ Karenu na shihoro ku vantu navantje. Karenu na shihoro na va kriste va unyenu. Tjirenu Hompa Karunga. Fumadekenu va Hompa venu. ¹⁸ Anwe vakareli, limburukenu kuva hona venu kumwe na kuva fumadeka. Kapishi kwava vavawa va mbili nava vavanongo tupu, nane ngoli na mpili navo va ukenya limburukenu kwavo. ¹⁹ Karunga nga tungika, kehe uno nga karo mumahepeko, ano ngoli ghuye shimpe nga limburuke. ²⁰ Lifumano munke ngali vhuro kukarapo nkeneshi anwe kuna kukudidimikira paku mupa matengekero gha undjoni wenu? Ano ngoli nkene amu kudidimikiri mahepeko ghenu gha viruwana vyenu vya uhunga, kwavino Karunga ngamu tungika. ²¹ Vino mbyo vamu yitira, mukondashi Kristus naye kwa monine runyando mukonda yenu. Mbyo amu neyeda shihonena ashi muviruwane vitikiliremo yira momu aviruwanine ghuye. ²² Matjangwa kwatanta ashi, "Ghuye kapi akalire na undjoni kehe uno, ntani nka kapi akalire na vimpepma mukanwa kendi." ²³ Ghuye kwa mushwaulire, ano ngoli ghuye kapi avyutire rughoko ashi aghambe navo. Ntani ghuye ava muhepeke, ano ngoli ghuye kapi agarapire navo ashi ava vyute, ano ngoli ghuye navintje kwavi tapire kwa Karunga ogho apangurango mu uhunga. ²⁴ Kristus kwa shimba ndjo detu murutu rwendi atware kushilivindakano mposhi atwe tufe tupire kukara na ndjo nane ngoli atwe tukare va uhungami. Muvironda vyendi mo twa wanena liveruko. ²⁵ Anwe kwa kalire yira ndjwi da kukombana, ano ngoli ntantani weno muna vyuka kwamu shita wenu wa muwa ntani ghuye ndje mutakamiti wa monyo denu.