¹ Nani ame kapi namanguruka? Nani ame kapishi mu Apostoli? Ndi ame kapi namona Kristusi muyowoli wetu? Anwe nani kapishi shiruwana shande mwa Hompa wetu? ² Nkene shi kuvamwe ame kapishi mu apostoli,hasha kukwenu nwe mwandjiva. Mukonda shi anwe ungambi waghu Apostoli wande mwa Hompa. ³ Lino ndyo likupopero lyande kovo vashano kumpangura: ⁴ Atwe nakuvhurashi tulye na kunwa ndi? ⁵ Nani atwe nakuvhurashi tuyende namukamali wo akaro nalipuro ugenda, yira momu varuwanga va Apostoli, nava unyetu vamwe mwa Muyowoli wetu na Cephasi ndi? ⁶ Ndi walye name na Barnabas tupu twadiro kukara naunankondo wadira kuruwana morwa liparu lyetu? ⁷ Are wa kuruwana viruwana vya ukavita makura akufute mwene? Are wakutapeka mushipata apire kulyamo viyimwa vyamo? Ndi are wa kukunga vimuna apire kukandamo mashini? ⁸ Ame kuna kughamba vino pankondo dashinauntu tupu ndi? Nani kapishi na veta mo yina kutanta? ⁹ Muveta ya Mosesi kwatjangamo ashi, '' Hove nkene kuna kushwaya mbuto washayimanga kukanwa''. Ngoli shili Karunga kwatambire Hove vya ushili ndi? ¹⁰ Nani ovino kapishi kwavi vitambidire kukwetu? Vino kwavitjangera kukwetu, mposhi mupuruli ahuguvare movyo ana kushwaya mposhi ngawanenemo muyangu wendi. ¹¹ Nkene atukunu vininke vyapa mpepo mukatji kenu, kutuditopera twe kuyangura vinke vyaparutu vyakukwenu ndi? ¹² Nkeneshi mpovali vawanango vino kukwenu, nani ndi kapishi atwe vakuvhura tuwane vyavinene ndi? Ano ngoli atwe kapi twaruwanita dino nkondo? Atwe mbyo twadidimika mwana vintje tupire kuyita makulimbo ku mbudi yayiwa ya Kristus. ¹³ Ame shi mwavi yiva ashi ovo varuwanango viruwana vya kupongoka kuwana ndya davo muntembeli? Kapi mwayiva ashi vakare vakuruwana ku shidjambero kuwanako ovyo vyavahameno vyakushidjambero? ¹⁴ Mo ngoli nka waro, Hompa kwaraghulire ashi vakuyivita mbudi ya yiwa vaparukire momo mukuyuvita mbudi ya yiwa? ¹⁵ Nampili momu vapulitira mukuruwana weno, shimpe kapi naruwana vya weno. Ntani ovyo nakutjangera vino kapishi ndi walye niwanenemo vintu. Hashako tupu nkene kuvhura nganife-mposhi kwato ogho ngashwauro shiruwana shande shashinene. ¹⁶ Nkene kuna kuyuvita mbudi yayiwa, kapishi mpo nikutumbira mukondashi kwavimpa niviruwane. Ndjo yayinene nkene nipira kuyuvita mbudi ya yiwa! ¹⁷ Nkene aniviruwana vino namutjima wakumanguruka, nganukawana mfuto. Ene ngoli nkene kuviruwanena kumutininiko, shimpe nahepa kuviruwana morwa kwavimpa niviruwane. ¹⁸ Mfuto yande nani mfuto munke? Ashi nahepa kuyuvita, mbudi yayiwa pahana kukara ntjontjo ntani nipire kutambura vitapa ovyo nahepa kuwana mukuyuvita mbudi yayiwa. ¹⁹ Nampili momu nakara ashi namanguraka kunavantje, ame kwa kara nimupika wa kuruwanena navantje, mposhi nganiyite vantu vavangi kwa Kristus. ²⁰ Kuva Juda ame kukara yira nimuJuda mposhi nikongwe va Juda. Kwavo vakaro kuntji ya veta, name kukara wakuntji ya veta mposhi nganikongwe vantu vavangi va kuntji ya veta. Ame kwaruwana vino nampili momu nakara ashi ame kapishi umwe nakaro mu veta. ²¹ Kwavo vakaro pandje ya veta, nahepa kukara yira umwe nakaro pandje yaveta, nampili ngoli kapi nakara pandje ya veta ya Karunga, ngoli kuntji ya veta ya Kristus. Kwaruwana vino mposhi nikongwe vavangi vapandje ya veta. ²² Kwavo vakupira nkondo, name kukara umwe wa kupira nkondo, mposhi nikongwe vavangi vakupira nkondo. Kukwavo navantje, nahepa kukuyenda nakukara mu ukaro wavo navntje nikongwerepo nampili vamwe. ²³ Navintje vino ame kuviruwanena morwa mbudi yayiwa, mposhi nganiwanenemo name matungiko ghamo. ²⁴ Ameshi mwaviyiva ashi mumarumbatano vaduki vangi vahamenangomo, ano ngoli umwe tupu ndje wakuwana mfuto yakufunda? Nanwe nka waro dukenu ngamukawane mfuto yenu. ²⁵ Kehe uno muduki kukuyombelita mwanavintje. Vavo kuruwana vino mposhi ngava kawane nkata yakupira kukarererapo, ano ngoli kuruwanena yakukarererapo. ²⁶ Mposhi ame kapi nakuduka nahana shitambo ndi kapi nakutoghona ngomi yande mumpepo mawoko-woko. ²⁷ Ame kuyombilita rutu rwande rukare runatikilirimo, opo nganu mana kuyuvita vantu, ame naumwande kapishi nganikahupeko.