¹ Vaunyande, ame kuna kumuvhurukita ashi vakurona vetu navantje kwayendilire muliremo ntani navantje kwavindakanine lifuta. ² Navantje kwava kushilire mwa Moses muliremo na mulifuta, ³ ntani navantje kwalire ndya dimwe tupu dapa mpepo. ⁴ Navantje kavanwanga vinwa vimwe tupu vyapa mpepo. Vavo kavanwanga kuliwe lya pa mpepo olyo kaliva kwamango,liwe linya ndyo Kristus. ⁵ Ngoli Karunga kapi akalire naruhafo rwamumutjima navantu vavangi vamumbunga yavo, makura mbyo ava djonaulirepo mumburundu. ⁶ Mposhi navintje vino vikare marondoro kukwetu, tupire kukara nalidowo kuvinke ovyo kava dowokeranga. ⁷ Kapishi mukareranga vaKarunga vavimpempa, yira momu kavaruwananga vamwe. Matjangwa kwatanta ashi, '' Mbunga ayishungiri yilye na kunwa, ntani yina kushapuka yidane.'' ⁸ Twashashondera, yira momu kavaruwanangamo vamwe. Muliyuva limwe, vantu mayovi dimurongo mbiri navatatu kwafire mukonda yavyo. ⁹ Nka twashatura Kristus mumasheteko, yira momu varuwaninemo vamwe makura avafu kumayoka. ¹⁰ Mwashakara narushivano, yira momu vakalire shingi shavo makura mu engeli wa mfa avadjonaurapo. ¹¹ Navintje vino kwashorokire kukwavo mposhi vatape shihonena kukwetu. Vino kwavi tjangera vatape marondoro-kukwetu atwe tuna karo mu udjuni uno tuyive ashi uhura wa udjuni unatiki. ¹² Mpo ngoli ashi kehe uno ana kughayaro ashi uye anayimana nawa-nawa akukunge mposhi kapishi ngawe. ¹³ Kwato masheteko ghakuvhura kumuwana nkene ashi kapishi ngogho awanango vantu navantje. Mposhi, Karunga mulimburuki. Ghuye nakumukengererashi amuwane masheteko akupitakana nkondo denu. Mposhi mumasheteko uye kumuwapayikira ndjira ya kughashendauka, mpo shi mukare nalididimiko. ¹⁴ Mpo ngoli shi, vaunyande vakuhora, tundenu kukukarera vaKarunga vavimpempa. ¹⁵ Ame kuna kughamba nanwe yira vantu vaukonentu, mposhi mukengurure nawa kwavino nakughamba. ¹⁶ Nkinda yakutungika oyo twataperanga mpandu kwa Karunga kumwe nakunwamo, kapi yatungwanikitanga kuhonde yaKristus? Mboroto oyo twa bamunanga tulye, kapi yatugwanikitanga kurutu rwaKristus? ¹⁷ Mukondashi muntje umwe tupu wa mboroto, Atwe twakaro ashi tuvangi kwakara rutu rumwe tupu. Mukondashi natuvantje kulya kumuntje umwe tupu wa mboroto. ¹⁸ Kengenu mbunga ya vaIsraeli kutwara parutu. Ovo vakulya kundjambo nani kapishi mbovo vakuruwana kushidjambero? ¹⁹ Vinke nakushana kutanta nani? Karunga wa vimpempa ne mulyo ndi? ndi ndya dakudjambera kwa Karunga wavimpempa ne mbyo vintu po ndi? ²⁰ Ame kuna kughamba vyakuhamena kuvininke ovyo vadjambitanga, ashi vavo kwavitapanga vininke vino kumpepo dadidona kapishi kwaKarunga. Ame kapi namushanena ashi mukukwatakane na mpepo dadidona! ²¹ Nakuvhurashi munwe kunkinda ya Hompa ntani munwe nka waro kunkinda ya mpepo dadidona. Nakuvhurashi muhamene kutafura ya Hompa ntani nakutafura ya mpepo dadidona. ²² ndi kuna shana tushangumune ugara wa Hompa ndi? Nkondo detu dinene dapitakana dendi ndi? ²³ '' Navintje vavipulitira,'' ngoli kapishi navintje kuvhura kukwafa. '' Navintje vavipulitira,'' ngoli kapishi navintje kuvhura kutunga vantu. ²⁴ Kapishi ukondjere uwa wana umoye. Nani ngoli kehe uno akondjere uwa wa unyendi. ²⁵ Lyenu kehe vino va ulitanga kumavango ghakuulitira mwahana kukupura liywi lyamumutjima. ²⁶ Mbyovishi, '' udjuni kumwe nanavintje vyakaromo vya Hompa.'' ²⁷ Nkene shi owo adiro kukara nalipuro anamuyita mukalye ndya, makura muna shana kuyenda, lyenu tupu kehe dino ndya vana muyumbura mwahana kukupura liywi lya mumutjima. ²⁸ Ngoli nkene umwe atanta kukwenu ashi, ''odi ndya kunaditapa mulidjambo,'' mwashadilya, mukonda yendi omo ana mupukurura ntani morwa ya liywi lya mumutjima wendi. ²⁹ Liywi lya munda yamutjima lya vantu peke, kapishi lyoye. Umwe kuvhura akupure ashi, mukonda munke muntu peke apangulira umanguruki wande munda ya mutjima wendi? ³⁰ Nkene anili ndya oku kuna kutapa mpandu, vinke nka waro mumpera ndjo, movyo nakulya oku natapa kare mpandu? ³¹ Mpo ngoli shi,kehe vino muna kulya ndi kunwa, ndi kehe vino tupu muna kuruwana, viruwanenu mutape lifumano kwa Karunga. ³² Karenu muna kushuka kwa navantje vaJuda na kuva Gereka, na kungereka ya Karunga. ³³ Momu nakambadaranga kuwapekera vantu navantje muvinke navintje. Kapi nashananga mauwa gha naumwande, ngoli kushana ghavantu vavangi. Ame kuruwana vino mposhi vavhure kuparuka.