¹ Vyakuhamena kuvininke ovyo mwatjanga ashi: ''Ghuwa unene nkene mukafumu adire kukundama mukamali''. ² Ano ngoli mukonda yamasheteko ghaviruwana vyakudira uhungami, kehe uno mukafumu akare na mukamali wendi, ntani kehe mukamali akare namukafumu wendi. ³ Mukafumu ahepa kutikitamo shiruwana shendi akare kumwe parutu na mukamali wendi, mukamali naye mushi kwavo. ⁴ Mukamali kapi akara nankondo dakupangera rutu rwa mwene, mukafumu ndje wa kurupangera. Akare mukafumu naye kapishi akare nankondo da kupangera rutu rwendi, mukamali ndje wa kurupangera. ⁵ Nakukushwenayikashi, nkwandi munakughu kumwe nka pashiruwo shashisheshu mukukuturamo naumwenu mundapero. Makura muna hepa kukara kumwe nka, mposhi Satana adire kumusheteka mukonda yakudira kukupangera naumwenu. ⁶ Ovino kuna kumutantera muyive ovyo vapulitira ano ngoli kapishi dikare dimurawo. ⁷ Ashi navantje ndi vakare yira momu nakara me. Ano ngoli kehe uno akara na ushwi wendi watundo kwa Karunga. Kwa umwe akara na ushwi ghuno, kwa unyendi wapeke. ⁸ Kuvadike na kuvafitavya kuna kumutantera ashi nawa nkene mukare ngoweyo, yira momu nakara me. ⁹ Ano ngoli nkene kapi vana kuvhura kukupangera, vakware. Hasha tupu vavo vakware kapi vikufana nomo vapya kulidowo. ¹⁰ Kuva kwali kuna kumupa dino dimurawo- kapishi me,nani ngoli Hompa- mukamali nakuvhura shi akugaunuke namukafumu wendi, ¹¹ (Nkene ashuvu vyendi, akare ngoli muudike ndipo nkwandi vakuvyute namukafumu wendi), Ntani mukafumu nakuvhurashi akombe mukamali wendi. ¹² Kwenu vakuhupako ame kuna kumutantera-Ame, kapishi Hompa- ashi nkene mukafumu akwara mukamali ahanashi mupuli, ntjene shi uye mukamali atokore kutunga namukafumu uno,mukafumu ashamushuva. ¹³ Nkene mukamali akwara mukafumu ahanashi mupuli, makura mukafumu atokore shi vatunge kumwe, mukamali ashamushuva. ¹⁴ Mukafumu wakudira lipuro ngakapongokera mwa mukamali wendi ntani mukamali wakudira lipuro kupongokera kwa mukafumu wendi. Ashi ndi kapishi mo vyakara weno vana venu ndi vanyata, ano ngoli vapongoka. ¹⁵ Nkene shi wakudiro lipuro atokora kutunda munkwara, kumushuva tupu ayende. Mupuli wamukafumu ndi mupuli wamukamali kwato wo vamanga mukonda yamughano wankwara. Karunga kwa tuyita tutunge mumpora. ¹⁶ Weni mo uyiva ve mukamali ashi ngaukapopera mukafumu woye? Ndi ove mukafumu weni omo uyiva ashi ngaukapopera mukamali woye? ¹⁷ Mpo ngoli ashi, kehe ghuno kwamupa Hompa ushwi wendi, kehe uno ana hepa kuruwana kutwara mu ushwi wendi ogho atapa Karunga kukwendi. Dino ndo veta dande kumbunga Kriste nadintje. ¹⁸ Mpwali mukatji kenu ogho varuwana kare vyavamba kumeho aya kare mupuli ndi? Ghuye kapishi amoneke yira kapi vamuruwana vya vamba. Mpwali mukatji kenu ogho vapira kuruwana vya vamba kumeho akare na lipuro ndi? Ghuye kapishi vamuruwane vyavamba. ¹⁹ Vakuruwane vyavamba ndi vapire kukuruwana vyavamba kapishi mbyo vahepa po. Ovyo vahepapo unene vya kulimburuka kudimurawo da Karunga. ²⁰ Kehe ghuno akare na ushwi wendi ogho atapa Karunga kukwendi kumeho akare na lipuro. ²¹ Ove kwa kalire mupika opo akuyitire Karunga ndi? Kapishi kukupakera shinka kovyo. Ano ngoli nkene shi ove wamanguruka, kara ngoli. ²² Muntu ogho vayita ghuye mupika ano ngoli muviruwana vyaHompa ghuye akona kumanguruka. Mo nka waro, muntu ogho vayita ghuye mumanguruki, ghuye akona kukara mupika wa Jesusi Kristusi. ²³ Anwe kwa mughura kundando ya ndiro, kapishi mukare nka vapika vavantu. ²⁴ Vaghunyande, kehe runo rupe mwakalire naro kumeho mutambure lipuro, muna hepa kukara ngoli mwa Karunga. ²⁵ Vyakuhamena kovo vapiro kukwara rumwe,kapi nakara namarawiro ghavo gha kutunda kwa Hompa. Ano ngoli kuni tapa tupu lighano lyande yira ndjegho, afera nkenda Hompa ashi, ghuye kuvhura kumuhuguvara. ²⁶ Mpo ngoli ashi, ame kunakughayara ashi mukonda ya maudito ogho ana kuyo, ghuwa unene muntu mukukara yira momo ana kara. ²⁷ Ove wakwara mukamali? Kapishi umukombe. Nkene kapi wa kwara mukamali, kapishi ushane mukamali ashi ukware. ²⁸ Ano nkene unakwara, kwato undjoni ntani nkene mukadona ghona akwara, kwato undjoni. Ngoli kuvantu va weno ngava gwanekera namaudito ghapa rutu ghamangi, ame kuna shana nimuyoworore mo. ²⁹ Vaunyande: ame kuna kumutantera ashi, Shiruwo shifupi. Kutunda pano, ovo vakaro navakamali vakare yira kapi vakara navo. ³⁰ Ava vana karo naliguvo vakare yira kapi vana guvu, kovo vana karo naruhafo vakare yira kapi vanahafa, ntani vakughura vininke vakare yira kwato ovyo vaweka, ³¹ Ano kwavo vahameno kwavi vya muudjuni vakare yira kwato ovyo vawanangamo muudjuni. Oghuno udjuni una karopo weno na navintje vyakaromo kuna kuyenda vishayepo. ³² Ame kuna horo mupire kukara nashinka shamawoko-woko. Wakupira kukwara kwakara nashinka shavi vya Hompa, ashi weni omo amuhafita. ³³ Ngoli mukafumu wakukwara kwa kara nashinka shavi vya mu udjuni, ashi weni omo ahafita mukamali wendi- ³⁴ ano uye kwakara pamaruha maviri. mukamali ndipo mukadonaghona ogho apira kukwara kukara nashinka sha Hompa, ashi weni omo apongokera rutu rwendi na mpepo yendi kwa Karunga. Ngoli mukamali wa kukwara kwa kara nashinka shamu udjuni ashi weni omo ahafita mukafumu wendi. ³⁵ Ame kuna kuvimutantera vino muwanene mo uwa wanaumwenu, ntani kapishi kuna kumupa undjoni. Kuna kughamba vino mukare muna kushuka, mukarere Hompa mwahana upiki-piki. ³⁶ Nkene shi umwe mukatji kenu kuna kughayara ashi mukafumu kapi ana kufumadeka mbandeki yendi-nkene mwaka damu kadonaghona dakukwara datikamo vikare paveta-kuvhura aruwane ovyo anahepa. Kapi pakara ndjo. Kuvhura va kukware. ³⁷ Ano ngoli mukafumu nkeneshi anatokora mumutjima wendi, pahana mutininiko akwame shihoro shamwene, mbyo atokora mumutjima wendi ashi kapi ngakwara, ghuye kuwapeka. ³⁸ Wakukwara mbandeki yendi kuwapeka, ntani wakuhorowora ashi ghuye kapi ngakwara kuwapeka unene. ³⁹ Mukamali mumango daveta akara nkene mukafumu shimpe namonyo anakara. Nkeneshi mukafumu ana dohoroka, makura ana manguruka kukwara kehe uno anahoro, ngoli dikare nkwara dapa Ukriste. ⁴⁰ Kutwara mumwande, mufitavya ndi kapi anahepa kukwara nka waro, ngaparuke naruhafo. Ame kunakughayara shi name nakara naMpepo ya Karunga.