¹ Nkene umwe akara namutangu naunyendi, kuvhura ayende akapure vantu vakudira kuhungama ahana kuyenda kuvantu vakupongoka vaKarunga ndi? ² Kapi mwayiva ashi vantu vakupongoka vaKarunga mbo ngavakapanguro udjuni? Nkene ashi udjuni anwe ngamu kaupanguro, makura vimu vhure ngoli kughupapo vino vyavididi ndi? ³ Kapi mwayiva ashi atwe ngatukapangura vaEngeli ndi ? Rukando rwakutika, kuninko tuvhura kupangura maudito ghaliparu lino? ⁴ Nkeneshi mpanguro da weno ndo mwakaranga nado kehe liyuva, vinke mutwarera nkango da weno kuva panguli ovo vapiro kuhama kumbunga Kriste? ⁵ Ame kuna kughamba vino mukufe ntjoni. Mukatji kenu kapi mwakara mukonentu mpiri umwe wakuvhura kughupapo maghudito ghamukatji kenu? ⁶ Ngoli mupuli umwe kutwara mupuli unyendi mushipango-ntani vino kwashorokanga kumeho yavantu vakudira kukara nalipuro! ⁷ Omo mwakara ngoli ashi anwe kukutwaranga muvipango navaunyenu mwakombanita kare. Nke vyo udira tupu kuvitambura shi vanakudjonene? Nke vyo udira kuvitambura tupu ashi vanakukongo? ⁸ Ngoli anwe naumwenu mwaruwanango vyavidona nka anwe kukonga, ntani nwe kwaviruwananga vino kuvapuli vaunyenu! ⁹ Kapi mwayiva ashi vantu vakupira kuhungama kapi ngavakapinga untungi waKarunga? Vashamupukita: kapishi vaviruwana dona vyalikaro panyama, ndi vakareli karunga vavintjwantjo, ndi vatjoli nkwara, ndi ovo vakutapo kushiruwana shalikaro panyama lyamukafumu namukafumu unyendi, ndi vakafumu ovo varuwanango shiruwana shalikaro panyama navakafumu vaunyavo, ¹⁰ Ndi vawidi, ndi vamakurulya, ndi vankorwe, ndi vakushwaura vaunyavo, ndi vakupukita vaunyavo ngavakapinga untungi waKarunga. ¹¹ Vaunyenu vamwe movakalire ngoli. Ano ngoli anwe vamukusha ndjo denu, mbyo vamu pongwera Karunga, mbyo mwahungamena mulidina lya Muyowoli wetu Jesusi Kristusi naMpepo yakupongoka yaKarunga wetu. ¹² '' Navintje vavipulitira kwande''. ngoli kapishi navintje kukwafa. '' Navintje vavi pulitira kwande''. ano ngoli kapi nganipulitira kehe shino shikare na nkondo parutu rwande. ¹³ '' Ndya kwa karerapo lipumba, ano lipumba nalyo kwa karerapo ndya,'' ano ngoli Karunga ngaka vidjonaurapo navintje. Rutu kapi varutambitilire shi rwaviruwana dona vyapanyama. Ano ngoli rutu kwahamena kwa Hompa, ngoli Hompa ndje wakurera rutu. ¹⁴ Karunga kwarambwita Hompa kuufe ntani natwe nka waro ngatu rambwita kuufe nankondo dendi. ¹⁵ Kapi mwayiva ashi marutu ghenu maruha gha rutu rwa Kristus? Kuvhura nighupe ruha rwa Kristus niruture kumwe na ruha rwa vantu va rushonda ndi? Nakuvhurashi vikare ngoli! ¹⁶ Ndi kapi mwayiva ashi wa kugwanekera panyama na mukadi warushonda vana hepa kukara rutu rumwe naye? Yira momu atanta matjangwa, '' Vantu vaviri ngava kara rutu rumwe tupu''. ¹⁷ Ngoli kogho ana gwanekero na Hompa kukara mu mpepo kumwe naye. ¹⁸ Tundenuko kuviruwanadona vyakukara panyama! Kehe yino ndjo peke adjonanga muntu kwa kara pandje ya rutu, ano ngoli wakuruwana viruwana dona vyapanyama kutura ndjo kurutu rwa mwene. ¹⁹ Kapi mwayiva ashi marutu ghenu ndo ntembeli daMpepo yaKupongoka, oyo yatungo mwenu, oyo amupa Karunga? Kapi mwayiva ashi anwe kapi mwakuweka umwenu! ²⁰ Kwa mughura na mfuto. mpo ngoli ashi fumadekenu Karunga na marutu ghenu ntani na mpepo yenu, oyo yahameno kwaKarunga.