¹ Twaya yuvha mbudi ashi mukatjikenu viruwanadona vyalidovaukiro lyapanyama vinakaromo, viruwanadona ovyo vadira kupulitira mpiri muvapagani: mukafumu akare kumwe panyama namukamali wavashe. ² Ano ngoli anwe mbyomuna kukunenepita waro! Mwahana kulira, mposhi ogho ana kuruwano vya weno vamughupemo mukatji kenu? ³ Nampili momu napili kukara kumwe nanwe parutu,Mponili paMpepo. Napangura kare ogho aruwana vihuna vyaweno, yira name mpo nakalire. ⁴ Opo mwaponganga mulidina lyaHompa wetu Jesus Kristus nanwe nakara paMpepo, nankondo daHompa wetu Jesus mpodili, ⁵ Tapenu muntu wa weno kwa Satana nampili rudjonauke rutu rwendi, ano ngoli Mpepo yendi ngayiparuke muliyuva olyo ngaya Hompa. ⁶ Likunenepito lyenu kapi lyawapa. Kapi mwayiva ashi vishashito vyamboroto vyavisheshu kushashita muntje nauntje wamboroto? ⁷ Kukushenu naumwenu vishashito vyavi kuru-kuru mukare mbunga yaviduva vyavipe, vyakupira vishashito, yira momu mwakara. Morwa Kristus, ndjwighona yetu yashipito shaPaska, yinapu kudjamba. ⁸ Tudanenu ngoli shipito shetu, ngoli kapishi namboroto yaviduvito vyavikuru-kuru, ndi viduvito vyaukaro dona nandjo. Nane ngoli, tudanenu namboroto dakukushuka dadiwa nka daushiri . ⁹ Natjangire kwenu muntjangwatumwa yande ashi mwashakaranga navantu ovo vanakaro naviruwana dona vyalidoho lyapanyama. ¹⁰ Kapi natambire vantu vaviruwana dona vyapandje youno udjuni, ndi vamakurulya,ndi vipempa, ndi vakareli karunga wavi ntjwantjo, morwa mukutunda kwavantu va weno nkwandi ghunahepa kutunda muno muudjuni. ¹¹ Ngoli weno ame kuna kumutjangera ashi mwashakara kumwe nakehe uno ashi mbyovyoshi ghunyenu mara ghuye kwatunga muviruwana dona vyalidoho lyapanyama, ndi po shi wamakurulya, ndi mukareli vakarunga vavintjwantjo, ndi mushwauli, ndi nkorwe, ndi wawidi. Nakuvhurashi kulya ndya namuntu wakufana weno. ¹² Ame pankedi munke nivhura kupangura vantu ovo vakaro pandje yangereka? Ntani anwe,nani kapishi shiruwana shenu shakupangura ovo vakaro munda yangereka? ¹³ Karunga ndje ngapanguro vapandje. "Kuupamo vantu vavadona mukatji kenu."