¹ Omuno mo awapera muntu kutumona twe, ashi vakareli vaKristus ntani vatwali mbudi yaHompa oyo yakaro mulihoramo. ² Weno vyakutaterera kuvayuviti mbudi vavo vanahepa kukara shi kuvhura kuvahuguvara. ³ Kukwande me ovyo vininke vyavididi tupu nkene amumpangura nwe ndipo kehe lipanguro lyavantu. Nampili naumwande shi kapi nakupanguranga. ⁴ Ame shimpe kapi nayiva shi nakara namarapoto ghangandi ghakuhamena kukwande, ngoli kapi nakutanta ashi ame nimuhungami. Wakumpangura me ne Hompa. ⁵ Mpo ngoli ashi mwashahova kupangura kehe vino kumeho yo ngashiya shiruwo,kumeho oyo ngaya Hompa. Ghuye ndje ngayayito paukenu vininke ovyo vya horamo mumundema ntani ngaya shorora maghayaro ghamumutjima. Makura kehe uno ntani ngoli ngawana mpandu yendi ya kutunda kwaKarunga. ⁶ Vaunyande, marongwa ghano kunaghahamitiri kwanaumwande ntani naApollos mukonda yenu, mposhi mukurongereko kwetu ovyo ana kutanta matjangwa ashi, "mwasha pitakananga povi vatjanga." ngamudire kukushentjanga. ⁷ Are akengango kehe likushekuno pakatji koye navaunyoye? Vinke ovyo una kara navyo ovyo vyadiro kukarashi vyakuwana? ntjeneshi ove kwaviwana, kukupandayikira vinke yira kapishi kwavikupa? ⁸ Mwakara kare nanavintje ovyo mwashana! Mwangawopara kare! Mwavareka kupangera-shirugho shashire atwe po shimpe kwato! Uwa unene,ashi ndi mwakalire vahompa vaushili,makura tupangere kumwe nanwe. ⁹ Omo nakuvimona, Karunga atura atwe vaApostoli tukare palivega lyakuhulilira, yira mbova vatokwera kumfa. Atwe tuna kara ngoli vantu ovo vanakushepa muudjuni-kuvaEngeli nakuvantu. ¹⁰ Atwe tuvagova mulidina lyaKristus, Anwe muvakonentu mwaKristus. Atwe kapi twakara nankondo, anwe nkondo. Anwe kwawana mfumwa, atwe kwatushwaura. ¹¹ Dogoro weno atwe kuna kuyuva ndjara nalinota, atwe nkagi, atwe vatoghona ntani atwe kwato mandi. ¹² Atwe kuruwana viruwana vyavidito namawoko ghetu. Pakuturundira, atwe kuvatungika. Pakutuhepeka, atwe kudidimika. ¹³ Pakuturundira, atwe kughamba naunongo. Atwe tuna kara ngoli yira liyara lya muudjuni ntani tuna kara ndova kwanavintje,mpiri dogoro weno. ¹⁴ Ame kapi nakutjanga vino ashi nimufite ntjoni, ngoli kuna kumurondoro vanavande vakuhora. ¹⁵ Nampili mukare navadeghuli mayovi murongo mwaKristusi,kapi mwakara navashenu vavangi. Ame nakara shenu mwaKristusi Jesus kupitira mumbudi yayiwa. ¹⁶ Kuna kumukorangeda mukare vatemwinini vande. ¹⁷ Mbyo namutumininine Timothi, monande wakuhora nka owo akaro nalihuguvaro mwaHompa. Ghuye ngayamvhurukita ndjira dande damwa Kristus, yira momu tupu nadironganga kehe kuno ntani namumbunga-Kriste. ¹⁸ Vamweya mukatji kenu vana kara naurunde,morwa kuna kughayara ashi kapi nganiyako nka kwenu. ¹⁹ Ano ngoli ntantani nganiye kwenu, ntjeneshi Hompa anavipulitiri. Kapi nganiyademenena unene kuyiva nkango davarunde,nani ngoli nganiyakenga unankondo wavo. ²⁰ Mukonda shi untungi waKarunga kapi wakara munkango nani ngoli wawo kwakara munkondo. ²¹ Vinke muna shana? Nganiye kukwenu mburo ndi nashihoro shakumuhora namutjima waghughomoki?