¹ Vaunyande, ame kapi navhulire kughamba nanwe yira vantu ovo va karo naMpepo, nani ngoli yira vantu va muno muudjuni, yira vanuke mulipuro lya kupura mwaKristus. ² Ame kwamurelire namashini, kapishi nandya dakutafuna, mbyovyoshi kapi mwadikuwapayikilire, nampili weno shimpe kapi munakuwapayikiri. ³ Anwe shimpe vamuudjuni ghuno. Omo mwakaro mfudu namfumwa mukatji kenu, kapi mwatunga kutwara parutu, ntani kapi mwayendanga kutwara pantambo dashinauntu ndi? ⁴ Nkene umwe aghamba ashi,"Ame kwakwamanga vya Paul," ntani umwe aghamba shi "Ame kwakwamanga vya Appollosi," kapishi muvantu vakushetera vakuyulilira ndi? ⁵ Appollos kwenu ne are? Are Paul? Vakareli vaHompa ovo vayuvhito mbudi odo mwapura, yira momo atapa Hompa shiruwana kwa kehe uno. ⁶ Ame kwatapeka ano Appollos kwatekera, ene ngoli Karunga atapa likulito. ⁷ Makura,pakare mutapeki ndi mutekeli navimweshi. Wamunenepo Karunga wo atapango likulito. ⁸ Weno wakutapeka ntani nowo wakutekera navantje kumwe tupu, ntani kehe ghuno ngakawana ndjambi yendi kutwara kuviruwana vyendi. ⁹ Mukonda shi atwe kuruwana kumwe naKarunga. Anwe shikunino shaKarunga,litungo lyaKarunga. ¹⁰ Kutwara munkenda oyo ampa Karunga nikare mutungi wamukonentu unene, Ame naturapo litateko ano wakukwamako kunakutungirapo. Ngoli kehe uno atakamite ashi weni omo anakutungirapo. ¹¹ Kwato ghumwe avhuro kutateka litateko nalyo peke lyahanashi olyo lyakaropo kare, lyalyo Jesusi Kristusi. ¹² Ntjene shi kehe uno atungu palitateko lino aruwanite Ngorodo, Siliveli, mawe andiro, vitondo, mushoni ndi virwenge, ¹³ viruwana vyendi ngavi kushorora, ngavi shoroka muliyuva ndyo lyo. Ngavikushorora mumundiro. Mundiro ngausheteka mulyo waviruwana ovyo aruwana kehe uno. ¹⁴ Nkene viruwana vyaumwe ngaihupepo, ghuye ngawana mfuto. ¹⁵ Ano nkene viruwana vyaumwe ngavipye,uye ngakombanita, ngoli uye mwene ko ngaparuka, yira kunahene kupitira mumundiro. ¹⁶ Kapi mwayiva ashi anwe ntembeli yaKarunga ntani ashi Mpepo yaKarunga mumwenu yatunga? ¹⁷ Ntjene muntu adjonaura ntembeli yaKarunga, Karunga naye ngadjonaurapo ogho muntu. Morwa ntembeli yaKarunga kwapongoka,ntani mo nka nanwe. ¹⁸ Mwashakengerera muntu akupukite mwene. Ntjeneshi umwe mukatji kenu kughayara ashi ghuye mukotoki muno muudjuni, ahove tanko kukara "ligova" ntani ngakara mukotoki. ¹⁹ Mbyovo shi ukonentu wamuno muudjuni ugova kwaKarunga. Matjangwa kwatanta ashi, "Ghuye kukwata vakonentu mumaukotoki ghavo." ²⁰ Shimpe waro, "Hompa ayiva unandunge wavakonentu ashi navimweshi kukwendi." ²¹ Mukonda ndjoyino, kapishi pakare ogho ana kukunenepitiro vyapashinauntu. Morwa vininke navintje vyenu, ²² Akare Paul, ndi Appollos, ndi Cephas, ndi udjuni, ndi liparu, ndi mfa, ndi vininke vyantantani, ndi vininke vyo ngaviyo kumeho. Vininke navintje vyenu. ²³ Anwe kwahamena kwaKristus, ano Kristus kwaKarunga.