¹ Opo nayire kwenu, vaunyande, kapi nayire nashighamba shakutikiliramo ndi ukonentu mukuyayuvita lihoramo lyaushiri wankango daKarunga. ² Ame kwatokolire ashi nashayiva vintu opo nayakalire mukatji kenu kuupako vyakuhamena kwa Jesus Kristus, ogho vapampalire kushikurushe. ³ Ame kwaya kalire kumwe nanwe mulidiro nkondo namughutjirwe ntani nalikankamo lyalinene. ⁴ Mbudi yande naliyuvito lyande kapi vyamushongaulire nankango daukonentu, nani ngoli kwayaneghedire vyakuhamena kuMpepo naunankondo, ⁵ Mposhi mapuliro ghenu kapishi ghahamene kuukonentu wavantu, nani ngoli munkondo daKarunga. ⁶ Weno atwe kughamba vyaukonentu mukatji kovo vakuro pamaghno,ano ngoli kapishi ukonentu wamuudjuni uno, ndi kuvapangeli vashino shirugho, ovo ngava djonaghukopo. ⁷ Ano ngoli, atwe kughamba ukonentu waKarunga muushili ogho wahoramo, ukonentu wahoramo ogho atulirepo Karunga pamuntango kumeho yavirugho mulifumano lyetu. ⁸ Kwato ghumwe wavapangeli vashiruwo shino vaukwato lighano, ashi ndi vaukwatire lighano, ndi kapi vapamparelire Hompa wakufumana. ⁹ Ano ngoli yira momo vatjanga ashi, "kwato lintjo lyo lyamono, kwato litwi lyo lyayuvho, kwato mutjima wamuntu owo waghayaro ovyo awapayikira Karunga ovo vamuhoro"- ¹⁰ Ano ngoli Karunga kwavishorora kwetu kupitira muMpepo. Mukonda shi Mpepo kukona-kona kehe shino, nampili namaghano ghaKarunga ghakuntji-ntji. ¹¹ Are wakuyiva maghayadaro ghamuntu nkene kapishi Mpepo oyo yakaro mwendi? Waro nka, kwato wakuyiva lihoramo lyaKarunga nkwandi Mpepo yaKarunga. ¹² Atwe kapi vatupa mpepo yamuudjuni nani ngoli Mpepo yakutunda kwaKarunga, mposhi tuvure kuyiva vininke vyamawoko-woko ovyo atupa Karunga. ¹³ Atwe kapi twaghambanga vyakuhamena kuvininke vino munkango odo varonganga naukonentu wavantu nani ngoli naMpepo yakupongoka,atwe kufwaturura vininke vyapampepo kovo vakaro naMpepo. ¹⁴ Muntu wo apiro kukara nampepo yakupongoka nakuvhurashi kutambura mashongo ghakutunda kuMpepo yaKarunga, kuvimona yira vyaugova kwendi. Ghuye nakuvhurashi kuvikwata lighano morwa vyavyo kuvidimburura naMpepo yakupongoka. ¹⁵ Ogho akaro naMpepo yakupongoka kupangura navintje,ngoli ghuye nakuvhurashi kumupangura vaghunyendi. ¹⁶ "Mukondashi are wakuyiva maghano ghaHompa, ashi avhure kumuronga?" Ngoli atwe kwakara namaghano ghaKristus.