¹ Jaanong Jakoba o ne a utlwa mafoko barwa Labane, ba re, ''Jakoba o tsere tsotlhe tse e neng e le tsa ga rraarona, ebile o nnile le khumo ka dithoto tsa ga rraarona.'' ² Jakoba a leba sefatlhego sa ga Labane. A bona gore maitsholo a gagwe mo go ene a fetogile. ³ Foo Modimo a raya Jakoba a re, ''Boela kwa lefatsheng la borraago le kwa masikeng a gago, mme ke tla nna le wena.'' ⁴ Jakoba a roma mongwe a biletsa Ragele le Lea kwa tshimong ya letsomane la gagwe ⁵ mme a ba raya a re, ''Ke bona gore maitsholo a ga rraalona mo go nna a fetogile, mme Modimo wa ga rre o ntse a na le nna. ⁶ Le a itse gore ke diretse rraalona ka thata ya me yotlhe. ⁷ Rraalona o ntsieditse mo a fetotseng dituelo tsa me ga lesome, mme Modimo ga a a ka a mo letlelela go nkutlwisa botlhoko. ⁸ Fa a rile, 'Diphologolo tse dithamaga e tla nna dituelo tsa gago,' foo letsomane lotlhe la tsala tse dithamaga. Mme fa a re, 'Tse ditilodi di tla nna dituelo tsa gago,' letsomane la tsala tse ditilodi. ⁹ Ka tsela eModimo o tsere diruiwa tsa ga rraalona a di nneela. ¹⁰ Nako nngwe ka paka e diphologolo di tsalang ka yone, ka bona mo torong diphoko tse di neng di gwela letsomane. Diphoko e ne e le tse ditilodi, tse dithamaga, le tse dikgweba. ¹¹ Moengele wa Modimo a nthaya mo torong a re, 'Jakoba.' Ka re, 'Ke fano.' ¹² A re, 'Tsholetsa matlho a gago o bone diphoko tse di palamang letsomane. Di dithamaga, ditilodi le bokgweba, gonne ke bone sengwe le sengwe se Labane a se go dirang. ¹³ Ke Modimo wa Bethele, kwa o tloditseng pilara teng, kwa o inkanetseng teng. Jaanong emelela o tswe mo lefatsheng le, o boele kwa lefatsheng le o tsaletsweng mo go lone.''' ¹⁴ Ragele le Lea ba araba ba mo raya ba re, ''A go na le kabelo epe kgotsa boswa jwa rona mo ntlong ya ga rraarona? ¹⁵ A ga a re tseye jaaka batswakwa? Gonne o re rekisitse a bo a ja madi a rona gotlhegotlhe. ¹⁶ Ka jalo dikhumo tsotlhe tse Modimo a di tsereng mo go rraarona jaanong ke tsa rona le bana ba rona. Jaanong , sepe se Modimo a se go boleleltseng, se dire.'' ¹⁷ Foo Jakoba a emelela a pega barwae le basadi ba gagwe mo dikameleng. ¹⁸ A gatelela leruo la gagwe go tsamaya kwa pele ga gagwe, mmogo le dithoto tsotlhe tsa gagwe, a akaretsa leruo le a le bapetseng mo Patane Aramo. Foo a bothologa go ya kwa go Isaka rraagwe kwa lefatsheng la Kanana. ¹⁹ Fa Labane a santse a ile go beola dinku, Ragele a utswa medimo ya gae ya ga rraagwe. ²⁰ Jakoba le ene o ne a tsietsa Labane wa Moaramo, ka go sa mmoleleleng gore o a tsamaya. ²¹ Jalo a tshaba ka tsotlhe tse a nang le tsone mme ka bofefo a kgabaganya noka, mme a tsamaela ntlheng ya lefatshe la dithaba la Gileate. ²² Ka letsatsi la boraro Labane a bolelelwa gore Jakoba o tshabile. ²³ Jalo a tsaya ba lesika la gagwe a mo latela mo moepeleng wa matsatsi a supa. A mo tshwara mo lefatsheng la dithaba la Gileate. ²⁴ Jaanong Modimo a tla kwa go Labane wa Moaramena mo torong bosigo a mo raya a re, ''Ela tlhoko gore o bua le Jakoba molemo kgotsa bosula.'' ²⁵ Labane a tshwara Jakoba. Jaanong Jakoba o ne a tlhomile tente mo lefatsheng la dithaba. Labane le ene a kampa le ba lesika la gagwe mo lefatsheng la dithaba la Gileate. ²⁶ Labane a raya Jakoba a re, ''O dirileng, mo o ntsieditseng wa bo wa tsaya barwadiake jaaka magolegwa a ntwa? ²⁷ Ke eng o tshabile mo sephiring mme wa se ka wa mpolelela? Ke ka bo ke go laetse ka boipelo le dipina, ka meropana le diharepa. ²⁸ Ga o a ntetlelela go atla bana banake le barwadiake ke ba laela. Jaanong o dirile boeleele. ²⁹ Go mo thateng ya me gore ke go utlwise botlhoko, mme Modimo wa ga rraago o buile le nna bosigo jo bo fetileng a re, 'Ela tlhoko gore o bua le Jakoba molemo kgotsa bosula.' ³⁰ Jaanong o tsamaile ka gore o tlhoafaletse ntlo ya ga rraago mo go golo. Mme ke eng o utswitse medimo ya me?'' ³¹ Jakoba a araba a raya Labane a re, ''Ka gore ke ne ke boifa ke ne ka akanya gore o tla tsaya barwadio mo go nna ka dikgoka ke ne ka tsamaya mo sephiring. ³² Ope yo o utswitseng medimo ya gago ga a na go tswelela a tshela. Mo bolengteng jwa ba masika a rona, kaya sepe se se mo go nna se e leng sa gago mme o se tsee.'' Gonne Jakoba o ne a sa itse gore Ragele o e utswitse. ³³ Labane a tsena mo tenteng ya ga Jakoba, mo tenteng ya ga Lea, le mo tenteng ya batlhanka ba basadi, mme a se ka a e bona. A tswa mo tenteng ya ga Lea mme a tsena mo tenteng ya ga Ragele. ³⁴ Jaanong Ragele o ne a tsere medimo ya gae, a e tsenya mo saleng ya kamela, mme a nna mo godimo ga yone. Labane a batla mo tenteng yotlhe, mme a se ka a e bona. ³⁵ A raya rraagwe a re, ''O se ka wa tenega, mong wa me, fa ke sa kgone go ema ka dinao fa pele ga gago, gonne ke mo setswalong.'' Jalo o ne a batla mme a se ka a bona medimo ya gae ya gagwe. ³⁶ Jakoba o ne a tenega a bo a nganga le Labane. A mo raya a re, ''Molato wa me ke eng? Boleo jwa me ke eng, mo o ntshetseng morago go le kana? ³⁷ Gonne o batlile mo dithotong tsotlhe tsa me. O bone eng se e leng sa dithoto tsa ntlo ya gago? Se beye fa pele ga ba lesika la rona, gore ba tle ba atlhole fa gare ga bobedi jwa rona. ³⁸ Ke nnile le wena dingwaga tse 20. Dinku tse di namagadi tsa gago le dipodi tsa gago ga di a folotsa, ga ke a ja dikonyana dipe mo matsomaneng. ³⁹ Se se neng se gagotswe ke dibatana ga ke a se tsisa kwa go wena. Boemong jwa moo, ke dirile tatlhegelo ya me. O ne o tlhola o ntlama go duelela seruiwa sengwe le sengwe se timelang, a se utswitswego le bosigo kgotsa se utswitswe motshegare. ⁴⁰ Ke ne ke le foo; mo letsatsing mogote o nja, le serame bosigo; ke tlhoka boroko. ⁴¹ Dingwaga tse 20 tse ke ne ke le mo ntlong ya gago. Ke go bereketse dingwaga tse 14 ke berekela barwadio, le dingwaga tse 6 ke berekela letsomane. O fetotse dituelo tsa me ga lesome. ⁴² Fa e ne e se gore Modimo wa ga rre, Modimo wa ga Aborahama, ene yo Isaka a mmoifang, o ne a na le nna, e le ruri jaanong o ka bo o nthometse gae ke sa tshola sepe. Modimo o bone kgatelelo ya me le ka fa ke berekileng ka thata ka teng, mme a go kgalema bosigo jo bo fetileng.'' ⁴³ Labane a araba a raya Jakoba a re, ''Brwadi ba ke barwadiake, bana ba bana ke bana ba bongwanake, mme matsomane ke matsomane a me. Tsotlhe tse o di bonang ke tsa me. Mme letsatsi leno ke ka direla barwadiake ba eng, kgotsa bana ba ba bone ba ba ba tshotseng? ⁴⁴ Jalo, a re dire kgolagano, wena le nna, mme a e nne bosupi fa gare ga gago le nna.'' ⁴⁵ Jalo Jakoba a tsaya letlapa a le tlhoma go nna pilara. ⁴⁶ Jakoba a raya ba lesika la gagwe a re, ''Kgobokanyang matlapa.'' Jalo ba tsaya matlapa ba dira mokoa. ⁴⁷ Labane a o bitsa Jegara Saha Dutha, mme Jakoba a o bitsa Galeete. ⁴⁸ Labane a re, ''Mokoa o ke mosupi fa gare ga me le wena letsatsi leno.'' Jalo he leina la one ya nna Galeete. ⁴⁹ Gape o bidiwa Misepha, ka gore Labane o ne a re, ''A Modimo a ntebe a bo a go lebe, fa re sa bonane ka matlho. ⁵⁰ Fa o sotla barwadiake, kgotsa o fa o tsaya basadi bape ntleng le barwadiake, ntswa go sena ope yo o nang le rona, bona, Modimo ke mosupi fa gare ga me le wena.'' ⁵¹ Labane a raya Jakoba a re, ''Leba mokoa o, gape leba pilara, e ke e tlhomileng fa gare ga gago le nna. ⁵² Mokoa o ke mosupi, le pilara ke mosupi, wa gore ga ke na go tlolela mokoa o kwa go wena, le gore ga o na gotlolela mokoa o le pilara e kwa go nna, go nkutlwisa botlhoko. ⁵³ A Modimo wa ga Aborahamo, le modimo wa ga Nahore, medimo ya ga rraabone, e atlhole fa gare ga rona.'' Jakoba a ikana ka Poifo ya ga Isaka rraagwe. ⁵⁴ Jakoba a ntsha setlhabelo mo godimo ga thaba mme a bitsa ba lesika la gagwe go ja dijo. Ba ja ba bo ba nna bosigo jotlhe kwa godimo ga thaba. ⁵⁵ Makuku mo mosong Labane a tsoga, a atla bana ba bana ba gagwe le barwadie a bo a ba segofatsa. Foo Labane tsamaya a boela gae.