21
Nu ami mba muine meke rokunene kua ingui ngua haverere ko tjihavero tjouhona embo nda tjangerue pomurungu no kombunda, nda patua notujano hambombari.
2 Nu mba muine omuengeri omunamasa ngua ravaerere neraka romasa amatja, ''Ouani ngua puirua ijoku paturura embo noku kakaturura otujano tua ro?''
3
Nu kapari umue mejuru, poo kombanda jehi, poo kehi jehi ngua jenenene oku paturura embo poo oku resa mu ro.
4
Nu ami mba rira tjinene orondu kape vazerue omundu ngua puiririrue ijoku paturura noku resa mu ro.
5
Nu umue uovanene ua tjere nai ku ami, ''O riri. Tara, Ongejama jomuhoko ua Juuda, Omuze ua Ndaavita, ua kara no ndoneno joku paturura embo noku kakaturura otujano tuaro pouhambombari ua tuo.''
6
Ami mba muna Ondjona ndja kuramene mokati kotjihavero tjouhona, pokati kovinamuinjo vine, no pokati kovanene. Ai munika tjimuna ndja zepirue. Ndjari nozonja hambombari nomeho hambombari, nderi o Zombepo hambombari za Mukuru nda hindua mehi arihe.
7
Nu Eje ue ere nu a toora embo mokunene kua ingui ngua haverere kotjihavero tjouhona.
8
Nu eje tja za noku toora embo, ovinamuinjo imbio vine novanene imba omirongo vivari na vane, ve riuisiririre pomurungu uo Ndjona. Auhe aena ovihumba novijaha vio ngoldo mbie urisirue ovinuke oviua, nderi ozongumbiro zovajapuke va Mukuru.
9
Nu ovo va imburire eimburiro epe: amavetja; Ove ua puirua ijoku toora embo noku kakaturura otujano tua ro.Orondu ove ua zepirue, nu no mbindu Joje Ua randerere Mukuru ovandu oku za komihoko avihe, neraka arihe, novandu avehe noviuana avihe.
10
Nu ove ungura ozombara novapristeri oku karera Mukuru uetu, nu ovo mave kara nouvara kombanda jehi.''
11
Nu ami mba jevajeva, nu e zuu eraka rovaengeri ovengi mba koverere otjihavero tjouhona, novinamuinjo, novanene. Otjivarero tjao tjari otuuondja notuuondja, nomajovi uomajovi,
12
Amavetja nai neraka enene, O Ndjona ndja zepirue ja puirua ijoku jakura omasa, notutumbo, nounongo, noukukutu, nondjozikiro, noujere, nondangero.''
13
Nu ami mba zuvire, otjiutua atjihe tji tjiri mejuru, na kombanda jehi, nokehi jehi, novina mbiri mokuvare, imbi avihe mbiri muvio- amavitja, Kuingui ngua haama ko tjihavero tjouhona nako Ndjona ngape kare ondangero, nondjozikiro, noujere, nouvara aruhe nga aruhe.''
14
Nu ovinamuinjo imbio ovine via tjere, ''Amen!'' Nu ovanene ve riuisiririre pehi nu ave rikotamene Kuje.***