1
Nu Jesu ua kotokere okuza ko Jordan ae ura Ombepo Ondjapuke, na tuarua i jOmbepo Ondjapuke mokuti ongaango,
2
Ka ka rorua i jOmunauvi omajuva omirongo vine. Nu momajuva ngo kena tjina tja rire, nouo tji je ja komaandero, Eje otja tondjara.
3
Nu Omunauvi ua tja ku Je, Ove tjiuri Omuna ua Mukuru pangura eue indi kutja ri rire omboroto.
4
Nu Jesu Ue mu zira amatja, Patjangua kutja, Omundu kena ku hupisiua i jomboroto poruajo, nunguari ije embo ndi ma ri zu ku Mukuru.
5
Nu Omunauvi ue Mu tuara kombanda jondundu onde, nu e Mu raisire omauhonapare aehe uouje moruveze orusupi,
6
Natja ku Je, Ouvara imbui auhe me jandja ku Ove no ujere uauo, orondu ouo ua peua ami na kaani auhe ku mba vanga oku u jandja.
7
Nu Ove tji uerikotamene ku ami, imbi avihe otjinga mavi rire ovioje.
8
Nu Jesu ua zira natja ku je, Konda kongotue jandje Satan, Orondu patjangua, Ove mo rikotamene ku Muhona Mukuru uoje nu Eje erike arire ngu ua karere.
9
Nu ue Mu jeta ko Jerusalem, ne Mu tua ponganda jo Ndemberi, natja ku Je, Tjiuri Omuna ua Mukuru ri umba pehi okuza imba.
10
Orondu patjangua, Eje ua rakiza ovaengeri ve komunda uo Je, oku takamisa Ove;
11
Nu ovo mave ku tjindi momake uao, kutja nangarire moruveze rumue o ha vete ombaze jo Je meue.
12
Nu mezirira Jesu uatja ku je, Kuaza, Kona ku rora ko Muhona Mukuru uoje.
13
Nu omunauvi tja mana omarorero ue, arire tja zapo puje okaruveze okatiti.
Jesu ma njengiua mo Nasaret
14
Jesu ua jarukire momasa uOmbepo ko Galilea, nu ondangu je ja handjaukire motukondua atuhe ongondoroka.
15
Nu Eje ua hongere mo zosinagoge zao, ama hivirikua i avehe.
16
Neje ue ja ko Nasaret ke kurisirua. Nu otja kongaro Je Eje uaja ko sinagoge mesabat nu a sekama oku resa.
17
Neje ua peua embo romuprofete Jesaja. Neje tja paturura embo a munu pona pu pa tjangua nai,
18
Ombepo ja Muhona i ri kombanda jaNdje, orondu Eje ueNdji soporera oku zuvarisa Ombuze Ombua kovasiona. UeNdji hinda oku verukisa imba mba njanjauka omitima, oku hongonona ongutukiro kovahuurua, nokujarurapo oku muna kovapotu, oku kutura ovanavitumbo mba hihamisiua,
19
Nokuzuvarisa ombura jo tjari tja Muhona.
20
Neje ua pata embo a jarura ro komuungure, na haama pehi. Nu omeho ua imba avehe mbari mo sinagoge ja zikirue mu Je.
21
Neje otja uta oku tja nai kuvo, Ndinondi omatjangua inga ja jenenisiua momatui uenu.
22
Nu avehe ve Mu kamburira nave temisiua i jomambo uotjari nguja e piti motjinjo Tje. Nu va tjere, Tjii ingui ka muna ua Josef?
23
Nu Eje uatja nai kuvo, Tjiri mamu je ku ungurisa omuano imbui ku Ami, Nganga riverukisa omuini. Avihe mbi tua zuva kutja via tjitua ko Karpenaum tjita na muno mojenu uina.
24
Nu uatja, Tjiri metja nai kuene, Kapena muprofete ngu jakurua mehi re omuini.
25
Nunguari Me mu raere ouatjiri, Muari ovahepundu ovengi mo Israel momajuva ua Erija, ejuru tjira paterue ozombura ndatu nomieze hamboumue, ondjara onene tji jar i mehi arihe.
26
Nu Erija ka hindirue ku umue uavo, pendje no ko Zerapath kotjihuro tja Sidon, komukazendu nguari omuhepundu.
27
Nu muari ovanalepere ovengi mo Israel moruveze ruomuprofete Erisha, nu kapena umue uavo ngua kohororerue pendje na Naaman Omusirie.
28
Nu avehe imba mbari mo sinagoge, tji va zuvire ovina mbi, va tiro mazenge.
29
Novo va sekamene, nave Mu nakere pendje jotjihuro, nave mu nanene korutjene ruondundu, mumua zikirue tojihuro tjao, kutja ve ke Mu undurire pehi a ka ue ondjendje.
30
Nunguari Eje ua tuurunga mokati kao na toora ondjira je ai.
31
Nu Eje ueja ko Kapernaum otjihuro mo Galilea, nu a hongo vo momajuva ue sabat.
32
Novo va himisirue i imbi mbija hongo, orondu embo Re rari nouvara.
33
Nu mo sinagoge muari omurumendu nguari nombepo jondemone ohakohoke, neje ua urira kombanda neraka enene,
34
Amatja, Hanika na ete, tuna tjike kuena ove, Jesu ua Nasaret. Ove uee kutunjona are? Me tjiua kutja oove une; Ingui Omujapuke ua Mukuru.
35
Nu Jesu ue mu kandaiza, amatja, Muina nu pita Muje. Nu indji ombepo ombi tji jaza noku mu umba mokati kavo, ja pita muje nu ai he mu hihamisa.
36
Nu avehe va himinue, nu ave hungire mokati kao oveni amvetja, Indi enge mbo! Orondu Eje ma kandaiza ozombepo ozombi nomasa nouvara, nu ozo maze piti.
37
Nu omahumgi kuta ku Je jautu zuvako movirongo avihe mongondoroka.
38
Jesu ua sekamene mosinagoge na kahita mondjiuo ja Simon. Nu ina jomukazendu ua Simon ua havererue i jotjindjumba otjizeu, novo ve mu hepura ku Je.
39
Neje u aka kurama posije na kandaiza otjindjumba notjo atji piti mu je. Nu motjimanga eje ua sekama nu autu oku ve ungura.
40
Nambano ejuva tjira toko, avehe imba mbari novavere vomitjise pekepeke ve ve eta ku Je. Neje ua jambeka omake kuvo avehe nu Eve verukisa.
41
Nozombepo ozombi uina za pita movengi, amaze uru, amaze tja, Oove Kriste Omuna ua Mukuru. Neje Ue ze kandaiza ne he ze jandjere oku hungira, orondu ija ze tjiua kutja onguri Kriste.
42
Nu tjipatji Eje ua pita nai ko ngaango. Nu ovimbumba vie Mu pahere na vija ku Je, navi kakatere ku Je kutja aha zapo puvio.
43
Neje uatja nai kuvo, Ami mbaso ku zuvarisa ouhona ua Mukuru kovihuro ovikuao uina, orondu itji otji mba hindirua.
44
Neje ua zuvarisa mozosinagoge za Galilea.