¹ Mombura oitja murongo na ndano joMukesare Tiberius, Pontius Pilatus tjari omuhegemone mo Judea, na Herodes tjari omutetraki ua Galilea, na Filipus omuangu ue tjari omutetraki ua Iturea na mehi ra Trakonitis, na Lisanias tjari omutetraki ua Abilene, ² Annas na Kajafas averi ovapristeri ovanene, embo ra Mukuru reja ku Johanesa omuatje ua Sakaria, mokuti ongaango. ³ Neje ue ere mehi arihe rongondoroka ja Jordan ama zuvarisa ombapitisimo jondanaukiro jomeriverero kondjesiro jomauvi. ⁴ Otja tji patjangua membo romambo ua Jesaja omuprofete, kutja, “Eraka ra umue ngu ma ravaere mongaango, ‘Tuneje ondjira ja Muhona, teremaniseje omirari vie. ⁵ Otjana atjihe matji sirua, nondundu nomuru auhe mau heurirua kehi, nu mbia sotoroka mavi teremanisiua, nomirari viovipundauronde mavi serurua. ⁶ Nonjama aihe mai munu ondjamo ja Mukuru’ ” ⁷ Kuzambo otja tja nai kotjimbumba tji tjeere oku papitisiua ije, “Ndekurona uene jo zonjoka, mua tirisiua ijani oku taura komazenge ngu mae ja. ⁸ Opu muaso kujeta ovihape mbia puira ondanaukiro jomeriverero, nu amu utu oku tja nai momitima vienu, Tuna Abraham otja tate uetu. Orondu tji me tja nai kuene, Mukuru ma jenene oku ungurira Abraham ovanatje pomaue nga. ⁹ Nambano ekuva ra tuua hapo komuze uomiti. Okutja omuti auhe mbu hina kujeta otjihape tjiua opu mau keua, nau umbua momuriro.” ¹⁰ Novandu ve mu pura navetja, “Nambano ngatu tjite vi?” ¹¹ Neje ua zira natja kuvo, Ingui ngu nozondjasa mbari nga jandje ku ingui ngu hina jo. Nu ingui ngu novikuria nga tjite nao uina. ¹² Kuzambo pe ja ovasutise votjisuta tjouhona oku papitisiua, nave tja ku je, “Muhonge ete nga tu tjitevi?” ¹³ Neje uatja kuvo, “Amu sutisa ko oku kapita imba pu mua rakiziua.” ¹⁴ Tjiva ovasorondate uina ve mu pura kutja, “Nu ete ngatu tjite vi?” Neje uatja kuvo, “Amu tjiti otjomasa movandu, poo oku kuminina omundu, nunguari kareje nuhange motjisuta tjenu.” ¹⁵ Nai otja ovandu avehe tji vari nomaundjiro, ovandu avehe otjija ve ripura momitima viao kutja, tjii Johanesa rumue onguri Kriste poo ka je. ¹⁶ Johanesa ua zirire natja kuvo avehe, “Ami tjiri mbi mu papitisa nomeva, nu ingui nguri omunamasa puami me ja, ngu mbi puire noku kutura ozondatua zo zongaku Ze. Eje mee ku mu papitisa nOmbepo Ondjapuke nomuriro. ¹⁷ Eje uno tjisise meke Re, nu ma komborora otjitondero Tje ketupa, na uongere ondui indji ombua mondjiuo Je jombuikiro, nu imbi ovitatu ma njosa nomuriro mbu ha zemi. ¹⁸ Neje ua ronga ovandu kovina ovingi am eve zuvarisire Ombuze Ombua. ¹⁹ Nunguari Herodes ingui omutetraki tja vererue ije mena ra Herodias omukazendu uomuangu ue na mena romaurunde uarue Herodes nga tjitire, ²⁰ Eje ua ueza ouvi mbui kombanda jao aehe, eje ua patera Johanesa mondorongo. ²¹ Nambano ovandu avehe tji vaza noku papitisiua pa kara nai,kutja Jesu uina tjija papisiua, nu ama kumbu, ejuru ra paturuka, ²² Nu Ombepo Ondjapuke ja herukira kombanda Je ai ri mombunikiro jonguti, neraka raza mejuru naritja, “Oove Omuna Uandje omusuverua, mo Ve mbi nondjoroka.” ²³ Nu Jesu uari nozombura mangara ndu maze utu oku kambura omirongo vitatu, ae ri omuna ua Josef (otja kouripura uovandu), omuna ua Heli, ²⁴ Omuna ua Matat, omuna ua Levi omuna ua Melki omuna ua Jana omuna ua Josef ²⁵ Omuna ua Matatias omuna ua Amos omuna ua Naum omuna ua Esli omuna ua Nangai ²⁶ Omuna ua Maat omuna ua Matatias omuna ua Semei omuna ua Josef omuna ua Juda ²⁷ Omuna ua Johannes omuna ua Resa omuna ua Zorobabel omuna ua Salatiel omuna ua Neri ²⁸ Omuna ua Melki omuna ua Adi omuna ua Kosam onuna ua Elmodam omuna ua Er ²⁹ Omuna ua Joses omuna ua Eliezer omuna ua Jorim omuna ua Matat omuna ua Levi ³⁰ Omuna ua Simeon omuna ua Juda omuna ua Josef omuna ua Jonan omuna ua Eliakim ³¹ Omuna uaMeleas omuna ua Menan omuna ua Matata omuna ua Natan omuna ua David ³² Omuna ua Jese omuna ua Obed omuna ua Boas omuna ua Salmon omuna ua Nahason ³³ Omuna ua Aminadab omuna ua Aram omuna ua Esrom omuna ua Fares omuna ua Juda ³⁴ Omuna ua Jakob omuna ua Isaak omuna ua Abraham omuna ua Tara omuna ua Nahor ³⁵ Omuna ua Saruk omuna ua Ragau omuna ua Falek omuna ua Heber omuna ua Sala ³⁶ Omuna ua Kainan omuna ua Arfaksad omuna ua Sem omuna ua Noa omuna ua Lamek ³⁷ Omuna ua Metusala omuna ua Enok omuna ua Jared omuna ua Maleleel omuna ua Kainan ³⁸ Omuna ua Enos omuna ua Set omuna ua Adam ngua ri ua Mukuru.