1
Nu momajuva ngena, kua zire embo erajero komukesare Augustus, kutja ouje auhe utjangue omana.
2
Nomatjangero inga omatenga ja tjitua Kirenius tja ri omuhegemone mo Sirie.
3
Navehe vaja okukeritjangisa, auhe kotjihuro the omuini.
4
Josef uina uaza ko Galilea, motjihuro tja Nasaret, nai ko Judea, kotjihuro tja David, tji tja rukua Bethlehem,orondu tja zire mondjiuo na morukuato rua David.
5
Uaja ngo Okukatjangua puena Maria, omukazendu ue omuvareka, nguari otjingundi.
6
Nu ngunda averi ngo, omajuva arire tjija jenene uokutja a panduke omuatje uee.
7
Neje ua panduka omuzandu otjiveri tje, nemu manga mozonguju, narire the mu rareke metemba ndi risirua ovitumbua, orondu tji pe ha ri noruveze mondjiuo jovaenda.
8
Nu morukondo rue hi otjingeruo, muari ovarise mba tjeverere otupanda tuao outuku.
9
Omuengeri ua Muhona ua raukira kuvo, noujere ua Muhona ue ve koverere nondjerera. Novo arire tjiva uruma tjinene.
10
No omuengeri ua tjere kuvo, ''A mu tira, orondu mbe mu jetere ombuze ombua jondjoroka onene, ndji mai ja kovandu avehe.
11
Ndino mua kuaterua Omujame motjihuro tja David! Nguri Kriste Omuhona!
12
Nu itji matji rire otjiraisiro kuene, mamu ka vaza okanatje kuka mangua mozonguju kuka rarekua metemba ndi risirua ovitumbua.
13
Nu tjimanga pa munikire otjimbumba otjinene tje juru puena omuengeri, amatji tanga Mukuru, amatji tja,
14
Oujere ku Mukuru mokombandambanda, nohange mouje, noupue movandu.
15
Nu pa kara nai, kutja otja imba ovaengeri tjiva zire puvo nu ave jaruka mejuru, ovarise arire tji va hejasana nai, Nambano ngatu jende ko Betlehem tu ka mune otjina tji tjitja tjitua, itji Muhona tja tjivisa kuete.
16
Novo veja mohakahana nave vaza Maria, na Josef nokanatje kuka rara metemba ndi risirua ovitumbua.
17
Novo tji ve kemunu, arire tjiva zuvarisa porutjandja imbi mbi va raerua komunda uokanatje nga.
18
Navehe imba mba zuva, va himisiua ijo vina mbi va raererue i jovarise.
19
Nunguari Maria ua takamisa omambo inga ne ripura nauo momutima ue.
20
Novarise va jarukire, amave hivirike noku tangera Mukuru ovina vihe mbi va zuvire, noku muna, otja imba pu va raererue.
21
Nomajuva hambondatu tji ja jenennisiua kutja okanatje ke sukarekue, ena Re arire tjira rukua Jesu, nda rukirue i jomuengeri ngunda ae hija zezengua motjikuatero.
22
Nu omajuva uokukohororua tji ja za noku jenenisiua otja koveta ja Mose, ove ve Mu jeta ko Jerusalem oku Mu jandja ku Mukuru;
23
Otja tji patjangua moveta ja Muhona,''Otjitume atjihe tji tja paturura otjikuatero matji isaneua otjijapuke tja Muhona,''
24
Noku ka jandja ombunguhiro otja ku imba pupa heua moveta ja Muhona,''ozonguti mbari poo ovititipongona vivari.''
25
Nu tara, muari nomurumendu mo Jerusalem, uena ra Simeon, nu omurumendu tjingeje ngui uari omutakame aeno ndira, ngua undjire omahekununino ua Israel, Nu Ombepo Ondjapuke jari kombanda je.
26
Nu pa tjivisirue kuje no Ombepo Ondjapuke kutja kanaa koka ndgunda ae hija muna Kriste ua Muhona.
27
Neje ua jeterue ijOmbepo kondemberi. Nu ovakuate tjiva jeta okanatje Jesu, oku tjita otja kombazu joveta,
28
Indino otja toora okanatje momaoko ue, nu a tanga Mukuru natja,
29
Nambano jandjera omukarere uoje oku kaenda mohange, otja kembo roje,
30
Orondu omeho uandje tjija munu ondjamo joje,
31
Ndji ua tunina pomurungu uovandu avehe;
32
Ondjerera oku jerisa Oviuana viozonganda, oujere uovandu voje Israel.
33
Nu ihe na ina va himisirue ijovina mbi mbia hungirirue ohunga na Je.
34
Nu Simeon ueve sera ondaja natja ku ina Maria, ''Tara, omuatje ngui ua zikirua omauiro nomajeuriro uo vandu ovengi mo Israel; noku rira otjisasanekero tjima tji pataneua;
35
Nengaruvio mari tuurunga omuinjo uoje omuini uina, kutja ouripura uomitima omingi u horoke.
36
Omuprofete uena ra, Ana, omusuko ua Fanuel, ue tundu ra Aser. Eje ua hupire ozombura ozengi; neje ua karere ozombura hambombari puena omurumendu ue okuza kousuko ue.
37
Neje uari omuhepundu uozombura omirongo hambondatu na ine, ngu ja ha piti mondemberi, ae karera Muhona noku ritjaera kovikuria na mongumbiro outuku nomutenja.
38
Neje uina ueja moruveze otjingeruo na tanga Muhona, nu a hungire ohunga na Je kuimba avehe mba undjire oku randururua mo Jerusalem.
39
Novo tji va mana oku tjita ovina avihe otja koveta ja Muhona, va jaruka ko Galilea kotjihuro tjao tja Nasaret.
40
Nu ingui omuatje ue kura, a hara omasa, eurisiua nounongo. Notjari tja Muhona tjari puna Je.
41
Nu ovakuate ve ija vei ko Jerusalem ombura nombura komukandi uo Marurumino.
42
Nu tjari nozombura omurongo na mbari, vaja ko Jerusalem otja komuhingo uo Mukandi.
43
Nu tjiva jenenisa omajuva, tjija ve jaruka, omuatje Jesu ua seua ko Jerusalem; Ovakuate ve ave hina kutjiua.
44
Nunguari ovo, va kaenda oujenda uoure uejuva, amave tjangovasi uri mokati kotjimbumba; nu otji va jaruka oku Mu paha movazamumue novatjiuasane.
45
Novo tjive he Mu muine, va jaruka ko Jerusalem, ave otisa o ku Mu paha naua ingo.
46
Nu pa kara nai, kutja kombunda jomajuva jetatu ve Mu vaza mondemberi, aa haama mokati ovahonge, ame ze puratene noku ze pura omapurira.
47
Nu avehe mbe mu zuvire va temisirue ijo mapangununino ue nomaziriro ue.
48
Novo tjive mu muna arire tjiva himua, ina uatja ku Je, Muatje, onguae tji ue tu tjiti nai? Tara, iho na ami tue Ku pahere nomihihamuatima.
49
Neje uatja kuvo, Ene muari ama mu ndji pahere tjike? Kamuna ku tjiua kutja mbaso ku pendapara moviungura via Tate.
50
Novo kave pangununineko indembo nda hungirire kuvo.
51
Nu Otja jaruka konganda punavo ko Nasaret, na kara nonduviro kuvo: Ina ua takamisire ovina mbi avihe momutima ue.
52
Nu Jesu ue kura mozondunge na momuseka, na mokusuverua i Mukuru novandu.