¹ Neje tji ma kapita a rire tja munu omundu ngua kuatua omupotu. ² Novahongeua Ve ve Mu purire, amave tja, Muhonge, Ouani ngua katuka, omurumendu ingui poo ovakuate ve, eje tja kuatua omupotu? ³ Jesu Ua zira, Naingui omurumendu ingui poo imba ovakuate ve, kapena ngua katuka, nunguari okutja oviungura via Mukuru vi raisirue mu je. ⁴ Ami mbasokuungura oviungura via Ingui ngue Ndji hinda ngunda a kuri omutenja. Ongurova ma i ja auhe ndje hina ku sora okuungura mu jo. ⁵ Ngunda A mbiri mouje, Ouami ondjerera jouje. ⁶ Eje tja za nokuhungira nai Ua tjekera pehi, Na ungura orunoko nomate, Na sopora omeho uomurumendu ingui omupotu norunoko, ⁷ Na tja ku je, Kaende, u ke rikohe merindi ra Siloam, (tji pa tanaurua okutja, Tumua). Eje otja kaenda nekerikoha, na kotoka ama munu. ⁸ Ovararanganda, na imba mbe mu muine hapo kutja omupotu, otji va tja, Ingui kaje ingui ngu ja haama na ningire oviousiona. ⁹ Tjiva va tjere, Ongurije. Varue va tjere, U asana ku je. Eje ua tjere, Ouami. ¹⁰ Ovo otji va tja ku je, Omeho uo je ja patururua vi? ¹¹ Eje ua zira Na tja, Omurumendu ngu isaneua Jesu, Ua ungura omunoko, Na sopora omeho uandje, Na tja, Kaende kerindi ra Siloam nu kerikohe. Nami ei ne kerikoha ne jakura okumuna. ¹² Novo otji va tja ku je, Eje u pi? Eje atja, Hina ku tjiua. ¹³ Novo va tuara Kovafarisei ingui hapo ngua ri omupotu. ¹⁴ Nu jar i ejuva resabata Jesu tja ungura orunoko Na paturura omeho ue. ¹⁵ Kuzambo Ovafarisei uina ve mu pura kutja ua jakura vi okumuna. Eje ua tja kuvo, Ua tua omunoko momeho uandje, name e rikoho nu me munu. ¹⁶ Novafarisei tjiva otji va tja, Omurumendu ingui ka ua MUkuru, orondu ka Japura esabata. Ovakuao va tja, Omundu omurunde ma ungura vi ovihimise otja imbio? Nu mua kara omahanikiro mokati kavo. ¹⁷ Ovo va tja nai rukuao komurumendu ingui omupotu, Ove motjavi ohunga na Je, Eje tjinga a paturura omeho uo je? Eje atja, Omuprofete. ¹⁸ Nunguari Ovajuuta kave itaverere ohunga na je, kutja uari omupotu, na jakura okumuna, nga tji va isana ovakuate va ingui ngua jakura okumuna. ¹⁹ Novo ve ve pura, amave tja, Ingui omuna ue nu ngu mamu tja ua kuatua omupotu? Nambano ma muu vi nai? ²⁰ Ovakuate ve ve zira nave tja, Matu tjiua kutja ingui omuna uetu, nokutja eje ua kuatua omupotu. ²¹ Nunguari kutja eje ma munu vi nai, ka tuna ku tjiua. Poo kutja ouani ngua paturura omeho ue, ka tuna ku tjiua. Eje ue kura, mu puree. Eje me ri hungirire. ²² Ovakuate va hungira omambo nga orondu ovo ija ve tira Ovajuuta, orondu Ovajuuta va zuvasanene hapo kutja auhe ngua hongonona kutja Jesu o Kriste, ma rambua mosinagoge. ²³ Ovakuate ve opuvazokutja, eje ue kura, mu puree. ²⁴ Ovo otji va isana omurumendu ingui ngua ri omupotu rukuao, nave tja ku je, Jandja oujere ku Mukuru. Matu tjiua kutja omurumendu ingui omurunde. ²⁵ Eje ua zira Na tja, Kutja omurunde poo, hina ku tjiua. Otjina tjimue tji me tjiua okutja mbari omupotu nu nambano me munu. ²⁶ Ovo otji va tja nai ku je rukuao, Eje Ua tjiti vi kove? Ua paturura vi omeho uo je? ²⁷ Eje u eve zira, na tja, Ami mbe mu raere hapo nu kamu zuvire. Onguae tji mamu vanga okupuratena rukuao. Mamu zeri okurira ovahongeua ve uina? ²⁸ Ovo otji ve mu hungira omambo omavi nave tja, Oove omuhongeua Ue; nunguari ouete ovahongeua va Mose. ²⁹ Matu tjiua oukahu kutja Mukuru ua hungira kuena Mose, nunguari otja ku ingui omurumendu ngui, katu muii kaza. ³⁰ Omurumendu ua zira na tja nai kuvo, Pena otjihimise mu itji, kutja ene kamuna kujtiua kutja Eje ua za pi, nu Eje ua paturura omeho uandje. ³¹ Nambano matu tjiua kutja Mukuru ka puratene ovarunde, nunguari omundu tje tira Mukuru, nu the tjita ombango je, Eje U mu zuvira. ³² Nganda ouje a ua utire, kapeja zuvaka kutja omundu umue ua patururire omeho ua umue ngua kuatua omupotu. ³³ Andaku omurumendu ngui ka ua Mukuru, ka tja tjita otjina. ³⁴ Ovo va zira nave tja ku je, Ove ua kuaterua mouvi auhe, nu motu hongo. Novo ve mu nakera pendje. ³⁵ Jesu Ua zuva kutja ve mu nakere pendje, nu Tje mu vaza Ua tja ku je, Ove u itavera mo Muna ua Mukuru. ³⁶ Eje ua zira na tja, Eje ouani, Muhona, Ami mbi itavere mu Je? ³⁷ Nu Jesu Ua tja ku je, Ove ue Mu munu, nu Eje ongu ma hungire kuena ove. ³⁸ Neje ua tja, Ami me itavere. Neje ue rikotamena ku Je. . ³⁹ Nu Jesu Ua tja, Ami mbe jera ombanguriro mouje, kutja imba mbe ha munu ve mune, nokutja imba mbe muna ve potupare. ⁴⁰ Nu tjiva vo Vafarisei mbaripuena Je, va zuva omambo inga nave tja ku Je, Ouete ovapotu uina? ⁴¹ Jesu Ua tja nai kuvo, Andaku ouene ovapotu, ka tja mu kara nouvi. Nunguari mokutja mamu tja, tu muna ouvi uenu ouvi uenu otji u ri po.