1
Nunguari Jesu Ua ja kondundu jomininga.
2
Nu muhuka omunene Eje ue ja rukuao mondemberi, novandu avehe ave ja ku Je, nu Eje Ua haama pehi nu E ve hongo.
3
Novatjange nOvafarisei, va ete ku Je omukazendu ngua kamburua ama katuka orukupo, nu tji vaza nokumukuramisa pokati,
4
Ave tja ku Je, Muhonge, omukazendu ingui ua vazeua ama katuka korukupo, mo tjiungura tja po otjini.
5
Nambano Mose moveta ue tu pangurire kutja, vasokuvetua omaue. Nunguari Ove Mo tjavi?
6
Va hungirire nai, okumurora, kutja nani mave munu ezeva rokumuvara omunandjo. Nunguari Jesu Ue rikota, nu A tjanga mehi nomunue Ue, aajo tjimuna kena ku ve zuva.
7
Novo otji ve ha kuramisire okumupura, nu Eje Ua tumunuka osemba, Na tja nai kuvo, Ingui ngu hina uvi mokati kenu nge mu ube eue etenga.
8
Nu Eje Ue rikota rukuao Na tjanga mehi.
9
Nu imba mba zuva, va vererue ijourizemburuka uao, nave piti koumueumue, okuza komunene nga kouomaandero. Nu Jesu Ua seerue peke puena omukazendu ngua tuiirue pokati.
10
Nu Jesu tja tumunuka osemba, Na ha munu uarue pendje nomukazendu, Eje Ua tja ku je, Mukazendu, imba ovekuvare vondjo ve pi? Kapena mundu ngue ku pangura?
11
Neje ua tja, Kepo Muhona. Nu Jesu Ua tja ku je, Na Ami hina kuku pangura. Kaende nu okakatuka rukuao.
12
Nu Jesu Ua hungira rukuao kuvo, amatja, Ouami Ondjerera jouje. Ingui ngu Me Ndji kongorere kanaa kaenda mondorera, nunguari ma kara nondjerera johupo.
13
Novafarisei otji va tja nai ku Je, Mo ri hatoire omuini, ouhatoi uo Je ka uatjiri.
14
Jesu Ua zira Na tja kuvo, Noondi Me rihatoire omuini, ouhatoi Uandje ouatjiri, orondu Ami Me tjiua ku Mba za na ku Me i. Nunguari ene kamuna ku tjiua ku Mba za na ku Me i.
15
Ene mu pangura otja konjama. Ami hina ngu mbi pangura.
16
Nunguari nangarire tji Mba pangura, ombanguriro Jandje ouatjiri, orondu Hi rip eke, nunguari Ouami na ingui Tate ngue Ndji hinda.
17
Nu moveta jenu pa tjangua kutja, ouhatoi uovandu vevari ouatjiri.
18
Ami Ouami ngu Me rihaoire, nu ingui ngue Ndji hinda, ingui Tate, U hatoira ohunga na Ami.
19
Nu otji va tja nai ku Je, Iho u ri pi? Jesu Ua zira, Ene kamu tjiua Ami poo Tate. Andaku mue Ndji tjiua, otji tja mu tjiua Tate uina.
20
Jesu Ua hungiririre omambo inga mombuikiro, Ama hongo mondemberi, nu kapena umue ngue Mu kamburire orondu oruveze Rur tjandje ngunda karu je ja.
21
Jesu Ua tja nai kuvo rukuao, Ami Me i. Nene mamu je ku Ndji paha. Nu mamu je ku tira mouvi uenu. Ku Me i, ene kamuna ku ja ko,kujako.
22
Novajuuta otji va tja, Tjii Eje Me Ri zepa, tjinga ama tja, Ku Me i, ene kamuna ku ja ko.
23
Nu Eje Ua tja nai kuvo, ene muaza kehi; Ami mba za kombanda. Ene mua za mouje mbui; Ami Hi zire mouje mbui.
24
Opu Mba tjere mamu tire momauvi uenu. Orondu tji mu hina ku itavera kutja OUAMI, mamu tire momauvi uenu.
25
Novo otji va tja ku Je, Oove une? Nu Jesu Ua tja kuvo, Ingui ngu mbe mu raera okuaz kombutiro.
26
Mbi novina ovingi okuhungira nokupangura ene muvio, Nunguari ingui ngue Ndji hinda Eje ouatjiri, nu Mbi hungira kouje ovina imbi mbi mba zuvire mu Je.
27
Novo kave pangununine kutja Eje ua hungirire kuvo ohunga na ingui Tate.
28
Nu Jesu otja tja nai kuvo, Tji mua zu nokujera Omuna Uomundu, otji mamu je ku tjiua kutja OUAMI, nokutja Hi tjiti otjina kuami omuin, nunguari otja Tate Tje Ndji hongere, toji Mbi hungira ovina mbi.
29
Ingui ngue Ndji hinda u ri puena Ami. Ingui Tate Ke Ndje sire peke, orondu Ami aruhe Mbi ungura ovina mbi mu tjatera.
30
Eje tji ja hungire omambo inga ovengi va kamburire mu Je.
31
Nu Jesu otja tja Kovajuuta imba mba itavera mu Je, Ene tji mua pandere Pembo Randje, ouene ovahongeua vandje tjiri.
32
Nu mamu tjiua ouatjiri, nouatjiri au mu kutura.
33
Ovo ve Mu zira, Ouete ondui ja Abraham, nu katuna pu tuari momapando ua rive. Mo heje vi kutja, matu kuturua.
34
Jesu Ue ve zira, Tjiri, tjiri, Me tja nai kuene, Auhe ngu hupa ohupo jouvi otjitikiha tjouvi.
35
Notjitikiha katji karerere mondjiuo, nunguari omuna u karerera.
36
Nu Omuna Tje mu kutura mamu kutuka katjootjiri.
37
Me tjiua kutja ouene ondui ja Abraham, nunguari mamu vanga okundjizepa orondu Embo Randje ka ri na ruveze muene.
38
Ami Mbi hungira mbi Mba muna puena Tate, nene, otji muasokutjita imbi mbi mua muna puena iho.
39
Ovo va zira nave tja ku Je, Abraham o Tate uetu. Jesu Ue ve zira, Andaku ouene ovanatje va Abraham itja mu ungura oviungura via Abraham.
40
Nunguari nambano mamu paha okundjizepa, omurumendu ngue mu raera ouatjiri mbu Mba zuva mene ra Tate. Abraham ka tja tjita nai.
41
Mu tjita ovitjitua via iho. Ovo otji va tja nai ku Je, Ete ka tu kuatererue moruvakiro. Tuna tate umue uriri, nguri Mukuru.
42
Jesu Ua tja kuvo, Andaku Mukuru o iho, itja mu Ndji suvera, orondu Ami mba pita, Ame zu mu Mukuru; orondu Ami Hi ri jererere omuini, nunguari Eje Ue Ndji hinda.
43
Nu onguae tji mu ha pangununa okuhungira Kuandje? O mokutja kamu jenene okuzuva omambo Uandje.
44
Ouene ovaiho Saatana, nozonduma za iho ondu mu tjita. Eje uari omuzepe okuza kombutiro, neje ka karere mouatjiri orondu kamuna uatjiri mu je. Tjima hungire otjizeze, u hungira okuza mu je omuini, orondu eje omuna vizeze, nonguri ihe javio.
45
Nu mokutja Me mu raere ouatjiri, kamuna ku itavera mu Ami.
46
Ouani mkati kenu ngu me Ndji varura ouvi? Nu tji Me hungire ouatjiri, onguae tji mu hina ku itavera Ami.
47
Ingui ngu ri oua Mukuru u zuva omambo ua Mukuru. Nunguari ene tji mu heje zuu, o mokutja kauene ova Mukuru.
48
Indino Ovajuuta ve Mu zirire nave tja ku Je, Katu hungire osemba tji tu tja Oove Omusamaria nu u nombepo ombi are?
49
Jesu Ua zira, Hina mbepo ombi, nunguari Mba jozika Tate, nunguari ene mu Ndji tengurura.
50
Nu Ami hi paha oujere Uandje omuini, nunguari pena Umue Ngu u paha nu Ngu pangura.
51
Tjiri, tjiri, Me tja nai kuene, Omundu tja takamisa Embo Randje kanaa munu ondiro.
52
Nu Ovajuuta otji va tja ku Je, Nambano matu tjiua kutja u nombepo ombi. Abraham novaprofete va ta, nu Ove mo tja, Omundu tja takamisa Embo Randje, eje kanaa roro ondiro.
53
Ove ua kapita Tate Abraham ngua ta? Novaprofete va ta; mokondjo okuriungura omukendu?
54
Jesu Ua zira, Tji Me ri jerisa omuini, oujere Uandje ka tjina; o Tate ngu jerisa Ami, ingui ngu mamu tja onguri Mukuru uenu.
55
Noo ndi mu he Mu tjivirue, nunguari Ami Mbi muii. Nu tji Mba tja hi Muii, Me rire omunavizeze tjimuna ene. Nunguari Ami Mbi Muii nu Mbi takamisa Embo Re.
56
Iho Abraham ua jorokerere okumuna ejuva Randje, ne ri munu, na tjaterua
57
Ovajuuta otji va tja ku Je, Ngunda ko ja kambura ozombura omirongo vitano, nu Ove Ua muna Abraham?
58
Jesu Ua tja nai kuvo, Tjiri, tjiri, Me raere ene, Ngunda Abraham ae hija kara ko, OUAMI!
59
Ovo otji va toora omaue okumuveta. Nunguari Jesu ua tara Na piti mondemberi, A tuurunga mokati kao Na kapita.