1
Kombunda jovina imbi Jesu ua riangere mo Galilea, orondu tji ja ha jenene oku rianga mo Judea mena rokutja Ovajuuta ija ve zeri oku mu zepa.
2
Nambano omukandi uOvajuuta uo viranda uari popezu.
3
Nu ovamuangu ve va tjere nai ku Je, Sekama imba nu u jende koJudea, kutja ovahongeua voje ovo uina ve ka mune oviungura mbi u tjita.
4
Orondu kapena mundu ngu horeka oviungura vie nu eje ama zeri oku tjiukua porutjandja. Ove riraisa omuini kouje orondu u ungura ovina imbi.
5
Orondu na imba ovamuangu ve kaa ve itavere muje.
6
Indino Jesu uatja nai kuvo, Oruveze ruandje karuje ja: nunguari oruveze ruenu ru kara arua tumbuka aruhe.
7
Ouje kanaa u mu njengua: nunguari u njengua Ami orondu ami mbi hongonona komunda uauo, kutja oviungura viauo ovirunde.
8
Ene tuendee komukandi imbui: Ami hina ku jenda komukandi imbui nai orondu oruveze ruandje karuja jenenisiua.
9
Tjaza nokuhungira omambo inga kuvo, Eje arire tja kara pehi mo Galilea.
10
Nunguari ovamuangu ve tji vazu noku jenda, Eje uina arire tja sekama oku jenda komukandi; nu Eje ka kaendere porutjandja nunguari kaenda ame rihoreke.
11
Ovajuuta ve mu pahere momukandi nu avetja, Eje u ri pi?
12
Nu pa kara omazumazumino tjinene komunda Ue mokati kovandu, tjiva ama vetja Eje omundu omuua: ovakuao ama vetja, aje kako, Eje u pukisa ovandu.
13
Nunguari kapena mundu ngua hungirire komunda Ue porutjandje mena rokutira Ovajuuta.
14
Nambano pokati komukandi Jesu arire tjai kondemberi nu a hongo.
15
Nu Ovajuuta va himinue nu ave tja, Omurumendu ingui ondjiviro jomambo ue ji isapi, je a e ha hongerue?
16
Jesu ue ve zira nu atja, Okuhonga kuandje, ka kuandje, nunguari okua ingui ngue ndji hinda.
17
Auhe ngu ma ungura ombango je, eje meje ku tjiua okuhonga ingui kutja okua Mukuru poo mbi ri hungirira oveni.
18
Ingui ngu me rihungirire omuini tjandje me ri pahere ondjozikiro: nunguari ingui ngu ma pahere ingui ngue mu hinda ondjozikiro, eje omuna uatjiri, nu kamuna ouhasemba muje.
19
Mose ke mu pere oveta are? Nu na tji peri nao kapena umue mokati kenu ngu takamisa oveta. Onguae tji mamu zeri oku ndji zepa?
20
Ovandu va zira nu avetja, ove ua huurua ijombepo ombi: ouani ngu ma zeri oku kuzepa?
21
Jesu ua zira nua atja nai kuvo, Ami mba ungura otjiungura tjimue nu ene amuhe amu himua.
22
Mose ue mu pere omasukarekero (nangarire tji je ha zire ku Mose nunguari koo iho;) nu ene mesabata mu sukarisa omurumendu.
23
Nu omundu the jenena okusakarisiua mesabata, kutja oveta ja Mose ai ha katukua, onguae tji mue ndji pindikire mokutja Ami mesabata mba verukisa orutu ruomundu aruhe?
24
Amu pangura otja kombunikiro nunguari pangureje nozombanguriro ozosemba.
25
Indino venue va imba ova Jerusalem va tjere, Tjii ingui kaje ingui ngu mave zeri oku zepa?
26
Nu tara, ma hungire pomurungu uo vandu, nu kavena tji mave hungire ku Je. Poo rumue ovanane mave tjiua naua kutja ingui Eje Kriste katjootjiri.
27
Nunguari ete matu tjiua omurumendu ingui ka za: nu ingui Kriste tji meja kapena ngu ma tjiua Eje ku ma zu.
28
Nu Jesu otja ravaera mondemberi otja tjija hongo, nu atja, Ene ma mu Ndji tjiua nu rukuao mama tjiua kutja mba za pi; nunguari Ami hi rijetere omuini, Ingui ngue ndji hinda eje ouatjiri nu ene ka mu muii.
29
Nunguari Ami Mbi muii, orondu Mbaza ku Je, nu Eje Ue Ndji hinda.
30
Novo va zerire okumukambura, nunguari kapena ngua tuako omake ku Je, orondu oruveze Rue ngunda tjandje ka ru je ja.
31
Novengi vovandu va itaverere mu Je, nave tja, Ingui Kriste tji me ja meje ku ungura ovihimise okukapita imbi omurumendu ingui Mbia ungura.
32
Ovafarisei va zuvire kutja ovandu ija ve hokora ovina mbiri nai ohunga na Je. Novafarisei novapristeri ovanene va hindire ovaungure vo veta kutja v eke Mu kambure.
33
Nu Jesu otja tja nai kuvo, Okaruveze okasupi ngunda Mbiri puena ene, nu kuzambo Mei ku ingui ngue Ndji hinda.
34
Ene mamu je ku Ndji paha namu he Ndji munu. Nu kumbiri ene kanaa mu ja.
35
Novajuuta otji va tjere nai mokati kavo oveni, Eje u ri poo kujenda pi ete ku tu hina ku Mu muna? Eje uri poo ku jenda Komarimbarero Movahirika, nokukahonga Ovahirika?
36
Omambo jene inga ngu Ma hungire, Mamu je ku Ndji paha nu kamuna ku je ku Ndji muna, nu ku Mbiri, kamuna ku ja.
37
Mejuva romaandero, ejuva indi enene romukandi, Jesu Ua sekama, Na tja nai neraka enene, Omundu auhe ngu nonjota, ngeje ku Ami eje kunua.
38
Ingui ngu ma itavere mu Ami, otja omatjangua pu ja tjere, okuza mezumo re mamu pupu ozondondu zomeja omanamuinjo.
39
(Nunguari Eje ija hungire itji ohunga Nombepo, Indji imba mba itavera mu Je Ndji va sere okujakura, Orondu Ombepo Ondjapuke tjandje ngunda ka I ja jandjeua, orondu tjandje Jesu ngunda Ke ja jerisiua.
40
Novengi vovandu tjiva zuva omambo inga otji va tja, Tjiri ingui eje Omuprofete.
41
Varue va tja, Ingui o Kriste. Nunguari tjiva va tja, Kriste uasokuza mo Galilea?
42
Omatjangua ka je tjere, Kriste mazu mondui ja David, namo tjihuro tja Bethlehem David ma ri?
43
Nu otji pa kara omahanikiro mokati kovandu mena Re.Litv
44
Tjiva muvo va vangere okumukambura, nu kapena mundu ngua tuire omake ku Je.
45
Novaungure vo veta otji veja kovapristeri ovanene Novafarisei. Novo va tja kuvo, Onguae tji mu he Mu jetere?
46
Ovaungure voveta va zira, Kapena mundu ngua hungirire otja omurumendu ingui.
47
Novafarisei otji ve ve zira, Ene uina kamu pukisirue nai?
48
Pena umue uovanane poo uo Vafarisei ngua itaverere mu Je?
49
Nunguari ovandu imba mbe ha tjiua oveta imba va sengua.
50
Nikodemus ua tja nai kuvo, (ingui ngueja ku Jesu ongurova, nguari umue uavo),
51
Tjii oveta jetu i pangura omundu ngunda ai hije mu zuva, nokutjiua tje ungura?
52
Ovo va zira nave tja nai ku je, Ove uina oove o ua Galilea? Paha nu u mune, kutja kapena muprofete nguza ko Galilea.
53
Nomundu auhe uaja kondjiuo je omuini.