1
Tjiri, tjiri Me tja nai kuene, Ingui ngu hina ku hitira pomuvero uotjunda tjozondu, nunguari ngu ma rondere mo nondjira jarue, ingo erunga nomupunde.
2
Nunguari ingui ngu ma hitire momuvero onguri omurise uozondu.
3
Omutjaere uopomuvero u mu jezururira, nozondu ze zuva eraka re, neje u isana ozondu ze omuini komana, neze hongorere pendje.
4
Nu tja pitisa ozondu ze omuini, u ze hongorera, nozondu a ze mu kongorere, orondu ze tjiua eraka re.
5
Nomundu ngu ze hei, kazena ku kongorera nunguari maze tupuka naze zupo puje, orondu kaze tjiua omaraka uovandu mbu ze hei.
6
Jesu ua serekarera otjisasanekero tji kuvo, novo kave pangununine ovina Mbi ja serekarere kuvo.
7
Jesu otja tja nai kuvo, Tjiri, tjiri, Me tja nai kuene, Ouami omuvero uozondu.
8
Avehe mbe ere komurungu Uandje omarunga novapunde, nunguari ozondu ka z eve zuvire.
9
Ouami omujero. Auhe ngu ma hitire mu Ami, eje ma jamua, nu ma hiti moukoto noku pita pendje, na munu omario.
10
Erunga ka ri ja pendje, nokujera okuvavaka, nokuzepa, nokunjona. Ami Mbe jera kutja ve mune omuinjo, nu ve kare nauo kouingi.
11
Ouami omurise omuua. Omurise omuua u jandjera ozondu ze omuinjo ue.
12
Nunguari omukutua, ngu heri omurise, ngu heri omuni uozondu, u muna ombungu ama ija, na jesa ozondu na tupuka. Nombungu mai ze kamburra nai piza ozondu.
13
Omukutua u tupuka mokutja eje omukutua, nu kena konatja nozondu.
14
Ouami omurise omuua, nu Mbi tjiua ozondu Zandje, nu Mbi tjiukua I inda o Zandje.
15
Otja Tate Tje Ndji tjiua Ami uina otji Mbi Mu tjiua, nu Me jandjere ozondu omuinjo Uandje.
16
Nu Mbi na ozondu ozonguao nde heri ozotjunda tji. Mba sokuzehonorera uina, nu mazeje ku zuva eraka Randje. Nu mazeje ku rira orupanda rumue nomurise umue.
17
Nu Tate Otje Ndji suvera, orondu Me jandja omuinjo Uandje, kutja Mbi u toore rukuao.
18
Kapena mundu ngu u toora mu Ami, nunguari Mbi u jandja mombango Jandje. Mbi nouvara uoku u jandja, nu Mbinouvara uoku u toora rukuao. Etuako ndi Mbe riakura ku Tate.
19
Pa kara omahanikiro rukuao pokati Kovajuuta mena romambo inga.
20
Novengi vavo va tjere, U nombepo ombi, nu ua puruka. Mamu Mu puratenene tjike?
21
Ovakuao va tja, Inga ka mambo uomundu nguna ombepo ombi. Tjii ombepo ombi mai jenene okupaturura omeho uovapotu?
22
Nu jari Kojerusalema, momukandi Uomajandjero, nu kuari okupepera.
23
Nu Jesu ua riangere mondemberi Moruhito rua Solomon.
24
Novajuuta otji veja nave Mu kondoroka, nave tja, Mo tu ivaivisa ngapi, tji uri Kriste tu raera ongahukiro.
25
Jesu Ue ve zira, Ami Mbe mu raera, nu kamu itaverere. Oviungura Mbi Mbi ungura mena ra Tate, vi hatoirira Ami.
26
Nunguari kamu itavere, orondu kauene vemue vozondu Zandje. Otja tji mba hungire kuene,
27
Ozondu Zandje ze zuva eraka Randje, nu Ami Mbi zei, nu ze kongorera Ami.
28
Nu Ami Mbi zepa omuinjo uaaruhe, nozo kanaa ze pandjara ko, nu kapena umue ngu me ze pora meke Randje.
29
Tate ngue ze jandja ku Ami Ua kapita avihe, nu kapena umue nguma jenene okuzepora meke ra Tate.
30
Ami na Tate ouete umue.
31
Ovajuuta otji va toora omaue rikuao okumuveta.
32
Jesu Ue ve zira, Mbe mu raisira oviungura ovingi oviua okuza ku Tate; otjiungura tjine muvio tji mamu Ndji vetere nomaue.
33
Ovajuuta ve Mu zira, amave tja, Katuna ku ku vetera otjiungura otjiua nomaue, nunguari omena, rokujamburura Mukuru, orondu ove auri omundu, mo ri isapo Mukuru.
34
Jesu Ue ve zira, Kape tjangerue, moveta jenu, Mba tja, Ouene oomukuru.
35
Eje Tje ve isanene oomukuru imba embo ra Mukuru ku rejere, nomatjangua kanaa je tejeua,
36
Mamu tja nai ku ingui Mukuru ngua Japura na hindi mouje, Ove Mo jamburura Mukuru, mokutja Mba tja Ouami Omuna ua Mukuru.
37
Tji Mbi ha ungura oviungura via Tate, amu itavere Ami.
38
Nunguari tji Mbi vi ungura, nangarire tji mu hina ku itavera Ami, itavereje oviungura kutja mu tjiue nu mu itavere kutja Tate U ri mu Ami, nu Ami Mbiri mu Je.
39
Ovo otji va vangere rukuao okumukambura, nu Eje ua heza momake uao.
40
Nu Eje ua ja rukuao hembandina ja Jordan koruveze indui Johanesa ka papitisira rutenga, nu Eje A ka kara mbo.
41
Novengi veja ku Je nave tja, Johanesa tjiri kena tjihimise tja tjitire, nunguari ovina ahihe mbia hungirire ohunga nomurumendu ingui viari ouatjiri.
42
Novengi va itavera mu Je ingo.