¹ Nu Petrusa na Johanesa ngunda amave hungire kuena o vandu, ovapristeri no munane uo ndemberi no vasadukai va raukira kombanda jao. ² Tjinga va hihamisirue katjiri i jo kutja i Petrusa na Johanesa ija ve hongo ovandu noku hongonona ombendukiro mo vakoke mu Jesu. ³ Novo va tua omake uao kuvo, nave ve tua kehi jo ndjeverero nga kejuva e pendukirua, orondu tjandji ra toko hapo. ⁴ Nunguari imba ovengi vo vandu mba zuva Embo va itavera; no tjivarero tjo varumendu tjari mangara omajovi jetano. ⁵ Nu pa kara nai me pendukirua, kutja o vanane vao, no vanene, no vatjange va uoronganena ko Jerusalema. ⁶ Na Anasa o mupristeri o munene uari mbo, na Kaipasa, na Johanesa, na Aleksandera, na imba avehe mbari omuhoko uo mupristeri o munene. ⁷ Novo tji vaza mo ku kuramisa Petrusa na Johanesa pokati kao, ve ve pura,''O mo masa ene, nu o mena ra une, mu mua tji tji?'' ⁸ Nu Petrusa ngue urisirue I jo Mbepo o Ndjapuke, ua tja kuvo, Vanane vo vandu, no vanene, ⁹ Tji matu kondononua ndino motjimbe tjo tjina o tjiua tji tja ungurirua o muremane, kutja eje ua verukisiua mo muano une, ¹⁰ Ngaku tjiukue ku ene amuhe, nako vandu avehe va Isiraera kutja omurumendu ngui ngua kurama po murungu uenu aeri omupuisiua mena ra Jesu Kristu ua Nasareta, ngu mua papera ko tjikoroise, nu Mukuru ngua pendura mo vakoke. ¹¹ Jesu Kristu Eje Eue enene ovatunge ndi mua vara e hina hepero, nu Eje ua rira o Tjiuru tjo mauaneno uo tjikoro. ¹² Nu uina kapena ndjamo mo mundu uarue o mukuao, orondu kapena ena rarue nda jandjua kehi jejuru movandu ndi matu munu mo o ndjamo.'' ¹³ Nunguari ovo tjiva muna ouvande ua Petrusa na Johanesa, nu ave munu kutja ovandu uriri, ovo vari o varumendu mbe hina omahongero, ovo va himua, novo ve ve zemburuka, kutja vari puena Jesu. ¹⁴ Novo tjinga muna o murumendu ingui ngua verukisiua aa kurama puena vo, va urua o jo ku pimba embo mu itji. ¹⁵ Novo tji vaza noku heja Ovaapostolo kutja ngave pite mo mbungarero jo unanane, ve hungira mokati kao. ¹⁶ Amave tja, ''Ngatu tjite vi no varumendu mba? Orondu kutja otjihimise otjinandengu tja tjitua ivo, nu itji matji ri raisa ku kaani auhe ngua tura mu Jerusalema, nuka tuno oku jenena oku patana. ¹⁷ Nunguari kutja atji ha handjaukire ko murungu mo vandu, ngatu ve tirise tjinene, kutja ngaa ve uhuara amave hungire rukuao nangarire komundu umue mena ra Jesu. ¹⁸ Novo ve ve isana, nave ve pangura kutja ngaa ve hungire poo oku honga mena ra Jesu kaparukaze. ¹⁹ Nunguari Petrusa na Johanesa va zira nave tja kuvo, ''Tjeri kutja o kokuua po murungu ua Mukuru oku zuva ku ene oku kapita ku Je, ri pangurireje oveni. ²⁰ Orondu ete kanaa tu serekarere tjarue, pendje ja imbi mbi tua muna noku zuva.'' ²¹ Novo tji vaza noku tirisa Petrusa na Johanesa rukuao, ve ve sa nave kaenda.Ovo tjinga va urirue ijo ku muna ezeva ro ku ve vera, motjimbe tjo kutja ovandu avehe ijave hivirikire Mukuru mu itji tji tja tjitua. ²² Orondu o murumendu ingui o tjihimise tji tjo mberukiro mu tja tjitua uari kombanda jo zombura o mirongo vine. ²³ Novo tji vaza noku kuturua, Petrusa na Johanesa vaja kovandu vao oveni, na rire tjiva ka horora avihe imbi o vapristeri o vanene mbi va hungirire kuvo. ²⁴ Novo tji va zuva tji, va jerera o maraka uao ku Mukuru mo nduvasaneno imue, nave tja, ''Muhona, Ove ngu Ua mema ejuru nehi, no kuvare, na imbi avihe mbiri muvio. ²⁵ Ngu U hungira no Mbepo o ndjapuke no tjinjo tjo mukarere Uoje, tate uetu David, ''Onguae oviuana tji via handja, no vandu tji ve ripura no vina vio ujova?'' ²⁶ Uatja, 'Ozombara zehi za sekama, novanane va uongarera kumue oku pirukira Muhona, noku pirukira Kristu Ue.' ²⁷ Orondu tjiri, Heroda na Pontius Pilatusa, no viuana no vandu va Israela va uongarera kumue oku pirura o muatje Uoje o mujapuke Jesu, ngu Ua sopora, ²⁸ Oku tjita atjihe eke Roje no Uripura Uoje, tjiua tandere komeho kutja tji tjitue. ²⁹ Nu Nambano, Muhona, tara o matirisiro uao, nu U jandje ko vakarere Voje kutja ve hungire Embo Roje no uvande auhe. ³⁰ Nokutja U njotororere eke Roje okuverukisa noku jandja o vikaneno no vihimise, vi tjitue mena ro muatje Uoje o mujapuke Jesu Kristu. ³¹ Novo tji va za noku kumba oruveze pu va uongarerere arire tji rua njinganjingisiua no masa, novo ave urisiua no Mbepo o Ndjapuke, nave zuvarisa Embo ra Muhona noku hina ndira. ³² No tjimbumba tja imba mba itaverere tjari otjo mutima umue, no muinjo umue. Nu kapena umue ngu ja tja ovina mbia tumbire ovie omuini, nunguari ovina viao avihe via ri o viao avehe. ³³ Nu nomasa omanene ovahongeua va jandjere ouhatoi ko mbendukiro ja Muhona Jesu, no otjari o tjinene tjari kombanda jao avehe. ³⁴ Nu uina ka pari umue mokati kao nguari no uhepe, orondu imba mbari no mahi no zondjiuo va randisire mbi, nave jeta ondengu jo vina mbi va randisa ³⁵ nave vi tua pehi po zombaze zo vaapostolo, nu ijavi haneua ku auhe otja ko uhepe ue. ³⁶ Nu Joses, ngua isanenue ijo vaapostele Barnabas (tji mape tanaurua o kutja, o muna mazeuparisiro), o Mulevi, ngua kuaterua ko Siprus, ³⁷ Ua randisire ehi nda ri naro, na jeta ovimariva viaro, nevi tua pehi po zombaze zo vaapostolo.