¹ Me zeri kutja mu ndji jandjere o ujova katiti, nunguari tjiri, ndji jandjeree. ² Orondu mbina o ukoze kombanda jenu no ukoze ua Mukuru: ami tjinga a mbe mu varekisa ko Murumendu umue, oku mu jandja ku Kriste otjo musukona ngu hija rara pueena o varumendu. ³ Nunguari otji mbi na o mburuma jokutja ngahino mo muano umue, otja indji o njoka tji ja pukisire Eva no vineja viajo, uina o zondunge zenu otji maze tundiua amu poka ko ukohoke mbu ri mu Kriste. ⁴ Orondu tjiri, tji pe ja umue ngu ma zuvarisa Jesu uarue, ngu tu ha zuvarisire, poo tji mua jakura o mbepo jarue ndji mu ha jakurire, poo o mbuze jarue ndji mu hina mua jakurire, mu jandjera uriri o vina mbi. ⁵ Orondu ami hi rivara kutja mbi ri kehi mu tjimue jo vaapostele imba vo kombanda. ⁶ Nu nangarire kutja hi sorere oku hungira, kape ri nao mo ndjiviro, nunguari mba raisiua ku ene o ngahukiro mo vina avihe. ⁷ Poo mba tjitire o uvi noku risusuparisa tji mba zuvarisire o Mbuze o Mbua ja Mukuru kuene noku hina tjisuta kutja ene mu tongamisiue? ⁸ Mba punda o zokereka zarue noku jakura o visuta kuzo kutja mbi vatere ene. ⁹ Nu tji mbar i pueena ene a mbi hina tjina, hina ndi mba tuire o uzeu ko mundu: orondu atjihe tji je hepa o vakuetu imbo va Makedonia ija ve ndjipe. Movina avihe mbe ritjaerere kutja mbi jandje o uzeu kuene, nu mo muano imbo otji me ritakamisa. ¹⁰ Otja Kriste tje ri mu ami, kapena mundu ngu me ndji tjaere ko merihiviro nga mo makondua ua Akaija. ¹¹ Onguae? O mena rokutja hi mu suverere poo? Mukuru ma tjiua. ¹² Nunguari tji me tjiti, itjo me tjiti, kutja mbi konde o ruveze ku imba mbu mave paha o ruveze ruo hiviro, kutja ve munike otja ete mu imbi mbi ve rihiva na vio. ¹³ Orondu imba o vaapostele vo vizeze, o vatjite vo matiku mbe ri tanaura oveni oku rira o vaapostele va Kriste. ¹⁴ Nu ka tjihimise, orondu Saatana o muini u ritanaura oku rira o mujengeri uo ndjerera. ¹⁵ Otji tji heri o tjina o tjinene kutja o vakarere ve ve ritanaure otja o vakarere vo usemba; mbrir kutja o ndjandero jao mai kara otja ko viungura viao. ¹⁶ Me tja nai rukuao, Ape ningi o mundu ngu me ripura kutja ouami ejova. Nunguari tji pe he ri nao, ndji jakuree otja ejova, kutja mbi jenene oku rihiva katiti uina. ¹⁷ Itji tji me hungire hina ku hungira oku za ku Muhona, nunguari otjo mo ujova, mo uvande uo ku ritanga mbui. ¹⁸ Ovengi otja tji ve rihiva otja ko njama, ami uina otjinga a me rihivi. ¹⁹ Orondu ene jari o tjimu jandjera o majova, ene tjinga mu ri o zonongo. ²⁰ Orondu mu nanena o mundu tji me mu tua mo upandekua, o mundu tji me mu ninaura, o mundu tji me mu jeka, o mundu tji me ritongamisa, o mundu tji me mu tono mo murungu. ²¹ Itji me hungirire mo honi, tjimuna tu kara o vehinamasa, nunguari auhe pu ma rorere (me hungire tji mo ujova), ami uina me rorere. ²² O Vaheperi are? Ami uina. O Vaisirael are? Ami uina. Ovo o vondui ja Abraham are? Ami uina. ²³ Ovo o vakarere va Kriste are? (Me hungire otja o muvere uo mo ukoto) Ami mbe ve kapita; moku ungura mbe ve kapita, mo zongora zo matoneno mbi ri kombanda jo tjisanekero, moku umbua mo ndorongo mbi ri ko murungu, mo zondiro o potuingi. ²⁴ O Vajuuta ve ndji tona o zongora o mirongo vitatu na muviu po tutano. ²⁵ Mba tonua no zonguinja po tutatu, tjikando tjimue mba turua no maue, po tutatu mba kara mo maumba uo viskepi, mba kara o mutenja umue no utuku mo ukoto uo meja. ²⁶ Mba kara mo maujenda po tuingi, mo maumba mo meja, mo maumba uo vapunde, mo maumba uo tjiuana tjandje, mo maumba ua imba o voviuana, mo maumba mo tjihuro, mo maumba mo ngaango, mo maumba mo kuvare, mo maumba mokati ko vakambure vovizeze, ²⁷ Mba kara mo ngondjero neputi moku kara katumba po tutuingi, mo ndjara na mo njota; potuingi ame ritjaere ko vikuria, mo zombepera na mo muzu. ²⁸ Pendje no vina mbi mbi ndji ruisa ama vi zu pendje pena o ngendo jo ndjeverero jo zokereka azehe. ²⁹ O muhinamasa o uani, ami hi muhinamasa. O uani ngu putarisiua, nu ami e ha pindike? ³⁰ Tji ku ri oku samba oku rihiva, me rihivi no vina vio ungundi uandje. ³¹ Ingui Mukuru nu Ihe jo Muhona uetu Jesu Kriste, ngua serua o ndaja aruhe nga aruhe, ma tjiua kutja hina ku kora o vizeze. ³² Ko Damaskus ingui o munane nguari kehi jo mbara Aretas ua zikire o vatjevere mo tjihuro eje tjinga a vangere oku tuako o make kombanda jandje. ³³ Mba herurirua mo ruiho ruo rumbo ruo maue mo tjimbamba nu e pona mo make uao nu e hene.