¹ Nambano ami, Paulus, me rijarikana kuene no ukozu no unjanutima ua Kriste, ami tji mbiri puna ene ngu mbi rira o mutarazu nu tji mbiri kokure ngu mbi rira o mbande ku ene, ² Nunguari me ningire, ngunda ambi he ri po, kutja mbi kare no uvande no upatje mbu me ripura oku kara nao ku imba mbe ripura kutja ete tu kaenda otja ko njama. ³ Orondu nangarire tji tu kaenda mo njama ka tu ru otja ko njama: ⁴ Orondu o viumbe vio vita vietu ka vio njama, nunguari o vinamasa mu Mukuru oku uisira o vitunga pehi, ⁵ Oku vanda pehi o mauripura, no tjina tjo kombanda atjihe tji ma tji ritongamisire oku pirukira o ndiviro ja Mukuru, nu ku jeta o uripura auhe kehi jo uhuura uo nduviro ku Kriste, ⁶ Noku kara no merirongerero uoku jeta ko mberero o uhazuva auhe, o nduviro jenu tji ja jenenisiua. ⁷ Mu tara mo vina otja ko mbunikiro ja vio are? Tji pena umue ngue riraera kutja eje o ua Kriste, nge ripure na itji rukuao ku je omuini, kutja otja indi eje tje ri o ua Kriste, ete uina o tji tu ri o va Kriste. ⁸ Nu nangarire uina ami tji mbe rihivi oku ura no uvara uatu (Muhona mbue tu pera oku tunga ku ku heri oku mu hana), hi nee zepaisiua ohoni; ⁹ Kutja e ha sana tjimuna ngu me mu tirisa no zombapira. ¹⁰ Ovo tjinga ave tja, o zombapira ze zena o haveha nu o zondeu, nunguari tje ri mokati ketu o muhinamasa, nu oku hungira kue oku jaukise. ¹¹ Ingui ngu ri nao nga ripure na itji, kutja otja tji turi membo ro zombapira, atu he ri po, uina o tjinga ama tu je ku kara mo vitjitua tji tu ri pueena ene. ¹² Orondu ete kanaa tu roro natu risasaneke kueena imba mbe rivara o haveha ku vo oveni, nunguari ovo otja tji ve risaneka mokati kavo oveni, nave risasaneke kuvo oveni, ka zonongo. ¹³ Nuguari katuna ku rihiva oku kapita o maenenisiro, nunguari matu rihivi otja ko maenenisiro uo muhingo Mukuru mbua jandja ku ete, oku vaza nga kuene uina. ¹⁴ Orondu ka tu ri uonjonona oku kapita tjimuna mbu tu hina ku vaza kuene, ete tjinga tue ja kuene mo Mbuze o Mbua ja Kriste, ¹⁵ Atu hina ku rihiva tjinene mo tjiungura tjo vakuetu, nunguari atu na o maundjiro, uo kutja o ngamburiro jenu tji je kuru, matu humbururua ijene tjinene otja ko maenenisiro nga tji tua tikatika otja ko tjisanekero tjetu, ¹⁶ Kutja tu zuvarise o Mbuze o Mbua [ko makondua nge ri] munda mbuina na ene, nu kutja atu he rihivi no vina mbia ungurua ijo mundu uarue hapo ¹⁷ Nunguari ngu me rihivi nge rihive mu Muhona. ¹⁸ Orondu kaje ingui ngu me rivara ku je o muini ngu ma jakurua, nunguari eje ingui ngu mavarua I Mukuru.