¹ Ja̧hua̧nö̧ ja̧'a̧mä̧, ttö̧ja̧'i̧sa̧mä̧ pä'äjita'nö ȩpi̧nä̧cu̧sä̧ Dios ö̧jo̧de doächäcuähuome, juorömä Dios ö̧jo̧dȩ dȩa̧ttö̧ cuäomettö̧ ajiya ppöreina isodettömä ka̧hua̧ räopacuttö, Dios ö̧jo̧de pä̧tȩcuä̧nö̧mä̧ ka̧hua̧ räopacumä to̧ä̧ri̧na̧ ja'acu, ja̧hua̧nö̧ ja̧'a̧mä̧ ajiyamä ppöreina Dios ö̧jo̧de kä̧hua̧ ö̧huo̧ja̧'a̧cu̧ttö̧, kuicu iyäcuomettö u̧huo̧jua̧'a̧cu̧. ² Ja̧hua̧nö̧ ja̧'a̧ttö̧mä̧, ja̧u̧mä̧ ȩpi̧nä̧cu̧sä̧ kä̧hua̧ u̧huo̧jua̧'a̧cu̧ ja̧hua̧nö̧ ja̧'a̧mä̧ ka̧hua̧ räopa jäyänä ȩpi̧nä̧cu̧sä̧, jua̧nä̧ttö̧mä̧ ajiyamä ppöreina ka̧hua̧ ieruhuacu jäyä apatettö. ³ Ttö̧ja̧'i̧sa̧ ka̧hua̧ räopacuttö i̧'cha̧nä̧mä̧, isappä pa̧ja̧cuä̧ppä ku̧npri̧nö̧ u̧mu̧nä̧; ja̧u̧mä̧ ttu̧chu̧'ca̧ri̧ milnö jo̧mȩ pa̧ja̧ti̧nö̧ ja̧hua̧ta̧'a̧nö̧ icähicnäcusä̧ yukoroya ajiya ja̧hua̧ta̧'a̧nö̧ koroya ajiya cuä̧o̧pä̧rö̧ tusä'cä̧tȩ jo̧mȩ täcuoyanä. ⁴ Ja̧hua̧nö̧ ja̧'a̧mä̧, ja̧u̧mä̧ ttu̧chu̧'ca̧ri̧ milnö jo̧mȩ pa̧ja̧ti̧nö̧ pä'äji ta'anö ja̧hua̧ta̧'a̧nö̧ ȩpi̧nä̧cu̧ ajiya koroya ajiyanä chihue'ca rärecuome jo̧mȩnä̧ täcunä; ja̧u̧mä̧ koro milnö ttu̧chu̧'ca̧ri̧ jo̧mȩ pa̧ja̧tö̧ ȩpi̧nä̧cu̧sä̧ ajiyara̧'a̧ chäcäjobu täcunä. ⁵ Ja̧u̧nu̧ o'ca'amä pä'äjita'anö ttu̧cu̧'ca̧ri̧ milnö jo̧mȩ pa̧ja̧ti̧nö̧, ja̧hua̧nö̧ ja̧'a̧nä̧ aje ji̧na̧ ttömä chijähua pä'ö jo̧coto ajiyamä täcuina'a huottanö pä'ö jo̧mȩnä̧, aje käcuähuä juiyönä jo̧to ji̧na̧'a̧. ⁶ Ttö̧ja̧'i̧sa̧mä̧ päinäcu̧sä̧: "ttö̧ja̧'i̧sa̧ i̧tti̧, ¿Pi̧yȩ topöjä tä̧ji̧?" ja̧u̧mä̧ u̧mi̧cu̧ icächö aje jäyänä chucutä huetäyunä jȩi̧nä̧cu̧sä̧. ⁷ Ppa̧'ä̧chö̧cä̧nö̧ chi̧'cho̧mȩnä̧, juorö aje jäyotottömä dau röä̧nä̧ ka̧cui̧na̧'a̧ jäyänä ja̧hua̧ta̧'a̧nö̧ kara jäyänä'inä. ⁸ ttö̧ja̧'i̧sa̧mä̧ päinäcu̧sä̧: "Poya ajiyamä ka̧hua̧ räopa'acuttö'inä, Arabá rȩjȩttö̧'i̧nä̧ dȩa̧ttö̧'i̧nä̧ räopoto; poya ajiyamä Dubora A̧'cua̧rö̧ juiyotocu siäcuattömä tti jö̧nä̧ jä̧hua̧'a̧. ⁹ Isotö ajenä huoätö a̧cuä̧rä̧tö̧mä̧ ttö̧ja̧cuä̧cuo̧tö̧di̧ aje sia pätecu huo'ätömä; po̧i̧ rö̧ä̧nä̧ ttö̧ja̧tö̧, poya ajiyamä jua'acu siattö. Ajiya sa̧no̧yamä adiu tti jö̧nä̧ jä̧cua̧'a̧. O'catoinä ttö̧ja̧cuo̧tö̧ aje siacu päteö. ¹⁰ Ja̧hua̧nö̧ ja̧'a̧ttö̧, Gadi po̧i̧ 'choähuä ttö̧ja̧mä̧ aje ttö̧ri̧jä̧cuo̧tö̧, ja̧hua̧ta̧'a̧nö̧ po̧i̧ huo̧cuä̧sa̧ jottepa pä'ö Eglaimnä kä̧cua̧'a̧. Po̧i̧ pä̧cuä̧ri̧ju̧nä̧ recuätö ttö̧ja̧cuo̧tö̧ dubora A̧'cua̧rä̧tö̧ to'otonämä, aje röotänä po̧i̧ ttirecuechanö pa̧ja̧cuä̧ juiyönä. ¹¹ Ja̧hua̧nö̧ ja̧'nä̧ dubora A̧cua̧rö̧ juiyotottömä 'cärisä'inä, retäcua'inämä ttinä juochiyäcua'a, ja̧u̧mä̧ 'cäruhuäbö räopa pä'ö jö̧hua̧'a̧. ¹² Poto aje jäyoto jäyänämä, pätecu jäyänämä, dauhuiyä o'cajuiyö jähuä ba'u u̧huä̧ju̧ ichäcua'a. Ojiyämä hua'ö ihuiyäcua ja̧hua̧ta̧'a̧nö̧ u̧huä̧ju̧mä̧ bautä kä̧cua̧'a̧. Ka̧hua̧ jö̧ta̧'a̧nö̧ dauhuiyämä u̧huä̧ju̧ ichäcua, ajiyamä suroju huiyodettö siattö jua'acu. U̧huä̧ju̧mä̧ ttucua'a pä'ö jä̧cua̧'a̧, ja̧hua̧ta̧'nö̧ ojiyämä märiyä jahuapö jä̧hua̧'a̧. ¹³ TÖ̧Ä̧NÄ̧HUA̧MÄ̧ Diosmä pa̧'a̧nö̧ pä'ö: Pa̧'a̧nö̧ jö̧nä̧ jä̧cua̧'a̧tó cui̧'cä̧chä̧cua̧mä̧ docenö huotö Israel ttö̧ja̧römä: Josemä todäre jo̧mȩ jä̧cua̧'a̧. ¹⁴ Ucumä ttö pa̧'a̧nö̧ jä̧cua̧ pätinomettö̧ topö 'cä̧huȩpä̧cua̧jä̧, chu̧mu̧ teätönö, jä'orö cuiyajä̧. Pi̧jä̧ rȩjȩmä̧ ucuturu iyäcuiäcua ttiya pättinö pä̧tȩcuä̧yö̧nä̧. ¹⁵ Pa̧'a̧nö̧ jä̧cua̧'a̧ ka̧hua̧ u̧huo̧jua̧cu̧ bȩi̧pä̧ro̧mȩmä̧ Aje röotoju kä̧mä̧dö̧mä̧ Hetlón jubö kä'ätö, ja̧u̧nu̧ o'camä Zedad jubö. ¹⁶ Ja̧u̧nu̧ o'camä Berotattö pȩi̧bä̧rä̧cua̧, Sibraimra̧'a̧cu̧ttö̧i̧nä̧, Damasco'inä Hamat'inä kä'co ka̧'a̧mä̧, ja̧u̧nu̧ o'ca'amä Hazar Haticónra'acu, Haurán jäyä pei̧pä̧ro̧mȩcu̧. ¹⁷ Ja̧hua̧nö̧ ja̧'a̧ttö̧, pȩi̧pä̧ro̧mȩmä̧ Hazar Enán aje röotottö kä̧mä̧dö̧ Damasco'inä Hamat rȩjȩ pȩi̧pä̧ro̧mȩ ka̧hua̧ ö̧huo̧jua̧'a̧cu̧. Pa̧'a̧nö̧ jä̧cua̧ ka̧hua̧ ö̧huo̧jua̧'a̧cu̧mä̧ ¹⁸ Kä̧hua̧ räopacuttömä, Haurán'inä Damasco'inättö̧, ja̧hua̧ta̧'a̧nö̧ Galaad kä'co 'inä, ja̧hua̧ta̧'a̧nö̧ Israel ttö̧rȩjä̧mä̧ Jordan ajecu kä̧cuä̧jä̧. Ucumä juȩnȩ rȩjȩ pȩi̧pä̧ro̧mȩcu̧ttö̧ kä̧mä̧dö̧ aje röoto ka̧hua̧ räopacuttö; pi̧jä̧ jä̧ttä̧yä̧jä̧mä̧ ka̧hua̧ räopacu rȩjȩ pȩi̧pä̧ro̧mȩ jä̧cua̧. ¹⁹ Ja̧u̧nnu̧ o'camä ka̧hua̧ ieruhuacu jä̧cua̧'a̧, Tamar ka̧hua̧ ieruhuacuttö kä̧mä̧dö̧ Meriba Cades rȩjȩra̧'a̧cu̧, Egipto aje ä̧u̧cuo̧to̧ räopa'acuttömä Aje Röotora̧'a̧cu̧, ka̧hua̧ ieruhuacumä ka̧hua̧ ieruhuacutä. ²⁰ Ja̧u̧nu̧ o'camä, kä̧hua̧ mo̧ä̧cha̧'a̧cu̧ pȩi̧pä̧ro̧mȩmä̧ Aje Röotottömä Lebo Hamat'ra'acu. Pa̧'a̧nö̧ jä̧cua̧'a̧ ka̧hua̧ mo̧ä̧cha̧'a̧cu̧mä̧. ²¹ Pa̧'a̧nä̧ jö̧nä̧, ucumä 'cä̧chö̧ cui̧chä̧cua̧jä̧ ucuturutä ja̧'a̧tȩu̧, Israel ahuaruhuä o'cotörömä. ²² Ja̧hua̧nö̧ ja̧'a̧ttö̧ ucumä cui̧yä̧'chä̧cua̧jä̧ jitörötä pä̧tȩtö̧ iyäcuiome ucuturutä ja̧'a̧tȩu̧ ja̧hua̧ta̧'a̧nö̧ iyäcuähuotö ucutucutä ka̧cuä̧tö̧rö̧'i̧nä̧, jitö ucututäcu kä̧nö̧ tti̧tti̧cuä̧rö̧'i̧nä̧ jahuätömä titö ja̧'a̧ttö̧, ucucutä, Israel ttö̧ja̧sa̧ jönä ucubächinö. Ucutumä rö̧ä̧nä̧ cuiyäcuotöjä Israel ttö̧ja̧ ttö̧'cä̧tȩttö̧mä̧. ²³ Ja̧hua̧nö̧ ja̧'a̧ttö̧, 'cuäopäcua i̧yä̧cuä̧hua̧mä̧ ö̧jä̧cua̧ Israel ahuäruhuä o'cotöcu ttö̧ja̧cuo̧mȩcu̧. Ucutumä ji̧yȩtȩ ja̧u̧ cuiyätucua'a pä'ö ja̧'a̧. Pi̧yȩ ja̧'a̧ TÖ̧Ä̧NÄ̧HUA̧ Dios pä'ömä.