¹ TÖ̧Ä̧NÄ̧HUA̧ Diosmä pa̧'a̧nö̧ pä'ö: Jacuoju isode isarä, ka̧hua̧ räopa'acuttö pä̧tȩcuä̧nö̧mä̧, seinö mo̧ro̧ ttaditö mo̧ro̧mä̧ chi̧ȩcuä̧ra̧cua̧, ja̧hua̧nö̧ ja̧'a̧nä̧ cuä'ächiu ttö̧jä̧mä̧nö̧ mo̧ro̧mä̧ bahuȩcuä̧rä̧cua̧, ja̧hua̧ta̧'a̧nö̧ kä̧hua̧ ja̧rȩpa̧ räopu mo̧ro̧'i̧nä̧ pa̧huȩcuä̧rä̧cua̧. ² Ru̧hua̧ i̧tti̧mä̧ isode i̧mi̧ aca isode isarä apate kä'cote'inä ja̧hua̧ta̧'a̧nö̧ u̧mi̧nä̧ mi̧ȩcua̧ra̧te'inä ja̧hua̧ta̧'a̧nö̧ ja̧u̧mä̧ u̧jä̧mä̧nä̧cua̧ jäyänä ku̧nä̧huä̧mȩ Diosttö'inä ttö̧ja̧ttö̧'i̧nä̧ käco päteu adicuä ttö̧ja̧ ttöäre kuicu iyäcuä'inä ja̧hua̧ta̧'a̧nö̧ huȩnȩ juiyönä kä̧cuä̧ ja̧'a̧tä̧ iyähuä'inä. Ja̧hua̧nä̧ ja̧'a̧mä̧ ja̧u̧mä̧ jacuojuttö apate huäose jo̧mȩttö̧ ucuo tȩä̧hui̧'ca̧ rä̧o̧pä̧cua̧, ja̧hua̧nö̧ ja̧'a̧nä̧ apatemä yi̧ȩcuä̧chi̧chä̧cua̧ yodoju jubö. ³ Ötahuiyä ttö̧ja̧'i̧nä̧ cuä'ächiäcuähuä mo̧ro̧'i̧nä̧ ja̧hua̧ta̧'a̧nö̧ ka̧hua̧ ja̧rȩpa̧ räopu mo̧ro̧'i̧nä̧ TÖ̧Ä̧NÄ̧HUA̧RÖ̧ ucuo tettähuäcuotö apate doächäcuähuomettö̧. ⁴ Ru̧hua̧ i̧tti̧ cuä'ächiö pä̧cuä̧huä̧ mo̧ro̧ TÖ̧Ä̧NÄ̧HUA̧RÖ̧ kuicu iyähuä iya'a pä'ö jö̧mä̧ seinö oveja i̧tti̧mö̧ suroju juiätöttö'i̧nä̧ ja̧hua̧ta̧'a̧nö̧ oveja buo suroju jui̧'a̧ttö̧'i̧nä̧ jä̧cua̧'a̧. ⁵ Jȩru̧huä̧ oveja i̧tti̧ buocuttömä jicäte ä̧tȩcuo̧mȩ jä̧cua̧'a̧, ja̧hua̧ta̧'a̧nö̧ jȩru̧hu̧ oveja i̧tti̧cu̧mä̧ ttiya'a pättomȩtä̧ jä̧cua̧'a̧, yaute hin aceitettömä jȩru̧huä̧ jicäte jä̧cua̧'a̧. ⁶ Kä̧hua̧ ja̧rȩpa̧ räopu mo̧ro̧mä̧ ja̧u̧mä̧ ä̧ji̧mu̧ttö̧ ya̧tȩ päcäyä ubo suropocöttö 'i̧nä̧, oveja i̧tti̧mö̧ seinö huottö'inä ja̧hua̧ta̧'a̧nö̧ oveja ubo suropocöttö'inä iya'a pä'ö jä̧cua̧'a̧. ⁷ Ja̧u̧mä̧ jȩru̧huä̧ jicäte ä̧tȩcuo̧mȩ iya'a pä'ö jä̧cua̧ päcäyä ubo ä̧tȩcuä̧ ja̧hua̧ta̧'a̧nö̧ jicäte jä̧cua̧ oveja ubo ä̧tȩcuä̧mä̧ ja̧hua̧ta̧'a̧nö̧ yaute hin jo̧mȩ aceitettö jȩru̧huä̧ jicäte ä̧tȩcuä̧mä̧. ⁸ Ru̧hua̧ i̧tti̧ apate mä̧nä̧nä̧'i̧nä̧ ja̧hua̧ta̧'nö̧ u̧mi̧nä̧'i̧nä̧ toächäcuähuome'inä toächomenämä, ja̧u̧mä̧ toächä̧mä̧nä̧tä̧ ppa̧'ä̧chö̧ räopä̧cua̧ kä̧cua̧'a̧. ⁹ Ja̧hua̧nö̧ ja̧'a̧nä̧ pi̧jä̧ kä̧cuä̧tö̧ TÖ̧Ä̧NÄ̧HUA̧ u̧ja̧'a̧cu̧ tti̧'cho̧mȩnä̧mä̧ päcäri hueähuime, ucuo teähua pä'ö apate ka̧hua̧ u̧huo̧jua̧'a̧cu̧ to'ächömä rä̧o̧pä̧cua̧ apate ka̧hua̧ ieröhua'acu ka̧tettö; ja̧hua̧nö̧ ja̧'a̧nä̧ apate ka̧hua̧ ieruhuacu katenä to'ächumä rä̧o̧pä̧cua̧ ka̧hua̧ u̧huo̧jua̧'a̧cu̧ katenä. Ya̧tȩ'i̧nä̧ rä̧o̧pi̧chä̧cua̧ apate toächatenämä, pä̧tȩcuä̧nö̧ jö̧nä̧tä̧ räopa pä̧'ö̧ ja̧'a̧. ¹⁰ Ru̧hua̧ i̧tti̧mä̧ käco päteö u̧ja̧ pä'ö ja̧'a̧; jahuätö jacuocu dottächa'anämä, ja̧u̧mä̧ doächa pä'ö ja̧'a̧, ja̧hua̧ta̧'a̧nö̧ jahuätö rättopa'anämä ja̧u̧nä̧ räopa pä'ö ja̧'a̧. ¹¹ Pä'cärittömä, jȩru̧huä̧ iyähuämä jicäte jȩru̧huä̧ ja̧'a̧ pä'ö ja̧'a̧ päcäyä uborö ja̧'a̧tȩu̧mä̧ ja̧hua̧ta̧'a̧nö̧ oveja buo ä̧tȩcuä̧mä̧ jicäte jä̧cua̧'a̧, ja̧hua̧ta̧'nö̧ oveja i̧tti̧mö̧ttö̧mä̧ ttiya pättome ttiya pä'ö jä̧cua̧. ¹² Ru̧hua̧ i̧tti̧ chutä amöcuädö öäre iyäcuä iyöttömä, kuicu iyäcuätä ja̧'a̧ pä'ö ja̧'a̧ ja̧hua̧ta̧'a̧nö̧ TÖ̧Ä̧NÄ̧HUA̧RÖ̧ huȩnȩ juiyönä jäecuä ja̧'a̧tä̧'i̧nä̧ ttiya pä'ö ja̧'a̧, apate pätecuänö kate pateba'a pä'ö jä̧cua̧'a̧ ja̧u̧ru̧ ja̧'a̧tȩö̧. Ja̧u̧mä̧ öäre kuicu iyähuämä'inä, Diosrö huȩnȩ juiyönä kä̧cuä̧huä̧ jäecuä jö̧ttö̧'i̧nä̧ cuä'ächiö mo̧ro̧ pä̧cuä̧huä̧ jȩttö̧ya̧nö̧ jȩa̧ pä'ö ja̧'a̧. Ja̧u̧nu̧ o'ca, ja̧u̧mä̧ rä̧o̧pa̧cua̧, ja̧hua̧ta̧'a̧nö̧ räope o'camä apate u̧mi̧mä̧ yi̧'ȩpu̧ icuähuäcua. ¹³ Ya'acu iya'a pä'öttömä, ucumä ya̧tȩ oveja i̧tti̧ ayaute a̧'ȩ hua̧ a̧di̧hua̧ttö̧ cuiya'a pä'ö pä̧cuä̧cua̧ TÖ̧Ä̧NÄ̧HUA̧RÖ̧ cuäopönä mo̧ro̧ kuicu cuiya'apä'ö; ucumä pi̧yȩmä̧ jȩcuä̧cua̧jä̧ mo̧ro̧ jö̧ a̧u̧cuä̧. ¹⁴ Pi̧yȩcu̧mä̧ ucumä mo̧ro̧ jö̧ a̧u̧cuä̧ cuiyäcua̧jä̧ jä̧ru̧ä̧ iyäcuä, jicätettö seinö pa̧ja̧cuä̧ jo̧mȩ ja̧hua̧ta̧'a̧nö̧ yaute hin pa̧ja̧cuo̧mȩ huabodäcuä pa̧ja̧cuo̧mȩ jo̧mȩ aceitettömä ya̧mö̧ i̧sa̧ppȩ jihuö TÖ̧Ä̧NÄ̧HUA̧ jȩru̧huä̧ iyähuä jȩtta̧'a̧ pä'ö, jȩtta̧'a̧ pä'ö huettinö ta̧'a̧nö̧tä̧. ¹⁵ Jahuätömä jo̧mȩnö̧ jȩpu̧ ttö̧jö̧nä̧cuo̧tö̧ oveja i̧tti̧rö̧'i̧nä̧, jȩru̧huä̧ iyähuä'inä, ja̧hua̧ta̧'a̧nö̧ a̧dȩ isoya iyähuä mo̧ro̧ jö̧ a̧u̧cuä̧, 'cuäopönä kuicu iyäcuä jä̧cua̧'a̧. ¹⁶ TÖ̧Ä̧NÄ̧HUA̧MÄ̧ Diosmä pa̧'a̧nö̧ pä'ö: ru̧hua̧ i̧tti̧ i̧tti̧mö̧rö̧ mipponä iyäcuä iyöttömä, pi̧yȩ jä̧cua̧'a̧ ja̧u̧ru̧ iyähui̧ä̧cuä̧mä̧. Pomä i̧tti̧mö̧ ttöäretä päiäcua, ji̧yȩtȩ ki̧'ä̧cuä̧mä̧. ¹⁷ Ja̧hua̧nö̧ ja̧'a̧nä̧ ja̧u̧ u̧mu̧ä̧ya̧rö̧ mipponä chutä öäre ichipöttömä, u̧mu̧ä̧ya̧ öäre jä̧cua̧ huettanä u̧jo̧mȩttö̧ räopome jubötä, ja̧u̧nu̧ o'camä pä'äjita'anö ru̧hua̧ i̧tti̧rö̧tä̧ ppa̧huä̧chä̧cua̧. Öäremä jö̧mä̧ i̧tti̧mu̧tä̧ ttöäre kä̧cua̧'a̧. ¹⁸ Ru̧hua̧ i̧tti̧mä̧ ȩmi̧yä̧cua̧ ötahuiyä ttö̧ja̧ ttöäremä; ja̧u̧mä̧ chötä öärettö iya'a pä'ö jä̧cua̧'a̧, chidepiyu ttö̧ja̧ karacu ttipperecuächu juiyäcua'anö, ya̧cu̧nä̧ pö̧nä̧ tta̧mo̧nä̧ ttöärettötä iyätucui. ¹⁹ Ja̧u̧nu̧ o'camä ttö̧ja̧'i̧sa̧mä̧ apate toächäcuähuome Diosttö'inä ttö̧ja̧ttö̧'i̧nä̧ kä'co adicuä ttö̧ja̧ suroju juiätö ttöjacanä cuä'opö ȩpi̧nä̧cu̧sä̧, ka̧cui̧nä̧tö̧ ka̧hua̧ ö̧huo̧jua̧cu̧ pä̧tȩcuä̧nö̧ ja̧hua̧ta̧'a̧nö̧ ¡pȩnȩmä̧! ka̧hua̧ mo̧ä̧cha̧'a̧cu̧ yaute rȩjȩ ki̧na̧'a̧. ²⁰ Ja̧u̧mä̧ päinäcu̧sä̧: "Pȩnȩmä̧ ja̧'a̧ Diosttö'inä ttö̧ja̧ttö̧'i̧nä̧ käco adicuä ttö̧ja̧ micuä ja̧'a̧ ttöäre iyäcuä cuäräönä jȩtta̧'a̧ jo̧mȩmä̧ ja̧hua̧ta̧'nö̧ suroju jȩttȩji̧ ja̧'a̧tä̧ iyäcuä'inä, ja̧hua̧nö̧ ja̧'a̧mä̧ jahuätömä jȩru̧huä̧ iyähuämä ttä̧tta̧'a̧ pä'ö ja̧'a̧. Jahuätömä isode u̧mi̧ aca saränämä ttöäre iyäcuämä tti'cächa'a pä'ö jo̧ca̧'a̧, täcö ötahuiyä ttö̧ja̧mä̧ surojuttö nucähuottö ttö̧ja̧'a̧ttö̧. ²¹ Ja̧u̧nu̧ o'comenä ja̧u̧mä̧ isode u̧mi̧ isarecu oipinä̧cu̧sä̧ , ja̧hua̧nö̧ ja̧'a̧mä̧ ja̧u̧mä̧ juȩnȩ isarä pa̧ja̧nö̧ jäyänä cuä'opu oipäcumä ttömä topinösä̧ ya'acunä jäyämä isarä ka̧cui̧na̧'a̧. ²² Pa̧ja̧cuä̧nö̧ isarä u̧mi̧ jäyänämä̧ ppo̧'ö̧ u̧mi̧ isarä ka̧cui̧na̧'a̧, ttuchu'cari cuarentanö pa̧ja̧cuo̧mȩ'i̧nä̧, ja̧hua̧ta̧'a̧nö̧ treintanö jo̧mȩ öcähuemä. Pa̧ja̧cuä̧ isarä u̧mi̧mä̧ yoräteunätä̧ pa̧ja̧cuo̧mȩ jö̧nä̧ ji̧na̧'a̧. ²³ I̧nä̧ o'quittö ka̧cui̧na̧'a̧ yoyonö 'chö̧nä̧ jȩä̧cua̧hua̧'a̧ ja̧u̧ pa̧ja̧cuä̧nö̧ jo̧mȩttö̧, ja̧hua̧ta̧'a̧nö̧ yoyonö jȩä̧cuä̧huo̧mȩ dȩa̧ttö̧mä̧ datta'a pä'ö ucurä huoecuome'inä ki̧na̧'a̧. ²⁴ Ja̧u̧ ttö̧ja̧'i̧sa̧mä̧ päinäcu̧sä̧: "Pȩnȩ jä̧cua̧'a̧ Dios ojusode adicuä ttö̧ja̧ ödahuiyä ttö̧ja̧ tti̧yu̧ cuäräunä da'u jȩttä̧cuo̧mȩmä̧.