¹ Pitö ja̧'a̧ Isarael ahuäruhuä 'cotö tti̧mi̧ pi̧yä̧mä̧. Dan 'cotömä yaute rȩjȩ jo̧mȩ ttȩmä̧cuo̧tö̧; Pȩi̧pä̧ro̧mȩmä̧ 'chä̧cua̧'a̧ Israel ttö̧ja̧ ttö̧jo̧mȩ kä̧hua̧ u̧huo̧jua̧ pȩi̧pä̧ro̧mȩcu̧ Hetló'inä Lebo Hamat'inä ttö̧mä̧nä̧cu̧. beipä̧ro̧mȩ 'chä̧cua̧'a̧ Hazar Enánttö̧ ja̧hua̧ta̧'a̧nö̧ Damasco rȩjȩ ko̧ro̧ jä̧cu̧ pȩi̧pä̧ro̧mȩcu̧ ka̧hua̧ u̧huo̧jua̧'a̧cu̧ ja̧u̧nu̧ o'camä Hamat'ra'acu. Dan rȩjȩ beipä̧ro̧mȩmä̧ 'chä̧cua̧'a̧ ka̧hua̧ mo̧ä̧cha̧'a̧cu̧ttö̧mä̧ Dubora Röoto o'cajuiyö mä̧ni̧yä̧ra'acu. ² Dan rȩjȩ ko̧ro̧jä̧cu̧ bȩi̧pä̧ro̧mȩmä̧ kä̧cua̧'a̧ kä̧hua̧ räopomettömä ka̧hua̧ mo̧ä̧ya̧'a̧cu̧, Asermä a̧u̧cuo̧mȩ jo̧mȩ ttö̧ju̧nä̧rä̧cuo̧tö̧. ³ Aser rȩjȩ ko̧ro̧jä̧cu̧ bȩi̧pä̧ro̧mȩcu̧mä̧ ka̧hua̧ raopa'acuttö ka̧hua̧ mo̧ä̧ya̧'a̧cu̧mä̧, Neftalímä a̧u̧cuo̧mȩ jo̧mȩ ttö̧jö̧nä̧rä̧cuo̧tö̧. ⁴ Neftalí rȩjȩ ko̧ro̧jä̧cu̧ bȩi̧pä̧ro̧mȩcu̧mä̧ ka̧hua̧ raopa'acuttö ka̧hua̧ mo̧ä̧ya̧'a̧cu̧mä̧, Manasésmä a̧u̧cuo̧mȩ jo̧mȩ ttö̧jö̧nä̧rä̧cuo̧tö̧. ⁵ Manases rȩjȩ ko̧ro̧jä̧cu̧ bȩi̧pä̧ro̧mȩcu̧mä̧ ka̧hua̧ raopa'acuttö ka̧hua̧ mo̧ä̧ya̧'a̧cu̧mä̧, Efraínmä a̧u̧cuo̧mȩ jo̧mȩ ttö̧jö̧nä̧rä̧cuo̧tö̧. ⁶ Efraín rȩjȩ ko̧ro̧jä̧cu̧ bȩi̧pä̧ro̧mȩcu̧mä̧ ka̧hua̧ raopa'acuttö ka̧hua̧ mo̧ä̧ya̧'a̧cu̧mä̧, Rubénmä a̧u̧cuo̧mȩ jo̧mȩ ttö̧jö̧nä̧rä̧cuo̧tö̧. ⁷ Rubén rȩjȩ ko̧ro̧jä̧cu̧ bȩi̧pä̧ro̧mȩcu̧mä̧ ka̧hua̧ raopa'acuttö ka̧hua̧ mo̧ä̧ya̧'a̧cu̧mä̧, Judámä a̧u̧cuo̧mȩ jo̧mȩ ttö̧jö̧nä̧rä̧cuo̧tö̧. ⁸ Töäre iyähuä jȩ'cuä̧cuo̧mȩmä̧ Judá rȩjȩ ko̧ro̧jä̧cu̧ bȩi̧pä̧ro̧mȩ jä̧cua̧'a̧ ja̧hua̧ta̧'a̧nö̧ 'chä̧hui̧ä̧cua̧ ka̧hua̧ räopa'attömä kä̧hua̧ mo̧ä̧ya̧'a̧cu̧; veinticinco mil ttu̧chu̧'ca̧ri̧ ä̧tȩcuo̧mȩ jä̧cua̧'a̧ öcähuemä. Öotome kä̧hua̧ mo̧ä̧ya̧'a̧cu̧ttö̧ ya̧tȩ ahuäruhuä 'cotö ttö̧jä̧rä̧jä̧ttö̧ pä̧tȩtä̧cua̧'a̧, ja̧hua̧ta̧'a̧nö̧ Dios ö̧jo̧dȩmä juȩnȩtä̧ kä'co kä̧cua̧'a̧. ⁹ Pi̧jä̧ rȩjȩ TÖ̧Ä̧NÄ̧HUA̧ ttiäre iyähuä cuiyäcuomemä veinticinco milnö ttu̧chu̧'ca̧ri̧ ä̧tȩcuo̧mȩ jä̧cua̧'a̧ öotome ja̧hua̧ta̧'a̧nö̧ diezmilnö ttu̧chu̧'ca̧ri̧ jo̧mȩnä̧ öcähuemä. ¹⁰ Pa̧'a̧nö̧ jö̧nä̧ ichähuiäcua pi̧jä̧ suroju jui̧yä̧jä̧: Diosttö'inä kä'co adicuä ttö̧ja̧mä̧ ttö̧jö̧nä̧rä̧cuo̧tö̧ veinticinco milnö ttu̧chu̧'ca̧ri̧ ä̧tȩcuo̧mȩ ka̧hua̧ ö̧huo̧jua̧'a̧cu̧ öotomä; diez milnö ttu̧chu̧'ca̧ri̧ ä̧tȩcuo̧mȩ ka̧hua̧ mo̧ä̧ya̧'a̧cu̧ öcähuemä; diez milnö̧ ttu̧chu̧'ca̧ri̧ ä̧tȩcuo̧mȩ ka̧hua̧ räopa'acuttö öcähuemä; ja̧hua̧ta̧'a̧nö̧ veinticinco milnö ttu̧chu̧'ca̧ri̧ ä̧tȩcuo̧mȩ ka̧hua̧ ieruhuacu öotomä, su̧rä̧jä̧ jui̧yä̧jä̧nä̧ TÖ̧Ä̧NÄ̧HUA̧ kä'co u̧ja̧nä̧. ¹¹ Pi̧yȩmä̧ Sadoc kä̧co̧jä̧ttö̧ surojuttö ttutöcähua pä'ö, icuicuä juiyönä ttörö ja̧'a̧tä̧ ttaditö suripu'inä surittoca'attö Israel ttö̧ja̧ suritti̧nö̧ pä̧nä̧mä̧, Levi ttö̧ja̧ jȩtti̧nö̧ ji̧nö̧'a̧nö̧mä̧. ¹² Jahuätörö iyähuiä̧cuä̧mä̧ suoju jui̧yä̧jä̧ttö̧ a̧u̧cuä̧jä̧ iyähuiäcuotö, Levi rȩjȩ ko̧ro̧jä̧cu̧ bȩi̧pä̧ro̧mȩ jubö cä'ätö. ¹³ Levi ttö̧ja̧ tti̧rȩjä̧ttö̧mä̧ ja̧hua̧ta̧'a̧nö̧ Diosttö'inä ttö̧ja̧ttö̧'i̧nä̧ käco adicuä ttöja̧ ttirejä ko̧ro̧jä̧cu̧ bȩi̧pä̧ro̧mȩmä̧ veinticinco milnö ttu̧chu̧'ca̧ri̧ jo̧mȩ jä̧cua̧'a̧ öotomä ja̧hua̧ta̧'a̧nö̧ diez milnö ttu̧chu̧'ca̧ri̧ jo̧mȩ öcähuemä. Öoto o'cahuiyönämä todäre jo̧mȩmä̧ rȩjȩmä̧ veinticinco milnö ttu̧chu̧'ca̧ri̧ jo̧mȩ ä̧tȩcuo̧mȩ öoto jä̧hua̧'a̧ ja̧hua̧ta̧'a̧nö̧ öcähuemä veintemilnö ttu̧chu̧'ca̧ri̧ ä̧tȩcuo̧mȩ jo̧mȩ. ¹⁴ Jahuätömä micuänä iyö'inä, korojucu päräto'inämä jȩtta̧'a̧ pä'ömä juiyäcua'a; pi̧yȩ Israel ttö̧ja̧ tti̧rȩjä̧ ä̧cuo̧mȩnä̧ jähuättö iyähuämä̧ totehuomemä 'to'opu tticu juiyäcua, TÖ̧Ä̧NÄ̧HUA̧RÖ̧ jä̧jä̧mä̧ suroju jui̧yä̧jä̧ ja̧'a̧. ¹⁵ Rȩjȩ ka̧cui̧pä̧ji̧mä̧, cinco milnö ttu̧chu̧'ca̧ri̧ jo̧mȩ ä̧tȩcuo̧mȩ öcähuettömä ja̧hua̧ta̧'a̧nö̧ veinticinco milnö ttu̧chu̧'ca̧ri̧ jo̧mȩ ä̧tȩcuo̧mȩ öotomä, ötahuiyä ji̧nä̧ ji̧yȩtȩnä̧ esecu ttadita pä'ö, odehuiyä'inä, isotö ttu̧huȩ ku̧nä̧hu̧'i̧nä̧; ötahuiyämä kä'co kä̧cua̧'a̧. ¹⁶ Pa̧'a̧nö̧ jö̧nä̧ pa̧ja̧cuä̧cua̧ ötahuiyämä: Ka̧hua̧ ö̧huo̧ja̧'a̧cu̧mä̧ öotomä 4,500 ttu̧chu̧'ca̧ri̧ jo̧mȩ, ka̧hua̧ ieruhuacumä öotomä 4,500 ttu̧chu̧'ca̧ri̧ jo̧mȩ ja̧hua̧ta̧'a̧nö̧ ka̧hua̧ räopa'acuttömä öotomä 4,500 ttu̧chu̧'ca̧ri̧ jo̧mȩ ja̧hua̧ta̧'a̧nö̧ ka̧hua̧ mo̧ä̧ya̧'a̧cu̧ öotomä 4,500 ttu̧chu̧'ca̧ri̧ jo̧mȩ. ¹⁷ Ötahuiyättö kä̧hua̧ ö̧huo̧jua̧'a̧cu̧mä̧ isotö ttuhuäcua kä̧cua̧, 250 ttu̧chu̧'ca̧ri̧ jo̧mȩ täcunä; kä̧hua̧ ieruhuacumäl, 250 ttu̧chu̧'ca̧ri̧ jo̧mȩ täcunä; kä̧hua̧ räopa'acuttömä, 250 ttu̧chu̧'ca̧ri̧ jo̧mȩ täcunä; kä̧hua̧ mo̧ä̧ya̧'a̧cu̧mä̧, 250 ttu̧chu̧'ca̧ri̧ jo̧mȩ täcunä. ¹⁸ Ttöäre iyähuä suroju jui̧yä̧jä̧ jö̧nä̧ tti̧yä̧jä̧ttö̧ kä̧cui̧pä̧jä̧mä̧ 'chä̧hui̧ä̧cua̧ diez milnö ttu̧chu̧'ca̧ri̧ jo̧mȩ ka̧hua̧ raopa'attömä, ja̧hua̧ta̧'a̧nö̧ kä̧hua̧ mo̧ä̧ya̧'a̧cu̧mä̧ diez milnö ttu̧chu̧'ca̧ri̧ jo̧mȩ. Öotomä 'chä̧hui̧ä̧cua̧ suroju jui̧yä̧jä̧ tti̧yä̧jä̧ ko̧ro̧jä̧cu̧ bȩi̧pä̧ro̧mȩcu̧, ttu̧ju̧nä̧huä̧mä̧ ötahuiyä adicuä ttö̧ja̧ ttuhua'a pä'ö kä̧cuä̧. ¹⁹ Ötahuiyä adicuä ttö̧ja̧mä̧, o'catoinä Israel ahuaruhuä o'cotö jö̧nä̧ ka̧cuä̧tö̧mä̧, ttucuäcuähuä ttö̧jö̧nä̧cuo̧tö̧. ²⁰ Jä̧tȩyä̧jä̧ ttiäre iyähuäjämä veinticinco milnö ttu̧chu̧'ca̧ri̧ jo̧mȩ pa̧ja̧cuä̧cua̧ pä̧tȩcu̧'i̧nä̧ veinticinco mil ttu̧chu̧'ca̧ri̧ jo̧mȩ. Pa̧'a̧nö̧ jö̧nä̧tä̧ kä̧cua̧'a̧ ttiäre iyähuäjä̧, ötahuiyä ji̧nä̧ ji̧jä̧tȩnä̧. ²¹ Pä̧tȩcu̧ jäyä suroju jui̧yä̧jä̧ tti̧yä̧jä̧mä̧ ja̧hua̧ta̧'a̧nö̧ ötahuiyämä ru̧hua̧ i̧i̧ti̧ i̧rȩjä̧ jä̧hua̧'a̧. Ru̧hua̧ i̧tti̧ i̧rȩjä̧mä̧ ka̧hua̧ räopa'acu toteunä 'chä̧cua̧'a̧ veinticinco ttu̧chu̧'ca̧ri̧ jo̧mȩttö̧ suroju jui̧yä̧jä̧ tti̧yi̧ji̧nä̧jä̧ bȩi̧pä̧ro̧mȩttö̧ ka̧hua̧ raopa'acu jäyäcu jubö, ja̧hua̧ta̧'a̧nö̧ rȩjȩmä̧ totecuäcua kä̧hua̧ mo̧ä̧ya̧'a̧cu̧ttö̧ setächiäcua'a ka̧hua̧ mo̧ä̧ya̧'a̧ rȩjȩ ko̧ro̧jä̧cu̧ bȩi̧pä̧ro̧mȩ veinticinco milnö ttu̧chu̧'ca̧ri̧ jo̧mȩ. Kä'comö suroju juiyö iyähuä kä̧cua̧, ja̧hua̧ta̧'a̧nö̧ Dios u̧jo̧de suroju jui̧yä̧nä̧ kä'co kä̧cua̧'a̧. ²² Rȩjȩmä̧ Levitatö̧ ttöäre ka̧cuo̧mȩttö̧ setächäcua'a ja̧hua̧ta̧'a̧nö̧ ötähuiyättö rȩjȩmä̧ kä'co jo̧mȩ ru̧hua̧ i̧tti̧ pä̧tȩtä̧cua̧'a̧; Juda rȩjȩ ko̧ro̧jä̧cu̧ bȩi̧pä̧ro̧mȩcu̧ ja̧hua̧ta̧'a̧nö̧ Benjamín rȩjȩ bȩi̧pä̧ro̧mȩcu̧ jä̧cua̧, pi̧jä̧ rȩjȩmä̧ ru̧hua̧ i̧tti̧ i̧rȩjä̧ ja̧cua̧'a̧. ²³ Ahuaruhuä 'cotö ka̧cui̧pä̧tö̧rö̧mä̧, ja̧hua̧ta̧'a̧nö̧ jä̧cua̧'a̧ ka̧hua̧ räopacuttö'inä kä̧hua̧ mo̧a̧ya̧'a̧cu̧ttö̧ tti̧ȩjä̧ iyähui̧ä̧cuä̧mä̧. Benjamínmä a̧u̧cuo̧mȩ jo̧mȩ ttö̧jö̧nä̧rä̧cuo̧tö̧. ²⁴ Benjamín rȩjȩ ko̧ro̧jä̧cu̧ bȩi̧pä̧ro̧mȩcu̧mä̧ ka̧hua̧ raopa'acuttö ka̧hua̧ mo̧ä̧ya̧'a̧cu̧mä̧, Simeónmä a̧u̧cuo̧mȩ jo̧mȩ ttö̧jö̧nä̧rä̧cuo̧tö̧. ²⁵ Simeón rȩjȩ ko̧ro̧jä̧cu̧ bȩi̧pä̧ro̧mȩcu̧mä̧ ka̧hua̧ raopa'acuttö ka̧hua̧ mo̧ä̧ya̧'a̧cu̧mä̧, Isacarmä a̧u̧cuo̧mȩ jo̧mȩ ttö̧jö̧nä̧rä̧cuo̧tö̧. ²⁶ Isacar rȩjȩ ko̧ro̧jä̧cu̧ bȩi̧pä̧ro̧mȩcu̧mä̧ ka̧hua̧ raopa'acuttö ka̧hua̧ mo̧ä̧ya̧'a̧cu̧mä̧, Zabulónmä a̧u̧cuo̧mȩ jo̧mȩ ttö̧jö̧nä̧rä̧cuo̧tö̧. ²⁷ Kä̧hua̧ irehuacu Zabulón ttö̧ja̧ tti̧rȩjä̧cu̧ttö̧ bȩi̧pä̧ro̧mȩmä̧, ka̧hua̧ räopacuttö kä̧mä̧dö̧ 'chä̧cua̧'a̧ kä̧cua̧ mo̧ä̧ya̧'a̧cu̧ päteö, Gad ttö̧ja̧ tti̧rȩjä̧ jä̧cua̧, a̧u̧cuo̧mȩmä̧. ²⁸ Gat rȩjȩ beipomemä setächiäcua Tamarttömä Meriba Cades ajiyäcu jubö, otonänömä Egipto ajei̧sä̧rä̧ jubö, ja̧hua̧nö̧ ja̧'a̧ttö̧ aje Röoto jubö ji̧na̧'a̧. ²⁹ Pi̧jä̧ rȩjȩ jä̧cua̧'a̧ ku̧'o̧cuä̧ jȩpu̧ tocuäcuamä; juä̧jä̧ ja̧'a̧ Israel ttö̧ja̧ tti̧rȩjä̧ jä̧cuä̧jä̧mä̧. Pi̧yȩ jä̧cua̧'a̧ jahuätö tti̧rȩji̧yä̧ jä̧cuä̧mä̧. Pi̧yȩ ja̧'a̧ TÖ̧Ä̧NÄ̧HUA̧ Dios ijäu hu̧nȩmä̧. ³⁰ Pa̧'a̧nö̧ jä̧cua̧'a̧ ötahuiyättö räocuämä: ka̧hua̧ u̧huo̧jua̧'a̧cu̧ttö̧mä, 4,500 ttu̧cu̧'ca̧ri̧ jo̧mȩ, öotomä pa̧ja̧cuä̧cua̧, huäboäcuänö apate kä̧hua̧, ³¹ Israel ahuruhuä 'cotö tti̧mi̧ huȩyu̧cua̧'a̧: yatetemä Rubénrö̧ ja̧'a̧tȩ, yatetemä Judárö ja̧'a̧tȩ ja̧hua̧ta̧'a̧nö̧ yatetemä Levírö ja̧'a̧tȩ. ³² Kä̧hua̧ räopa'acumä, öotomä pa̧ja̧cuä̧cua̧, 4,500 ttu̧chu̧'ca̧ri̧ jo̧mȩ, huaboäcuä apate kä̧cua̧'a̧: yatetemä Joserö ja̧'a̧tȩ, yatetemä Benjamínrö ja̧'tȩ ja̧hua̧ta̧'a̧nö̧ yatetemä Danrö̧ ja̧'a̧tȩ. ³³ Ka̧hua̧ irehuacumä, öotomä pa̧jcuä̧cua̧, 4,500 ttu̧chu̧'ca̧ri̧ jo̧mȩ, huäbodäcuänö apate kä̧cua̧: yatetemä Simeónrö ja̧'a̧tȩ, yatetemä Isacarö ja̧'a̧tȩ ja̧hua̧ta̧'a̧nö̧ yatetemä Zabulónrö ja̧'a̧tȩ. ³⁴ Ka̧hua̧ mo̧a̧ya̧'a̧cu̧mä̧, öotomä pa̧jcuä̧cua̧, 4,500 ttu̧chu̧'ca̧ri̧ jo̧mȩ, huäbodäcuänö apate kä̧cua̧: yatetemä Gadrö ja̧'a̧tȩ, yatetemä Aserö ja̧'a̧tȩ ja̧hua̧ta̧'a̧nö̧ yatetemä Neftalírö ja̧'a̧tȩ. ³⁵ Ötahuiyä jäyänä pa̧ja̧cuo̧mȩmä̧ dieciocho milnö ttu̧chu̧'ca̧ri̧ jo̧mȩ jä̧cua̧; ja̧u̧nu̧ mo̧ro̧ yabocumä, Ötahuiyä u̧mi̧mä̧ "TÖ̧Ä̧NÄ̧HUA̧ pȩnȩtä̧ kö̧" jä̧cua̧'a̧.