¹ Tö̧ja̧sa̧mȩ ȩpi̧nä̧cu̧sä̧ kä̧hua̧ räopa'acu kate apatecu. ² ¡Jitä opätucui! Israel ttö̧ja̧ TTÖ̧Ä̧NÄ̧HUA̧ usäru ichäja'a kä̧hua̧ räopa'acuttu; i̧huȩnȩmä̧ rä̧mi̧pi̧na̧'a̧ ajiyä rö'änä ichö rä̧mi̧pä̧'i̧nö̧'a̧nä̧, ja̧'hua̧ta̧'a̧nö̧ pi̧yä̧mä̧ ö'ädihuätä kä̧dȩpi̧na̧'a̧. ³ Ja̧'hua̧nö̧ ja̧'a̧ topinösa̧ i̧jȩcua̧'a̧, ya̧nä̧ jähuä i̧jȩcua̧'a̧ tochinö ji̧nö̧ ötahuiyä si'epö icu ichinö̧ji̧nö̧, ja̧u̧ tochinömä Quibar ajettö tochinö ji̧nö̧ ji̧na̧'a̧, Ja̧'hua̧nö̧ ji̧yä̧cu̧ chi'ä rȩjȩcu̧ mo̧'ä̧mi̧nö̧sä̧. ⁴ Ja̧'hua̧nö̧ ja̧'a̧ttö̧ TÖ̧Ä̧NPHUA̧ diosmä ichinö isodera̧'a̧ kä̧hua̧ rä'opa'acu katenä do'ächö. ⁵ Ja̧'hua̧nö̧ ja̧'a̧mä̧ a̧'cua̧ru̧hua̧tä̧ cä'epö ȩpi̧nä̧cu̧sä̧ u̧mi̧ jacuojunä isarecu. ¡Topätucui! TÖ̧Ä̧NÄ̧HUA̧ Dios usäru isode suhuädiönä i̧jȩcuä̧cha̧'a̧. ⁶ Ja̧'hua̧nö̧ ja̧'a̧ttö̧ ja̧u̧mä ttöcu ki̧nö̧, ya̧tȩ ucuocua'a ä̧ju̧cui̧nö̧sä̧ isode jacuättö. ⁷ Ja̧'hua̧ta̧'a̧nö̧ ja̧u̧ pä'inäcu̧sä̧: pi̧jä̧ ttö̧ja̧sä̧ i̧ttí̧, pȩnemä̧ ttö chö̧jo̧me ja̧'hua̧nö̧ ja̧'a̧ttö̧ pȩnetä̧ ttö chi̧jȩ́do̧me, ttö chö̧jä̧cu'o̧mȩ chahuaröhuä Israel ttö̧ja̧cu̧ 'cuä'opunä. Ja̧'hua̧nö̧ ja̧'a̧ttö̧ Israel ttö̧já̧ ttö̧jó̧memä suronä pättiyäcuotö ttö surojö jui̧'á̧ chi̧minä, jähuätö ja̧'hua̧ta̧'a̧nö̧ tturuhuotörö'inä hueocösä pä'äjita'anö ruhuotö hua'inä̧tö̧ ttu̧pi̧yä̧ pome'inä. ⁸ Ja̧'hua̧nö̧ ja̧'a̧ttö̧ jahuätömä pä'äjta'anömä suronä pättiyäcuotöTtö surojö jui̧'a̧ chi̧mi̧nä̧ ttö̧ji̧ni̧yä̧cuo̧tö̧ ttäpatemä ji̧nä̧ yo̧mȩtȩ Ttö chäpatecumä ja̧'hua̧ta̧'a̧nö̧ ttido'qui'inä ji̧nä̧ yo̧mȩtȩ chido'quicumä ja̧'hua̧nö̧ ja̧'a̧ttö̧ ji'cate ttoecuä'ca 'qui'epö ku̧nä̧hua̧'a̧ kä̧cua̧'a̧, jahuätöttö'inä juhua'atäcu Ttöttö'inä. Jahuätö suronä pä'inätö Ttö surojö jui̧'a̧ chi̧mi̧nä̧ jȩtti̧nö̧nä̧tä̧ ro̧dȩpi̧nä̧u̧ ja̧'hua̧nö̧ ja̧'a̧ttö̧ ra̧huä̧rö̧nö̧ tochinä̧u̧. ⁹ Ja̧'hua̧nö̧ ja̧'a̧ amöcuädätucui ucutu cuarodinä̧tu̧cu̧ ja̧'hua̧ta̧'a̧nö̧ curuhuotö huattinomettö Ttö chä'ca jo̧mȩttö̧, ja̧'hua̧nö̧ ja̧'a̧ttö̧ jahuätö ttö̧'quȩtȩnä̧ chö̧jä̧cua̧sä̧ 'cuäopönä. ¹⁰ Ttö̧ja̧sa̧ i̧tti̧ ucutätä Israel ttö̧ja̧rö̧mä̧ jicuähua pä'ö ja̧'a̧, pitu ttö̧ja̧rö̧mä̧ suronä jȩttö̧ dä'ätuhuähuätä kä̧cua̧'a̧, jahuätömä pi̧yȩ pädö huȩnȩ ttamöcuäda pä'ö ja̧'a̧. ¹¹ Ja̧'hua̧nö̧ ja̧'a̧ttö̧ jahuätömä o'cajuiyönö suronä jȩtti̧nö̧nä̧ dä'ä ttucuäcuotö, ja̧'hua̧nö̧ jo̧mȩnä̧ isode adicuä̧cuȩ a̧'cua̧juä̧ i̧jȩpi̧tö̧, jacuä jähuä'inä, roäocuome'inä, doächächähuome'inä ja̧'hua̧ta̧'a̧nö̧ tta̧di̧tä̧cuȩ a̧'cua̧juȩmä̧ o'cajuiyönä, ja̧'hua̧ta̧'a̧nö̧ pä'ö u̧ju̧ni̧nö̧'i̧nä̧, juhua'atäcu huehui'inö'inä, ja̧'hua̧nö̧ ja̧'a̧ttö̧ tto̧ttä̧ro̧mȩttö̧ huȩyu̧ti̧yi̧tö̧ tta̧di̧tä̧cuȩ a̧'cua̧juȩ toe'ächö juiyäcua'anö ja̧'hua̧ta̧'a̧nö̧ jȩtta̧ pä'ö hueähui'inö'inä ja̧'hua̧nö̧ jo̧mȩnä̧ ttucuotäcua'anö. ¹² Pi̧yȩ ja̧'a̧ isode ttaditä̧cuȩ tö'cö jiäömä: möä'ca ä̧'chu̧ jo̧mȩttö̧ kä̧mä̧dö̧ sobucuächönä o'cajuiyötä ro̧o̧mȩ pättäcuome. ¡Pa̧'a̧nö̧tä̧ ja̧'a̧! Isode ttaditä̧cuȩ tö'cö jiäömä ¹³ Ku'icu iyähuyomemä ttu̧ju̧'ca̧ri̧ jo̧mȩtä̧ jä̧cua̧'a̧, ja̧u̧ ttu̧yu̧'ca̧ri̧ jo̧mȩ ja̧'a̧nä̧ ttu̧mu̧ öcähue jo̧mȩtä̧ ji̧na̧'a̧ öcähuemä. Ku'icu iyähuome sobucuächänä sa̧huä̧huä̧rä̧ täcunä ö̧rö̧'ä̧mä̧ yaute ttu̧ytu̧'ca̧ri̧ jo̧mȩ jä̧cua̧'a̧. Jäyänä sobucuächönämä ya'ate me'ä̧huo̧mȩ ji̧na̧'a̧. Pa̧'a̧nö̧tä̧ jä̧cua̧'a̧ ku'icu iyähuome kada'ca 'chu̧huä̧ro̧mȩmä̧. ¹⁴ Sa̧huä̧hua̧rä̧ttö̧ kä̧mä̧dö̧ rȩjȩcu̧ yoräteunä ähuäbämä ji̧na̧'a̧ ku'icu iyähuomettömä tä'are ttu̧yu̧ca̧ri̧ jo̧mȩ abonänö, juäbä ähuäbämä ö̧rö̧'ä̧mä̧ ya'ate ttu̧yu̧'a̧ri̧ jo̧mȩ ji̧na̧'a̧. Ja̧'hua̧nö̧ ja̧'a̧ttö̧ ähuäbä a̧'u̧cuäbättö kä̧mä̧dö̧ ku'icu iyähuome jäyänä jubumä ji̧na̧'a̧, pa̧ja̧cuä̧nö̧ ttu̧yu̧'ca̧ri̧ ja̧'hua̧ta̧'a̧nö̧ jäyänä̧ ö̧rö̧'ä̧mä̧ ya'ate ttu̧ju̧'ca̧ri̧ jo̧mȩ ji̧na̧'a̧. ¹⁵ Ocuränä̧ ku'icu iyähuomemä ji̧na̧'a̧ pa̧ja̧cuä̧nö̧ ttö̧yöu̧'ca̧ri̧ jo̧me ju'tojucumä̧. ja'hua̧nö̧ ja̧'a̧nä̧'i̧nä̧ ka̧'a̧ pa̧ja̧cuä̧nö̧ ä̧ja̧isä'cä jo̧mȩ ocurä huä̧mȩcu̧ to̧pä̧rö̧. ¹⁶ Ja̧u̧ ocurä pa̧ja̧cuo̧mȩmä̧ docenö ttö̧yö̧'ca̧ri̧ jo̧mȩ ji̧na'a̧ ö'otomä ja̧'hua̧ta̧'anö docenö ttö̧yu̧'ca̧ri̧ jo̧mȩ ö'cähuecumä, yoräteunä̧tä̧. ¹⁷ Jäyänämä catorcenö ttö̧yu̧'ca̧ri̧ jo̧mȩ ö'otomä ja̧'hua̧ta'anö̧ catorcenö ttö̧yu̧'ca̧ri̧ jo̧mȩ ji̧na'a̧ ö'cähuecumä ya'acunämä pa̧ja̧cuä̧nö̧ jö̧nä jo̧mȩ, ja̧'hua̧nö ja̧'a̧nä̧ jäyänä̧mä ttö̧yu̧'ca̧ri̧ttö̧ yaute mȩä̧huo̧mȩtä̧ öcähuemä. Sahuä̧huä̧rä̧ ö̧rö̧'ä̧mä̧ ya'ate ttu̧yu̧'ca̧ri̧jo̧mȩ ji̧na̧'a̧ kä̧hua̧ räopa'acu 'chä̧hui̧'ö̧." ¹⁸ Ja̧u̧nu̧ o'ca'a pä'inäcu̧sä̧: "Pi̧jä̧ ttö̧ja̧sa̧ i̧tti̧, TÖ̧Ä̧NÄ̧HUA̧ Diosmä pa̧'a̧nö̧ pä'ö: Pa̧'a̧nö̧ jȩcu̧'ä̧tu̧cua̧ja̧ ku'icu iyähuome cuaditätucuomenämä, cuiyäcuotöjä i̧sa̧rö̧ ku'icu ja̧'hua̧ta̧'a̧nö̧ ucuoja'inä riri'cuäcuotöjä juȩnȩmä̧. ¹⁹ Cuiyäcuotöjä päcäyä mö'ä̧ya̧ttö̧ suronä jȩcu̧'ä̧tu̧cu̧ micuä päi'önä Sacerdote huotö Levittö̧ja̧rö̧ cuiyäcuotöjä ja'huätö ja̧'a̧ Sadoc ahuaruhuä o'cotömä, Jahuätö ja̧'a̧ ttö chö̧jo̧mȩcu̧ ucuotönö̧ ka̧cuä̧tö̧mä̧, ja̧'hua̧nö̧tä̧ pä'ö TTÖ̧Ä̧NÄ̧HUA̧ Diosmä. ²⁰ Ja̧u̧nu̧mä̧ cuȩmä̧cua̧jä̧ ucuojä ji̧'chi̧cha̧nö̧ ja̧'hua̧nö̧ ȩmö̧ cu̧ju̧na̧ja̧ pa̧ja̧cuä̧nö̧ ä̧ja̧ i̧sä̧na̧ i̧sa̧ro̧ ku'iyähuome ka̧cu̧ o̧nänä̧ ja̧'hua̧ta̧'nö̧ pa̧ja̧cuä̧nö̧ jäyänä sobucuächönä ka̧cu̧'i̧nä̧; cu̧tu̧cä̧cua̧jä̧ j'a̧hua̧nö̧ jȩpö̧ ja̧'hua̧nö̧ jȩpu̧tä̧ cui̧mi̧tä̧huä̧cua̧jä̧ ja̧u̧ru̧mä̧. ²¹ Ja̧u̧nu̧mä̧ ȩmi̧ ya̧tȩ päcayärö suronä jȩcu̧'ä̧tu̧cu̧ micuä päi'önä cuiyätucua ja̧'hua̧nö̧tä̧ ku'icuätucui ja'huätörö pätetö ku̧nä̧huo̧mȩ surojö juiyomettö̧'i̧nä̧ otonänö̧ttö̧. ²² Ja̧'hua̧nö̧ ja̧'a̧ todäre mo̧ro̧ päi'omenä ya̧tȩ cabra uborö öttahuiyä'inä jui̧'a̧rö̧ surojö jȩä̧cuä̧huä̧ jähuänä iyähuäcua'a; sacerdotestö̧mä̧ ku icu iyähuome ttutöcäcuotö, päcäyärö ttötöcäji ta'anötä̧. ²³ Täcö cättädomenä pä̧cä̧yu̧ttö̧ päcäyä uborö'inä ja̧'hua̧ta̧'a̧nö̧ isotö ovejas ubo öttahuiyä'inä jui̧'a̧rö̧ cuiyajä̧. ²⁴ TÖ̧Ä̧NÄ̧HUA̧ to̧ä̧ro̧mȩttö̧ iyi; sacerdotestö̧mä̧ jahuätörö 'cäruhuäbu tticuähuäcuotö ja̧'hua̧ta̧'a̧nö̧ ttiäre ku icu iyähuä TÖ̧Ä̧NÄ̧HUA̧RÖ̧ ttiyäcuotö. ²⁵ Ucumä jo̧mȩnö̧ jȩpö̧ ku̧ju̧na̧ pä'ö ja̧'a̧ ya̧tȩ cabra uborö surojö jȩä̧cuä̧huä̧ jähuänä mo̧ro̧ jö̧ta̧'a̧nö̧ ttiäre iyähuä 7nö̧ mo̧ro̧ jo̧mȩnä̧ iyähuä̧cuȩ, ja̧'hua̧ta̧'a̧nö̧ sacerdotestö̧'i̧nä̧ päcäyä uborö öttahuiyä'inä jui̧'a̧rö̧ juhua'atäcu oveja uborö öttahuiyä'inä jui̧'a̧rö̧ jo̧mȩnö̧ jȩpö̧ ttu̧ju̧na̧ pä'ö ja̧'a̧. ²⁶ Jahuätömä ku icu iyähuome ririttäcuotö sietenö mo̧ro̧ jo̧mȩnä̧ surojö jȩä̧cha̧ pä'ömä ja̧'hua̧nö̧ jȩpö̧tä̧ ucuo ko̧mȩ ju̧nä̧ jȩttä̧cuo̧tö̧. ²⁷ Jahuätö ja̧u̧ mo̧ro̧mä̧ jo̧mȩnö̧ päiönä jȩttä̧cuo̧tö̧ ja̧'hua̧ta̧'a̧nö̧ ochonö̧ mo̧ro̧ 'cuäo'omenä ji̧yȩtȩ 'cuäopäcua'a Sacerdotestömä ucu cuiäre iyähuä ku icu iyähuo̧mȩ jo̧mȩnö̧ jȩpu̧ ttu̧ju̧nä̧cuo̧tö̧, pi̧yȩ ja̧'a̧ TÖ̧Ä̧NÄ̧HUA̧ Dios päömä."