¹ Jitämä , ttö̧ja̧sa̧ i̧ttí, .'cuäopä̧cuä̧ jiäcui Gogrö pa'anö päö:TÖ̧Ä̧NÄ̧HUA̧ DIOSMÄ pa'anö päö: Topí! TÖMÄ cuabo'i̧yä̧ jö̧nä̧tä̧ cua̧sä̧, Gog, Mesec'inä jahuatanö Tubal ttu̧ru̧hua̧. ² TTÖTÄ juȩ'ȩpä̧rö̧ pärotö chicua̧cua̧jä̧, TTÖTÄ otó kä̧cua̧ räopa'cu ȩpu̧ chi'cächä̧cua̧jä̧ Israel muä̧'ca jo̧me jobu. ³ Ja̧u̧nu̧ o'camä cumuttö̧ cu'ocuenä chu̧cuä̧rö̧bumä käö chicuäcua̧jä̧ ja̧'hua̧'a̧nö̧ jȩpu̧ ja̧u̧ ppo'obu o'quimä cu̧mu̧ cu̧cuo̧hua̧'a̧nä mo̧ö̧nä jȩchä̧cua̧jä̧. ⁴ Israel deattötä 'coru juocuächa̧cua̧jä̧, cumuhuäyotö su̧ru̧da̧u̧ ucucu kä̧tö̧ o'catoinä̧cu̧. Chi̧yä̧cua̧jä̧ ppi̧yu̧ 'co̧rä̧tö̧tö̧ ttidepä cuätörö ja̧'hua̧ta'anö dea isotörö ttucuätucuacu päötä. ⁵ Ucumä 'coru juocuächäcua̧jä̧ rȩjȩ dea'a jo̧mȩtä̧, TTÖTÄ CU̧Ä̧NÄ̧HUA̧ DIOS cua̧ ucuocu päö ku̧nu̧sä̧ pi̧yȩmä ⁶ Ja̧'u̧nö o'ca'amä, Magogrömä ocurätä̧ hueda̧cua̧ jueönä̧mä̧ jitörö jä̧cua̧'a̧ aje röä̧oto jäyoto ko̧cuä̧tö̧rö̧, ja̧'hua̧'a̧nö ja̧'a̧nä jahuätömä ja̧u̧nu̧ ttucuo̧juä̧chi̧ä̧cuo̧tö̧ TTÖRÖMÄ̧ pidemä TÖ̧Ä̧NÄ̧HUA̧ ja̧'a̧ päö. ⁷ Ja̧'hua̧nö̧ ja̧'a̧ ttömä jȩchä̧cua̧sä̧ surojö jui̧'a̧ chi̧mi̧ ttö̧huo̧jua̧ pä'ö chumöhuäyotö Israel 'cä̧tȩ ka̧cuä̧tö̧, ja̧'hua̧nö̧ ja̧'a̧nä̧ yabocumä jȩpo̧cö̧sä̧ Ttö surojö jui̧'a̧ chi̧mi̧ ucuotäcuähuä juiyönä jȩtta̧ pä'ömä; pi̧jä̧nä̧ ka̧cuä̧tö̧mä̧ ttu̧huo̧juä̧cuo̧tö̧ Ttötäsä TÖ̧Ä̧NÄ̧HUA̧ Diosmä, ro̧mȩ surojö jui̧'a̧mä̧ Israelttö. ⁸ Mo̧ro̧mä̧ icha'a ¡Topittö! Ja̧'hua̧nö̧ ja̧'a̧ttö̧ päinömä pätecuächäcua'a, pi̧yȩ huäjetö icu ji'äu TÖ̧Ä̧NÄ̧HUA̧ Diosmä. ⁹ Israel ttö̧ja̧ ttö̧ja̧cuo̧mȩ ötahuiyämä ka̧cuä̧tö̧mä̧ rättopäcuotö ja̧'hua̧ta̧'a̧nö̧ jȩttä̧cuo̧tö̧ curä rohuäu ttȩpä̧'i̧jö̧ ttujuhua pä'ö, ja̧'hua̧nö̧ ja̧'a̧nä̧ ocurä rȩdȩtö̧ ku icu ttabo jähuä ttoecuäcuähuä ppo̧ö̧ o̧bi̧'i̧nä̧ bäreu obi'inä, 'po'obö'inä, 'po̧'a̧ri̧'i̧nä̧ cuähuä o'ca'inä ja̧'hua̧ta̧'a̧nö̧ dacuodiyä'inä, jahuätömä ocuränä ttujuhuäcuotö ja̧u̧nä̧mä̧ koromötönö todäre a̧'ȩ jo̧mȩnä̧. ¹⁰ Juhua'attömä pä'äjita'anö ttö̧ca̧ca̧tä̧cuo̧tö̧ mi̧ pättiyuttömä ja̧'hua̧nö̧ ja̧'a̧ttö̧ 'ca̧rä̧u̧'i̧nä̧ 'ca̧rä̧huo̧co̧tö̧ de'iyu dauhuiyättömä, curä rohuähäcuähuämä ku tticua'attö, jahuätömä 'chottipäcuotö 'chottipa pä'inä̧tö̧rö̧; jahuätömä ttö̧nä̧u̧cuä̧cuo̧tö̧ ttö̧nä̧u̧cua̧ pä'inätö̧rö̧ jitörötä, pi̧yȩ huäjetö icu ji'äu TÖ̧Ä̧NÄ̧HUA̧ Diosmä. ¹¹ Ja̧'hua̧nö ja̧'a̧ ja̧u̧ mo̧ro̧ 'cuäopäcua'a yȩnetȩ ȩpö̧ chu̧ju̧nä̧cua̧sä̧ Gogrö, Israel ttö̧ja̧ ttuhuäpäreba pä̧cuo̧me, yȩnetȩ pä̧märoppä päi'omä kä̧huä̧ macha̧'a̧cu̧ päte'ö 'cuä'opätömä aje dä'ähuotocu. pi̧yȩ 'cuäopiyunä to̧ttȩpä̧rä̧cuo̧tö̧ huämenämä. Jahuatömä juenetä tta̧ttä̧cuo̧tö̧ Go̧grömä ttö̧ja̧ recuätö O'cätoi'önä. Juenemä rȩjȩ pämäroppämä Hamón Gog pä'ö o'inätö̧ ¹² Israel tto̧ja̧mä siete meses jo̧menä ttö̧jo̧cuähuotto huene rȩjȩnämä adiu juoächomebö päi'önä. ¹³ tto̧ja̧ recuätö O'cätoi'önämä jua̧'ä̧ rȩjȩmä yaute mo̧ro̧mä uhuotetäcuähuotö jahuätömä tesecuähuotö, pi̧yȩmä ja̧'hua̧nötä̧ cuäjuettoi'ö TÖ̧Ä̧NÄ̧HUA̧ Diosmä. ¹⁴ Ja̧'hua̧nö̧ ja̧'a̧, jahuätömä yabonö ja̧huä̧jä̧ rȩjȩ jä̧ttä̧jä̧ cuettächa pä'ö huȩtti̧nä̧u̧, ja̧huä̧jä̧nä̧ 'cuä'opö cue'ächätö to'e'ächö rȩjȩ pȩjä̧tö̧rö̧ usu po̧cui̧pö̧mä̧ tto'co jähuä pȩju̧mä̧ 'tu̧rä̧rö̧ tticua pä'ö, ja̧'hua̧nö̧tä̧ ja̧huä̧jä̧ rȩjȩmä̧ hua'aremä pȩju̧ juiyönä̧tä̧ jȩpö̧ icuinä̧tö̧. Koromö̧ttö̧ ta̧ju̧ kä̧hua̧tö̧ beipächomenä̧, jahuätömä kä̧mä̧dö̧ ttusäcuotö. ¹⁵ Jahuätö jä̧huä̧jä̧nä̧ cue'ächö ttusomenä ttö̧ja̧ ttihue'quiyö tottöttömä jahuätömä jittähuäcuotö hua'are 'turähuä ttö̧ja̧ ichiö Hamón-gogttö pämäroppä päi'ome 'turu tticuiyatö pä'ö. ¹⁶ Ju̧huȩnȩmä̧ ötahuiyä Hamona pä'ö micu kä̧cua̧'a̧, pa̧'a̧nö̧ jȩpö̧tä̧ ja̧huä̧jä̧ rȩjȩnä̧ hua'aremä̧ pȩju̧ juiyönä̧ jȩttä̧cuo̧tö̧. ¹⁷ Jitä ucu ttö̧ja̧sa̧ i̧tti̧mä̧, TÖ̧Ä̧NÄ̧HUA̧ Diosmä pi̧yȩ pä'ötó: Ji'ähui ppi̧yu̧ o'catoi'önä ttujuabä ku̧nä̧rä̧tö̧rö̧'i̧nä̧ ja̧'hua̧ta̧'a̧nö̧ o'catoi'önä de'iyu isotö pä̧i̧cuä̧tö̧rö̧'i̧nä̧, ji̧nä̧ yo̧mȩtȩ ttö̧ca̧ca̧cui̧'ö̧nä̧. Ku icu iyähuotörömä o'cajuiyönä ka̧cuä̧tö̧rö̧ ca̧ca̧ti̧pi̧, pi̧yȩmä̧ ucuturu ja'ute'ö jȩchö̧ ja̧'a̧, Israel ttö̧ja̧ möä'canä ka̧cuä̧tö̧ rö̧ä̧u̧ ku icu iyähuä iyömä, idepä'inä cuä̧nö̧ kä̧nö̧ ja̧'hua̧ta̧'a̧nö̧ ucuoja'inä ttahuäcua'anö. ¹⁸ Curä rohuähuätö ttidepä ttucuäcuotö ja̧'hua̧ta̧'a̧nö̧ ja̧huä̧jä̧ttö̧ ruhuotö ttucuoja'inä ttahuäcuotö; jahuätö ahuähuätömä pitö ja̧'a̧: carnerostö̧, ovejastö̧, cabrastö̧ ja̧'hua̧ta̧'a̧nö̧ pä̧cä̧yu̧tö̧ttö̧'i̧nä̧ jahuätö o'catoi'önämä Basán ötahuiyättö ttubäretinä̧u̧ ji̧na̧'a̧. ¹⁹ Ja̧u̧nu̧ o'ca'a cucuäcua̧jö̧ a̧dȩu̧tä̧ cuidepämä cuesehuächi'ome jubö; aumä cuocuoyatä cua̧huä̧cua̧jä̧ tä̧cuä̧mä̧chome jubö; pi̧yȩ jä̧cua̧'a̧ ku icu iyähuä päi'önä jȩchä̧cuȩmä̧ Ttö cuä'ö chi̧cuä̧cua̧sä̧ ucutunämä. ²⁰ Ucutumä jo̧mȩnö̧ sucuädiäcuotöjä Ttö chu̧cuȩ huȩnä̧huodättömä cahuayutö̧rö̧'i̧nä̧ doähuä ocä'inä rohuähuätörö'inä ja̧'hua̧nö̧ ja̧'a̧nä̧'i̧nä̧ o'catoi'önä curä rohuähuätörö huä̧nö̧, pi̧yȩtä̧ pä'ö ji'äu TÖ̧Ä̧NÄ̧HUA̧ Diosmä. ²¹ Ttötä chi̧jȩpä̧cua̧sä̧ Ttö churuhuo chusärömä ja̧'hua̧nö̧ ja̧'a̧nä̧ o'cajuiyönä ttidepiyu jö̧nä̧mä̧ tottöcuotö Ttö chumöttö̧ ro̧ȩcuä̧ jȩchö̧mä̧ jahuätörö. ²² Israel Ttö̧ja̧mä̧ ttu̧huo̧juä̧cuo̧tö̧ Ttörömä TTÖ̧Ä̧NÄ̧HUA̧ Dios ja̧'a̧ pä'ö pi̧yȩ mo̧ro̧ yabocumä. ²³ Pi̧jä̧ o'cahuiyinä ttu̧huo̧juä̧cuo̧tö̧ Israel ttö̧ja̧mä̧ chi̧nä̧tö̧ pä̧i̧'cu̧nä̧ ttaditönä huettätö pä'ö ttö'aroda'attö̧ ja̧'hua̧nö̧ jȩpö̧ ttörö jarodinätö̧, Ja̧,hua̧nö̧ ja̧'a̧ttö̧ TTÖMÄ jahuätörömä ppä̧'ä̧dä̧rö̧cö̧ chä̧cua̧sä̧ iyötä chu̧ju̧nä̧jä̧u̧ ttäbo'iyotörötä jahuätö jö̧ta̧'a̧nö̧tä̧ rö̧'ä̧nä̧ usurä ttȩmä̧hua̧ pä'ö. ²⁴ TTÖMÄ yȩpa̧ji̧sä̧ jitötä surojönä jȩtta̧'a̧ttö̧ ja̧'hua̧ta̧'nö̧ surojönätä̧ tta̧mucuada'attö̧, dajahuächinösä jahuätörömä. ²⁵ Ja̧'hu̧a̧nö̧ ja̧'a̧ttö̧ TTÖ̧Ä̧NÄ̧HUA̧ Diosmä pa̧'a̧nö̧ pä'ö: Jitämä pa'ajita'anö ppä̧dä̧dä̧cua̧sä̧ Jacob ahuaruhuä o'cotörö, ja̧'hua̧ta̧'a̧nö̧ rȩrö̧jo̧nä̧ to̧chä̧cua̧sä̧ Israel ttö̧ja̧rö̧'i̧nä̧, ja̧'hua̧nö̧ jȩchä̧ji̧mä̧ TTÖ chi̧mi̧ surojuo'ächa'acu pä'ö ä'cuoyäusä. ²⁶ Ja̧'hua̧nä̧ ja̧'a̧ttö̧, ttä̧mo̧mä̧ jȩttä̧ji̧tä̧ da̧'a̧rö̧jö̧tä̧ 'ca̧tä̧chi̧'ä̧cuo̧tö̧, o'cajuiyönä suronä jȩttä̧'i̧jö̧ TTÖRÖ'inä jarodäjätö. Ja'huätömä ja̧'hua̧nä̧ jä̧'i̧jö̧'i̧nä̧ ttunichi'äcuotö adihuome ttä̧mo̧nä̧ tti̧rȩjä̧nä̧ 'cuättächomenä ro̧huä̧pi̧jö̧'i̧u̧nä̧ juiyome, korotö'inä ye'epä'chö ttichocome. ²⁷ Jahuätörö pa'aji ttö̧ji̧nö̧'a̧nö̧ ttabo'iyotö̧ tti̧rȩjä̧nä̧ ji̧nä̧ ji̧jä̧tȩnä̧tä̧ ttö̧jönä̧ jȩcho̧mȩnä̧, TTÖ cha̧mo̧nä̧tä̧ chi̧jȩcuä̧cua̧sä̧ pi̧jä̧ o̧'ca̧jui̧yö̧nä̧ tottönä. ²⁸ Ja̧'hua̧nö̧ ja̧'a̧ttö̧ jahuätömä ttu̧huo̧juä̧cuo̧tö̧ TTÖTÄSÄ TTÖ̧Ä̧NÄ̧HUA̧ Diosmä pä'ö. Ttötä rä'epö chicuinä̧u̧jä̧, ko̧ro̧jä̧ rȩjȩra̧'a̧, ja̧'hua̧nö̧ ja̧'a̧ ja̧u̧nu̧ o'ca'a pä'äjita'anö ca̧ca̧tö̧ chu̧ju̧nä̧cua̧sä̧ tti̧rȩjä̧nä̧. Ku̧ni̧po̧cö̧sä̧ ya̧tȩrö̧'i̧nä̧ jahuätörömä ko̧ro̧jä̧nä̧mä̧. ²⁹ Yabocumä da̧ja̧huä̧ro̧cö̧sä̧ chi'ämä jahuätörömä, ja̧u̧nu̧ Ttö adihuä cha̧'cua̧ru̧hua̧rö̧ chipperetomenä Isael ttö̧ja̧rö̧mä̧ pi̧yȩ pä'ö TÖ̧Ä̧NÄ̧HUA̧ Diosmä.