¹ TÖ̧Ä̧NÄ̧HUA̧ i̧huȩnȩ rȩbȩhui̧pö̧ ttörö pa̧'a̧nö̧ päina'a: ² Ttö̧ja̧sa̧ i̧tti̧, Gog ö̧ja̧'a̧cu̧ kärächi'ö topi, Magog rȩjȩra̧'a̧cu̧, Mesec'inä Tubal'inä ttu̧ru̧hua̧ ö̧ja̧'a̧cu̧; ja̧'a̧hua̧nö̧ ja̧'a̧ ja̧u̧ru̧ 'cuä̧o̧pä̧cuȩ ji'ähui. ³ Pa̧'a̧nö̧ ji'ähuirö, TÖ̧Ä̧NÄ̧HUA̧ Diosmä pa̧'a̧nö̧ pä'ö: ¡Topi! Ucu Mesec'inä Tubal'inä ttu̧ru̧hua̧ Gogrö kö'cocösä. ⁴ ¡Ja̧'hua̧nö̧ ja̧'a̧ Ttömä päcuä'chunä jȩchä̧cua̧sä̧ ja̧'hua̧ta̧'a̧nö̧ chu̧nä̧cua̧sä̧ ajua'che ucu cuäcänä; Ttömä ro̧dȩpä̧cua̧jä̧ o'catoi'önä cumöhuäyotö curä ttö̧ja̧ o'catoi'önä, cabayutu̧, juhua'atäcu huȩjä̧tö̧rö̧'i̧nä̧, jahuätömä o'catoi'önä curä rohuäu 'ca̧tä̧cuä̧huä̧ta̧ jo̧mȩnö̧, ttö̧ja̧ recuätö curä rohuäu ttottecuäbi'inä ja̧'hua̧ta̧'a̧nö̧ ppo̧ö̧ obi'inä, jahuätö o'catoi'önä 'chu̧'ä̧rä̧tö̧ curä o'chu! ⁵ ¡Persia'inä, Cus ttö̧ja̧'i̧nä̧ ja̧'hua̧ta̧'a̧nö̧ Libia ttö̧ja̧'i̧nä̧ jahuätucu kä̧tö̧mä̧, o'catoi'önä ttoecuäcuähuä obi'inä ja̧'hua̧ta̧'a̧nö̧ ttöcähuiyä ose'inä huȩnä̧rä̧tö̧! ⁶ ¡Gomer ttö̧ja̧ttö̧ su̧ro̧da̧u̧ o'catoi'önä Bet Togarmáttö̧ kä̧hua̧ u̧huo̧jua̧'a̧cu̧nä̧ oto kä̧tö̧'i̧nä̧ o'catoi'önä su̧ro̧da̧u̧! ¡Recuätö ttö̧ja̧ ucutucu kä̧tö̧! ⁷ !Jo̧mȩnö̧ kä̧hui̧! A̧, jo̧mȩnö̧ kä̧hui̧ ucumä ja̧hua̧nö̧ ja̧'a̧ttö̧ ca̧ca̧ti̧ cumöhuäyotörö ucutäcu ja̧'hua̧nö̧ ja̧'a̧ ucumä ttu̧ru̧hua̧ jö̧nä̧ kä̧hui̧. ⁸ Ucumä huo̧ttä̧cua̧jä̧ recuo mo̧ro̧ jö̧ o'ca'a ja̧'hua̧ta̧'a̧nö̧ recuo a̧'ȩ 'cuäopö o'ca'a ko̧ro̧jä̧ rȩjȩra̧'a̧ cui̧'chä̧cua̧jä̧ curättömä 'cuä'ächi'ö korotö ttö̧ja̧'a̧ ja̧'hua̧nö̧ ja̧'a̧ jahuätömä ca̧ca̧cuä̧tö̧ ttö̧ja̧ recuätö ttö̧'cä̧tȩttö̧, ca̧ca̧tö̧ ppä'ädäcuähuotö Israel de'iyura̧'a̧ 'cuäopönä surojuottepä'chäjome ja̧hua̧nö̧ ja̧'a̧ttö̧ porö ötahuiyättö rä'epö icuähuäcuotöjä, jahuätömä adiutä ttö̧ja̧cuä̧cuo̧tö̧, ¡Ja̧ahuätö o'catoi'önätä! ⁹ Ja̧'hua̧nö̧ ja̧'a̧ ucumä cui̧'chä̧cua̧jä̧ kä̧ru̧'coppa 'cua̧rö̧nä̧ rö̧ä̧nä̧ ra̧huä̧pi̧ joppa, ucumä cu̧'ä̧cua̧jä̧ yoppate kä̧ru̧'coppa rȩjȩ a̧tto̧ppoppa 'cua̧rö̧nä̧, ucu'inä o'catoi'önä cumöhuäyotö'inä, ja̧'hua̧nö̧ ja̧'a̧ ucu cumöhuäyotö su̧ro̧da̧u̧ rrecuätö ttö̧ja̧ ucucu ttö̧jä̧cuo̧tö̧. ¹⁰ TTÖ̧Ä̧NÄ̧HUA̧MÄ̧ Diosmä pa̧'a̧nö̧ pä'ö: "Ja̧u̧nu̧ mo̧ro̧mä̧ 'cuäopäcua, cuamiso'quitöcunämä däje amöcuädäcuähuä kä̧cua̧'a̧ttö̧, ja̧hua̧tä̧'anö̧ ucumä chä̧huȩnä̧ suronä jȩä̧cuä̧huä̧ jȩpö̧ ku̧ju̧nä̧cua̧jä̧". ¹¹ Ja̧hua̧nö̧ ja̧'a̧ttö̧ ucumä pä̧cuä̧hua̧jä̧: "Ttö rȩjȩ bahuȩcuä̧jä̧ra̧ 'ca̧nä̧chä̧cua̧sä̧; ttömä ttö̧ja̧ tta̧cua̧pö̧nö̧ ka̧cuä̧tö̧ ttö̧jo̧mȩ chi̧'chä̧cua̧sä̧, huȩnȩ huiyönä ttö̧jo̧cuo̧mȩ, o'catoinä jitö ttoecuome'inä, o̧'quȩ'i̧nä̧ juiyönä ka̧cuä̧tö̧ja̧, ja̧hua̧ta̧'a̧nö̧ ötahuiyänämä apate'inä juiyome ja̧'a̧. ¹² Ttömä micuäu o̧'ca̧'i̧nä̧ ȩmö̧ chu̧nä̧i̧cuä̧hua̧sä̧, ja̧hua̧nö̧ jȩpö̧tä̧ chi'chächäcua'anö chö̧mu̧ jitö a̧u̧cuo̧tö̧ pparötticuinome ka̧cuä̧tö̧rö̧, ja̧hua̧ta̧'a̧nö̧ ötahuiyä pi̧jä̧ rȩjȩ ttö̧ja̧cu̧ ji̧nä̧ yo̧mȩtȩ ka̧ca̧cu̧ ka̧cuä̧tö̧, äjicuäcuähuotörö'inä ja̧hua̧ta̧'a̧nö̧ ttiäre ȩmö̧ ka̧cuä̧tö̧, pi̧jä̧ttö̧ kä'copäteö ka̧cuä̧tö̧. ¹³ Sebá'inä, Dedán'inä, ja̧hua̧ta̧'a̧nö̧ Tarsis ttö̧ja̧ järe ichäcuä ttö̧ja̧'i̧nä̧, o'catoinä ttömuäyotö möäyotö curä rohuäcuähuä ttö̧ja̧'i̧nä̧, pättäcuotö ucurö: "¿Ttö̧nä̧ icua pä'ö iyäjätö? ¿Ka̧'ca̧tä̧ji̧ ucuru ja̧'a̧tä̧ curä rohuäcuähuä ttö̧ja̧rö̧ micuäu ä̧co̧ca̧ ttȩma̧ pä'ö, plata'inä, oro'inä ttȩi̧pa̧ pä'ö, ttä̧ji̧mö̧rö̧'i̧nä̧, ttöäre'inä, ȩmö̧ rö̧ä̧nä̧ micuäu ttȩpa̧ pä'ö? ¹⁴ Ja̧'hua̧nö̧ ja̧'a̧ttö̧ Dios iminä ucuocui, ttö̧ja̧sa̧ i̧tti̧, ji'ähui Gogrö: TÖ̧Ä̧NÄ̧HUA̧ Diosmä pa̧'a̧nö̧ pä'ö: ji̧yȩnö̧ mo̧ro̧, Ttö chahuaruhuä Israel ttö̧ja̧mä̧ huȩnȩ juiyönä ttö̧ja̧cuä̧cuo̧tö̧, ¿jahuätrömä ucumä cuieruhuäcua̧jä̧? ¹⁵ Ucu oto cuo̧mȩttö̧ cui̧chä̧cua̧jä̧ recuätö cumöhuäyotucu kä̧hua̧ u̧huo̧jua̧'a̧cu̧ttö̧, jahuätö o'catoi'önä cahuayutönä ttö̧huä̧cuo̧tö̧, tti̧'chä̧cuo̧tö̧ recuätö ja̧'hua̧ta̧'a̧nö̧ recuätö su̧ro̧da̧u̧cu̧. ¹⁶ Ja̧'hua̧nö̧ ja̧'a̧ttö̧ ucumä cu̧'a̧tä̧cua̧jä̧ ttö chahuaruhuä Israelrö ja̧'hua̧nö̧ ja̧'a̧ttö̧ ajiya isoppattö a̧ttä̧di̧'a̧'a̧ jä̧'i̧nö̧'a̧nö̧ päi'äcua'a chahuaruhuärömä chichö mo̧ro̧mä̧, Ttötä chi̧chä̧cua̧sä̧ ucuru chahuaruhuä ro̧ttȩpa̧cu̧ pä'ö ja̧'hua̧ta̧'a̧nö̧ ttu̧huo̧juä̧cua̧'a̧nö̧ Ttörö de'iyu pa̧ja̧cui̧'a̧ o̧du̧nä̧ttö̧, chi̧jȩpo̧mȩ jä̧cua̧'a̧ Ttötä ucunä jȩchä̧cua̧sä̧, ja̧'hua̧nö Gogmä̧ ö'äre ä'cattö aditö icuähuäcua̧. ¹⁷ Ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧ Diosmä pa̧'a̧nö̧ pä'ö: ¿Ucumä̧cö̧jä̧ Ttö chucuocuäcumä ni̧po̧ mo̧ro̧ chumöhuäya̧nä̧ Israelttö Dios i̧huȩnȩ jiäcuähuä ttö̧ja̧nä̧ jittähuinäcu̧jä̧ ucu cu̧ji̧nö̧ a̧'ȩ Ttötä chȩpä̧cua̧jä̧ ucuru jahuätö tta̧'u̧ta̧ pä'ö. ¹⁸ Ja̧'hua̧ta̧'a̧nö̧ 'cuäopäcua'a ja̧u̧nu̧ mo̧ro̧ Gog urohuähuomenä Israe ttö̧ja̧cu̧ pi̧yȩ ja̧'a̧ TÖ̧Ä̧NÄ̧HUA̧ Dios jiähuinömä ja̧'hua̧nö̧ jo̧mȩnä̧ rö̧ä̧nä̧ ro̧dȩpä̧cua̧sä̧ chöjö'coca'attö. ¹⁹ Chä'cuoyäu'inä ja̧'hua̧ta̧'a̧nö̧ cha̧mi̧ sura'a ocurä jä̧'i̧nö̧'a̧nö̧ jö̧'i̧nä̧, Ttömä ji'äu icusä Israel ttö̧ja̧ tti̧rȩjä̧nä̧ ja̧u̧nu̧ mo̧ro̧mä̧ rö̧ä̧nä̧ rȩjȩ ma̧ä̧chö̧ jähuä kä̧cua̧'a̧. ²⁰ Jahuätömä chä'ca jo̧mȩttö̧ ttö̧ttä̧huä̧cuo̧tö̧, dä'ähuoto po̧i̧'i̧nä̧, ppi̧yu̧ mo̧ro̧jä̧nä̧ co̧'ä̧rä̧tö̧'i̧nä̧, de'iyu isotö pä̧i̧cuä̧tö̧'i̧nä̧ ja̧'hua̧ta̧'a̧nö̧ o'catoi'önä rȩjȩnä̧ do'ähuätö'inä juhua'atäcu ttö̧ja̧ pi̧jä̧ rȩjȩnä̧ ka̧cuä̧tö̧'i̧nä̧. Mö̧ä̧'quiyumä maächä̧cua̧'a̧ ja̧'hua̧ta̧'a̧nö̧ idoce jo̧mȩ pö̧nä̧'i̧nä̧ cacuächächäcua'a, o'cajuiyönä tto'epö ku̧nä̧huä obämä rȩjȩra̧'a̧ maä̧cho̧mȩ jubö. ²¹ Ja̧u̧ru̧ curä'chu rohuäu ichönä chä̧tȩpä̧cua̧sä̧, chidepiyu möä'quiyu jo̧mȩmä̧ o'cajuiyötä, pa̧'a̧nö̧tä̧ huäjuetö icu jiäu TÖ̧Ä̧NÄ̧HUA̧ Diosmä, yotucu pönä ttucurä o'chumä ttö̧jä̧huo̧tu̧cu̧ rohuöhucua'a. ²² Ja̧'hua̧nö̧ jo̧mȩnä̧ Ttömä surojönä jö̧nä̧'i̧nä̧ ja̧'hua̧ta̧'a̧nö̧ ttucuojanä'inä ro̧dȩpä̧cua̧sä̧; ja̧'hua̧ta̧'a̧nö̧ ajiya siächoyanä'inä juhua'atäcu o̧tȩnö̧ jö̧ ttahuähuönä'inä; ja̧'hua̧ta̧'a̧nö̧ azufre pättö cuoumä̧ ja̧u̧nä̧tä̧ ma̧ä̧mä̧cua̧'a̧. ²³ Ja̧'hua̧nö̧ ja̧'a̧ Ttömä chö̧rö̧ä̧ chi̧jȩpä̧cua̧sä̧ ja̧'hua̧ta̧'a̧nö̧ surojö'inä jui̧'a̧sä̧ juhua'atäcu ttö̧ja̧ recuätö tottönä cha̧mö̧nä̧ pa̧ja̧tö̧ chi̧jȩcuä̧cua̧sä̧ ja̧'hua̧nö̧ jo̧mȩnä̧ Ttömä TTÖ̧Ä̧NÄ̧HUA̧SÄ̧ pä'ö ttu̧huo̧juä̧cuo̧tö̧.