¹ TTÖ̧Ä̧NÄ̧HUA̧ u̧mu̧ jacuätä ki̧nö̧sä̧, TÖ̧Ä̧NÄ̧HUA̧ a̧'cua̧ru̧hua̧nä̧tä̧ rä'epö icuinäcusä̧ ja̧'hua̧nö̧ ja̧'a̧ttö̧ ötinäcu̧sä̧ de'a pämärächi'omä; ttihue'quiyu rö̧'ä̧nä̧ pȩjo̧mȩ. ² Ja̧'hua̧nö̧ ja̧'a̧ttö̧ jahuätö ttö̧'cä̧tȩnä̧ 'cuä̧do̧pö̧nä̧ jȩi̧nä̧cu̧sä̧, ttö̧jo̧mȩ ppeyänä. Juȩnȩ de'a pämärächi'ome recuätö ka̧cui̧nä̧tö̧. ¡Topätucui! juȩnȩmä̧ ttihue'quiyu jo'ächächinötä pȩji̧na̧'a̧. ³ Ja̧u̧ päinäcu̧sä̧: "Pi̧jä̧ ttö̧ja̧sa̧ i̧tti̧, ¿Pi̧yȩ ttihue'quiyumä pä'äjita'anö ttoächa'anö ja̧'a̧tä̧jí̧?" ja̧'hua̧nö̧ä̧ ja̧'a̧ pä'inösä: "CHÖ̧Ä̧NÄ̧HUA̧ Dios, ucutä huo̧jua̧jä̧." ⁴ Ja̧'hua̧nä̧ ja̧'a̧ päinäcu̧sä̧, "ttihue'quiyu ötö'cömä ji'äjui pa̧'a̧nä̧ pä'ö: ttihue'quiyu joö o'ca. Ä̧ju̧cuä̧tu̧cui̧ TÖ̧Ä̧NÄ̧HUA̧ i̧huȩnȩ. ⁵ TÖ̧Ä̧NÄ̧HUA̧ Diosmä ttihue'quiyu joö o'carömä pa̧'a̧nö̧ pä'ö: ¡Ä̧ju̧cuä̧tu̧cui̧! Ucuturu kä̧cuä̧huä̧ chamiyuppa ppu̧däomenä cu̧jä̧cuo̧tö̧jä̧ ja̧'hua̧ta̧'a̧nö̧ cuihue'quiyu 'tö̧ȩpö̧ appiyä'inä chu̧ju̧nä̧cuo̧tö̧jä̧ ja̧'hua̧ta̧'a̧nö̧ cuidepätucu'inä chö̧nä̧cua̧sä̧ ucuturumä. ⁶ TTÖTÄ chattopäcuotöjä cui̧jȩta̧tu̧cu̧mä̧ cua̧mi̧yu isoppatucu'inä chȩnä̧cuo̧tö̧jä̧ cu̧jä̧tu̧cuä̧cua̧'a̧nö̧. Ja̧u̧nu̧tä̧ cu̧huo̧juä̧chi̧'ä̧cuo̧tö̧jä̧ iso päi'önä TÖ̧Ä̧NÄ̧HUA̧ ja̧'a̧ pä'ö." ⁷ Ja̧'hua̧nö̧ ja̧'a̧ttö̧ hueinöta'anö 'cuäopä̧cuȩ jiähuinösä̧; 'cuä̧o̧pä̧cuȩ jidähua'anä, ji̧yȩtȩ rä̧pi̧po̧mȩnä̧ tti̧ȩpö̧ ichi'ina'a. Ja̧'a̧hua̧nö̧ päi'omenä ttihue'quiyumä ca̧ca̧cui̧pi̧na̧'a̧, koro'camä koro'cacu. ⁸ Ttömä topinö̧sä̧ ja̧'hua̧nö̧ ja̧'a̧ juhuorömä ttihuehui appiyämä jahuätunätä ki̧na̧'a̧ ja̧'hua̧nö̧ jo̧mȩnä̧ ttidepämä yuchächipina'a ja̧'hua̧nö̧ yuchächipömä i̧jȩta̧tä̧ a̧ttä̧chi̧'i̧na̧'a̧. Ja̧'hua̧nö̧ ja̧'a̧nä̧ jahuätönä̧mä ji̧nä̧ a̧'cua̧rä̧cuä̧huä̧mä̧ jui'ina̧'a̧. ⁹ Ja̧'hua̧nö̧ ja̧'a̧ TÖ̧Ä̧NÄ̧HUA̧MÄ̧ päinäcu̧sä̧: 'cuäopäcuȩ a̧'cua̧ru̧hua̧rö̧ ji'ähui, 'cuäopäcuȩ ji'ähui ttö̧ja̧sa̧ i̧tti̧, pa̧'a̧nö̧ pä'i a̧'cua̧rö̧hua̧rö̧: TÖ̧Ä̧NÄ̧HUA̧ Diosmä pa̧'a̧nö̧ pä'ö: A̧'cua̧ru̧hua̧, o'cajuiyönä̧tä̧ topi, jitö 'corujuo'ächinä̧tö̧rö̧ tta̧'cua̧rö̧ iyitö, jahuätö a̧'cua̧rö̧ ttö̧jä̧cua̧'a̧nö̧." ¹⁰ Ja̧hua̧nö̧ ja̧'a̧ttö̧ 'cuäopä̧cuȩmä̧ hueäjita'anö̧tä̧ ji'ähuinö̧sä̧; a̧cua̧rä̧cuä̧huä̧mä̧ jahuätörö rȩbȩhui̧po̧mȩnä̧ jahuätömä a̧'cua̧rä̧chi̧'i̧nä̧tö̧. Ja̧'hua̧nö̧ ja̧'a̧ jahuätömä ä̧rä̧mi̧'ö̧ ka̧cuä̧mi̧nä̧tö̧, su̧ro̧da̧u̧ rö̧ä̧nä̧ recuätö jö̧nä̧. ¹¹ TÖ̧Ä̧NÄ̧HUA̧ ja̧'hua̧nö päinö: "Ttö̧jö̧sä i̧tti̧, Israel ttö̧ja̧ O'cätoiönä ttihue'quiyu ja̧ji̧nö ja̧nö. ¡topi! ja'huätömä pä'ätö: 'Ujutu tihue'quiyumä joächä chinä'a̧ ¹² Ja̧'hua̧ta̧nö ujutu 'ta̧ttara̧i̧mä cuäoäa. 'to'opi'icuinä'öja̧. Ja̧'hua̧nö ja̧'a̧ cuä̧'o̧pä̧huȩ ji̧ähui: 'TÖ̧Ä̧NÄ̧HUA̧ Diosmä pä'ö: hua'areba baepu räepuchicuä'cuäsä̧ ö̧micu̧ ttö chumo huäyottörömä. Ja̧'hua̧nö jȩpu̧tä̧ pä'i̧ta̧'a̧nö ppadäda̧cuä̧sa̧ Israel tti̧rȩja̧rä̧mä ucuturumä. ¹³ ja̧'hua̧nötä̧ cuhuojuä̧ja̧ TÖ̧Ä̧NÄ̧HUA̧ pä'ömä, huä'areba ba'epu ö̧micu räepu chicuomenä, chumö̧huäyottörömä. ¹⁴ Chu̧ju̧nä̧cuä̧sa̧ ttö cha̧'cua̧ru̧hua̧ru̧ ucutu cu'cä̧tȩtö̧cu̧nä öja̧ pä'ö ucutucu ö̧ja̧ pä'ö. Ja̧'hua̧ta̧nö chi̧yä̧cua̧sä̧ ucuturu cuirȩjä̧tu̧cu̧ päi'önä cujä̧ttö̧ pä'ö, cuhuojuätö̧cua̧ pä'ömä Ttötä ja̧'a̧ TÖ̧Ä̧NÄ̧HUA̧TU̧CU̧MÄ̧. jȩchä̧ji̧mä jidähuä̧cua̧sä̧ ja̧'hua̧nötä̧ huäjuetö̧ icu TÖ̧Ä̧NÄ̧HUA̧ jiäumä Pi̧yȩ ja̧'a̧. ¹⁵ Ja̧'hua̧nö̧ ja̧'a̧tö̧ TÖ̧Ä̧NÄ̧HUA̧ ttö chö̧ja̧'a̧cu̧ ichö päinö: ¹⁶ "Ttö̧ja̧sä̧ i̧tti̧ jitämä, huȩyu̧ti̧ i̧so̧'cȩ chuädö, Judá to'a ja̧'hua̧ta'anö Israel ttö̧a̧'i̧nä̧ ahuäruhuä'inä̧ tottä. Ja̧'hua̧jö̧ta'anö̧tä̧ kö̧ro̧'cȩ̈ chuädö huȩ̈yu̧tti̧ José'inä to'a Efraín u̧mu̧huäyotö'inä ttiminä, ja̧'hua̧jö̧ta̧'anö Israel ttö̧ja̧ ttahuäruhuä o'catoinärö̧ ttiminä'inä." ¹⁷ Jahuätörö ji̧nä yo̧'cȩ̈tȩnätä̧ juoepu 'cächi, yautetä juottacha ucu cumunämä. ¹⁸ Ucu cumuhuäyotö ucuocu pättomenä: '¿Pi̧yȩmä tocu päö jȩ'cu̧a̧jȩttö̧ ucumä?' ¹⁹ Ja̧'hua̧nö̧ jö̧tö̧mä päitö: TÖÄ̧NÄ̧HUA̧ DIOSMÄ päö: Topätucuí! TTÖMÄ chuädösä José ahuäruhuärö Efraín umunä̧ kö̧cuȩ̈tö̧rö̧ jahuajö̧ta'anö Israel ttö̧ja̧ ttacuäruhuä 'cotörö'inä Judá isotucutä ji̧nä̧ yo̧mȩtȩ pättiapäö ja̧'hua̧'a̧nö̧ jȩpu̧tä̧ TTÖ chumunä pätti'apäö. ' ²⁰ Cu̧mu̧nä chu̧ä̧rö̧ kä̧cui̧jó to̧kȩ̈rȩ jo̧mȩ hui̧cuȩyu̧tti̧nöji̧nömä adiu to̧pä̧rö̧. ²¹ Ji'ähui, TU̧RU̧HUA̧ DIOMÄ pä'ö: ¡Topätucui! TTÖMÄ Israel ttö̧ja̧ korotö tti̧rȩjä̧nä̧ tti̧'chi̧no̧mȩttö̧ rä'epö chi̧cuä̧cua̧sä̧. Pperecuächinätö̧ ttö̧jo̧mȩttö̧ ca̧ca̧tö̧ tti̧rȩjä̧ra̧'a̧cu̧ chi'chächäcuotö. ²² Ji̧nä̧ ji̧jä̧tȩnä̧tä̧ ttö̧jo̧cu̧nä̧ jȩchä̧cuo̧tö̧, Israel muä'quiyunä ka̧cuä̧ttö̧'i̧nä̧, ttu̧ru̧hua̧ hue'örömä ya̧tȩrö̧tä̧ ttu̧ju̧nä̧rä̧cuo̧tö̧, po yabocumä ta'are tti̧rȩji̧yö̧mä̧ jö̧ juiyäcua'a. TTuruhuo'inä tta'are hue'ähuämä juiyäcua'a. ²³ Ja'huanö ja̧'a̧ttö̧ po yabocumä yapare ttö̧'ä̧na̧hua̧rö̧ ucuo teäcuähuä'inä juiyäcua'a, jarodö jȩä̧cuä̧huä̧'i̧nä̧, koro suronä jȩ'ä̧cuä̧huä̧'i̧nä̧. Ttötä ppä̧dä̧dä̧cua̧sä̧ jahuätö suronä jȩtti̧nö̧'i̧nä̧ si'epö icu, adiunätä pätti'önä jȩchä̧cuo̧tö̧, chumuhuäyotö pätti'önä TTÖTÄ jä̧cua̧'ä̧ TÖ̧Ä̧NÄ̧HUA̧ Diosmä. ²⁴ TTÖ chu̧mu̧huä̧yä̧ David jä̧cua̧'ä̧ jahuätö ttu̧ru̧hua̧mä̧. Ja̧'hua̧nä̧ ja̧'a̧ttö̧ ya̧tȩ ja'hutörö o'ipö ö̧jä̧cua̧, ja̧'hua̧nö̧ ja̧'a̧ttä̧ ja'huätömä cuettächäcuotö ttö chamucuädinomenätä̧ ja̧'hua̧ta̧'a̧nö̧ hua'adö ttu̧ju̧nä̧cuo̧tö̧ jȩtta̧ pä'ö huedinö'inä ju̧nä̧tä̧ kä̧nö̧. ²⁵ Jahuätömä ttö̧jo̧cuä̧cuo̧tö̧ chu̧mu̧huä̧yä̧ Jacob'rö chi̧yi̧nä̧jä̧ rȩjȩnä̧, ttä̧dä̧tö̧ mi̧nä̧ ttö̧ji̧nä̧jä̧nä̧. Ja'huätönä 'cuä'opönä juȩnȩtä̧ ttö̧jo̧cuä̧cuo̧tö̧, ja'huätö, tti̧tti̧mö̧ ja̧'hua̧ta̧'a̧nö̧ ttö̧nä̧mu̧'i̧nä̧, jua'amä chu̧mu̧huä̧yä̧ David 'cuäopönätä ttu̧ru̧hua̧ ja̧'a̧ttö̧. ²⁶ Ttö̧mä̧ jahuätöcu huȩnȩ juiyönä eseu tö̧ja̧ pä'ö kä̧cuä̧huä̧ pä'ö chö̧jö̧nä̧cua̧sä̧. Peipocö juiyönä pä'ö ku̧nä̧huä̧ jä̧hua̧'a̧ jähuätöcumä. Ttömä jȩpö̧cö̧nö̧'i̧nä̧, ya'acu rö̧'ä̧nö̧'i̧nä̧ ja̧hua̧ta̧'a̧nö̧ päcuajuo pä'iönä Ttö suroju jui̧'a̧ chö̧jä̧jä̧ kä'co ku̧nä̧ jȩchä̧cua̧sä̧. ²⁷ Ttö chö̧jo̧mȩmä̧ jahuätöcutä jä̧cua̧'a̧; Ttömä Tö̧ä̧nä̧hua̧ Dios chä̧cua̧sä̧, ja̧hua̧ta̧'a̧nö̧ jahuätömä chidepiyu jä̧hua̧'a̧. ²⁸ Ja̧hua̧nö̧ ja̧'a̧ttö̧tä̧ pi̧jä̧ ttö̧ja̧ ttö̧huo̧juä̧cuo̧tö̧ Ttötä ja̧'a̧ TTÖ̧Ä̧NÄ̧HUA̧ Israel ttö̧ja̧ttö̧ cä̧'ȩpö̧ ku̧nu̧mä̧, Ttö suroju jui̧a̧ chi̧jä̧jä̧ päcuajuo pä'inä ttö̧'cä̧tȩ ko̧mȩnä̧mä̧".