¹ Jitämä ucu ja̧'a̧, pi̧jä̧ ttö̧ja̧sa̧ i̧tti̧, ji'ähuäji Israel de'iyura̧'a̧ pa̧'a̧nö̧ pä'ö: Isreael De'iyunä ka̧cuä̧tö̧, ä̧ju̧cuä̧tu̧cui̧ TTO̧Ä̧NÄ̧HUA̧ i̧huȩnȩ. ² TÖ̧Ä̧NÄ̧HUA̧MÄ̧ pa̧'a̧nö̧ pä'ö: Ta̧bo̧'cha̧mä̧ pa̧'a̧nö̧ pä'ö ucurumä, "¡Iso päi'önä!" ja̧hua̧nä̧ ja̧'a̧ttö̧mä̧ "Täbocu ka̧cui̧nä̧tö̧'i̧nä̧ jitämä ujutu jö̧ta̧'a̧nä̧ amucuädätö ja̧'a̧," ³ Ja̧'hua̧nö̧ ja̧'a̧ttö̧mä̧ pa̧'a̧nö ji'ähui: TÖ̧Ä̧ÖNÄ̧HUÄ̧ Diosmä pa̧'a̧nö̧ pä'ö: cu̧jo̧mȩttö̧ katä juocuächa'attö ja̧'hua̧ta̧'a̧nö̧ cuaboiyotö ucuru koromettö̧ ichö ttörohuähua'attö̧, ko̧ro̧jä̧ra̧'a̧ttö̧ ichäji̧jä pocumä; Ucumä ichäjijä ttö̧ja̧ ya̧'a̧huä̧'chö̧ tucuocunä, ttö̧ja̧ ttö̧ji̧nä̧ pä'ächö. ⁴ Ja̧'hua̧nö̧ ja̧'a̧nä̧, Israel de'iyu, ä̧ju̧cuä̧tu̧cui̧ TÖ̧Ä̧NÄ̧HUA̧ Dios i̧huȩnȩ: TÖ̧Ä̧NÄ̧HUA̧ Diosmä pa̧'a̧nä̧ pä'ö de'iyunä ja̧'hua̧ta̧'a̧nö̧ mö̧ä'quiyunä ka̧cuä̧tö̧rö̧, ajehuiyä huerächö o̧du̧nä̧ ja̧'hua̧ta̧'a̧nä̧ mö̧ä'quiyu kada'ca jo̧mȩ, katä jo̧mȩ ya̧tȩ'i̧nä̧ ö̧jo̧co̧mȩ ötahuiyä'inä tticuipinomä juȩnȩmä̧ jacuä ka̧cu̧ e'tötä ya̧'a̧huä̧'chö̧tä̧ jȩpä̧tö̧ ppeyanä ötähuiyä jö̧nä̧ ka̧cuä̧tö̧mä̧. Ja̧'hua̧nö̧ ja̧'a̧nä̧ TÖ̧Ä̧NÄ̧HUA̧ Diosmä pa̧'a̧nö̧ pä'ö: ⁵ TTÖMÄ isopäi'önätä chö̧'ä̧i̧mä̧ ocuränätä ucuocuäjisä pi̧jä̧nä̧ ka̧cuä̧tö̧ pättä'chomenämä, Edom ttö̧ja̧rö̧mä̧ chöjö'cöjuiyönä jäcusä ja̧'hua̧ta̧'a̧nö̧ o'catoi'önärö chi̧rȩjä̧nä̧ ichö ka̧cui̧nä̧tö̧rö̧, ja̧'hua̧ta̧'a̧nö̧ todärenä amucuädö jȩpä̧nä̧tö̧rö̧'i̧nä̧: ttamiso'quinä esehuätöjä pättä'anä tta̧'cua̧ru̧hua̧nä̧ kö'cähuo'cö ku̧nä̧ri̧nä̧tö̧rö̧, esecu chi̧rȩjä̧nä̧ ichö ja̧'hua̧nö̧ jȩpö̧kä̧nö̧ chi'attä cuähuä'inä cuinätö̧. ⁶ Ja̧'hua̧nö̧ ja̧'a̧ttö̧, ji'ähuaji Israel rȩjȩra̧'a̧ ja̧'hua̧ta̧'nö̧ mu'ä'chiju juttä ka̧cuä̧tö̧rö̧'i̧nä̧, ajé jäyotonä ka̧cuä̧tö̧rö̧ ppämäröppänä ka̧cuä̧tö̧rö̧, TTÖ̧Ä̧NÄ̧HUA̧ Diosmä pa̧'a̧nö̧ pä'ö: !Iso päi'önä ja̧'a̧! juiyo rö̧'ä̧nä̧ chamisurächi'äcu TTÖ pa̧'a̧nö̧ pä'ösä jua'amä ucuturu ruhuäcuiyä pa̧ja̧cu̧nä̧ su̧ro̧jö̧nä̧ huo̧ttä̧'ä̧ttö. ⁷ Ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧ Diosmä pi̧yȩ pä'ö: Ttö'inä chumö cä̧dȩpä̧cua̧sä̧ ja̧huä̧jä̧ rȩjȩnä̧ ka̧cuä̧tö̧ ucuturu ttottepomenä isopäi'önä jȩchä̧cua̧sä̧ pä'ö, isopäi'önä ucututä dä'ärö̧jö̧nä̧ jȩ'cui̧'i̧nä̧tu̧cu̧ cu̧ju̧nä̧rä̧tu̧cua̧'a̧ttö̧. ⁸ Ja̧'hua̧nö̧ ja̧'a̧nä̧ ucutu, Israel deiyunämä, dauhuiyä bäreu bahuäcua'a, u̧huä̧ju̧'i̧nä̧ huȩjä̧cua̧'a̧ Ttö chi̧tti̧mö̧ Israel ttö̧ja̧rö̧, täcö tö'cö päia'a ppa̧huä̧chä̧cua̧'a̧mä̧. ⁹ Topihuä, Ttömä kö̧sä̧ucutunä, ja̧'hua̧ta̧'a̧nö̧ Ttötä tta̧dä̧rä̧cua̧sä̧; ucututä jä̧cua̧'a̧ cui'ö'cotö u̧huä̧ju̧ cu̧ju̧nä̧cuo̧tö̧jä̧. ¹⁰ Ja̧'hua̧nö̧ ja̧'a̧ Ttömä yabocu yo̧dȩpä̧cua̧sä̧ ucuturumä, de'a Israel ttidepiyunämä jä̧ttä̧jä̧tä̧ jo̧mȩnö̧ päi'äcua'a Israel ttö̧ja̧tö̧, jahuätö o'catoi'önä ötahuiyämä pä'äjita'anö̧ ttö̧ja̧cuä̧cuo̧tö̧, ja̧'hua̧ta̧'a̧nö̧ surojuoächinö̧mä̧ aditö icuähuäcua'a pä'äjita'anö. ¹¹ Ttömä jȩchä̧cua̧sä̧ yabocutä yottähuächönä u̧mä̧tö̧'i̧nä̧ ja̧'hua̧ta̧'a̧nö̧ de'a isotörö'inä ja̧'hua̧nö̧ ja̧'a̧ttö̧ yabocutä yottähuächäcuotö ja̧hua̧nö̧ ja̧'a̧mä̧ pä'äjita'anö̧ adiu yocuähuätucunä. Ja̧'hua̧nö̧ ja̧'a̧nä̧ Ttö jȩchä̧cua̧sä̧ ucu yabocumä adiu cu̧ja̧cuä̧tu̧cua̧ pä'ö pä'äji jinöta'anö ucumä ki̧nö̧jä̧ ja̧'hua̧nö̧ ja̧'a̧ttö̧ jȩchä̧cua̧jä̧ yabocu rö̧cuä̧chö̧nä̧ ä'coji jinomettö̧'i̧nä̧ abonänö ja̧'hua̧nö̧ ja̧'a̧ cu̧huo̧jua̧ pä'ömä Ttötäsä TÖ̧Ä̧NÄ̧HUA̧ Diosmä. ¹² Ttömä chi'cächä̧cua̧sä̧ u̧mä̧tö̧rö̧ chidepiyu Israelttö ja̧'hua̧nö̧ ja̧'a̧mä̧ cuettächunä jȩchä̧cua̧sä̧ ucu cu̧huä̧mȩnä̧. Jahuätömä ttu̧ju̧nä̧rä̧cua̧jä̧ ja̧'hua̧ta̧'a̧nö̧ ucu jä̧cua̧'a̧ iyähuä hua̧ jä̧cua̧mä̧ ja̧'hua̧nö̧ ja̧'a̧ttö̧ porö yabocumä 'corujuo'ächocotö cui̧tti̧mö̧mä̧. ¹³ TÖ̧Ä̧NÄ̧HUA̧ Diosmä pi̧yȩ pä'ö ja̧'hua̧nö̧ ja̧'a̧ pä'ätötó ucuru: "Ucuru pä'ätö ttö̧ja̧rö̧ cu, ja̧'hua̧ta̧'a̧nö̧ cuidepiyu ttö̧ja̧ tti̧tti̧mö̧ 'coru juo'ähuäjätö. ¹⁴ Ja̧'hua̧nö̧ ja̧'a̧ttö̧ täcö cuocöjä ttö̧ja̧rö̧mä̧ juhua'a yabonö̧mä̧, ja̧'hua̧ta̧'a̧nö̧ jȩpo̧cö̧jä̧ ucu cuidepiyu ttö̧ja̧ ttajahua pä'ömä yabocu'corujuoächätörömä pi̧yȩ pä'ö TÖ̧Ä̧NÄ̧HUA̧ Diosmä. ¹⁵ Täcö, pä'ocösä yettepä'chö cuä̧ju̧cuä̧tu̧cua̧ pä'ömä korotö ichäcuähuotörö pättömä rȩbȩhuo̧ca̧'a̧ yabocunö yettepä'chumä koro ötahuiyä ttö̧ja̧. Ja̧'hua̧nö̧ ja̧'a̧ ucutumä pä'äjita'anömä ku̧ni̧po̧co̧tö̧jä̧ cui̧tti̧mö̧rö̧ tounämä cuidepiyutucunämä Ttö CU̧Ä̧NÄ̧HUA̧TU̧CU̧ Diosmä pä'ösä. ¹⁶ Ja̧hua̧nö̧ ja̧'a̧mä̧, rä̧mȩhui̧na̧'a̧ TÖ̧Ä̧NÄ̧HUA̧ i̧huȩnȩ ttörö, pa̧'a̧nö̧ pä'ina'a: ¹⁷ " ttö̧ja̧sa̧ i̧tti̧, Israel ttö̧ja̧ tti̧rȩjä̧nä̧ ttö̧ja̧cui̧nö̧mä̧, jitötä micuäunä chichinö suronä jȩä̧cuä̧tä̧ i̧jȩpi̧nä̧tö̧. Jȩttö̧mä̧ isaju ihua ku̧nä̧rä̧ju̧ suroju joächäju jö̧'a̧nö̧ ja̧'a̧ ttö chä'cattömä. ¹⁸ Ja̧hua̧nö̧ ja̧'a̧mä̧, chö̧'ä̧i̧ i̧jȩpi̧nö̧sä̧ jahuätörö pi̧jä̧ rȩjö̧ttö̧ ttöcuoja toädö tticuäji micuä'inä ja̧hua̧ta̧'a̧nö̧ yapare ttö̧ä̧nä̧hua̧rö̧ ucuo tejä̧u̧nä̧ jȩcuä̧tö̧cu̧ta̧'a̧nö̧'i̧nä̧. ¹⁹ Tti̧huȩnȩ ucuocuocotu tti̧rȩji̧yä̧nä̧ chi̧ppȩrȩti̧nä̧u̧; jahuätömä pperetötti̧cui̧nä̧u̧ pi̧jä̧ jä̧ttä̧yä̧jä̧. Ttömä jitötä ttö̧jö̧nä̧'i̧nä̧ ja̧hua̧ta̧'a̧nö̧ jȩtti̧nö̧'i̧nä̧ topö ro̧'ȩpi̧nä̧sä̧. ²⁰ Jahuätömä Tti̧huȩnȩ ucuocuocotu tti̧rȩja̧ra̧'a̧ 'chi̧nä̧tö̧, ja̧hua̧nö̧tä̧ korome 'ti̧cho̧mȩcu̧mä̧ jahuätömä, Ttö suroju jui̧a̧ chi̧mi̧ surojunätä ku̧ni̧pi̧nä̧tö̧, ttö̧ja̧ pa̧'a̧nö̧ pättomenä jahuätörö: "¿Isopäinä pitömä TTÖ̧Ä̧NÄ̧HUA̧ idepiyu ttö̧ja̧ tä̧ji̧? Jitöjamä ttö̧rȩjä̧ttö̧ rä'epö icuäcuotö ja̧'a̧". ²¹ Ja̧hua̧nö̧ ja̧'a̧nä̧ ttömä suroju jui̧'a̧ Chi̧mi̧mä̧ rȩrö̧nä̧tä̧ topösä, Israel ttö̧ja̧ pi̧jä̧ ttö̧ja̧ tti̧huȩnȩ ucuocuottö tti̧ja̧cuo̧'o̧nö̧ttö̧ surojutä tti̧jȩpä̧'cha̧nä̧'i̧nä̧, juä̧jä̧ rȩjȩra̧ tti̧'chi̧nö̧ ²² Ja̧'hua̧nö̧ ja̧'a̧ttö̧, Israel ttö̧ja̧rö̧ jiähuinösä̧: TÖ̧Ä̧NÄHUA̧ pa̧'a̧nö̧ pä'inö: ttö Israel ttö̧ja̧rö̧mä adihua pe'ömä jȩpo̧cu̧sä̧, churu̧hua̧ surojö jui̧'a̧ i̧minä̧, ucutumä suronä jȩpä̧tö̧jä̧ cui̧'chä̧tö̧cuo̧me pi̧jä̧ deiyu ttö̧ja̧cu̧ o̧dö̧nä. ²³ Ja̧'hua̧nö̧ ja̧'a̧nä jȩ'ä̧cua̧ churu̧hua̧ surojö jui̧'a̧ i̧minä, ucutu suronä jȩ'cuä̧tö̧cua̧nä deiyu ttö̧ja̧cuo̧me o̧du̧nä, deiyu ttö̧ja̧cuo̧me cä'copäteö, ucutumä suronä jȩpä̧tö̧jä̧. Ja̧'hua̧nö̧ ja̧'a̧ttö̧, pi̧jä̧ deiyunä ka̧cuä̧tö̧mä ttö̧huo̧juä̧cuo̧tö̧ ttö TÖ̧Ä̧NÄHUA̧ chö̧ja̧'a̧mä, pa̧'a̧nö̧ pä'inö̧ TÖ̧Ä̧NÄHUA̧ DIOSMÄ ucutu cuhuo̧jui̧ä̧chi̧'ä̧tö̧cuo̧menä ttömä surojö kö'cocösä. ²⁴ Ja̧'hua̧nö̧ ja̧'a̧ttö̧ Ttötä rädepäcuotöjä pi̧jä̧ deiyunä cu̧jä̧tu̧o̧mettö̧ ja̧'hua̧ta̧'nö̧ cu̧jä̧tö̧cuo̧mettö̧ o'catoinärö̧ ji̧nä yo̧metȩ päcuiäcuotöjä, ttötä chepäcuo̧tö̧jä̧ cui̧rȩjä̧tu̧cu̧ra̧'a̧. ²⁵ Ja̧'hua'a̧nö̧ ja̧'a̧ttö̧, ttötä cuämetö̧cu̧nä ajiya adihuoya ichönä jȩchä̧cua̧sä̧. ²⁶ Yo'quite ttamiso'qui jareo'qui chiyäcuotöjä̧ ja̧'hua̧ta̧'a̧nö̧ cua̧'cua̧ru̧hua̧ jacuänä ucutunä ö̧jä̧cua̧'a̧nö̧, ja̧'hua̧nö̧ ja̧'a̧ cuidepätucuttö cuami'iso'qui inähuämä baropö chi̧cuä̧cuo̧tö̧jä. Juhua'amä cuami'iso'quie jareo'qui chiya'attö. ²⁷ Ttö cha̧'cua̧ru̧hua̧rö̧mä̧ ucuturu chiyäcuasä̧ ja̧'hua̧nö̧ chiyomenä ucutumä Ttö huedinönä päö'acuä̧ cui̧'chä̧cuotöjä̧ ja̧'hua̧ta̧'a̧nö̧ ja̧u̧nä̧tä̧ 'chu̧'ä̧rä̧cuä̧huö̧ cu̧jä̧cuo̧tö̧jä̧, ja̧'hua̧nö̧tä̧ jȩ'cuä̧tu̧cua̧ja̧ ucutumä. ²⁸ Ja̧'hua̧nö̧ jo̧mȩnä̧ rȩjȩ cuä̧do̧tö̧ mi̧nä̧rö̧ chi̧yi̧nä̧jö̧ cu̧jä̧cuotö̧jä̧, ucumä chumöhuäyotö jö̧nä̧ cu̧jä̧tu̧cua̧'a̧nä̧ Ttö̧mä̧ Cu̧ä̧nä̧hua̧tu̧cu̧ jö̧nä̧ chö̧jä̧cua̧sä̧. ²⁹ Isopäi'önä o'cajuiyönä surojö jȩ'cuä̧tu̧cu̧ttö̧mä rä'epö chicuäcuäu̧jä̧. Ttömä trigo icha pä'ö a̧tȩpi̧'ö̧'ca̧mä̧ yabonö rö̧ä̧chö̧nä̧ jȩchä̧cua̧sä̧. Täcö yabonö ppäi ttucuätucunämä jȩpö̧cö̧ chä̧cua̧sä̧ ucuturumä. ³⁰ Ttö dauhuiyä u̧huä̧ju̧ huȩju̧nä̧ jȩchä̧cua̧sä̧ ja̧'hua̧ta̧'a̧nö̧ cuähuä huȩja̧'a̧ttö̧ ttö̧ja̧mä̧ ucuturu ppäi ttucuätucunä jȩttö̧ juiyäcuäcua'anö. ³¹ Ja̧'hua̧nö̧ jo̧mȩnä̧ ucutu surojö jȩ'cuu̧ä̧'i̧jä̧tu̧cu̧mä̧ cuamöcuädäcuotöjä ja̧'hua̧ta̧'a̧nö̧ jȩ'cuä̧tu̧cuo̧mȩnä̧ adihuocö jä̧'i̧jö̧'i̧nä̧ ja̧'hua̧nö̧ ja̧'a̧mä̧ surojö jȩ'cuä̧'i̧jä̧tu̧cumä̧ yahuocua'amä cui'ätucutä i̧jȩcuä̧cua̧'a̧ ja̧'hua̧ta̧'a̧nö̧ rö̧ä̧nä̧ surojö jȩ'cuä̧'i̧jä̧tu̧cu̧'i̧nä̧. ³² Pi̧yȩ Ttö jȩchö̧mä̧ adiu jȩ'cuä̧tu̧cua̧'a̧mä̧ jȩcho̧cö̧, pa̧'a̧nö̧tä̧ TÖ̧Ä̧NÄ̧HUA̧MÄ̧ huäjuetö icu ji'äu, cu̧huo̧juä̧tu̧cua̧ pä'ömä. Ja̧'hua̧nö̧ ja̧'a̧ttö̧ dä'ä ttu'ätöjä̧ ja̧'hua̧ta̧'a̧nö̧ jȩ'cuä̧tu̧cu̧mä̧ ucuotäcuähuotöcötä ja̧'a̧ Israel ttö̧ja̧ttö̧mä̧. ³³ Pi̧yȩ pä'ö TÖ̧Ä̧NÄ̧HUA̧MÄ̧: Ttö ucutunä ka̧cu̧ surojö töcö chicu mo̧ro̧mä̧, ötahuiyänä ku̧jä̧tu̧cu̧nä̧ jȩchä̧cua̧sä̧ ja̧'hua̧ta̧'a̧nö̧ pparö icuä o̧du̧nä̧'i̧nä̧ ötahuiyä cuäräbe'ätucunä. ³⁴ Isopäi'önä ucutumä rȩjȩ surojuoächinä̧jä̧ cuaditäcuotöjä, o'catoi'önä ju̧huȩnȩnä̧ 'cuä'opätö ju̧huä̧jä̧mä̧ surojuoächina'amä yabonö tottö juiyäcua'anö. ³⁵ Ja̧'hua̧nö̧ ja̧'a̧ttö̧ jahuätömä pättäcuotö: Pi̧jä̧ rȩjȩmä̧ to̧ä̧chä̧chi̧nä̧jä̧, ja̧'hua̧nö̧ ja̧'a̧nä̧ pärohuächina'a Edén pätta a̧'cua̧rö̧nä̧; ötahuiyä'inä katä ki̧na̧'a̧ ja̧'hua̧ta̧'a̧nö̧ ttö̧ja̧'i̧nä̧ to'epächinä̧tö̧ surojuoächina'a juhua'atäcu kä'ö icuinätö, jitämä 'quiyönä aditö icuähua'a ja̧'hua̧nö̧ ja̧'a̧ttö̧ jitämä ttö̧ja̧cua̧'a̧. ³⁶ Ja̧'hua̧nö̧ ja̧'a̧ ucutu cuippeyänä ötahuiyänä ka̧cuä̧tö̧mä̧ korojä̧ ttö̧ja̧mä̧ ttu̧huo̧juä̧cuo̧tö̧ Ttötä ja̧'a̧ TTÖ̧Ä̧NÄ̧HUA̧MÄ̧ pä'ö. Ttömä pä'äjita'anö cä'epusä surojuoächinö̧mä̧ ja̧'hua̧nö̧ ja̧'a̧ttö̧ pä'äjinö ta'anö jȩchä̧cua̧sä̧ surojuottepi̧yä̧u̧ jarotti'inö̧mȩ, Ttötäsä TTÖ̧Ä̧NÄ̧HUA̧ Dios, pädäjimä jȩchä̧cua̧sä̧. ³⁷ TÖ̧Ä̧NÄ̧HUA̧ Dios pi̧yȩ pä'ö: pä'äjita'anö yabocutä jȩchä̧cua̧sä̧, Israel ttö̧ja̧mä̧ jättepäcuotö ppädädatö pä'ö jahuätörö, yodepä̧cua̧sä̧ yabocutä ttirecuächunä ttö̧ja̧rö̧mä̧, ajicuäcuähuotö 'cua̧rö̧nä̧. ³⁸ Ötahuiyä surojuoächinönämä ttö̧ja̧ rö̧ä̧nä̧ ttirecuäcuotö, ovejastö̧ a̧'cua̧rö̧nä̧, pä'cäri ko̧mȩnä̧ ttȩpa̧tö̧ pä'ö, Jerusalénra̧'a̧ ttiyatö pä'ö cuä'ö icu iyähuome, ja̧'hua̧nö̧ ja̧'a̧ttö̧ ja̧u̧nu̧ ttu̧huo̧juä̧chi̧'ä̧cuo̧tö̧ TTÖTÄSÄ TTÖ̧Ä̧NÄ̧HUA̧ Diosmä pä'ö.