¹ Ja̧'hua̧nö̧ ja̧'a̧ttö̧ TTÖ̧Ä̧NÄ̧HUA̧ i̧huȩnȩ ttörö rä̧bȩhui̧na̧'a̧, pa̧'a̧nö̧ pä'ö: Pi̧jä̧ ttö̧ja̧sa̧ i̧tti̧, ji'ähuäji Israel ttö̧ja̧ tturuhuotörö. 'Cuä̧'o̧pä̧cuä̧ ji'ähui pa̧'a̧nö̧ pä'ö: ² TÖ̧Ä̧NÄ̧HUA̧ pa̧'a̧nö̧ pä'ö tturuhuotörö: Israelttö tturuhuotö korotö punämä ttamonätä hue'äu ka̧cuä̧tö̧. ¿Tturuhuotö huotömä tä̧ji̧mö̧rö̧mä̧ tta̧ttä̧ra̧ pä'ömä juiya'a tä̧jí̧? ³ Ucutumä idepä'inä rö̧'ä̧nä̧ cuätöjä ja̧'hua̧ta̧'nö̧ uhuo'chetö adicuä̧ta̧ 'ca̧tä̧huä̧tö̧jä̧. Ucutumä isotöttö'inä buottö topö cuä'ätöjä. Ttu̧cuä̧'i̧nä̧ adiunä iyö tta̧'a̧ro̧co̧tö̧jä̧. ⁴ Ucutumä nattächo̧mȩnä̧ a̧di̧tä̧rö̧'i̧nä̧ tta̧'a̧rö̧co̧tö̧jä̧, ttöttähuiyä pȩjä̧u̧ru̧'i̧nä̧ hua'epö tta̧'a̧ro̧co̧tö̧jä̧. ucutumä 'ta'ipätörö'inä ja̧'a̧tä̧ topätöjä, ucutumä re'tehuächätörö'inä mä̧nä̧cu̧ i'chächö ku̧no̧co̧tö̧jä̧. Ja̧'hua̧nö̧ jo̧ca̧'a̧, ucutumä jahuätörömä pä̧i̧cu̧nä̧ cujurucutä hue'ätöjä. ⁵ Ja̧u̧nu̧ o'ca'amä pperecuächinätö ttu̧ru̧hua̧ to'ötä, jahuätömä isotö pä̧i̧cuä̧tö̧ de'a ka̧cuä̧tö̧ ttucui'atö pä'ötä patecuächinätö̧, ttipperecuächinö o'ca'amä. ⁶ TTÖ chä̧ji̧mö̧mä̧ pe'ächächinätö de'ara̧'a̧ ja̧'hua̧ta̧'a̧nö̧ muä'chiju juttä ra̧'a̧cu̧, pi̧jä̧ttö̧mä̧ ruhuäcuiyä pa̧ja̧cu̧nä̧ pperecuächinätö. Jitä pä̧nä̧ jubu ya̧tȩ'i̧nä̧ u̧so̧co̧u̧. ⁷ Ja̧'hua̧nö ja̧'a̧ttö̧, ttö̧ja̧ tturuhuotö, ä̧ju̧cuä̧tu̧cui TU̧RU̧HUA̧ i̧huȩne: ⁸ Ttömä kö̧sä̧, pa'anö̧ pä'ö TU̧RU̧HUA̧ TTÖ̧Ä̧NÄ̧HUA̧MÄ̧, tta'anö̧ pä'ö ttö chäjï̧mu ttö̧ja̧cuo̧memä ja̧'a̧tä̧ to'cuätucuättö̧ de'a isotö pä̧'ï̧cuä̧tö̧ o'cato'önä ȩmipu̧ ttöcuȩ juoächa'anä, tta'a̧nö pä'ö toa'attö̧ ttö̧ja̧ ttö̧ru̧hua̧mä ja̧hua̧ta̧'a̧nö̧ ttö̧ja̧ ttöröhuotö'önä̧ usocotö ttö chäjï̧mu ttö̧ja̧cuo̧me, ja̧'hua̧'a̧nö̧ jo̧ca̧'a̧ ttö̧ja̧ ttöröhuotömä jittötä tta̧'a̧rä̧cuä̧huä̧tö̧ ja̧hua̧'a̧nö̧ ja̧'a̧nä ttö chäjï̧mu ttö̧ja̧co̧memä tta̧'a̧ro̧co̧tö̧ pinätö. ⁹ Ja̧hua̧'a̧nö̧ ja̧'a̧ttö̧, ttö̧ja̧ tturuhuotö, ä̧ju̧cua̧tu̧cuï̧ Tu̧ru̧hua̧ i̧huȩne: ¹⁰ TU̧RU̧HUA̧ TÖ̧Ä̧NÄ̧HUA̧MÄ pa'anö̧ pä'ö: Topätucui! Ttömä kö'cocösä ttö̧ja̧ ttöruhuotörömä, ja̧hua̧'a̧nö̧ ja̧'a̧ttö̧ ttömä ro̧dȩpä̧cua̧sä̧ suronä jȩttï̧na̧'a̧ttö̧ ttö chäjï̧mu ttö̧ja̧cuo̧me. Jua̧'a̧nö̧ o'ca̧'a̧ Ttömä si'epu chicuäcua̧sä̧ ttö̧ja̧ tturuhuotörömä; ja̧hua̧'a̧nö̧ ja̧'a̧ttö̧ Ttö̧ja̧ tturuhuotörö tta̧munä tta̧'a̧rä̧cuä̧huä̧tö̧rö̧mä ro̧dȩpä̧cua̧sä̧ ttö chäjï̧mu ttö̧jo̧ca̧ttö̧mä cuocöjä, ttö chäji̧mu ttö̧jo̧ca̧ttö̧mä ucutu cu̧cuȩtu̧ ju̧nämä juiyäcua'a. ¹¹ Ja̧hua̧nö̧ ja̧'a̧ttö̧ pa̧'a̧nö̧ pä'ö TU̧RU̧HUA̧ TÖ̧Ä̧NÄ̧HUA̧MÄ:¡ Topätucui! Ttömä cha̧mu̧nä̧tä cusäcua̧sä chä̧jimu o̧huȩja̧turumä̧ ja̧hua̧nö̧ ja̧'a̧nä̧ ttömä usu'chu̧sä̧ chä̧ji̧mö̧ ö̧huȩja̧turu ja̧hua̧nö̧ ja̧'a̧nä̧ tta̧'a̧ru 'chu̧sä̧ jahuätöru. ¹² O̧huȩja̧tö̧rö̧ tta̧huära̧cuähua̧ isa̧ a̧jimuru usu mo̧ro̧ jä̧inö̧'a̧nö̧ ja̧hua̧ta̧'a̧nö ja̧u̧mä̧ a̧jimö o̧huȩja̧tö̧ ttö̧jäcuomettö̧mä̧ otonänö kö̧,ja̧hua̧nöjunätä ttömä̧ usu 'chusä chä̧jimu o̧huȩja̧turu, ja̧hua̧nö̧ ja̧'a̧nä̧ ttömä isoppa rö̧ mo̧ro̧ i̧nä̧ yo̧'cu jo̧menä̧ i̧nä̧ ppa̧'a̧dö̧ 'chö̧sä̧ o'catoiönä ttö̧ja̧cuö̧mȩ o̧dunä̧ttö̧ räopu pperecuächinätö̧rö̧ . ¹³ Ja̧hua̧ta̧'a̧nö̧ ttömä räepu chi̧cua̧cua̧sä̧ ötahuiyä ttö̧ja̧ ttö̧'cä̧tȩttö̧mä̧; ja̧hua̧nö̧ ja̧'a̧nä̧ ttömä tti̧rejära̧'a̧ttö̧ kämädö̧ jinä̧ yo̧mȩtȩ pättiäcuo ja̧hua̧nö̧ ja̧'a̧nä̧ tti̧rejära̧'a̧ chi'cächäcuotö.ttömä Israel ötohuiyä ttö̧ja̧rö̧mä̧ kunu chi̧ya̧cua̧sä mä̧jiyä'chemä riä̧nätä̧ juru'unä ja̧hua̧nö̧ ja̧'a̧ttö̧ ttöja̧cuejä o̧du̧nä̧ttö̧mä̧ ¹⁴ Ja̧hua̧nö̧ ja̧'a̧nä̧ adihuä juäi mä̧jiyä'chettö ku̧nu̧ 'chu̧sä̧ ttömä; mä̧jiyä'che ka̧cuo̧metä̧ ttö̧jäcuotö Israel ötahuiyä ttö̧ja̧mä. Ja̧hua̧nö̧ ja̧'a̧ttö̧ jahuätömä̧ ttö̧ja̧cua̧ pä'ö adihuometä̧ 'chä̧nö̧ ttujuru ttȩmä̧cuotö, mäjiyä'che riänä̧ ka̧cuomȩtä̧, ja̧hua̧nö̧ ja̧'a̧nä̧ jahuätömä Israel muä'cara'a ttucuäcuotö. ¹⁵ Ttömä cha̧munä̧tä̧ tta̧'a̧rö̧ 'chö̧sä chä̧jimö̧ ttucua'anä ja̧hua̧nö̧ ja̧'a̧nä̧ ttömä̧ cha̧munä̧tä̧ jȩcha̧cua̧sa ttujuru ttȩmunä̧ pi̧yȩtä̧ ucuocudo TU̧RU̧HUA̧ TÖ̧Ä̧HUA̧MÄ̧. ¹⁶ Ja̧hua̧nö̧ ja̧'a̧nä̧ Ttömä suronä jȩttä̧u̧ re'tehuächinäturu̧ emö̧ ppa̧'a̧dö̧ chi̧'cha̧cua̧sä. Ja̧hua̧nö̧ ja̧'a̧nä̧ Ttömä o̧huȩja̧tö̧ ttihue'cä 'tȩähui'inätörö ppa̧'a̧dö̧ chi̧'cha̧'a̧nä inä̧ o̧huȩja̧ na̧'a̧churumä u̧'i̧pönä̧ jȩcha̧cua̧sä ja̧hua̧nö̧ ja̧'a̧nä̧ juruhuäru inä bärȩpa̧ru̧ inä jö̧nä̧mä̧ ttömä jȩpö chi̧cua̧cua̧sä . Ttömä̧ jue'ö jahuänätä tta̧'a̧rö̧ chi̧'cha̧cua̧sä̧. ¹⁷ Ja̧'hua̧nö̧ ja̧'a̧ttö̧ jitämä, ucutumä Ttö chä̧ji̧mö̧jä̧ pa̧'a̧nö̧ pä'ötó TTÖ̧Ä̧NÄ̧HUA̧ Diosmä: Topätucui, Ttötä jä̧cua̧'a̧ röji pä̧dä̧cua̧mä̧ ja̧'hua̧nö̧ ja̧'a̧ttö̧ ovejastömä ja̧'hua̧ta̧'a̧nö̧ ovejasto̧cu̧ 'cä̧tȩnä̧ ovejastö̧ u̧mä̧tö̧'i̧nä̧, ja̧hua̧ta̧'a̧nö̧ chivostö̧ u̧mä̧tö̧'i̧nä̧. ¹⁸ ¿Täcö iso jo̧a̧'a̧ adiu mȩji̧yä̧ttö̧ cucuätucua pä'ömä, ja̧'hua̧nö̧ ja̧'a̧nä̧ ucutu 'cuȩ'cu̧ jȩ'cuä̧tu̧cua̧ pä'ö cu̧jä̧pö̧nä̧ mȩji̧yä̧ ka̧cui̧pä̧ji̧mä̧; ja̧'hua̧ta̧'a̧nö̧ ajiya saruhuoya au ja̧'hua̧nö̧ ja̧'a̧nä̧ ucutu iditö cuicuätucua pä'ö cu̧jä̧pu̧tu̧cu̧nä̧ ajemä. ¹⁹ ¿Chä̧ji̧mö̧ ovejastö̧mä̧ ttucua pä'ö ja̧'a̧ ucutu cui̧'cuȩ'cuä̧tu̧cu̧ cu̧jä̧pö̧tu̧cu̧nä̧ ja̧hua̧ta̧'a̧nö̧ au ucutu cuiditäcuoya cu̧jä̧pi̧tu̧cu̧nä̧? ²⁰ Ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧ Diosmä pa̧'a̧nö̧ pä'ö jahuätörö: ¡Topätucui! Ttötä ja̧'a̧ ro̧dȩpä̧cua̧mä̧ ovejastö̧ bärepätörö'nä ja̧'hua̧ta̧'a̧nö̧ si'ähuätörö'inä. ²¹ Ja̧'hua̧nö̧ ja̧'a̧nä̧ ucutumä ki'opäjätöjä̧ cui'esubätucunä ja̧'hua̧ta̧'a̧nö̧ cu'upi'canä, ja̧'hua̧nö̧ ja̧'a̧ttö̧ ucutumä dudupu ya'opö icuätöjä̧ juiyöpätörö o'catoi'önä̧rö̧ rȩjȩttö̧'i̧nä̧ oto. ²² ¡TTÖ chä̧ji̧mö̧mä̧ surojöttö ttö̧ji̧pö̧nä̧ ppädädäcuotö jahuätörömä ya̧tȩ'i̧nä̧ mȩ'o̧'cö̧ jä̧cua̧, ttötäjä̧cua̧'a̧ röji pä̧dä̧cua̧mä̧ ja'huätö ovejattöttö ja̧'hua̧ta̧'a̧nä̧ koroyörö'inä! ²³ TTÖTÄ chu̧ju̧nä̧cua̧sä̧ ja'huätö ttu̧ru̧hua̧ päi'önä öjäcuarömä, ja̧u̧mä̧ chu̧mu̧huä̧ya̧ David ja̧'a̧. Ja̧u̧tä̧ ttu̧ru̧hua̧ pi'önä o̧i̧pä̧cua̧, ttu̧cua̧'i̧nä̧ i̧yä̧cua̧, ja̧u̧tä̧p jä̧cua̧'a̧ ttu̧ru̧hua̧ päi'önä ö̧jä̧cua̧mä̧. ²⁴ TTÖTÄ jä̧cua̧'a̧ TÖ̧Ä̧NÄ̧HUA̧ Dios jö̧nä̧ chö̧jä̧cua̧mä̧, chu̧mu̧huä̧yä̧ Davidmä ja'huätö ttu̧ru̧hua̧ päi'önä ö̧jä̧cua̧, TTÖ TTÖ̧Ä̧NÄ̧HUA̧MÄ̧ ja̧'hua̧nö̧tä̧ pä'ösä röjimä. ²⁵ Ja̧u̧nu̧ o̧'ca̧'a̧ TTÖTTÄ jȩchä̧cua̧sä̧ adiu esecutä ttö̧jö̧nä̧ ja̧'hua̧ta̧'a̧nä̧ de'a isotö suropätö pä̧i̧cuä̧tö̧rö̧'i̧nä̧ ko̧ro̧jä̧cu̧ pporädöm chi̧cuä̧cua̧sä̧, ro̧huä̧pi̧jö̧ juiyönä rȩjȩ de'a jui̧yä̧jä̧nä̧'i̧nä̧ de'ä jo̧mȩ'i̧nä̧ ä'ö ttö̧jä̧cua̧'a̧nö̧. ²⁶ TTÖ choadihuä chi̧jȩpä̧cua̧sä̧ ja'huätörö o'catoi'önä muä'chiju jäyänä ka̧cuä̧tö̧tö̧'i̧nä̧, ajiya huȩdä̧ci̧a̧sä̧ ja'huätörö pätecuächo̧mȩnä̧. Ppädäcuöhuä päi'önä iyähui'äcuoyä juoyamä. ²⁷ Ja̧u̧nu̧tä̧ dauhuiyä u̧huä̧ju̧'i̧nä̧ iyäcua'a, rȩjȩ ku̧nä̧huä̧ cuähuä'inä ppuruhuächi'äcua'a. Chä̧ji̧mu̧mä̧ adiunä ttö̧jä̧cuo̧tö̧ ttä̧mo̧nä̧ tti̧rȩjä̧nä̧; Ja̧u̧nu̧tä̧ ttu̧huo̧huä̧chi̧'ä̧cuo̧tö̧ iso päi'önä ja̧u̧tä̧ ja̧'a̧ TTÖ̧Ä̧NÄ̧HUA̧ pä'ö, tti'ärenä ttö̧'ȩpä̧rö̧ ka̧cu̧ jȩpö̧ chicuomenä, ja̧'hua̧ta̧'a̧nä̧ pä̧'i̧cu̧nä̧ ttaditönä huȩttä̧rä̧u̧ ttö̧jo̧mȩttö̧ ra'epö chicuomenä. ²⁸ Jahuätömä juhua'a yabänämä ttö̧ja̧mä̧ 'chottipocou̧ ttäcuotö, ja̧'hua̧ta̧'a̧nö̧ de'a isotö pä̧i̧cuä̧tö̧'i̧nä̧ 'chä'chäpö tticuoco̧u̧ ttäcuotö. Juhua'amä 'quiya'a jacuätä ttö̧ja̧cua̧'a̧ttö̧ ja̧'hua̧ta̧'a̧nö̧ ya̧tȩ'i̧nä̧ yepä'cho̧co̧u̧ ttäcuotö. ²⁹ Isopäi'önä yo̧mȩtȩ cuähuä ka̧cuo̧mȩ u̧ni̧chä̧rö̧ ttö̧ja̧cua̧ pä'ö chaditiyäcuotö, ja̧huä̧jä̧ rȩjȩttö̧mä̧ ppäi ttuttiyäcua'anö ja̧'hua̧ta̧'a̧nö̧ ttö̧ja̧'i̧nä̧ jahuätörö yettepä'chö juiyäcua'anö. ³⁰ Ja̧'hua̧nö̧ ja̧'a̧ttö̧ jahuätömä TÖ̧Ä̧NÄ̧HUA̧ Diosmä ujututäcu kö̧ pä'ö ttu̧huo̧juä̧cuo̧tö̧. Jahuätömä Israel ttö̧ja̧mä̧ chumöhuäyotö ja̧'a̧, pa̧'a̧nö̧tä̧ TÖ̧Ä̧NÄ̧HUA̧ Diosmä huäjuetö icu ji'äu. ³¹ Isopäi'önä ucutumä chä̧ji̧mö̧ ovejastö̧jä̧ isotö ttucuä'cua ko̧mȩ ka̧cuä̧tö̧ ja̧'hua̧ta̧'a̧nö̧ chumöhuäotö ja̧'a̧, ja̧'hua̧nö̧ ja̧'a̧ttö̧ Ttötä ja̧'a̧ Diosmä, pa̧'a̧nö̧tä̧ TÖ̧Ä̧NÄ̧HUA̧ Diosmä huäjuetö icu ji'äu.