¹ Kä̧hua̧tö̧ ta̧ju̧ jo̧mȩ päi'omenä du'huottömä ta̧ju̧ jo̧mȩ ja̧'a̧ 'cuäopina'a̧, kä̧'hua̧ttö̧ ä̧cuo̧mȩnä̧ mo̧ro̧, CHU̧RU̧HUA̧ i̧huȩnȩ ttörö rä̧bi̧hui̧na̧'a̧, pa̧'a̧nö̧ pä'ö: ² "Pi̧jä̧ ttö̧ja̧sa̧ i̧tti̧, Faraónrö̧ cua̧'cua̧ttä̧nö̧ pä'i'ö ji'ähui, Egipto ru̧hua̧; ja̧u̧ru̧ huopönö ji'ähui: Pi̧jä̧ rȩjȩnä̧ ttö̧jo̧cuo̧mȩttö̧mä̧ mö̧yähui muä̧ya̧ ja̧'i̧nö̧'a̧nö̧ hua̧jä̧, ja̧'hua̧nö̧ ja̧'a̧nä̧ Dä'ähuotottö i̧sa̧ bu'o jä̧'i̧nö̧'a̧nö̧ hua̧jä̧; ucu ja̧'a̧ ajiya yu'epömä, ucumä yu'epöjä cu̧jä̧pi̧yä̧nä̧ ja̧'hua̧nö̧tä̧ jȩpö̧jä̧ ajiyamä. ³ TU̧RU̧HUA̧ TÖ̧Ä̧NÄ̧HUA̧MÄ̧ pa̧'a̧nö̧ pä'ö: Ja̧'hua̧nö̧ ja̧'a̧ttö̧ ji̧nä̧ yo̧mȩtȩ päcui'ätucuome ma'ayä kädäcuotöjä, ja̧'hua̧nö̧tä̧ cä̧ttȩpä̧cua̧jä̧ TTÖ chumapayättö. Rȩjȩtä̧ ja̧ro̧chi̧'ä̧cua̧jä̧ ppadäcuähua juiyönä. ⁴ De'a jo̧mȩ ja̧ro̧chi̧'ä̧cua̧jä̧ ja̧'hua̧nö̧tä̧ isotö co̧'ä̧rä̧tö̧ ma̧ttä̧mä̧cua̧jä̧; o'catoi'önä isotö pi̧jä̧nä̧ ka̧cuä̧tö̧mä̧ ttucua ppä̧ö̧rö̧jä̧u̧mä̧ ucuru cuä̧nö̧ ttesehuäcuotö. ⁵ Cuidepä huahuipönä cuhuaparettö de'yu o'cajuiyönä ri̧dä̧huä̧cua̧sä̧ ja̧'hua̧ta̧'a̧nö̧ möä'quiyö'inä, de'iyu pämärä'ca jo̧mȩ'i̧nä̧, möä'ca po̧ri̧yä̧'tä̧ jo̧mȩ'i̧nä̧. ⁶ Rȩjȩ'i̧nä̧ tudepä̧cua̧sä̧ cucuojamä, juhua'amä rȩbȩhuä̧cua̧'a̧ möä'quiyö jubö, ja̧'hua̧nö̧ ja̧'a̧ttö̧ ja̧u̧nä̧tä̧ suädi'äcua'a ajehuiyämä. ⁷ Ja̧u̧nu̧ ucuru Ttö si'epu chicuomenä, jȩchä̧cua̧sä̧ mo̧ro̧jä̧'i̧nä̧ yo̧ä̧chi̧'ö̧nä̧ ja̧'hua̧ta̧'a̧nö̧ si̧ri̧'kö̧'i̧nä̧na̧tti̧'ä̧cuo̧tö̧, mo̧ro̧ kä̧hua̧rö̧ kä̧ru̧'koppanä ttodepä̧cua̧sä̧, ja̧'hua̧nö̧ ja̧'a̧nä̧ yodo kä̧hua̧'i̧nä̧ kä̧dȩpo̧cö̧ jä̧cua̧ yabocumä. ⁸ Ucu jähuänä na'epö chi̧cuä̧cua̧sä̧ o'cajuiyönä mo̧ro̧jä̧ dä'änö cuoumä, ja̧'hua̧nö̧ ja̧'a̧ttö̧ yo̧u̧nä̧ jȩchä̧cua̧sä̧ cui̧dȩpi̧yu̧nä̧ Ttö Cu̧ä̧nä̧hua̧mä̧ pä'ösä. ⁹ Ja̧hua̧nö̧ ja̧'a̧ttö̧ ötahuiyä tti̧jamä ri̧ä̧nätä tta̧'cua̧ tta̧ttecuä̧cuo̧tö rȩjȩ ttu̧huojuä̧chio̧ca̧'a̧ttö̧ , ttömä ucu jȩpu cuicua'a rä̧mipomenä ötahuiyä bäreunä ka̧cuä̧cuaturu inä̧ rȩjȩ cuieruhuäjä̧nä ka̧cuäturu inä̧ chi'chä̧chä̧cua̧sä̧. ¹⁰ Ötahuiyä ttöja̧rumä riänä ra̧huȩpiju 'cuäopä'chäcua'a ucu jahuänä ; tturuhuotumä yittecuä'chönätä tti̧ȩpa̧cua̧'a̧ ucu cuä'ca jo̧mettömä̧ ja̧hua̧nö̧ ja̧'a̧nä jahuätö ttä'cä jo̧mȩttö̧ chucurä'chu boreiomenä. Ja̧unu̧ pä̧nä̧mä̧ jahuätö o'cätoiönättö ya̧cu̧ po̧närumä tti̧ȩpa̧cua̧'a̧ ucu iso jucuepocu mo̧ro̧mä̧. ¹¹ Ja̧hua̧ta̧'a̧nö̧ TTU̧RU̧HUA̧ TÖÄ̧NÄ̧HUA̧MÄ̧ pi̧yȩ pä'öto: Babilonia ötahuiyä ru̧hua̧ u̧mu̧huäyotö su̧ro̧da̧umä̧ ucuru rohuäu ttichäcuotu. ¹² ttömä jechacuasä ucutu recuäturu rohuäu iso juttepunä,y ja̧hua̧nö̧ ja̧'a̧nä̧ rohuäcuä isa̧ttumä ttirȩjiyänäo kacuätö̧mä yittecuaujina̧'a̧. Ja̧hua̧nö̧ ja̧'a̧nä jahuäto suroda̧umä o'catoi'önä Egipto rejenä recuätö ka̧cuä̧turumä̧ be'epäjipu tticuäcuotu ¹³ Ja̧hua̧nö ja̧'a̧ttö̧, jȩpu̧ chicuäcuä̧sä̧ ajiya jäyänä ka̧cu̧'ï̧nä ja̧hua̧ta̧'a̧nö̧ pä̧cä̧yö̧rö̧'ï̧nä̧; ttö̧jä̧sä̧ ö̧jo̧memä adiunä ö̧ja̧peömä ppa̧huä̧chiyä̧ cua̧'a̧ ajiyamä, ja̧hua̧ta̧'a̧nö̧ pä̧cä̧yö̧ ttö̧jä̧pu̧ o̧tta̧ ttöarecua peönä juiyäcua. ¹⁴ Ja̧hua̧'a̧nö ja̧'a̧ttö̧ ttötä chiyä̧cua̧sä̧ ajiya'inä ja̧hua̧ta̧'a̧nö̧ ajehuiyä'inä̧ a̧dȩja huerächa'a jä̧ï̧nö̧'a̧nö̧ pa̧'a̧nö̧ pä'inö̧ tu̧ru̧hua̧ tï̧ä̧nähua̧ Diosmä. ¹⁵ Ja̧hua̧'a̧nö̧ ja̧'a̧ttö̧ Ttömä jȩchä̧cua̧sä̧ ju̧ȩne Egipto rȩjȩmä̧ jaroi'äcuähuome ju̧nä, ja̧hua̧ta̧'a̧nö̧ jua̧jä̧ rȩjȩttö̧mä̧ u'cajuiyönä tu̧ju̧närö̧mä 'chodi̧pä̧cuä̧'u̧, ja̧hua̧'a̧nö̧ ja̧'a̧ttö̧ Ttötä ro̧dȩpä̧cua̧sä̧ o'cateönä juȩne ka̧cuä̧tö̧rö̧, juo̧nötä̧ ttö̧huo̧juï̧'ä̧chä̧cuo̧tö̧ Ttö̧rö̧hua̧ päi'önä Chö̧ja̧'a̧mä̧. ¹⁶ Ja̧'hua̧nö̧ ja̧'a̧ttö̧ tta̧'cua̧ tta̧huȩ cuä̧cuä̧huä̧ käjä̧cua̧'a̧; ja̧hua̧nö̧ ja̧'a̧ttö̧ pï̧jä̧ ttö̧ja̧cuo̧me o'cajuiyönä ka̧cuä̧tö̧mä juä̧jä̧ tta̧'cua̧ tta̧ttȩcuä̧cuo̧tö̧ ; Egipto rȩjȩ, recuätö juä̧jä̧ tta̧'cua̧ tta̧ttȩcuä̧cuo̧tö̧, pä'inö Ttu̧ru̧hua̧ Tï̧ä̧nähua̧ Diosmä. ¹⁷ Ja̧'hua̧nö̧ 'cuäopinö o'ca'a ttö̧ja̧ ta̧ju̧ 12nö̧ a̧'ȩnä̧ kä̧hua̧ttö̧mö̧ 15nö̧ mo̧ro̧ päi'omenä TÖ̧Ä̧NÄ̧HUA̧ i̧huȩnȩ rȩbȩhui̧na̧'a̧ ttörö päina'a: ¹⁸ Pi̧jä̧ ttö̧ja̧sa̧ i̧tti̧ Egipto ttö̧ja̧ recuätö jahuätörö cuajahuäcua̧jä̧ ja̧'hua̧ta̧'a̧nö̧ jahuäjuru kidea'anä i'cächiju. Ji̧jä̧tȩ ja̧'hua̧ta̧'a̧nö̧ ttö̧ja̧ ji̧nä̧ ji̧jä̧tȩnä̧ ka̧cuä̧tö̧ ruhuo i̧yä̧hui̧'ä̧u̧ pi̧jä̧ rȩjȩttö̧ hua'are reju juhua'a yo̧'cu̧nä̧nö̧ täcunä juittäda pä'ö. ¹⁹ ¿Isopäi'önä ucumä korotöttö'inä abonänö adihua̧jä̧ tä̧ji̧? Topi rȩjȩcu̧ ja̧'hua̧ta̧'a̧nö̧ ja̧'a̧tä̧ra̧'a̧ huotucu pä̧hui̧. ²⁰ Jahuätömä totte'äcuotö curä'chu pätecu so̧ä̧'chunä to'e'inätö̧cu̧ ¡Curä'chu pä̧tȩcu̧ soä'chumä ku̧nä̧rä̧tö̧ ttu̧mö̧nä̧! Jahuä'chumä rohuäu i̧cuä̧cua̧ Egipto ttö̧ja̧ recuätörö. ²¹ Su̧ro̧da̧u̧ Seolttö juruhuätömä huȩnȩ ucuocuätö Egiptottö ja̧'hua̧ta̧'a̧nö̧ jäyänä ka̧cuä̧tö̧'i̧nä̧: ¡Täcö jo̧mȩnä̧ jȩpö̧ ku̧nä̧hua̧'a̧ hua'are rejumä! Juhua'atäcu hua'are ttutäcuome ja̧'a̧tä̧ huotörö, curä tturohuähuomettö̧ to'e'ätörö. ²² Asiria ttö̧ja̧mä̧ o'catoi'önä juhuenetä ca̧ca̧cuä̧'cotö pȩjä̧tö̧. Ttuhuaparebatä ttippeyänä sobutö cuȩä̧chä̧u̧; jahuätö o'catoi'önämä curä o'chunä cuä'äu tticuinäu ja̧'a̧, ²³ ji̧yȩ hua'are obamä reju täcuäjunä rutähua'a pa̧'a̧, ca̧ca̧cu̧ pȩjä̧tö̧rö̧mä̧ o'catoi'önätä̧. Ttuhuaparebamä ttippeyänä sobutö cuȩä̧chä̧u̧ jitö o'catoi'önä 'coru juo'ächinätö̧rö̧mä̧, curä o'chunä cuä'äu tticuinäu, jitö ttö̧ja̧ ja̧huä̧jä̧nä̧ ka̧u̧ä̧tö̧rö̧ yettecunä jö̧ i'cächinätö̧rö̧mä̧. ²⁴ Elammä ahuaruhuä recuätö o'catoi'önä̧tä̧cu̧ ju̧huȩnȩtä̧ kö̧, ttuhuaparebamä ttippeyänä sobutö cuȩä̧chä̧u̧; jahuätömä o'catoi'önätä̧ hua'äu icuinä̧tö̧. Jitö curä'chunä cuä'äu tticuinä̧u̧rö̧mä̧, ttö̧dä̧pä̧rö̧ päjure 'cui'ocuocotö pi̧jä̧ rȩjȩ dȩa̧'a̧ päte'ö jui'ächi'inä̧tö̧, jitö ja̧huä̧jä̧nä̧ ka̧cuä̧tö̧rö̧ yettecunä jö̧ i'cächinä̧tö̧mä̧ ja̧'hua̧ta̧'a̧nö̧ tta̧mö̧nä̧ pa̧ja̧tö̧ dä'ä ttuhuähuätä cuettädajä̧, rejunä jui'ächi'inä̧tu̧cu̧. ²⁵ Jahuätömä Elam ö̧'äbä aditö iyinä̧tö̧ ja̧'hua̧ta̧'a̧nö̧ ahuaruhuä o'catoi'önä̧ cuä'äu tticuinä̧u̧ ttö̧'cä̧tȩ jo̧mȩtä̧; ttuhuaparebamä ttippeyänä sobutö cuȩä̧chä̧u̧. Jitö ttö̧dä̧pä̧rȩ päjure 'cui'ocuocotö, curä'chunä cuä'äu tticuinä̧u̧mä̧, isopäi'önä ttö̧ja̧ ja̧huä̧jä̧nä̧ ka̧cuä̧tö̧rö̧ yettecunä jö̧ tti'cächina'attö̧. Ja̧'hua̧nö̧ ja̧'a̧ttö̧ tta̧mö̧nä̧ pa̧ja̧tö̧tä̧ dä'ä ttuhuähuämä cuettädäcuotö, o'catoi'önä 'corujuo'ächinä̧tö̧ reju jacuäcu juittächäcuotucu. Elammä jitö cuä'äu tticuinä̧u̧ ttö̧'cä̧tȩ jo̧mȩ kö̧. ²⁶ Juȩnȩtä̧ kä̧tö̧ ¡Mesec, Tubal, ja̧'hua̧ta̧'a̧nö̧ o'catoi'önä ttö̧ja̧ recuätö! ttuhuapare obanä ca̧ca̧cu̧ ttosähuäjätö jäyänä, jahuätö o'catoi'önö ttö̧dä̧pä̧rȩ päjure 'cui'ocuocotö, 'coru juo'ähuinä̧tö̧ curodiyänätä, ja̧'hua̧nö̧ ja̧'a̧ jahuätömä i'cächinä̧tö̧ yepeä'chäcuähuätä pi̧jä̧ a̧'cua̧rä̧tö̧ tti̧rȩjä̧nä̧. ²⁷ Jahuätömä pa̧ja̧cuo̧tö̧ su̧ro̧da̧u̧ curä ttö̧ja̧ 'coru juo'ächäjätucumä ttu̧dä̧pä̧rȩ päjure 'cui'ocuocotucumä mȩjä̧huä̧jä̧tu̧cu̧mä̧ hua'arera̧'a̧, o'cajuiyönä curä rohuäcuähuä ja̧'hua̧ta̧'a̧nö̧ curodiyä'inä ttuhuäme huȩnä̧huä̧cua̧'a̧ ttöarodönämä, Dios ro̧ȩpi̧nä̧u̧, jahuätö jina'a curä ttö̧ja̧ yettecuinäu̧mä̧ pi̧jä̧ rȩjȩ ttö̧ja̧ a̧'cua̧rä̧tö̧ tti̧rȩjä̧ttö̧mä̧. ²⁸ Ja̧'hua̧nö̧ ja̧'a̧ttö̧ ucu, Egipto 'cä̧tȩnä̧ 'turu tticuäcuotö ttu̧dä̧pä̧rȩ päjure 'cui'ocuotucu ucumä hua'ö cuicuäcua̧jä̧ juätucu curodänä 'cui'ö tti̧cuä̧u̧cu̧. ²⁹ Edómmä juȩnȩtä̧ pö̧ ruhuotucu ja̧'hua̧ta̧'a̧nö̧ o'catoi'önä churutä ppä'ädäcuähuätucu, Ja̧'hua̧nö̧ ja̧'a̧ ucumä juiyo juruhuinöjä̧, pö̧jä̧ 'cä̧tȩ coru juoä́chätucu curä rohuäu, ttö'törä̧cua̧jä̧ ttu̧dä̧pä̧rȩ päjure 'cui'ocuocotö, jahuätö mejä̧huä̧jä̧tö̧ hua'are ojura̧'a̧. ³⁰ Ttu'ohuecuttö ka̧cuä̧tö̧ ruhuotö, jahuätömä o'catoi'önätä ja̧'hua̧ta̧'a̧nö̧ Sidon ttö̧ja̧'i̧nä̧ o'catoi'önä tatapö tti̧cui̧nä̧u̧cu̧ ppä'ächi'inä̧tö̧mä̧. Jahuätö juruhuinätö ja̧'hua̧ta̧'a̧nö̧ korotö yettecunä jȩpi̧nä̧tö̧, ja̧'hua̧nö̧ jȩtti̧na̧'a̧nä̧ jitämä dä'ä ttu'ätö, ttu̧dä̧pä̧rȩ päjure 'cui'ocuocotömä jitö curä o'chömä tatapö tticuinäucu. Ja'huätömä tta̧mö̧nä̧ pa̧ja̧tö̧ dä'ä ttuhuähuätä kä̧u̧, reju täcuäjunä meyȩhuä̧tu̧cu̧. ³¹ Faraónmä to̧ä̧rä̧cua̧ ja̧'hua̧ta̧'a̧nö̧ curä'chunä tatapö tticuinäu̧ recuätucu a̧'u̧ ttuttäji toepächönä jȩttä̧cuo̧tö̧, Faraón'inä umähuäyotö su̧ro̧sa̧u̧'i̧nä̧ o'catoi'inäcu pi̧yȩ ja̧'a̧ TÖ̧Ä̧NÄ̧HUA̧ huäjuetä icu jiähuömä. ³² Ttömä ja̧huä̧jä̧nä̧ ka̧cuä̧tö̧ yettecunä jö̧ ku̧ni̧nö̧sä̧, ja̧'hua̧nö̧ ja̧'a̧nä̧ ttu̧dä̧pä̧rȩ päjure 'cui'ocuocotucu, jitö curä'chunä cuä'äu tticuinäumä Faraon ja̧hua̧ta̧'a̧nö̧ ahuaruhuämä o'catoi'änä̧cu̧, pi̧yȩ ja̧'a̧ TÖ̧Ä̧NÄ̧HUA̧ huäjuetä icu jiähuömä.