¹ Ja̧u̧nö̧tä̧ mo̧ro̧ ru̧hua̧ Asueromä, judíos tta̧bo̧i̧ya̧ Amán öäre Esterö iyinö. Ja̧'hua̧ta̧'a̧nö̧ Mardoqueomä̧ ja̧u̧nö̧tä̧ kä̧mä̧dö̧ ru̧hua̧ ä'ca jo̧mȩ aditinö, isopäi'önä Estermä ru̧hua̧rö̧ Mardoqueomä̧ pa̧'a̧nö̧ cha̧hua̧ru̧hua̧ pä'ö jijähua'attö. ² Ru̧hua̧mä̧ ödo'che i̧so̧bö̧ sello po̧bö̧ Amánrö̧ ppä̧huä̧dä̧jä̧bö̧ ko̧'ä̧dä̧u̧ Mardoqueorö iyinö. Estermä̧ Amán öäre ji̧nö̧ Mardoqueorö iyinäju̧. ³ Ja̧'hua̧nö̧ ja̧'a̧ Ester pä'äjita'anö̧ ru̧hua̧cu̧ ucuocuinäju̧. Jahuäjumä̧ kihue'quiyönä kä̧mä̧dö̧ ki'ä rȩjȩcu̧ pä'i'ö ajahuö kä̧nö̧ jä'epinä̧ju̧ Agag ttö̧ja̧'i̧sa̧ Amán suronä a̧mö̧cuädö, judíos ttö̧ja̧rö̧ si'epö icua päinö jȩnȩbötä si'epö icuiyaju pä'ö. ⁴ Ja̧'hua̧nö̧ ja̧'a̧ ru̧hua̧mä̧ itta'ca orottö adicuä'ca Ester kö̧ja̧'a̧cu̧ kí̧'ä̧dí̧nö̧ Ja̧'hua̧nö̧ ki̧ä̧dä̧cua̧ ä̧rä̧mi̧'ö̧ ru̧hua̧ ä'ca jo̧mȩ kä̧mä̧di̧nä̧ju̧. ⁵ Jahuäju pä'inä̧ju̧: ru̧hua̧ eseunä jö̧ttö̧mä̧, adiu jȩchö̧ toöttömä, ja̧u̧ jȩchö̧ ru̧hua̧rö̧ jueönä jö̧ttö̧mä̧, ja̧'hua̧ta̧'a̧nö̧ ttörö eseunä toöttömä̧ Agag ttö̧ja̧sa̧ Hamedata i̧tti̧ Amán, judíos ttö̧ja̧ ru̧hua̧ uruhuo huȩä̧jä̧nä̧ ka̧cuä̧tö̧rö̧ si'epö icua päö pähuä huȩnȩ i̧huȩyu̧ti̧no̧jä si'epö icu tti̧huȩyu̧ta̧ pä'äjusä. ⁶ Isopäi'önä ¿Tocu cha̧mi̧ 'quidächi'anöttö̧ chahuaruhuärö suroju ma̧ä̧ma̧dä̧mä̧? ¿Tocu cha̧mi̧ 'quidächi'anöttö̧ chahuaruhuärö si'epö tticua'anä̧mä̧? ⁷ ru̧hua̧ Asueromä ruhuaju Esterö'inä Ja̧'hua̧ta̧'a̧nö̧ Mardoqueo judío ttö̧ja̧sa̧rö̧'inä̧ pä'inö: "Topittö̧, Esterömä, Amán ojusode iyäjisä Ja̧'hua̧ta̧'a̧nö̧ yotutemä nu̧huä̧huo̧chö̧nä̧ ti̧'ä̧dö̧ rö̧nä̧tö̧, isopäi'önä judíos ttö̧ja̧rö̧ urohuähua pä'äjirömä̧. ⁸ ru̧hua̧ i̧mi̧nä̧ korojä huȩyu̧ti̧ ja̧'hua̧ta̧'a̧nö̧ Ru̧hua̧ ödo'che i̧so̧bö̧ sello po̧bö̧nä̧ ta'i. isopäi'önä pähuä huȩnȩ ru̧hua̧ i̧mi̧nä̧ huȩyu̧cui̧'ä̧ja̧'a̧mä̧ ja̧'hua̧ta̧'a̧nö̧ ödo'che i̧so̧bö̧ sello po̧bö̧nä̧ tahuähua'amä si'epömä icuähuoca'a." ⁹ Ja̧u̧nö̧ o'ca'a ru̧hua̧ttö̧ huȩyu̧cuä̧ tttö̧ja̧rö̧ huopinätö̧, ja̧u̧nö̧ pä̧nä̧mä̧ kä̧hua̧mä̧ huämetucuä pätti'omenä, ja̧u̧ kä̧hua̧mä̧ Siván pättäcu, mo̧ro̧tä̧ 23nä̧. Pähuä huȩnȩmä̧ o'cajuiyönä Mardoqueo judíos ttö̧ja̧ ttötö'cö huea'acu huȩyu̧cuä̧chi̧na̧'a̧. Ja̧u̧mä̧ huȩyu̧cuä̧chi̧na̧'a̧ ja̧huä̧jä̧nä̧ ruhuo hue'ätörö ja̧'hua̧ta̧'a̧nö̧ ja̧huä̧jä̧nä̧ ka̧cuä̧tö̧ ru̧hua̧cu̧ tö'cönänö aditätörö'inä, Indiattö̧ kä̧mä̧dö̧ Etiopía rȩjȩ jubö cä'dö, 127nö rȩjȩnä̧, ji̧jä̧cu̧pö̧nä̧ ka̧cuä̧tö̧rö̧mä̧ tta̧mö̧nä̧ tti̧huȩyu̧ta̧'a̧cu̧, yotucupönä tti̧huȩnȩ pö̧nä̧ ttucuocua'acu ja̧'hua̧ta̧'a̧nö̧ Judíos ttö̧ja̧'i̧nä̧ tta̧mö̧nä̧ tti̧huȩnȩnä̧ huȩyu̧tö̧ ttucuocua'acu. ¹⁰ Mardoqueomä̧ ru̧hua̧ Asuero i̧mi̧nä̧ huȩnȩtö̧ huȩyu̧ti̧nö̧ ja̧'hua̧ta̧'a̧nö̧ ru̧hua̧ ödo'che i̧so̧bö̧ sello po̧bö̧nä̧ ta'inö. Ja̧u̧ cuyärömä huȩnȩ ȩcuä̧ ttö̧ja̧ caballostö̧ korotöttö'inä abonänö adiu ttö̧'ö̧ttä̧dä̧u̧ juruhuätö ru̧hua̧rö̧ ppä̧'ä̧dä̧rö̧ aditätönä huȩjö̧ ttȩpö̧nä̧ hue'inö. ¹¹ Ru̧hua̧mä judíos ttö̧ja̧ ötahuiyä pönä ka̧cuä̧tö̧rö̧ ji̧nä̧ yo̧mȩtȩ ca̧ca̧cu̧ pȩjä̧mö̧ tta̧'cua̧rö̧ tto'ecuäcuähuö tturohuähua pä'ö hueinä̧u̧: cuä'äu tticua pä'ö ja̧'hua̧ta̧'a̧nö̧ ja̧huä̧jä̧nä̧ttö̧ ka̧cuä̧tö̧ su̧ro̧do̧u̧ rohuähuäu ichätörömä si'epö tticua pä'ötä, ppo̧'ä̧tö̧rö̧'i̧nä̧, nä̧tö̧rö̧'i̧nä̧ ja̧'hua̧nö̧ jo̧ka̧'a̧ttö̧mä̧ ttiäre 'chottipönä. ¹² Ru̧hua̧ Asuero ruhuo huȩä̧jä̧nä̧ ka̧cuä̧tö̧mä̧ pi̧yȩmä̧ jȩtta̧ pä'ö ja̧'a̧, mo̧ro̧mä̧ 13nä̧ kä̧hua̧tö̧tä̧ 12nö̧ huotö pätti'omenä̧, Adar kä̧hua̧ pättäcunä. ¹³ Pähuä huȩnȩ bo'epö huȩyu̧cuä̧mä̧ hueähuä huȩnȩ jö̧nä̧tä̧ jittähua pä'ö ja̧'a̧, ja̧'hua̧ta̧'a̧nö̧ ttö̧ja̧rö̧mä̧ o'catoi'önä̧rö̧ jittähua pä'ö ja̧'a̧. Judíos ttö̧ja̧mä̧ ja̧u̧nö̧ mo̧ro̧mä̧ jo̧mȩnö̧tä̧ ttö̧ja̧cua̧ pä'ö ja̧'a̧ ttaboiyotucu micuä jö̧nä̧ tturihuähua pä'ömä. ¹⁴ Ja̧'hua̧nö̧ ja̧'a̧ttö̧ huȩnȩ ȩcuä̧ ttö̧ja̧mä̧ caballostö̧ juruhuätö ru̧hua̧rö̧ ppä̧'ä̧dä̧rö̧ aditätönä huȩjö̧ jopinätö̧. Jahuätömä recuomä tta̧ttä̧ro̧ca̧'a̧tä̧. Ru̧hua̧ päji huȩnȩmä̧ Susa ötahuiyänä huode ruhuodettö'inä ji'ähuinätö̧. ¹⁵ Ja̧'hua̧nö̧ ja̧'a̧ Mardoqueomä ru̧hua̧ ä'ca jo̧mȩttö̧ rä'opömä isopäi'önä ö̧'ca̧tä̧huä̧ta̧ ja̧'tu̧huä̧ta̧'i̧nä̧, tȩä̧ta̧'i̧nä̧ 'ca̧tä̧hui̧'ö̧, u'uttähuämä orottö adicua'a huȩnä̧hui̧'ö̧ ja̧'hua̧ta̧'a̧nö̧ huä̧mȩnä̧ ö̧'ca̧tä̧huä̧ta̧ tädönä tu̧huä̧ta̧ lino pättöjueittö adicuäta̧ 'ca̧ta̧hui̧nö̧. Ja̧'hua̧nö̧ ja̧'a̧ Susa ötahuiyä ttö̧ja̧mä̧ eseu huopinä̧tö̧. ¹⁶ judíos ttö̧ja̧mä̧ eseäcuähuinätö̧ ja̧'hua̧ta̧'a̧nö̧ ra̧huä̧pi̧jö̧ttö̧ ka̧cui̧pä̧jä̧tö̧jä̧ pä'äcuäumä eseäcuäu ucuo te'äcuähuinä̧tö̧. ¹⁷ Tti̧rȩjä̧ pö̧nä̧ ja̧'hua̧ta̧'a̧nö̧ ötahuiyä pönä̧ ru̧hua̧ päji huȩnȩ rȩbȩhuo̧mȩ pönämä, judíos ttö̧ja̧ttö̧mä̧ eseäcuähuä ka̧'a̧ttö̧ pä'cäri ku̧ni̧nä̧tö̧. Recuätö ja̧huä̧jä̧nä̧ ka̧cuä̧tö̧mä̧ judíos ttö̧ja̧ jö̧nä̧tä̧ juo'ächinä̧tö̧, juhua'amä judíos ttö̧ja̧rö̧ rö̧ȩnä̧ yettecua'attö̧.