¹ Ja̧'hua̧nö̧ ja̧'a̧ kä̧hua̧tä̧ 12nö̧ huotö päi'omȩnä̧ ja̧u̧mä̧ Adar pättäcunä̧ mo̧ro̧tä̧ 13nä̧, ru̧hua̧ttö̧ hueähuä huȩnȩ ja̧'hua̧ta̧'a̧nö̧ päji huȩnȩ'i̧nä̧ päö'anö̧ ttaboiyotörö judíos ttö̧ja̧rö̧ si'epö tticua pättinö̧ pätecuächomenä̧' jȩtta̧ pättäjimä̧ pärohuächina̧'a̧ Judíos ttö̧ja̧tä̧ kȩdö̧ tticuinä̧u̧ jahuätörö tta̧mi̧surö topinä̧tö̧rö̧mä̧. ² Judíos ttö̧ja̧mä̧ ttidepiyö pönä̧ ru̧hua̧ Asuero ruhuo huȩä̧jä̧ttö̧mä̧ ca̧ca̧cu̧ pȩjä̧mi̧nä̧tö̧, jitörötä suronä̧ jȩpä̧tö̧rö̧ tturohuähua pä'ö jo̧mȩnö̧ jȩpä̧cuä̧u̧ ku̧nö̧huö̧mä̧. Ya̧tȩ jahuätucumä̧ urohuähuamä̧ pä'ocö pinö̧, juhua'amä̧ jahuätö o'catoi'önärö̧tä̧ yecuäcuähuä̧ ka̧'a̧ttö̧. ³ Ja̧huä̧jä̧ rȩjȩttö̧ ru̧hua̧cu̧ tö'cönä̧ aditätö'inä̧ jä̧huä̧jä̧ttö̧ ruhuo hue'ätöi̧nä̧, ru̧hua̧ öäre adihuomenä̧ topö tta̧'ä̧rä̧tö̧'i̧nä̧, judíos ttö̧ja̧rö̧mä̧ ppä'ädinä̧tö̧, juhuaa'amä̧ jahuätömä̧ Mardoqueorö yettecua'attö. ⁴ Ja̧'hua̧nö̧ ja̧'a̧ Mardoqueomä̧ ru̧hua̧ ojusodettömä̧ ucuo i̧sa̧ pinö̧, jȩö̧ tö'cömä̧ ja̧huä̧jä̧ jä̧ttä̧ ucuohuina̧'a̧ ja̧u̧ ttö̧ja̧sa̧ ucuomä̧ juhua'a yabonö rö̧ä̧cha̧'a̧ttö̧. ⁵ Judíos ttö̧ja̧mä̧ ttaboiyotörö curä o'chunä̧ rohuäbuinä̧tö̧. cuä'äu icu ja̧'hua̧ta̧'a̧nö̧ si'epö icu jitörö pä̧huä̧rö̧jo̧mȩ jȩpi̧nä̧tö̧ jitörötä kö'cocotörömä̧. ⁶ Ucuo ötahuiyä Susattö, judíoa ttö̧ja̧mä̧ 500nö̧ huotö u̧mä̧tö̧rö̧ cuä'ö icu si'epö icuinä̧tö̧. ⁷ Jahuätömä cuä'ö icuinä̧tö̧ Parsandatarö'i̧nä̧, Dalfonrö'i̧nä̧, Aspatarö'i̧nä̧, ⁸ Poratarö'i̧nä̧, Adalíarö'i̧nä̧, Aridatarö'i̧nä̧, ⁹ Parmastarö!i̧nä̧, Arisalrö'i̧nä̧, Aridairö'i̧nä̧, Vaizatarö'i̧nä̧, ¹⁰ Ja̧'hua̧ta̧'a̧nö̧ Hamedata i̧tti̧ judíos ttö̧ja̧ ttaboi̧ya̧ Amán i̧tti̧mö̧ dieznö̧ huotörö'i̧nä̧. Ja̧'hua̧nö̧ cuä'ä tticua'anä̧ ttöäremä̧ ȩmi̧po̧co̧tö̧ pinä̧tö̧. ¹¹ Ja̧u̧nö̧ mo̧ro̧tä̧ ji'ähuinä̧tö̧ ru̧hua̧rö̧mä̧ ucuo ötahuiyä Susattö cuä'äu tticuä̧u̧ ttötö'cömä̧. ¹² Ru̧hua̧mä̧ ruhuaju Esterö pä'inö̧: Susa ötahuiyättömä̧ 500nö̧ huotö u̧mä̧tö̧rö̧ cuä'äu icuätö, ja̧'hua̧ta̧'a̧nö̧ dieznö̧ huotö Amán i̧tti̧mö̧'i̧nä̧. ¿Ja̧'hua̧nö̧ ja̧'a̧mä̧ tocu jȩttä̧ttö̧ ru̧hua̧ ruhuo huȩä̧jä̧ttö̧ korotö ka̧cui̧pä̧jä̧tö̧rö̧mä̧? Jitämä̧ ¿Däjetä jäcuepättö̧? Jäcuepömä̧ iyähuäcuajujä̧. ¿Däjetä pä̧huä̧rö̧jä̧cu̧ttö̧? ucuru pä̧huä̧rö̧jö̧mä̧ iyähuäcuajujä̧. ¹³ Ester ädätinä̧ju: "ru̧hua̧ cueseunä̧ jü̧ttö̧mä̧, päcuinö̧ huȩnȩ päöta'anö̧ judíos ttö̧ja̧ Susa ötahuiyänä̧ ka̧cuä̧tö̧mä̧ yo̧ȩi̧mo̧ro̧ jȩttö̧nä̧ huecua pä'äjusä, ja̧'hua̧ta̧'a̧nö̧ Amán i̧tti̧mö̧ tto'co jähuä nu̧huä̧huä̧ o̧chö̧nä̧ ti̧'chö̧ ttö̧nö̧nä̧ huecua pä'äjusä." ¹⁴ Ja̧'hua̧nö̧ ja̧'a̧ttö̧ jäjepäjita'anö̧ jȩttö̧nä̧ hue'inö̧ ru̧hua̧mä̧. Ru̧hua̧ päji huȩnȩmä̧ Susa ötahuiyänä iyinä̧tö̧ ja̧'hua̧nö̧ jo̧mȩnä̧ Amán i̧tti̧mö̧ dieznö̧ huotö tto'co jähuämä̧ ti̧'chö̧ ru̧ni̧nä̧tö̧. ¹⁵ Judíos ttö̧ja̧ Susa ötahuiyänä̧ ka̧cuä̧tö̧mä̧ ji̧nä̧ yo̧mȩtȩ ca̧ca̧cui̧pinä̧tö̧ mo̧ro̧mä̧ 14nä̧ kä̧hua̧tä̧ Adar pättäcunä̧, ja̧'hua̧ta̧'a̧nö̧ Susa ötahuiyättömä yabonö̧tä 300nö̧ jo̧mȩnä̧ huotö̧ u̧mä̧tö̧rö̧ cuä'äu icuinä̧tö̧. Ja̧'hua̧nö̧ ja̧'a̧nä̧ jahuärö̧ ttöäremä̧ ȩmi̧po̧co̧tö pinä̧tö̧. ¹⁶ Korotö Judíos ttö̧ja̧ ru̧hua̧ ruhuo huȩä̧jä̧nä̧ ka̧cuä̧tö̧mä̧ ji̧nä̧ yo̧mȩtȩ pä'i'inä̧tö̧ tta̧'cua̧rö̧ toe'ächö juiyönä̧ tturohuähua pä'ömä̧, ja̧'hua̧ta̧'a̧nö̧ ttaboiyotö suronä̧ jȩttö̧ttö̧ tta̧'cua̧ ȩmö̧mä̧ kö'cocotö pä'ijätörömä̧ 75000nö̧ jo̧mȩnä̧ huotörö cuä'äu icuinä̧tö̧, ja̧'hua̧nö̧ ja̧'a̧nä̧ cuä'äu tti̧cuä̧u̧ ttöäre rö̧ȩnä̧ micuäu jähuämä̧ emipo̧co̧tö̧ pinä̧tö̧. ¹⁷ Pi̧yȩmä̧ 'cuäopina̧'a̧ mo̧ro̧mä̧ 13nä̧ kä̧hua̧tä̧ Adar pättäcunä̧. Mo̧ro̧ 14nä̧mä̧ 'cuä'ächi'ö pȩjä̧mö̧ pä'cäri ku̧nö̧ eseäcuähuinä̧tö̧. ¹⁸ Ja̧'hua̧nö̧ jȩtta̧'a̧nä̧ judíos ttö̧ja̧ Susa ötahuiyänä̧ ka̧cuä̧tö̧mä̧ mo̧ro̧mä̧ 13nä̧'i̧nä̧, 14nä̧'i̧nä̧ ca̧ca̧cu̧ pȩjä̧minä̧tö̧. 15nö̧ mo̧ro̧ päi'omenä̧ !'cuä'ächi'ö pȩjä̧mö̧ pä'cäri mo̧ro̧ jö̧nä̧ ku̧nu̧ eseäcuähuinä̧tö̧. ¹⁹ Pa̧'a̧nö̧ jo̧mȩttö̧ judíos ttö̧ja̧ ötahuiyä jäyänä ka̧cuä̧tö̧mä̧, ttoju odehuiyä 'tö̧'i̧nä̧tö̧mä̧, mo̧ro̧mä̧ 14nä̧ kä̧hua̧tä̧ Adar pättäcunä̧ eseäcuähuä mo̧ro̧ jö̧nä̧ ja̧'hua̧ta̧'a̧nö̧ pä'cäri mo̧ro̧ jö̧nä̧ topinä̧tö̧, jua'atäcu ja̧u̧nö̧ mo̧ro̧mä̧ ka̧ra̧ ka̧ra̧nö̧cu̧ mippounä̧ iyähuä'i̧nä̧, ttu̧cuȩ'i̧nä̧ iyäcuähuinä̧tö̧ jahuätömä̧. ²⁰ Mardoqueomä̧ pi̧yȩ tö'cömä̧ huȩyu̧tu̧ rutinö̧ ja̧'hua̧ta̧'a̧nö̧ huȩyu̧cuä̧ ojiyä'i̧nä̧ judíos ttö̧ja̧ ru̧hua̧ Asuero ruhuo huȩä̧jä̧ jä̧ttä̧jä̧ ka̧cuä̧tö̧rö̧mä̧ hue'inö̧, tö'cönä̧nö̧ ka̧cuä̧rö̧rö̧'i̧nä̧ oto ka̧cuä̧tö̧rö̧'inä̧, ²¹ jȩttö̧nä̧ hue'inä̧tö̧ mo̧ro̧mä̧ 14nä̧'i̧nä̧, 15nä̧'i̧nä̧ Adar pättäcunä̧ a̧'emä̧ 'cuäopönä̧tä̧. ²² Pi̧yȩ mo̧ro̧ ji̧na̧'a̧ judíos ttö̧ja̧ ttaboiyotöttö tta̧'cua̧ ttȩmö̧nä̧ ji̧nö̧ mo̧ro̧mä̧ ja̧'hua̧ta̧'a̧nö̧ tta̧'cua̧ tta̧ttȩcuinö̧ttö̧ eseäcuähuänä̧tä̧ pärohuächinö̧ kä̧hua̧mä̧ ja̧hua̧ta̧'a̧nö̧ a̧'u̧ ttuhuähuättö pä'cäri jȩä̧cuähuä̧ jö̧nä̧tä̧ pärohuächinö̧ mo̧ro̧mä̧. Ja̧u̧ mo̧ro̧mä̧ pä'cäri ku̧nö̧ cuesehuätucua pä'ö ja̧'a̧, ja̧'hua̧ta̧'a̧nö̧ mippoönä̧ iyäbuä'i̧nä̧, ttu̧cuȩ'i̧nä̧ ka̧ra̧ ka̧ra̧nö̧cu cuiyäcuähuärucua pä'ö ja̧'a̧, jua'atäcu usurä isotörö'i̧nä̧ mippounä̧ iyähuä̧ cuiyätucua pä'ö ja̧'a̧. ²³ Ja̧'hua̧nö̧ ja̧'a̧ judíos ttö̧ja̧ kä̧mä̧dö̧ pä'cäri jȩttä̧ji̧mä̧ yabonö̧tä̧ jȩpi̧nä̧tö̧, Mardoqueo jahuätörö huȩyu̧tu̧ hueäjita'anö̧tä̧. ²⁴ Ja̧u̧nö̧ pä̧nä̧mä̧ o'caroi'önä̧ judíos ttö̧ja̧ ttaboi̧ya̧ Hamedata i̧tti̧ Amánmä̧, judíos ttö̧ja̧rö̧ si'epö icua pä'ö a̧mö̧cuädö ö̧jö̧nina̧'a̧ jina̧'a̧ pur pättö jueinä̧ icu topö. (pi̧yȩmä̧ ttu̧huo̧jua̧ pä'ö icu toäcuähuä ji̧na̧'a̧) tottepächönä̧ si'epö tticua pä'ö. ²⁵ Ja̧'hua̧nö̧ ja̧'a̧nä̧ huȩnȩ ru̧hua̧ ä'ca jo̧mȩ rȩbȩhuipo̧mȩnä̧, ja̧u̧mä̧ hue'inö̧ cuyäru isojä Amán su̧ro̧pa̧ judíos ttö̧ja̧rö̧ cuä'ö icua pä'ö a̧mö̧cuädinö̧ jä̧ji̧mä̧ churutä ma̧ä̧mö̧nä̧ ja̧'hua̧ta̧'a̧nö̧ i̧tti̧mö̧rö̧'i̧nä̧ ä̧nö̧chö̧nä̧ ti̧'ä̧dö̧ ttö̧na̧tö̧ pä'ötä. ²⁶ Ja̧'hua̧nö̧ ja̧'a̧ ja̧unö̧ mo̧ro̧mä̧ Purim pä'ö o'inä̧rö̧, pur pä'ö ottinomȩttö̧, o'cajuiyönä̧ cuyäru isojänä huȩyu̧cuä̧chi̧nö̧ jähuänä̧mä̧, o'cajuiyönä̧ tottinö̧'i̧nä̧ ja̧'hua̧ta̧'a̧nö̧ ja̧huätörö 'cuäopinö̧'i̧nä̧. ²⁷ Judíos ttö̧ja̧mä̧ jareö ttä̧dotö̧ ttö̧ji̧nö̧'i̧nä̧ ja'hua̧ta̧'a̧nö̧ ttadita pä'ö ji̧nö̧'inä̧. ja̧u̧ jȩttinö̧'i̧nä̧ jitötä jähuätä jina̧'a̧, tti̧tti̧mö̧'i̧nä̧ ja̧'hua̧ta̧'a̧nö̧ o'catoi'önä̧ jahuätucu ca̧ca̧cui̧pä̧tö̧mä. A̧'ȩ jö̧ta'anö̧ pi̧yȩ todäre mo̧romä̧ pä'cäri jȩtta̧ pä'ötä ji̧na̧'a̧. Koro ja̧'a̧nä̧'inä̧ pä'cäri jȩtta̧ pä'ö jinö̧mä̧ ji̧yȩtä̧ ä̧'ȩnä̧ jȩtta̧ pä'ötä ji̧na̧'a̧. ²⁸ Ja̧u̧ mo̧ro̧mä̧ pä'cäri ttö̧jö̧nö̧ mo̧ro̧ ji̧na̧'a̧ ja̧'hua̧ta̧'a̧nö̧ totta pä'ö jina̧'a̧, yabobö̧ yo'ähui'ätö'inä̧. ji̧nä̧ yotute isotö'i̧nä̧, tti̧rȩjä̧ pönä̧ ka̧cuä̧tö'i̧nä̧ ötahuiyä ttö̧ja̧'i̧nä̧ totta pä'ö ji̧na̧'a̧. Pitö judíos ttö̧ja̧mä̧ ja̧'hua̧ta̧'a̧nö̧ jahuätöttö yo'ähuätö'i̧nä cättädi'oca'a jȩtta̧ pä'ö pähuächinö̧ta'anö̧ adihuomȩnä̧ jȩttö̧ mo̧ro̧ jä̧cua̧'a̧ Puri pättö mo̧ro̧mä̧, ja̧'hua̧nö̧ jö̧ttö̧tä̧ ttunichi̧'a pä'ö ji̧na̧'a̧. ²⁹ Ruhuaju Ester Abihail ittijumä̧ ja̧'hua̧ta̧'a̧nö̧ Mardoqueo judío ttö̧ja̧sa̧nömä̧ ucuo kö̧nä̧ huȩyu̧ti̧nä̧tö̧ ja̧'hua̧ta̧'a̧nö̧ pojä̧ tojäre päi'önä̧ purim pättö tö'cö huȩyu̧cuojämä̧ isopäi'önä jojä ja̧'a̧ pättinojä. ³⁰ Cuyäru isojä huȩyu̧cuojämä̧ judíos ttö̧ja̧rö̧mä̧ o'catoi'önä̧rö̧ hue'inä̧tö̧, ru̧hua̧ Asuero ruhuo huȩä̧jä̧nä̧ 127nö̧ rȩji̧yä̧nä̧ ka̧cuä̧tö̧rö̧mä̧, judíos ttö̧ja̧rö̧ isopäi'önä̧ eseunö̧. ³¹ Pojä cuyäru isojä huȩyu̧cuojämä̧ icu tottomenä̧ ja̧u̧nö̧ mo̧ro̧ jä̧cua̧'a̧ pättinö̧ mo̧ro̧, tottomenä̧ juojä cuyäru isojämä̧ isopäi'önä̧tä̧ ji̧na̧'a̧. judío ttö̧ja̧sa̧ Mardoqueomä̧ ja̧'hua̧ta̧'a̧nö̧ ruhuaju Estermä̧ judíos ttö̧ja̧rö̧ jȩttö̧nä̧ hue'inä̧tö̧. Judíos ttö̧ja̧mä̧ huecuätucumä̧ jȩtä̧cuo̧tö̧jä̧ pä'inä̧tö̧ ja̧'hua̧ta̧'a̧nö̧ ujututtö yo'ähuätö'i̧nä̧ jua'atäcu tu̧cuȩ a̧do̧chö̧'i̧nä̧ tajahuäcuotöjä̧ pä'inä̧tö̧. ³² Ester ji̧na̧'a̧ icu tottomenä̧ pätecuächinö̧ mo̧ro̧ pä'cäri jȩtta̧ pä'ö hue'inä̧ju̧jä̧, ja̧u̧ huȩnȩmä̧ cuyäru'tä huȩyu̧cuä̧china̧'a̧.