¹ Ja̧'hua̧nö̧ ja̧'a̧ ru̧hua̧'i̧nä̧ ja̧'hua̧ta̧'a̧nö̧ Amán'i̧nä̧ ruhuaju Estercu pä'cärira̧'a̧ 'chi̧nä̧tö̧. ² Todäre mo̧ro̧ päi'omȩnä̧, ji̧nä̧ vino ttiyä'cha'anä̧ ru̧hua̧mä̧ Esterö pä'inö: "¿Ucu ruhuaju Estermä̧ däje jäcuepa päcua'attö̧? Jäcuepömä̧ iyähuäcuajujä̧ ¿Ti̧yȩtä̧ jäcuepättö̧? jäcuepöttömä̧ ruhuomä̧ kä'co jo̧mȩ iyäcuajujä̧." ³ Ja̧'hua̧nö̧ päcua ruhuaju Estermä̧ kädätinä̧cu̧: "Ucu ru̧hua̧rö̧ adihuomenä̧ jö̧ttö̧mä̧, ja̧'hua̧ta̧'a̧nö̧ cuesehuächi'önä̧ jö̧ttö̧mä̧ jädepömä cha̧'cua̧rö̧ ki̧'a̧ pä'ötä ja̧'hua̧ta̧'a̧nö̧ chahuaruhuä tta̧'cua̧rö̧tä̧. ⁴ Isopäi'önä̧ ujutumä̧ iyö icuähuotöjä̧, ttö'inä̧ ja̧'hua̧ta̧'a̧nö̧ chahuaruhuä'i̧nä̧ si'epö tticuatö pä'ö. Suro a̧mä̧cö̧ jähuä ttaditönä̧tä̧ u̧mä̧tö̧'i̧nä̧ nä̧tö̧'i̧nä̧ iyö icuähuotö töttömä̧ 'coruchi'ö chö̧ja̧ pä'ö ja̧'a̧, tta̧'cua̧tta̧ttȩcu̧ juiyöttömä̧pi̧yȩ jȩpi̧yi̧ttö̧ pä'ömä̧ jädepö juiyö'anö̧ ja̧'a̧ ru̧hua̧rö̧mä̧." ⁵ Ja̧'hua̧nö̧ päjäcu ru̧hua̧ Asueromä̧ ruhuaju Esterö pä'inö̧ "¿Dijä̧ttö̧ ja̧u̧mä̧? ¿Tȩnȩ ö̧jä̧ttö̧ ucu cua̧'cua̧rö̧ ja̧'hua̧nö̧ suroju jȩpä̧ji̧mä̧?" ⁶ Estermä̧ pä'inäju̧: "¡ja̧u̧mä̧ to'ija̧'a̧cu̧tä̧ hua̧, ja̧u̧ taboiya, Amánmä̧ suropa̧!" Ja̧'hua̧nö̧ päjomȩnä̧ ru̧hua̧'i̧nä̧ ja̧'hua̧ta̧'a̧nö̧ ruhuaju'i̧nä̧ ttä'ca jo̧mȩttö̧ rö̧ä̧nä̧ ye'inö̧. ⁷ Ru̧hua̧mä̧ a̧misurächi''äcu ä̧rä̧mi'ö̧ pä'cärinä̧ vino au ttö̧'o̧mȩttö̧ ruhuodettö cuähuä cu̧nä̧huo̧mȩcu̧ 'chi̧nö̧ ja̧'huanö̧ ja̧'a̧nä̧ Amánmä̧ ki̧'i̧pi̧nö̧ a̧'cua̧rö̧ toe'ächö juiyönä̧ ruhuaju Esterö jäepa pä'ö ja̧u̧mä̧ o'cajuiyönä̧ surojumä̧ churutä ma'a̧mä̧ huo̧jui̧'i̧nö̧. ⁸ Ja̧'hua̧nö̧ ja̧'a̧ ru̧hua̧mä̧ ruhuodenä̧ cuähuä ka̧cuo̧mȩttö̧ vino isoya ttiyä'choca̧ra̧'a̧cu̧ ppa̧'ä̧chi̧'i̧nö̧. Amánmä̧ deäcänä̧ Ester kö̧'ä̧jo̧mȩ ta'ipäji'ca̧ pi̧nö̧. Ru̧huąmä̧ päinö̧: "¿Ja̧u̧mä̧ ruhuajuru chä'ca jo̧mȩttö̧, cha̧mö̧nä̧ chojusodettö urohuähuäcua'a?" Ru̧hua̧mä̧ ji̧nä̧ ucuocu ö̧ja̧'a̧nä̧ u̧mö̧huäyotö̧mä̧ Amánrö̧ i'ä a̧tto̧pi̧nä̧tö̧. ⁹ Ja̧'hua̧nö̧ ja̧'a̧ Harbona ru̧hua̧ ötö'cönä̧ kä̧nö̧ ppä̧'ä̧dä̧rä̧'i̧tö̧ttö̧ ya̧tȩmä̧ pä'inö: "Nuhuä̧huo̧chö̧ ju'tojucumä̧ 22nö̧ jo̧mȩnä̧ o̧to̧o̧chö̧ Amán ojusode ppeyänä̧ ra̧'a̧. Mardoqueo ru̧hua̧rö̧ cuä'ö tticu juiyönä̧ ucuocuäjirö nu̧u̧ icua pä̧jo̧chö̧." Ru̧hua̧mä̧ pä'inö: "Juo̧chö̧nä̧tä̧ ti̧ä̧dö̧ ru̧nä̧tu̧cui̧rö̧." ¹⁰ Ja̧'hua̧nö̧ ja̧'a̧ttö̧ Amánrö̧mä̧ Mardoqueorö nu̧hua̧ päjochö̧nä̧tä̧ ti̧'ä̧dö̧ ttu̧ninä̧cu̧ ja̧'hua̧nö̧ jo̧mȩnä̧ ru̧hua̧ a̧misuräjimä̧ pȩjä̧mä̧china̧'a̧.