¹ Pi̧yȩ 'cuäopäji o'ca'a, ru̧hua̧ Asueromä̧ Agag ttö̧ja̧sa̧ Hamedata i̧tti̧ Amánrö̧ ttu̧ru̧hua̧ päi'önä rötinö, ja̧'hua̧nö̧ jȩpö̧ ucuo dȩä̧cä̧nä̧ o'catoi'önä chutäcu tö'cönä̧nö̧ aditätöttö'inä ttu̧ä̧mȩnä̧ ö̧jö̧nä̧. ² O'catoi'önä ru̧hua̧ u̧mö̧huäyotö äpate ä'ca tta̧'ä̧rä̧tö̧mä̧ 'cuäopönätä̧ Amán ä'ca jo̧mȩ ttihue'quiyönä kä̧mä̧dä̧'chi̧nä̧tö̧, jȩtta̧ pä'ö ru̧hua̧ hueinöta'anötä̧. Ja̧'hua̧nö̧ jȩtta̧'a̧nä̧ Mardoqueomä̧ yorö'iso ihue'quiyönä'i̧nä̧ kä̧mä̧do̧cö̧ pinö. ³ Ja̧'hua̧nö̧ ja̧'a̧ ru̧hua̧ u̧mö̧huäyotö äpate ä'ca tta̧'ä̧rä̧tö̧mä̧ Mardoqueorö pä'inätö̧: "¿Tta̧'a̧nö̧ pä'ö ru̧hua̧ hueäjimä cucuotoca'attö̧?" ⁴ Jahuätömä ja̧u̧rö̧ mo̧ro̧ji̧nö̧'a̧cuä̧ ji̧'ä̧huä̧ri̧nä̧tö̧, ja̧'hua̧nö̧ jittähua'anä̧ jȩa̧ pä'ö hueähui'inö̧mä̧ jȩa̧ pä'ocö pinö. Ja̧'hua̧nö̧ ji̧yä̧u̧ Mardoqueomä̧ judío ttö̧ja̧'i̧sa̧sä̧ pä'ija'a, pä'ijömä isopäi'önä jȩa̧ja̧ pä'ö ja̧u̧ jȩu̧ huȩnȩ Amánrö̧ ji'ähuinätö. ⁵ Amán ä'ca jo̧mȩ, Mardoqueo ihue'quiyönä ö̧jä̧mä̧do̧ka̧ ja̧'hua̧ta̧'a̧nö̧ ja̧rȩyö̧ päi'oca'a topö Amánmä rö̧ȩnä̧ ra̧huä̧ri̧pinö. ⁶ Ja̧u̧mä̧ Mardoqueorötä cuä'ö icua pä'ö a̧mö̧cuädinö, juhua'amä Mardoqueo ahuaruhuämä̧ jahuätö ja̧'a̧ pä'ö ji'ähuäji ru̧hua̧ u̧mö̧huä̧ya̧ jiähuäjäcu. Amánmä ru̧hua̧ Asuero ruhuo hueome ka̧cuä̧tö̧ Mardoqueo ahuaruhuä judíos ttö̧ja̧rö̧mä̧ o'catoi'önä̧rö̧ si'epö icua pä'inö. ⁷ A̧cuo̧mȩnä̧ kä̧hua̧nä̧ (Nisán pättäcunä̧) 12nö̧ a̧'ȩ jo̧mȩnä̧ ru̧hua̧ Asuero ruhuo huea'a, ttu̧huo̧jua̧ pä'ö icu toäcuähuä, Amán ä'ca jo̧mȩttö̧ mo̧ro̧ji̧nö̧'a̧cuä̧, ja̧'hua̧ta̧'a̧nö̧ kä̧hua̧ jö̧'a̧cuä̧ icu tottomȩnä̧, icu toäcuähuämä pätecuächina̧'a̧ kä̧hua̧mä̧ 12nö̧ huotönä̧ (Adar pättäcunä) ⁸ Ja̧'hua̧nö̧ ja̧'a̧ Amánmä̧ ru̧hua̧ Asuero pä'inö: "Curuhuo huȩcuä̧jä̧nä̧mä̧ jä̧ttä̧jä̧tä̧ yotöte ttö̧ja̧ pperecuächino'cotö ka̧cuä̧tö̧. Huettö huȩnȩmä̧ korotö huettö huȩnȩcu̧mä̧ yorätehuoca'a, ja̧'hua̧nö̧ jä̧u̧ ru̧hua̧ päji huȩnȩmä̧ ucuotocotö, ja̧'hua̧nö̧ jo̧mȩttö̧ ttö̧ja̧cuo̧mȩmä̧ ttö̧ja̧cua̧ pä'ömä huocotö. ⁹ Ru̧hua̧ esohuomenä jö̧ttö̧mä̧, cuä'äu tticuatö pä'ötä hue'itö, ja̧'hua̧ta̧'a̧nö̧ ru̧hua̧ öäre aditötörämä, diez milnö jo̧mȩnä̧ pärätä chi̧mi̧tä̧cua̧sä̧. ¹⁰ Ja̧'hua̧nö̧ ja̧'a̧ ödo'che i̧so̧bö̧ sello po̧bö̧ ko̧'ä̧dä̧cuä̧u̧, judíos ttö̧ja̧ tta̧bo̧i̧ya̧ Agag ttö̧ja̧sa̧ Hamedata i̧tti̧ Amánrö̧ iyinö. ¹¹ Ru̧hua̧mä̧ Amán pä'inö̧: "Pärätämä ucurutä chiyäcua̧sä̧ ja̧'hua̧ta̧'a̧nö̧ cuahuaruhuärö'inä. Ja̧u̧ pärätämä ucuru pä̧huä̧rö̧jo̧mȩ jȩ'cua̧jä̧." ¹² Ja̧'hua̧nö̧ ja̧'a̧ ru̧hua̧ttö̧ huȩyu̧cuä̧ ttö̧ja̧rö̧ mo̧ro̧mä̧ 13nä̧ kä̧hua̧tä̧ ä̧cuo̧mȩnä̧ ru̧nä̧ ä̧tȩcui̧'i̧na̧'a̧, ja̧'hua̧nö̧ ja̧'a̧mä̧ ru̧hua̧ ruhuo huȩä̧jä̧nä̧ ka̧cuä̧tö̧ o'catoi'önä ruhuo hue'ätörö'i̧nä̧, ötahuiyä ttö̧ja̧ tturuhuotörö'i̧nä̧ tti̧rȩjä̧ pönä ka̧cuä̧tö̧ tti̧huȩyu̧tu̧'a̧cuä̧, ja̧'hua̧ta̧'a̧nö̧ ttucuocu'a̧cuä̧, Amán päji huȩnȩmä̧ huȩyu̧cui̧'i̧na̧'a̧. Ru̧hua̧ Asuero i̧mi̧nä̧ huȩyu̧tä̧'cotö ödo'che i̧so̧bö̧nä̧ micuähuächönä ta'inä̧tö̧. ¹³ Päji huȩnȩmä̧ ru̧hua̧ ruhuo huȩä̧jä̧ jä̧ttä̧jä̧tä̧ huȩnȩ ȩcuä̧ ttö̧ja̧ 'chä̧nö̧ iyä'chinätö̧, cuä'ö icu si'epö tticua pä'ö, ppo̧'ä̧tö̧ttö̧ kä̧mä̧dö̧ tä̧mö̧ jubö ja̧'hua̧ta̧'a̧nö̧ ppo̧'ä̧tö̧rö̧'i̧nä̧, nä̧tö̧rö̧'i̧nä̧ ja̧'hua̧ta̧'a̧nö̧ ttiäre 'chottipa pä'ö'inä. mo̧ro̧tä̧ 13nä̧ kä̧hua̧mä̧ 12nö̧ hu̧otönä (Adar pättäcunä). ¹⁴ Pähuä huȩnȩ jä̧ji̧mä̧ tti̧rȩjä̧ pönättö̧mä̧ hueähuä huȩnȩ päi'önätä bo'epö huȩyu̧ti̧nä̧tö̧. Ja̧huä̧jä̧nä̧ ka̧cuä̧tö̧ o'catoi'önärö ja̧u̧nö̧ mo̧ro̧mä̧ jo̧mȩnö̧ ttö̧ja̧cua̧ pä'ötä jiähuäcuähui'ina̧'a̧. ¹⁵ Huȩnȩ jiäcuähuä ttö̧ja̧mä̧ ru̧hua̧ hueäji ttiyä'cha pä'ö jurunä rä'opächinätö̧. Ja̧'hua̧ta̧'a̧nö̧ paji huȩnȩmä̧ Susa ötahuiyänä huode ruhuodenä̧'i̧nä̧ iyähui'ina̧'a̧. Ru̧hua̧'i̧nä̧ ja̧'hua̧ta̧'a̧nö̧ Amán pȩjä̧mö̧ ahuinä̧tö̧, ja̧'hua̧nö̧ ja̧'a̧nä̧ Susa öyahuiyä ttö̧ja̧mä̧ ttieruhuönä päi'inä̧u̧.