¹ Mardoqueo o'cajuiyönä jȩttä̧ji̧ huo̧jui̧'ö̧mä̧, i̧ä̧rȩta̧ sȩro̧cu̧ icu a̧'u̧ttö̧ ka̧tä̧huä̧cuä̧huä̧ta̧ 'ca̧tä̧u̧ ä̧ya̧ri̧sa unä icuäcuähuinö. Ja̧u̧mä̧ ötahuiyä ka'cocu rä'o'ö ajaunö pä̧i̧cu̧nä̧ huopinö. ² Katätä ru̧hua̧ ojusode äpatecu 'chi̧nö̧, isopäi'önä a̧'u̧ttö̧ 'ca̧tä̧cuä̧huä̧ta̧ 'ca̧tä̧huä̧tö̧rö̧mä̧ dottächa pä'ömä hueähuocome ja̧'a̧nä̧. ³ Rȩjȩmä̧ jä̧ttä̧jä̧tä̧ ru̧hua̧ hueäji huȩnȩ'i̧nä̧ ja̧'hua̧ta̧'a̧nö̧ päji huȩnȩ'i̧nä̧ rȩbȩhuä̧jo̧mȩmä̧ judíos ttö̧ja̧mä̧ o'catoi'önä̧tä̧ tta̧'cua̧ tta̧'ȩcu̧mä̧, ttu̧cuȩ a̧do̧chö̧ ba̧ra̧huä̧u̧ ajahuinä̧tö̧. Jahuätöttö recuätö a̧'u̧ttö̧ 'ca̧tä̧cuä̧huä̧ta̧ 'ca̧tä̧u̧ ja̧'hua̧ta̧'a̧nö̧ ä̧ya̧risanä pȩjä̧mi̧nä̧tö̧. ⁴ Nä̧tö̧ möäyotö'i̧nä̧ ja̧'hua̧ta̧'a̧nö̧ Esterö kumöhuäyotö nä̧tö̧'i̧nä̧ ruhuaju kö̧jo̧mȩ ichi'i'ö jittähuäcua ruhuajumä ka̧'cua̧tta̧ päi'inäcua̧. Jahuäjumä Mardoqueo ö̧'ca̧tä̧huä̧ta̧ ö̧'ca̧tä̧hua̧ pä'ö hue'inä̧ju̧ (a̧'u̧ ttu'u 'ca̧tä̧cuä̧huä̧ta̧ ko̧'ä̧dä̧cuä̧huö̧ icu) ja̧'hua̧nö̧ hueja'anä̧ ö̧'ca̧tä̧hua̧mä̧ pä'ocö pinö. ⁵ Ja̧'hua̧nö̧ ji̧yä̧cua̧, Estermä ru̧hua̧ u̧mö̧huä̧ya̧ yajurutä ppä̧da̧ra̧ pä'ö hueinä̧cu̧rö̧ ichi'önä huopinäju̧. Jahuä̧jumä Mardoqueomä däje 'cuäopäcu ja̧'hua̧ta̧'a̧nö̧ däje jä̧cu̧ ja̧'hua̧nö̧mä̧ jȩa̧'a̧ttö̧ pä'ö topö i̧'chö̧nä̧ hue'inäju̧. ⁶ Ja̧'hua̧nö̧ huejäcu Hatacmä̧ Mardoqueo cuähuä iyähuome ru̧hua̧ ojusode äpate pä̧tȩcuä̧nö̧ ö̧'a̧'a̧ topö 'chi̧nö̧. ⁷ Mardoqueomä 'cuäopäjimä̧ ji'ähuinö ja̧'hua̧ta̧'a̧nö̧ Amán pärätä chi̧yä̧cua̧sä̧ päji'inä, jua'atäcu judíos ttö̧ja̧rö̧ si'epö icu micuä ru̧hua̧ öäre pärätä i̧yä̧cuȩ'i̧nä̧. ⁸ Ja̧'hua̧ta̧'a̧nö̧ bo'epö huȩyu̧cuojä Susa ötahuiyättö judíos ttö̧ja̧rö̧ si'epö tti̧cuä̧cuȩ jiähuojä ttiyojä'inä iyinö. Mardoqueomä pi̧yȩ jȩpi̧nö̧ Hatac i̧jȩpi̧ya̧rö̧ pä'ö Esterö ja̧'hua̧ta̧'a̧nö̧ ru̧hua̧mä churutä'inä ja̧'hua̧ta̧'a̧nö̧ ahuaruhuärö'i̧nä̧ ppädänö ucuocu ki̧'chi̧ya̧rö̧ pä'ö. ⁹ Ja̧'hua̧ta̧'a̧nö̧ Hatacmä̧ Mardoqueo ucuocuäji ji'ähuinö Esterömä. ¹⁰ Ja̧'hua̧nö̧ jiähuäcua Estermä, Mardoqueo ö̧ja̧'a̧cu̧ ppa̧huä̧cha̧ pä'inä̧ju̧ Hatacrömä̧ ¹¹ Juhua'a yabonö pä'inä̧ju̧: "O'catoi'önä ru̧hua̧ u̧mö̧huäyotö'i̧nä̧ ja̧'hua̧ta̧'a̧nö̧ ru̧hua̧ i̧rȩjä̧nä̧ ka̧cuä̧tö̧ ttö̧ja̧'i̧nä̧ huo̧juä̧tö̧ ya̧tȩ ubo jö̧ttö̧'i̧nä̧ isaju jö̧ttö̧'i̧nä̧ a̧tȩcui̧'o̧ca̧ra̧'a̧ u̧mi̧ isaränä do'ächörömä ji̧yȩtȩ hueähuä huȩnȩtä̧ ka̧'a̧, 'corujuoächa pä'ötä, a̧'cua̧rö̧ ö̧ji̧pa̧ pä'ömä chu ru̧hua̧ itta'ca ki̧ä̧dä̧cu̧tä̧ ja̧'a̧. Ttö ru̧hua̧ ö̧ja̧'a̧ chi̧'cha̧ pä'ömä 30nö mo̧ro̧ päi'omenätä huottäcuajusä. ¹² Ja̧'hua̧nö̧ ja̧'a̧ Hatacmä̧ Ester jijähuäji Mardoqueorö ji'ähuinö. ¹³ Mardoqueomä pi̧yȩ huȩnȩ hue'inö: Ruhuodenä̧ chu̧ja̧'a̧ttö̧ korotö judíos ttö̧ja̧ totte'ächa'anä̧ chu̧ji̧pä̧cua̧ju̧sä̧ pä'ömä cua̧mö̧cuädä. ¹⁴ Pi̧yȩ pä̧nä̧ 'coruchi'ö cu̧ju̧ttö̧mä̧ koro judíos ttö̧ja̧mä̧ tta̧'cua̧ ttȩma̧'a̧nä̧ ja̧'hua̧ta̧'a̧nö̧ surojuttö rättopächa'anä̧, ucu'i̧nä̧ ja̧'hua̧ta̧'a̧nö̧ cuahuaruhuä'i̧nä̧ totte'ächäcuotö. ¿Diqui̧ huo̧jua̧mä̧ ucutä ja̧'a̧cö̧ pa̧'a̧nö̧ jö̧ mo̧ro̧ ruhuaju jö̧nä̧ pä̧mä̧di̧nä̧ju̧mä̧? ¹⁵ Ja̧'hua̧nö̧ päcua Estermä pi̧yȩ huȩnȩ hue'inä̧ju̧ Mardoqueorömä̧, ¹⁶ "Judíos ttö̧ja̧ Susa ötahuiyänä ka̧cuä̧tö̧rö̧ ttö̧ca̧ca̧cui̧'ö̧nä̧ jȩ'cua̧ täi ja̧'hua̧ta̧'a̧nö̧ cu̧cuȩtu̧cu̧ a̧do̧chö̧ ttörö'i̧nä̧ TTÖ̧Ä̧NÄ̧HUA̧ i̧mi̧nä̧ jäcuepätucuaja. Huäbodäcuä mo̧ro̧, huäbodäcuä yodo jo̧mȩnä̧ cu̧cuȩtu̧cu̧mä̧ cucuätucuä. Ja̧'hua̧ta̧'a̧nö̧ ttö'inä nä̧tö̧ mö̧ä̧yotucu ja̧'hua̧nö̧tä̧ ttu̧cuȩmä̧ ta̧do̧chä̧cuo̧tö̧jä̧. Ja̧'hua̧nö̧ jo̧mȩnä̧ ru̧hua̧rö̧mä̧ tochäjäcuajusä, hueähuä huȩnȩmä̧ hueoca'anä̧. Ja̧'hua̧nö̧ ja̧'a̧ttö̧ ttö tode'öttömä huä̧i̧nä̧ jä̧cua̧'a̧." ¹⁷ Mardoqueomä̧ 'chä̧ji̧'ca̧ jȩa pä'ö Ȩstȩr huejäjimä̧ o'cajuiyötä jȩä̧i̧nö̧.