¹ Pi̧yȩ 'cuäopäji o'ca'a, ru̧hua̧ Asuero ö̧'ä̧i̧ pȩjä̧mecho̧mȩnä̧, Vastirö a̧mö̧cuädö kä̧nö̧ jȩji̧nö̧'i̧nä̧ a̧mö̧cuädinö̧. Ja̧hua̧ta̧'a̧nö̧ jahuäjuru pähuä huȩnȩnä̧ to'ija̧'a̧cu̧ päinö'i̧nä̧. ² Ja̧'hua̧nö̧ ja̧'a̧ ru̧hua̧ u̧mö̧huäyotö churutä ppä̧'ä̧dä̧rä̧tö̧mä̧ pä'inä̧tö̧: "ru̧hua̧ irecua päi'önä̧ nä̧tö̧ uborö jerupättö a̧'cua̧cuä̧tö̧ttö̧ ttusu'anö̧ ja̧'a̧. ³ Ru̧hua̧mä̧ uruhuo huȩä̧jä̧ jä̧ttä̧jä̧ ruhuotö jö̧nä̧ ttö̧ja̧cu̧nä̧ o'ö u̧ju̧na̧ pä'ö ja̧'a̧, nä̧tö̧ a̧'cua̧cuä̧tö̧rö̧ Susa ötahuiyättö̧ harén pättomȩ huodenä̧ nä̧tö̧ muäyotö a̧'cua̧cuä̧tö̧rö̧ ca̧ca̧tö̧ ttu̧ju̧na̧ pä'ö, ru̧hua̧cu̧ tö'cönä̧nö̧ aditö Hegai ru̧hua̧ i̧rȩcua̧mö̧rö̧ tta̧huä̧rä̧cuä̧huä̧ i̧sa̧ tta̧huä̧rö̧nä̧ hue'ätucui, ja̧'hua̧ta̧'a̧nö̧ isähua'i̧nä̧ i̧yä̧cua̧. ⁴ Mö̧ä̧yaju ru̧hua̧ eseunä̧ huajumä̧ päji'önä̧ ku̧nä̧huä̧cua̧ju̧ Vasti ku̧ji̧nö̧ o'comȩ." Pi̧yȩ pättömä̧ ru̧mä̧ juiyo eseunä̧ ji̧nä̧cu̧ ja̧'hua̧nö̧ ja̧'a̧ttö̧ ja̧'hua̧nö̧tä̧ jȩpi̧nö̧. ⁵ Ya̧tȩ judío ttö̧ja̧sa̧ Susa ötahuiyänä̧ ki̧nö̧, ja̧u̧mä̧ Mardoqueo ji̧na̧'a̧, Jair i̧tti̧, Simeón ö̧do̧ jua'a Cis ö̧do̧, Benjamín ahuaruhuä 'cotö i̧sa̧. ⁶ Ja̧u̧mä̧ Jerusalénttö̧ ttȩmipä̧u̧cu̧ tti'cächinä̧cu̧, jitö judas rȩjȩttö̧ ru̧hua̧ Jeconíacu̧ yo̧mȩtȩnä̧ tti 'cächinä̧u̧cu̧ Babiloníattö̧ ru̧hua̧ Nabucodonosor cärenä̧ pȩjä̧tö̧ jö̧nä̧ ȩpi̧nä̧u̧cu̧. ⁷ Ja̧u̧mä̧ Hadasarö tta̧'a̧ri̧nö̧ jahuäjumä Ester ja̧'a̧, i̧mi̧ya̧ ittoju, isopäi'önä̧ jahuäjumä̧ kä'o'i̧nä̧ ka̧ju̧'i̧nä̧ to!inä̧ju̧. Jahuäju möäyajumä̧ kuadihuämä̧ juiyo adihuinä̧ju. Mardoqueomä̧ chutä a̧mö̧nä̧ ittiju päi'önä̧ ȩmi̧nä̧cua̧. ⁸ Ru̧hua̧ hueäji huȩnȩ ja̧'hua̧ta̧'a̧nö̧ päji huȩnȩ'i̧nä̧ jittähuomȩnä̧, nä̧tö̧ möäyorö recuätörö Susanä̧ huode ruhuodera̧'a̧ ttȩpi̧nä̧u̧. Hagai tta̧huä̧rö̧nä̧ huettinä̧u̧. Ja̧'hua̧ta̧'a̧ ö̧ Esterö'i̧nä̧ ruhuodera̧'a̧ ȩpä̧jä̧'cotö, nä̧tö̧rö̧ tta̧huä̧rä̧cuä̧huä̧ i̧sa̧ Hegai tta̧huä̧ra̧jö̧ pä'ö. ⁹ Möäyajumä̧ ja̧u̧ esehuomȩnä̧ ki̧nä̧ju̧, ja̧hua̧nö̧ jȩpö̧ ja̧u̧cu̧ esecuinä̧ju̧. Yotäcu tujuähuäcuähua'i̧nä̧ iyö kä̧nö̧ ku̧cuȩ'i̧nä̧ iyinä̧cua̧. Ja̧u̧mä̧ ruhuodettö ttömöhuäyotö nä̧tö̧ ppä̧ttä̧dö̧rö̧nä̧ hueinä̧cua̧ ja̧'hua̧nö̧ jȩpö̧ jahuäjurumä̧ ku̧mö̧huätotö nä̧tö̧cu̧ nä̧tö̧ ttoju isode adihuodenä̧ pporädö u̧ju̧ninä̧cua̧. ¹⁰ Esrermä̧ chahuaruhuämä̧ jahuätö pä'ömä̧ ji'ähuocoju pinä̧ju̧, juhua'amä̧ Mardoqueo yorö'iso jicuähuo pä'ö ro̧'ȩpö̧ u̧ju̧nina̧'a̧ttö̧. ¹¹ Mardoqueomä̧ mo̧ro̧ji̧'a̧cuä̧ ruhuodettö cuähuä ka̧cuo̧mȩ pä̧tȩcuä̧nö̧ nä̧tö̧ ttojusode huämo̧denä̧ ppa̧'a̧chä̧rö̧ cue'ächö ki̧nö̧, tocutä̧ kä̧ju̧qui̧ pä'ö ja̧'hua̧ta̧'a̧nö̧ däjetä jȩtta̧cua̧qui̧ pä'ö u̧huo̧jua̧ pä̧huä̧rö̧jä̧cu̧. ¹² Yotucunä̧ möäyotö ru̧hua̧ Asuerorö topö tti̧'cha̧ pä'ö pätecuächomȩmä̧, jȩtta̧ pä'ö hueähui'ähui'inö ucuotömä̧, nä̧tö̧ yotucunä̧mä̧ kä̧hua̧tö̧ 12nö̧ huotö jo̧mȩnä̧ ttadicua pä'ö ji̧na̧'a̧, 6nö̧ kä̧hua̧tö̧ jo̧mȩnä̧ mirra a̧dȩttö̧ ja̧'hua̧ta̧'a̧nö̧ korotö 6 kä̧hua̧tö̧nä̧mä̧ ameu̧ttö̧'i̧nä̧ isähuattö'i̧nä̧ tuttähua pä'ö ji̧na̧'a̧. ¹³ Möäyaju ru̧hua̧rö̧ topö ki̧'chomenä̧mä̧, nä̧tö̧ ttojusodettömä̧ ji̧yȩtȩ köjö'cö ttiyaju pä'ö ji̧na̧'a̧,ruhuodera̧'a̧ kȩpa̧ pä'ö. ¹⁴ Pä'ö ni̧pä̧cha̧'a̧ jahuäju do'ächinä̧ju̧, koro mo̧ro̧ mo̧ro̧juoa'amä̧ Saazgaz ru̧hua̧ u̧mö̧huäya ja̧u̧tä̧ i̧rȩcua̧rö̧ tta̧huä̧rä̧cuä̧huä̧ i̧sa̧ tta̧huä̧rodera̧'a̧tä̧ ppa̧'ä̧chi̧'ä̧nä̧ju̧. Jahuäjumä pä'äjita'anö̧mä̧ ppa̧jächa̧ pä'ö ji̧na̧'a̧ churutä esehuomenä jȩjä̧ji̧ttö̧tä̧ ja̧'hua̧ta̧'a̧nö̧ kicha pä'ö huoöttötä. ¹⁵ Ja̧'hua̧ta̧'a̧nö̧ Ester ki̧'cha̧ pä'ö jö̧ mo̧ro̧ rȩbȩhuo̧mȩnä̧ (Mardoqueo i̧mi̧ya̧ Abihail ittiju, a̧mö̧nä̧ ittuju päi'önä̧ ȩmi̧nä̧cua̧) ru̧hua̧ ö̧jo̧mȩcu̧, koromä jä'epocoju pinä̧ju̧, ru̧hua̧ u̧mö̧huä̧ya̧ Hegai nä̧tö̧rö̧ tta̧huä̧rä̧cuä̧huä̧ i̧sa̧ iyocömä. Ja̧'hua̧ta̧'a̧nö̧ Estermä o'catoi'önä ttesehuomenä ki̧nä̧ju̧. ¹⁶ Estermä̧ ru̧hua̧ Asuero ojusode jacuode ttȩpi̧nä̧cua̧ kä̧hua̧tö̧mä̧ 10nö̧ huotö pätti'omenä̧, kä̧hua̧ Tebet pättäcunä, ruhuomä 7nö a̧'ȩ päi'önä huea'a. ¹⁷ Ru̧hua̧ Esterö juiyo repe'inö korotö irecuamöttö̧'i̧nä̧ yabonä̧nö̧ ja̧'hua̧ta̧'a̧nö̧ adiu esehuomenä̧ jȩpi̧nä̧ju̧, ja̧'hua̧nö̧ jȩji̧yä̧cu̧ isopäi'önä pöttähuä cunä cä'epö huȩnö̧ ruhuaju jö̧nä̧ utinä̧cua̧, Vasti ku̧ji̧no̧mȩ o'come. ¹⁸ Ru̧hua̧mä̧ o'catoi'önä chutäcu tö'cönä̧nö̧ aditätucu'inä ja̧'hua̧ta̧'a̧nö̧ u̧mö̧huäyotucu'inä pä'cäri ku̧nö̧mä̧, "Ester pä'cäri pä'ö o'inö" ja̧'hua̧nö̧ jȩpö̧, ja̧huä̧jä̧nä̧ ka̧cuä̧tö̧rö̧mä̧ pärätä ru̧hua̧rö̧ ttiyä'iji'i̧nä̧ a̧'u̧cu̧nä̧tä̧ ttiyönä jȩpi̧nö̧. Ja̧'hua̧ta̧'a̧nö̧ aditähuä ja̧'a̧ttö̧ mippoönä̧ iyähuä iyä'chinö. ¹⁹ Ja̧'hua̧nö̧ ja̧'a̧ todärenä päi'önä nä̧tö̧ uborö jerupätö ttö̧ca̧ca̧cui̧'ä̧ja̧'a̧, Mardoqueo ru̧hua̧ oju'isode äpate'ca pi̧nö̧. ²⁰ Estermä ji̧nä̧ jahuätö jahuätö ja̧'a̧ chahuaruhuämä jahuätö isajusä pä'ömä ji'ähuocoju pinäju̧, Mardoqueo ro̧'ȩpö̧ jiähuinö̧ta'anö̧tä̧. Jahuäjumä Mardoqueo päöta'anö̧tä̧ jȩpi̧nä̧ju̧, pöttadä kä̧nö̧ jihuomenä jȩji̧nö̧ta̧'a̧nö̧tä̧. ²¹ Ja̧u̧nö̧ mo̧ro̧ Mardoqueo ru̧hua̧ ojuísode äpate ä'ca ö̧'a̧'a̧nä̧, ta̧ju̧ ru̧hua̧cu̧ tö'cönänö̧ aditä'ijätö Bigtán'inä ja̧'hua̧ta̧'a̧nö̧ Teres'i̧nä̧ doächi'äcuähuome tta̧'ä̧rä̧tö̧ ra̧huä̧ri̧pö̧ ru̧hua̧ Asuerö cuä'ö tticua pä'inä̧tö̧. ²² Mardoqueomä̧ ja̧u̧ huȩnȩ huo̧jui̧'ö̧ ruhuaju Esterö ji'ähuinö, ja̧'hua̧nö̧ ja̧'a̧ Estermä Mardoqueo iminä ru̧hua̧rö̧ ji'ähuinäju̧. ²³ Huȩnȩ jä̧ji̧ adiunänä usähuipö tottomenä, isopäi'önä̧tä̧ ji̧na̧'a̧, ja̧'hua̧nö̧ jo̧mȩnä̧ jahuätö ta̧ju̧ru̧mä̧ nu̧huä̧huo̧chö̧nä̧ nu̧'u̧ tticuinä̧u̧. Ja̧'hua̧nö̧ 'cuäopinö ru̧hua̧ ä'ca jo̧mȩttö̧ cuyäru'tä Crónicas pähuä'tänä huȩyu̧cui̧'i̧na̧'a̧.