¹ I Saulo te dako kõpletmã ke lamo dji Estevão. Lãdã sa mem ju-la legliz dji Jehuzalem kumase sufui un ghã pehseguisiõ. I tut sa ki ka suiv Jezi, ie ale kate pu hegiõ dji Judeia i dji Samaria i apostolo-iela nõ. ² Un de om ki te ka suiv helijiõ, ãtehe Estevão i ie khie boku palakos dji so lamo. ³ I Saulo te ka fose pu finï ke legliz-la. Li te k'ale dji kaz ã kaz, li te ka txẽbe om-iela i fam-iela li te ka jite ie lãdã phuiziõ. ⁴ Sa ki te kate-iela ie te ka ãnüsie *pahol-la pu tut kote. ⁵ Filip ale juk la Kapital dji Samaria li te ka ãnüsie Jezi Khi mun-iela ki te ka hete laba, ⁶ i ban mun-iela te ka kute ãtẽsiõ sa ki li te ka dji. Tut te ka kute'l ie te ka ue mihak ki li te ka fe. ⁷ Lesphui mal-iela, te ka hele, i ie te ka sotxi dji boku mun i boku ïvalid i mun ki pa te ka maxe te ka hete djiehi. ⁸ I kõsa pov dji sa vil-la hete boku kõtã. ⁹ Te ka hete laba un om ki ie k'aple Simõ, ki djipi un de tã deie te ka fe maji ãt samahitan-iela i li te lese ie boku susphan. Li te ka fe ki li te ïpohtã, ¹⁰ i mun-iela dji Samaria, ie tut te ka kute ke boku ãtẽsiõ, juk mun ki te pi ïpohtã i pi sẽp te ka kute, akisa li te ka dji. Ie afihmẽ: Sa om-la a povua dji Bõdje! li sa "ghã povua"! ¹¹ Ie te ka bai ãtẽsiõ, pu sa ki Simõ te ka fe, pase ki, dehãtxi boku tã li te lese mun-iela boku pe ke so maji-iela. ¹² Mẽ ie te ka khe lãdã mẽsaj dji Filip a hespek dji bõ Nuvel dji *lasosiete dji Bõdje i a hespek dji Jezi Khi i ie ale batxize Kumã om-iela i fam-iela. ¹³ Phop Simõ-la osi khe. I, aphue ki li batxize, li akõpãiẽ Filip dji phox, li hete boku susphan ke ghã mihak-iela i bagaj ki Joli ki li te ka fe. ¹⁴ Apostolo-iela, ki te la Jehusalem, hete save ki pov dei Samaria osi te husuve pahol dji Bõdje, pu sa ie voie Pie i Jã pu laba. ¹⁵ Kã de-iela hive laba, ie phuie pu mun-iela dji Samaria husuve Sẽthesphui, ¹⁶ pase Lesphui-la pa te ãko desan lasu pies un dji ie. Ie te selmã batxize lasu nõ dji Sẽie Jezi. ¹⁷ Djila Pie i Jã mete ie lãmẽ lasu mun-iela, kõsa ie husuve Sẽthesphui. ¹⁸ Simõ, ki kã apostlo-iela te ka poze ie lãmẽ lasu mun-iela, Bõdje te ka bai pu mun-iela Sẽthesphui. Pu sa li ofui lajã pu Pie i Jã, ¹⁹ li dji: Mo le ki zot osi bai mo sa povua-la. Kõsa, kã mo ke poze mo lãmẽ lasu un kek mun, sa mun-la ke husuve Sẽtesphui. ²⁰ Ẽbe Pie hepon: ki Bõdje voie u i u lajã pu lãfe! u ka majinẽ ki u puve hesi ke lajã povua dji Bõdje. ²¹ U pa gãiẽ dhue dji phã pedas lãdã no thavai, pase ki, u txo pa onet djivã Bõdje. ²² Hepãtxi, i lese u thvai ki u ka fe, dumãde dji Sẽie pu padõnẽ u pu sa mal ïtẽsiõ-la. ²³ Mo ka ue, ki u plẽ ke jaluzi, un jaluzi ãme kumã un fiel, i mo ka ue osi ki u phui lãdã pexe. ²⁴ Djila Simõ dji pu Pie i Jã: Zot dumãde dji Sẽie pu mo, pu pa hive ke mo ãiẽ djisa ki zot pale. ²⁵ Aphue dji bai tẽmuẽ i dji pase pahol dji Sẽie, Pie i Jã tonẽ pu Jehusalem. Lãdã ximẽ ie te ka hete lãdã boku vilaje dji Samaria pu ãnüsie Bõ Nuvel-la. ²⁶ Un zãj dji Sẽie dji pu Filip: Leve ale pu bo *Sul, pu ximẽ ki ka ale dji Jehusalem juk la Gaza (tximoso mun te ka pase pu sa ximẽ-la). ²⁷ Filip leve i li ale. Lãdã ximẽ-la li un *ofisial dji Etiopia, ki te ka tonẽ pu so pie. Sa om-la a te un ghã füsiõne, Li te ka ẽtxupe dji lajã dji lahen dji Etiopia. Li te ale la jezuhalem pu adohe Bõdje. ²⁸ Lãdã tonẽ, li asi lãdã so *puset ki xuval-iela ka pote, li te ka li lãdã liv dji phofet Isaías. ²⁹ Ẽbe Sẽthesphui dji pu Filip: phoxe sa puset i akõpãiẽ'l. ³⁰ Filip kuhi pu phox dji puset-la i li tãde füsiõne-la ka li liv dji phofet Isaias. Djila Filip dumãde'l: __u ka kõphan akisa u ka li? ³¹ Füsiõne-la hepon: __Kumã mo puve kõphan si pa gãiẽ pies mun pu esplike mo? Ẽbe li ẽvite Filip pu mõte i asi ãsam ke li lãdã so puset ki xuval-iela ka puse. ³² Pedas dji *Pahol Sẽ-la ki füsiõne-la te ka li a te sa: "Li te sa kumã un *pitxit mutõ, ki ie ale ke'l pu txue; li te sa kumã un fimel mutõ ki hete mud kã ie ka kupe so lapo. Li pa dji ãiẽ. ³³ Ie umilie'l, ie txihe so justxis. Pies mun ke puve pale a hespek dji so pitxit-iela, pase so lavi lãdã late-la hive lãdã finisiõ". ³⁴ Füsiõne-la dumãde dji Filip: esplike mo un bagaj! a dji kimun ki phofet-la ka pale sa? A dji li mem o dji uot? ³⁵ Ẽbe, kumase ke sa pedas dji Pahol-la, Filip ãnüsie pu füsiõne-la bõ Nuvel a hespek dji Jezi. ³⁶ Ẽkãt, ie te ka voiaje, ie hive un kote ki te gãiẽ djilo. Ẽbe füsiõne-la dji: Gade! esi gãiẽ djilo, mo pa puve batxize? ³⁷ (Filip hepon: si u ka khe dji tut u txo, u puve ui. I füsiõne-la dji: __ ui, mo khe ki Jezi Khi a Pitxit dji Bõdje.) ³⁸ Li voie hete puset-la ie de ãthe lãdã djilo-la, i Filip batxize'l. ³⁹ Kã ie te ka sotxi dji djilo-la, Lesphui dji Sẽie ale ke Filip, li kõtxinẽ so voiaj, plẽ dji kõtãtmã. ⁴⁰ Djinku Filip pahet lãdã vil dji Azoto, li kõtxinẽ voiaje i ãnüsie bõ nuvel lãdã tut vil-iela juk kã li hive Cesareia.