¹ Ẽkãt sa, Saulo pa te ka hete dji ãnüsie pinitãs dji lamo pu djisip-iela dji Sẽie Jezi. Li ale pale ke ghã sasedotxi-la. ² Li dumãde let dji aphuezẽtasiõ pu sinagog-iela dji vil dji Damasco. Ke sa papie-iela Saulo te puve phui i pote pu Jehuzalem mun-iela ki te ka suiv *Ximẽ dji Sẽie ki te ka hete laba, kumã om-iela i fam-iela. ³ Mẽ lãdã exthad dji Damasco, kã Saulo te phox dji vil-la, djinku, un klehite ki vinï dji siel-la klehe obo li. ⁴ Li tõbe ate i li tãde un vue ki dji kõsa: Saulo, Saulo, pukisa u ka fe violãs kõt mo? ⁵ Li dumãde akimun u sa? vue-la hepon: Mo sa Jezi sa ki u ka malthete-la. ⁶ Mẽ leve i ale lãdã vil-l, i laba ie ke dji u akisa u djivet fe. ⁷ I om-iela ki te ke Saulo hete this, ie pa dji ãiẽ. Ie tãde vue-la mẽ ie pa ue pies mun. ⁸ Saulo leve dji ate, li luvui so uei-iela, mẽ li pa te puve ue ãiẽ. Ẽbe ie txẽbe'l la so lãmẽ ie ale ke'l pu Damasco. ⁹ Li hete thoa ju sã ue ãiẽ i dehãtxi sa ju-iela li pa mãje nẽ bue ãiẽ . ¹⁰ Laba la Damasco te ka hete un mun ki te ka suiv Jezi ie te k'aple Ananias. Li te gãiẽ un viziõ, i lãdã sa viziõ-la pahet Sẽie, te k'aple: Ananias! Li hepon: mo esi-la, Sẽie! ¹¹ I Sẽie-la dji pu Ananias leve i ale lãdã lahi ki ie k'aple Adhet, juk la Kaz dji Judas i dumãde un om ki ie k'aple Saulo, dji vil dji Tarso. Li ka phuie ¹² i li te gãiẽ un viziõ. Lãdã viziõ-la pahet un om ki ie k'aple Ananias, ki ãthe i poze so lãmẽ-iela lasu li pu li puve ue ãko. ¹³ Ananias hepon: Sẽie, boku mun pale pu mo a hespek dji sa om-la i tut bagaj ki pa bõ ki li fe la Jehuzalem ke sa ki te ka khe lasu Jezi. ¹⁴ I ato li vinï esi la Damasco ke otohizasiõ dji xef dji sasedotxi-iela pu phui tut sa ki ka adohe u Sẽie. ¹⁵ Mẽ Jezi dji pu Ananias: Ale, pase mo xuezi sa om-la pu thavai pu mo, pu ãnüsie mo nõ, pu nõ-judeu-iela, pu vue-iela i pu pov dji Izhael. ¹⁶ Mo mem ke mõthe pu Saulo tut sa ki li gãiẽ pu sufui palakos dji mo. ¹⁷ Ẽbe Ananias ale, li ãthe lãdã kaz dji Judas, li mete so lãmẽ lasu Saulo i li dji: Saulo, mo fue, Sẽie ki voie mo esi a mem Jezi ki u ue lãdã exthad dji Damasco. Li voie mo esi pu u ue ãko i pu u hete plẽ ke Sẽthesphui. ¹⁸ Lãdã mem lokasiõ un bagaj ki sãble ban kai, tõbe dji uei-iela dji Saulo, i li ue ãko dji nov. Li leve ie batxize'l; ¹⁹ Aphue li mãje li hete fo kumã ãvã. Saulo hete un de ju ke djisip-iela ki te la Damasco. ²⁰ I li kumase vit pale dji Jezi lãdã *sinagog-iela, li te ka dji: __Jezi a Pitxit dji Bõdje. ²¹ Tut sa mun-iela ki te ka kute Saulo, ie hete susphan i ie dumãde: __a pa sa om-la ki la Jehuzalem te ka txue tut mun ki te ka suiv Jezi? A pa li ki vinï juk esi pu phui i pote sa mun-iela pu xef dji sasedotxi-iela? ²² Mẽ pahol-iela dji Saulo te ka hete fo xak fue plis. I laphuev-iela ki li te ka phuezãte dji ki Jezi a te Messias te fo, ki judeu ki te ka hete laba-iela la Damasco pa te save akisa pu ie dji. ²³ Aphue dji boku ju, judeu-iela dji Damasco hasãble i ie deside txue'l, ²⁴ Mẽ Saulo hete save dji ie itẽsiõ. Ie te ka veie gho lapot dji vil-la nuit i jonẽ pu txue'l. ²⁵ Mẽ, dehãtxi un nuit, djisip-iela dji Saulo mete'l ãdjidã un pãiẽ ie desan li pa un thu ki te gãiẽ lãdã bahaj dji vil-la. ²⁶ Kã Saulo hive la Jehuzalem, li seie kõthe ke djisip-iela, mẽ ie tut te pe dji li, pase ki ie pa te khe ki li osi te sa un djisip. ²⁷ Ẽbe Barnabe vinï ide'l i phuezãte'l pu apostolo-iela. I li hakõte pu ie kumã Saulo te ue Sẽie Jezi lãdã ximẽ i kumã Sẽie te pale ke li. Barnabe hakõte osi kumã, la Damasco, Saulo pu povua dji Bõdje dji nõ dji Jezi, li te ka ãnüsie ke kohaj nõ dji Sẽie Jezi. ²⁸ Aphue djisa Saulo hete ke ie, te ka maxe tut kote la Jehuzalem; i, pu povua dji nõ dji Sẽie Jezi, li te ka ãnüsie ke kohaj nõ dji Sẽie Jezi. ²⁹ Li osi te ka koze i djiskite ke judeu-iela ki te leve deho dji late dji Izhael, mẽ ie te ka sase un mãiẽ pu txue'l. ³⁰ Kã fue-iela save dji sa, ie ale ke Saulo juk la vil dji Cezareia i aphue ie voie'l pu vil dji Tarso. ³¹ Lãdã tut hejiõ dji Judeia, Galileia Samaria, legliz-la te lãdã kõtãtmã. Li te ka hete xak fue plis fo, i lemeho dji mun te ka boku, ke kohaj ki Sẽthesphui te ka bai, te ka mõthe ghã hespek pu Sẽie Jezi. ³² Pie te ka voiaje pu tut kote. Un ju li ale vizite pov dji Bõdje ki te ka hete la vil dji Lida. ³³ Li kõthe laba un om ki ie k'aple Eneias, ki te pahalize, te ka fe uit ãnẽ ki li pa te ka sotxi dji so bukã (cama). ³⁴ Pie dji pu li: Eneias, Jezi Khi deha djiehi u. Leve i hãje u bukã. Lãdã mem lokasiõ Eneias leve djibut. ³⁵ Ẽbe tut mun-iela dji vil dji Lida i dji hejiõ dji Sarom ue sa i ie asekte Sẽie. ³⁶ La vil dji Jope te gãiẽ un fam ki te ka suiv Jezi ie te k'aple li Tabita (sa nõ-la ã *grego a Dorcas), li te ka ize tut so tã ka fe djibiẽ i ide mun ki ka pase mize-iela. ³⁷ Lãdã sa ju-iela Dorcas hete malad i li muhi. Ie lave so ko i aphue ie mete'l un xam dji dezem etaj dji kaz-la. ³⁸ Jope te ka hete phox dji Lida. Kã djisip-iela dji Jezi save ki Pie te la Lida, ie voie de om pu bai li sa nuvel-la: Suple vinï pi vit Jope! ³⁹ Ẽbe Pie tonẽ ke ie. Kã li hive laba, ie pote'l pu xam ki la dezem etaj dji kaz-la. Tut fam ki ie om-iela muhi ãtuhe'l, Ka khie i mõthe hob-iela i uot lẽj ki Dorcas te fe kã li te vivã. ⁴⁰ Ẽbe Pie voie ie tut sotxi dji xam-la i aphue li ãjunü i li phuie. Aphue li vihe pu ko dji Dorcas li dji: Tabita, leve! Li luvui so uei-iela, i kã li ue Pie, li asi. ⁴¹ Pie txẽbe'l la so lãmẽ i li ide'l hete djibut. I aphue li aple djisip-iela i fam ki ie om-iela muhi, li bai fam-la pu ie vivã. ⁴² Nuvel a hespek djisa Kate pu tut vil dji Jope, i boku khe lasu Sẽie. ⁴³ I Pie hete laba boku ju, la kaz dji Simõ, un om ki Ka thavai ke lapo.