¹ Ghã sasedotxi-la dumãde dji Estevão: Sa ki mun-iela ka dji a lavehite? ² Estevão hepon: Fue-iela i papa-iela, kute! Bõdje dji *Gloria pahet pu no ãtepase Abhaão kã li te ka hete la hejiõ dji Mezopotamia, ãvã li te ale hete la vil dji Harã. ³ I Bõdje dji pu li: "sotxi dji u late, i dji lamitã dji u lafãmi i ale pu un late ki mo ke mõthe pu u". ⁴ Ẽbe Abhaão sotxi dji late dji caldeu-iela li ale hete la Harã. Aphue ki so papa muhi, Bõdje pote Abhaão pu sa late kote zot ato ka hete. ⁵ I Bõdje pa bai pu Abhaão hixez lãdã sa late-la, nẽ un thas dji un pie, mẽ li phomet ki li te ke bai pu Abhaão tut sa late-la, i ki aphue late-la te ke sa dji so pitxit-iela. Kã Bõdje fe sa phomes-la Abhaão pa te ãko gãiẽ pitxit. ⁶ Li dji pu Abhaão: "u pitxit-iela ke viv kumã ẽthãje lãdã uot late. Laba ie ke sa esklav mun-iela ke malthete ie dehãtxi katsã ãnẽ". ⁷ I Bõdje dji ãko: "Mo ke bai pinitãs pu nasiõ ki fe ie kumã esklav. Aphue djisa ie ke hutonẽ dji sa late-la i ie ke adohe mo lãdã sa kote-la". ⁸ Bõdje bai pu Abhaão un kõtha dji xathe (circuncisão). Kõsa kã so pitxit Izaque fet, li xathe'l lãdã uitzem ju. Izaque so pitxit Jako, i Jako fe mem bagaj ke so duz pitxit-iela, ki ghã xef-iela i no ãtepase-iela. ⁹ Estevão kõtxinẽ: Joze so fue-iela te jaluzi'l i ie vãde'l pu sa esklav la Egito. Mẽ Bõdje te ke li ¹⁰ i Bõdje delivue'l dji tut so aflisiõ-iela. Kã Joze pahet djivã Farao, vue dji Egito, Bõdje bai pu li konetmã i mãiẽ ki bõ dji viv. I Farao fe li tonẽ guvelmã dji Egito, i dji ghã Kaz dji vue-la. ¹¹ Aphue hive ghã fẽ, i boku sufãs la Egito i Canaã, i no ãtepase-iela pa te gãiẽ akisa pu mãje. ¹² Jako te save ki te gãiẽ tuju fahin-fãs la Egito li voie so pitxit-iela, no ãtepase-iela pu axte mãje. ¹³ Lãdã dezem fue ki ie ale, Joze hakõte pu so fue-iela akimun li te sa, i Farao hete save dji lafãmi dji Joze. ¹⁴ Ẽbe Joze voie sase so papa Jako i tut so lafãmi-iela, pu ie ale pu Egito; a te soasãt kẽz mun pu tut ki ale. ¹⁵ Jako ale pu Egito, i laba li i no ãtepase-iela hete juk ju dji ie lamo. ¹⁶ Ie ko-iela ale pu Siquem ie ãtehe lãdã tom ki Abhaão te axte pu un phui dji pitxit dji Hamor. ¹⁷ Kã te ka hive tã dji Bõdje kõphui phomes ki li te fe pu Abhaão, no pov te boku la Egito. ¹⁸ Ẽbe un vue, ki pa te save ãiẽ a hespek dji Joze kumase kumãde Egito. ¹⁹ Sa vue-la kuiẽnẽ i malthete no ãtepase-iela, li oblije papa-iela lese ie pitxit-iela ki fet, pu ie muhi. ²⁰ Lãdã sa tã-la fet Moises, ki a te un joli tximun, i dehãtxi thoa mua so papa-iela ẽtxupe dji li. ²¹ Kã ie te buẽzẽ ãbãdõnẽ'l, pitxit fam dji vue-la phã li i leve'l kumã so phop pitxit. ²² Kõsa Moises ãphan tut, konetmã dji egipcio-iela li tonẽ un om ki te ka pale i thavai ke otohite. ²³ Estevão dji ãko: Kã Moises te ke kahãt ãnẽ, li deside ale ue so mun-iela pov dji Ishael. ²⁴ Laba li ue un egipcio ki te ka malthete un om dji so pov. Ẽbe li defie ishaelita-la i li txue egipcio-la. ²⁵ Moises, te ka majinẽ ki so fue ishaelita-iela te ke kõphan ki Bõdje voie'l pu libiate ie, mẽ ie pa kophan. ²⁶ Lãdã uot ju-la Moises ue de om dji Ishael ka bhuiga. I li seie sepahe ie pu ie pa bhuiga, li dji pu ie: "om-iela, Zot kute! zot sa fue ; pukisa zot ka bhuiga?" ²⁷ Mẽ sa ki te ka malthete uot-la puse Moises i li dji: "akimun ki mete u kumã no xef, i mun pu kõdãnẽ no? ²⁸ U le txue mo kumã u txue egipcio-la aie?" ²⁹ Kã Moises tãde sa, li mahõ dji Egito i li ale hete la late dji Midiã, laba fet so de pitxit-iela. ³⁰ Kahãt ãnẽ aphue, kã Moises te la "kote ki pa gãiẽ ãiẽ" (deserto) phox dji mõtãi Sinai, un zãj pahet pu li, lamitã dji djife dji un "piebua" (sarça) ki te ka bule. ³¹ Kã Moises ue sa li hete susphan, li ale phox pu li gade pi biẽ. Ẽbe li tãde vue dji Sẽie, ki dji kosa: ³² " Mo sa Bõdje dji u ãtepase-iela, Bõdje dji Abhaão, Bõdje dji Isaque i Bõdje dji Jako". Moises te ka thãble dji pe, li pa te gãiẽ kohaj pu gade. ³³ Ẽbe Sẽie dji: " tihe savat-iela dji u pie, pase u ka djibut lãdã un late Sẽ. ³⁴ Mo ue kumã mo pov ka sufui la Egito; mo tãde ie phuie i mo desan pu libiate ie. Ato mo ke voie u pu Egito". ³⁵ I Estêvão kõtxinẽ: sa mem Moises ki ie nephuize, kã ie dji: "akimun ki mete u kumã no xef i mun pu kõdãnẽ no?" . Bõdje voie sa Moises-la kumã un lidehãs i un mun pu libiate, pu lãmẽ dji zãj-la ki pahet lãdã *piebua (sarça ) ki te ka bule-la. ³⁶ A li ki txihe pov dji Ishael dji Egito, kã li fe mihak i bagaj ki Joli la late dji Egito, la *ghã lãme huj, (mar vermelho), i la *kote ki pa gãiẽ ãiẽ (deserto) dehãtxi kahãt ãnẽ. ³⁷ A sa mem Moises ki dji pu pov dji Ishael: "dji lamitã dji zot Bõdje ke xuezi i ke voie pu zot un *phofet, kõsa kumã li voie mo". ³⁸ A Moises ki te ke pov dji Ishael ãsam la "kote ki pa gãiẽ ãiẽ" (deserto); li te laba ke no ãtepase-iela i ke zãj ki te pale ke li la mõtãi Sinai. A Moises ki husuve i bai pu no pahol vivã dji Bõdje. ³⁹ No ãtepase-iela pa te le obei Moises, mẽ ie nephuize'l i ie te le hutonẽ pu Egito. ⁴⁰ Ie dji pu Arão: "fe pu no un ban bõdje pu ale djivã dji no. Pase no pa save akisa ki hive ke sa Moises ki txihe no dji late dji Egito. ⁴¹ Ẽbe ie fe un imaj ã fom dji un bef i ie txue betaj-iela pu ofui kumã sakhifis pu imaj-la. I aphue ie fe un lafet pu imaj ki ie fe. ⁴² Ẽbe Bõdje sotxi dji ie phuezãs, li lese ie pu adohe zetuel-iela dji siel-la, kumã li ekhi lãdã liv dji phofet-iela : pov dji Ishael, a pa pu mo ki zot txue i ofui betaj-iela kumã sakhifis dehãtxi kahãt ãnẽ la "kote ki pa gãiẽ ãiẽ (deserto). ⁴³ Zot xaie bahak dji bõdje *Moloque i osi imaj dji zetuel dji Raifã, zot bõdje. Sa-iela a te bõdje ki zot te fe pu zot adohe. Pu sa mo ke voie zot pu plis luẽ dji Babilônia. ⁴⁴ Lãdã "kote ki pa gãiẽ ãiẽ (deserto), no ãtepase-iela te ke "bahak" dji Phuezãs dji Bõdje. Sa bahak-la ie fe kumã Bõdje te dji pu Moises fe, dji mãiẽ ki Bõdje te mõthe pu li. ⁴⁵ Ie te husuve bahak dji ie ãtepase-iela i ie ale ke'l kã ie ale ke Josue i ke phã late-iela dji nasiõ-iela ki Bõdje txihe dji djivã dji ie. Bahak-la hete laba ke ie juk tã dji Davi. ⁴⁶ Davi husuve aphovasiõ dji Bõdje i li dumãde pu edjifike un kaz pu Bõdje dji Jako. ⁴⁷ Mẽ, a Salomão ki edjifike kaz dji Bõdje. ⁴⁸ Mẽ Bõdje pa ka hete lãdã kaz ki lãmẽ dji om ka fe. Kumã phofet-la dji: ⁴⁹ "Siel-la a mo obiho, Bõdje dji, i late-la a kote mo ka poze mo pie-iela. Ki kalite kaz zot te puve edjifike pu mo? Kumã zot ke puve fe un plas kote pu mo hete? ⁵⁰ A pa mo lãmẽ-iela ki fe siel i late? ⁵¹ I Estevão finï dji kõsa: pov kumã zot txo du! zot gãiẽ un txo du i zot pa ka tãde pu kute pahol dji Bõdje! zot tuju ka nephuize Sẽtesphui, kumã zot ãtepase-iela nephuize. ⁵² A ki phofet ki zot ãtepase-iela pa fe pase pu pinitãs? Ie txue juk sa mun-iela ki te ka koze lasu un mun ki jis ki te ke vinï, sa ki zot kuiẽnẽ i txue. ⁵³ Zot husuve lalua-la pu lãmẽ dji zãj-iela i zot pa obei sa lalua-la. ⁵⁴ Kã mun-iela dji Kõsei-la finï kute sa ki Estevão te dji, ie hete boku kole ke akuzasiõ dji Estevão. ⁵⁵ Mẽ, Estevão, plẽ dji Lesphui Sẽ, li gade pu lahosiel li ue *Gloria dji Bõdje. I li ue osi, Jezi djibut, bo adhet dji Bõdje. ⁵⁶ Ẽbe li dji: Gade! mo ka ue siel-la luvui i *Pitxit dji Om-la djibut, bo adhet dji Bõdje. ⁵⁷ Mẽ ie buxe ie zohe-iela, i ka hele, ie tut ale kõt Estevão. ⁵⁸ Aphue ie jite'l deho dji vil-la i ie jite hox lasu'l. I tẽmuẽ-iela lese so lẽj-iela obo pie-iela dji un om ki ie k'aple Saulo. ⁵⁹ Ẽkãt ie te ka jite hox lasu'l, Estevão te k'aple Jezi, li te ka dji: __Sẽie Jezi, husuve mo lesphui! ⁶⁰ Aphue li ãjunü i hele biẽ fo: Sẽie, pa kõdãnẽ sa mun-iela palakos djisa pexe-la! I aphue ki li dji sa, li muhi.