¹ Un de tã aphue, lemeho dji judeu-iela ki te ka suiv Jezi hete boku, i sa ki leve deho dji late dji Ishael kumase heklãmẽ djisa ki leve lãdã Ishael. Ie te ka heklãmẽ, pase fam ki ie om muhi-iela dji ie patxizã ie te ka blie sa fam-iela lãdã djisthibuisiõ dji lajã dji xak ju. ² Ẽbe duz apostolo-iela hasãble tut patxizã dji sa ki ka suiv-iela ie dji: _Li pa jis no lese dji ãnüsie pahol dji Bõdje pu ẽtxupe dji djisthibuisiõ dji lajã. ³ Pu sa, fue-iela zot xuezi ãt zot set om dji kõfiãs, plẽ dji Lesplui Sẽ i dji konetmã, i no ke bai sa thavai-la pu ie. ⁴ Kõsa no ke puve kõtxinẽ ize tut no tã, lãdã phuie i lãdã thavai dji ãnüsie pahol dji Bõdje. ⁵ Ie tut dako kumã apostolo-iela te dji; Ẽbe ie xuezi Estevão, un om plẽ ke espua i Sẽtesphui, i osi Filip, Procoro, Nicanor, Timom, Parmenas i Nicolau dji Antioquia, un nõ-judeu ki ãvã li te asekte helijiõ dji judeu-iela. ⁶ Ie pote sa om-iela pu apostolo-iela, ki ie phuie i poze ie lãmẽ-iela lasu ie tet. ⁷ I pahol dji Bõdje te ka kõtxinẽ kate, la jehuzalem lemeho dji mun ki te ka suiv Jezi te ka boku, xak fue plis, i boku sasedotxi te ka asekte espua lasu Jezi. ⁸ Estevão, un om ki Bõdje te bẽnï boku i plẽ ke povua, te ka fe bagaj ki joli i boku mihak ãt pov-la. ⁹ Mẽ hete kõt li un de mun dji "Sinagog dji om lib-iela", ki a te Sinagog dji judeu-iela ki te vinï dji vil dji Cirene i Alexandria. Sa-iela i uot judeu-iela dji hejiõ i dji pei dji Azia kumase djiskite ke Estevão. ¹⁰ Mẽ, Lesphui dji Bõdje te ka bai boku konetmã pu Estevão, ki li te ka gãiẽ tut djiskusiõ-iela. ¹¹ Ẽbe ie phã un de mun pu dji: No tãde sa om-la ka koze mal kõt Moises i kõt Bõdje.! ¹² Djisa mãiẽ-la ie mete pov-la kõt li, lidehãs-iela i met dji lalua-iela. Aphue ie phui Estevão, ie pote'l pu Kõsei dji lidehãs dji pov-iela. ¹³ Ẽbe ie phã un de om pu dji mãto a hespek dji li. Sa mun-iela afihmẽ Kõsa: _Sa om-la pa ka hete dji pale kõt no Kaz Sẽ i kõt Lalua dji Moises. ¹⁴ No tãde kã li te ka dji ki sa Jezi dji nazare ke dethi Kaz dji Adohasiõ-la i xãje tut labitxuid ki Moises bai pu no. ¹⁵ Lãdã sa mumã tut mun dji Kõsei-la gade pu Estevão i ue so vijaz te sãble vijaz dji un zãj.