¹ Mẽ, un om ki ie k'aple Ananias, ki maie ke un fam ki ie te k'aple *Safira, vãde un tehẽ, ² li bai selmã un tximoso dji lajã-la pu apostolo-iela, li hete ke lahextã. I Safira te save djisa. ³ Ẽbe Pie dji pu Ananias: __Pukisa u lese djiab-la dominẽ u txo? _Pukisa u fe mãto pu Sẽtesphui? _Pukisa u hete ke lahextã dji lajã-la dji tehẽ ki u vãde? ⁴ Ãvã u te vãde'l a te, upa, i, aphue dji vãde'l lajã-la, osi a te upa. Ẽbe, pukisa u fe sa? U pa fe mãto pu mun-iela, mẽ u fe mãto pu Bõdje! ⁵ Kã, li tãde sa, Ananias tõbe ate i li muhi; i tut sa ki save djisa ki hive, tut hete boku pe. ⁶ Ẽbe vinï un de Jon mun, ie khuvui ko dji Ananias ke un dha, ie ale ke so ko pu deho i ie ãtehe'l. ⁷ Fam dji Ananias hive ke thoa le dji tã aphue, li pa te save, akisa ki te fet ke so om. ⁸ Pie dumãde'l: Dji pu mo! A pu sa phui-la zot vãde sa tehẽ-la? _Li hepon: ui! ⁹ Ẽbe Pie dji: _Pukisa zot Kõbinẽ pu mete lãdã laphuev Lesphui dji Sẽie? Jon mun-iela ki finï dji ãtehe u om ie deha lãdã lapot-la i ato ie ke ale ke u osi. ¹⁰ Lãdã mem lokasiõ fam-la tõbe ate, i li muhi. Jon mun-iela ãthe, ie ue ki li te muhi, ie ale ke so ko, i ie ãtehe'l phox dji so om. ¹¹ I tut legliz-la i tut sa ki save djisa, hete pe. ¹² Apostolo-iela te ka fe boku mihak i boku bagaj ki joli ãt pov-la, i sa ki te ka suiv Jezi ie hasãble lãdã * Alpendre (plas ki pi hix) dji Salomão. ¹³ Pies mun dji deho, pa te gãiẽ kohaj dji hasãble lãdã ie patxizã, mẽ pov-la te ka koze biẽ dji ie. ¹⁴ Un ban mun om i fam khe osi lasu Sẽie i patxizã-la vinï hete plis boku. ¹⁵ Palakos dji mihak-iela ki apostolo-iela te ka fe, mun-iela te ka mete mun malad-iela lãdã lahi-iela, lasu ie lit-iela. Ie te ka sa, pu kã Pie te pase, pu mem so lom te khuvui un de dji ie. ¹⁶ Ban mun-iela te ka vinï dji vil-iela ki phox dji Jehuzalem, ie te ka pote ie mun malad-iela, i sa ki te ke lesphui djimal, i ie tut te ka djiehi. ¹⁷ Ẽbe ghã sasedotxi-la i so kõpãiẽ-iela, ki a te dji patxizã dji saduseu-iela, ie hete ke jaluzi lasu apostolo-iela ie deside fe un kek bagaj. ¹⁸ Ie phui apostolo-iela lãdã phuiziõ. ¹⁹ Mẽ lãdã sa nuit-la un zãj dji Sẽie, luvui lapot-iela dji phuiziõ-la, li pote apostolo-iela pu deho i li dji: ²⁰ __Zot ale pu Kaz dji Adohasiõ-la i ãnüsie pu pov-la tut a hespek djisa nov lavi-la. ²¹ Apostolo-iela obei i lãdã uot ju-la, biẽ bono bõmãtẽ, ie ãthe lãdã Kaz-la i ie kumase mõthe. Ẽbe ghã-sasedotxi-la i so kõpãiẽ-iela, aple lidehãs-iela dji pov-la pu un heuniõ dji "Kõsei-la". Aphue ie voie un de soda dji Kaz dji Adohasiõ-la sase apostolo-iela la phuiziõ. ²² Kã, soda-iela hive laba, ie pa kõthe apostolo-iela. Ẽbe ie tonẽ pu kote kõsei-la te hasãble. ²³ Ie dji: __No ale juk laba, i no kõthe phuiziõ-la biẽ fõmẽ, i soda-iela ka veie lapot-iela; mẽ, kã no luvui lapot-iela, no pa thuve pies mun laba ãdjidã. ²⁴ Kã xef dji sasedotxi-iela i xef dji soda-iela dji Kaz dji Adohasiõ-la, tãde sa, ie hete sã save akisa pu ie majinẽ, suje sa ki fet ke apostolo-iela. ²⁵ Lãdã sa mumã-la hive un mun, li dji: zot kute! Sa om-iela ki zot te mete lãdã phuiziõ ie laba lãdã Kaz-la Kã mõthe pov-la ²⁶ Ẽbe xef dji soda-iela dji Kaz-la, i so soda-iela sotxi i ie pote apostolo-iela. Mẽ ie pa malthete apostolo-iela, pase ki ie te hete pe veie pov-la te jite hox lasu ie. ²⁷ Aphue ie mete apostolo-iela djivã Kõsei-la. I ghã sasedotxi-la dji: ²⁸ "No bai zod ki zot pa mõthe ãiẽ a hespek djisa om-la. I akisa ki zot fe? Zot kate sa nuvel-la pu tut pei dji Jehuzalem i zot le tuju mete fot lasu no, pu so lamo! ²⁹ Ẽbe Pie i uot apostolo-iela hepon: No djivet obei Bõdje i nõ mun-iela. ³⁰ Zot klue Jezi lãdã lakhue, mẽ Bõdje dji no ãtepase-iela hesusite'l. ³¹ I Bõdje mete'l la so bo adhet kumã Lidehãs i mun pu sove, pu bai pu pov dji Ishael opohtunite pu hepãtxi i husuve padõ dji so pexe-iela. ³² No sa tẽmuẽ dji tut sa, no i Sẽtesphui, ki Bõdje ka bai pu sa ki ka obei'l. ³³ Kã mun-iela dji Kõsei-la tãde sa, ie hete boku ãhaj, ie deside txue apostolo-iela. ³⁴ Mẽ leve un mun dji Kõsei-la, un fahiseu ki ie k'aple Gamaliel, ki a te un met dji lalua, ki tut te Ka hespete. Li voie apostolo-iela sotxi pu un mumã. ³⁵ Ẽbe li dji pu Kõsei-la: Om-iela dji Ishael, ãtãsiõ ke Kisa zot ke fe ke sa om-iela. ³⁶ Un de tã deie pahet un om ki ie k'aple Teudas, ki te ka afihmẽ ki li sa un mun boku ïpohtã, i ke sa li hesi hasãble katsã mun pu suiv li. Mẽ ie txue'l, tut so mun-iela ki te ka suiv li, ie Kate, i so muhmã finï. ³⁷ Aphue djisa pahet Judas, dji Galileia, lãdã sezõ ki ie ka kõte kãtxite dji mun-iela ki gãiẽ . Sa osi hesi hasãble boku mun, mẽ li muhi, i tut so mun-iela hete Kate. ³⁸ Lãdã sa lokasiõ-la, zot pa fe ãiẽ kõt sa om-iela. Zot lese ie ale, pase ki, si sa thavai ki ie ka fe, ka vinï dji om-iela li ke djispahet. ³⁹ Mẽ, si ka vinï dji Bõdje, zot pa puve dethi'l. Puve juk hive dji zot, bhuiga kõt Bõdje. I Kõsei-la asekte lide dji Gamaliel. ⁴⁰ Ẽbe ie aple apostolo-iela i ie fut ie; ie bai zod pu ie pa jẽ koze ãiẽ a hespek dji Jezi. Aphue Kõsei-la libehe ie. ⁴¹ Apostolo-iela sotxi dji Kõsei-la boku kõtã, pase ki Bõdje te kõsidehe ie jis dji sufui umiliasiõ pu no dji Jezi. ⁴² I tut ju-iela, lãdã Kaz dji Adohasiõ-la i dji kaz ã kaz, ie te ka kõtxinẽ mõthe i ãnüsie bõ nuvel a hespek dji Jezi.