¹ Pie i Jã te ka koze ke pov-la tuju, kã hive un de sasedotxi, xef ki te ka veie Kaz dji Adohasiõ-la I un de *saduceus*. ² Ie hete boku ãhaj, pase ki de apostolo-iela te ka dji pu pov-la ki Jezi hesusite, i sa te ka fe laphuev ki mun ki muhi-iela ke hesusite. ³ Ẽbe ie mete de-iela lãdã phuiziõ,pu ie hete laba juk uot ju-la, pase te deha ka suku. ⁴ Mẽ, sa mun-iela ki tãde mẽsaj-la ie khe, i sa om ki khe-iela phox ki sẽk mil. ⁵ Lãdã uot ju-la hasãble la Jehuzalem otohite dji judeu-iela, lidehãs-iela dji pov-la i met dji lalua-iela. ⁶ Lãdã heuniõ te laba osi, Anas, ki a te ghã sasedotxi-la, Caifas, Jã, Alixan i uot-iela ki a te dji lafãmi dji ghã sasedotxi-la. ⁷ Otohite-iela mete apostolo-iela djivã ie, i ie dumãde: ke ki povua o lasu nõ dji kimun zot ka fe sa? ⁸ Ẽbe Pie, plẽ ke Sẽtesphui, hepon: _Otohite-iela i lidehãs-iela dji pov-la. ⁹ Zot ka dumãde dji no jodla suje djibiẽ ki no fe pu sa om-la i kumã li hete djiehi. ¹⁰ Ẽbe, ki zot i tut pov dji Ishael hete save ki sa om-la ki esi, li kõpletmã djiehi pu povua dji nõ dji Jezi Khi, dji Nazare __sa ki zot klue lãdã lakhue i ki Bõdje hesusite. ¹¹ Jezi a sa ki Pahol Sẽ-la te dji: "hox ki zot, mun-iela jite deho vinï tonẽ plis ïpohtã dji tut." ¹² Pa gãiẽ salvasiõ lãdã pies uot! Pa gãiẽ pies uot nõ ãba dji siel-la, i lãdã tut tã-la, ki puve sove no. ¹³ Kõseie-iela ki pi ïpohtã-iela, hete susphan ke kohaj dji Pie i Jã, pase ie te save ki de-iela te sa om sẽp, i sã ïsthusiõ. I ie hukonet ki ie de te ke Jezi. ¹⁴ Mẽ ie pa te puve dji ãiẽ kõt, de-iela, pase om ki ie te djiehi-la te djibut laba, ãsam ke ie. ¹⁵ I aphue ie voie ki Pie i Jã sotxi dji lasal dji kõsei-la i ie kumase djiskite. ¹⁶ Ie te ka dji: __akisa no ke fe ke sa om-iela? Pase tut mun ki ka hete la Jehusalem save ki ie fe un ghã mihak, i no pa puve dji a mãto. ¹⁷ Mẽ, pu no pa lese sa nuvel-la Kate pi boku ãt pov-la, ãnü ãpexe ie, pu ie jẽ pale ke pies mun a hespek dji Jezi. ¹⁸ Ẽbe ie aple de-iela ãko i ie bai zod, pu ie pa jẽ pale, nẽ mõthe ãiẽ a hespek dji Jezi. ¹⁹ Mẽ Pie i Jã hepon: "zot ka khe ki Bõdje le no obei zot, i nõ li? ²⁰ No pa puve lese dji pale dji sa ki no ue i no tãde." ²¹ Kõseie-iela ki pi ïpohtã-iela ãpexe ãko, mẽ, lãdã finisiõ ie libiate de-iela. Kõseie-iela pa te puve bai pinitãs, pase ki tut pov-la te ka adohe Bõdje palakos dji sa ki te fet. ²² Sa om-la ki te djiehi, pu sa mihak-la te gãiẽ plis ki kahãt ãnẽ. ²³ Kã Pie i Jã hete lib, ie tonẽ pu ie patxizã i ie hakõte tut sa ki xef dji sasedotxi-iela i lidehãs-iela dji pov-la te dji. ²⁴ Kã ie tãde tut sa, ie phuie tut ãsam pu Bõdje, ie dji: __Sẽie, u sa met dji siel i late, dji ghã lãme, i dji tut ki gãiẽ lãdã ie! ²⁵ U pale boku tã deie pu Sẽtesphui, lãdã Pahol dji no ãtepase Davi, u siavito, kã li dji: "Pukisa nasiõ-iela hete kole boku? Pukisa pov-iela majinẽ bagaj sã vale? ²⁶ Zot vue-iela phuepahe, i zot guvelmã-iela hasãble kõt Sẽie Bõdje i kõt Messias, ki li xuezi". ²⁷ Vuemã, Herodes i Pilatos hasãble esi lãdã sa pei-la, ke nõ-judeu-iela i ke pov dji Ishael, kõt Jezi, u siavito Sẽ ki u xuezi pu tonẽ Messias. ²⁸ Ie hasãble pu fe tut sa ki, pu u povua i pu u volõte, te deha dji ki te ke hive. ²⁹ Ato Sẽie, gade pu phomes dji pinitãs, pu ie. Bai pu u siavito-iela kohaj pu ãnüsie u pahol. ³⁰ Lõje u lãmẽ pu djiehi, ãfẽ dji ki, pu povua dji nõ dji u siavito Sẽ Jezi, mihak i boku uot bagaj fet. ³¹ Kã ie Finï dji phuie, kote-la thãble, kote ie te hasãble. Ẽbe tut hete plẽ ke Sẽtesphui i ie kumase ãnüsie ke kohaj pahol dji Bõdje. ³² Tut sa ki khe-iela te ka majinẽ i sãtxi dji mem mãiẽ. Pies mun pa te ka dji ki sa bagaj ki ie te gãiẽ a te selmã ie pa, mẽ ie tut te ka pataje un ke uot tut sa ki ie te gãiẽ. ³³ Ke ghã povua, apostolo-iela te ka bai tẽmuẽ dji hesuheisiõ dji Sẽie Jezi, i Bõdje te ka devide boku usiõ lasu ie tut. ³⁴ Pa te gãiẽ ãt ie, pies mun ki te ka pase mize, pase tut sa ki ie te gãiẽ, late, kaz ie vãde, ³⁵ ie te ka pote lajã-la pu apostolo-iela. I xakẽ un mun te ka husuve un moso, sosulõ ie nesesite. ³⁶ Apostolo-iela bai un nõ pu Jose ki a Barnabe , ki signifike "Pitxit dji kohaj" li te sa dji thib dji Levi, i li te fet lãdã zile dji Chipre. ³⁷ Li vãde un tehẽ ki li te gãiẽ, i li pote lajã-la pu apostolo-iela.