¹ Un ju, Pie i Jã te ka ale pu Kaz dji Adohasio pu phuie thoaze dji asue. ² Te laba un om ki te fet ïvalid, tut ju-iela ie te ka pote'l laba phox dji lapot dji Kaz dji Adohasiõ ki ie te k'aple "Formosa", pu li dumãde lajã dji mun-iela ki te ka ãthe lãdã Kaz-la. ³ Kã, om ïvalid-la ue Pie i Jã te ka ãthe li dumãde lajã. ⁴ Ie gade kote li, i Pie dji: _gade pu no! ⁵ Om-la gade pu ie, li ãtan husuve un kek bagaj. ⁶ Ẽbe Pie dji: No pa gãiẽ pies lajã, mẽ sa ki mo gãiẽ mo ka bai pu u: pu povua dji nõ dji Jezi Khi, dji Nazare, djibut i maxe. ⁷ Aphue Pie txẽbe la lãmẽ adhet dji om-la li ide'l leve djibut. Lãdã mem lokasiõ so pie-iela, i so junü-iela hete fiam. ⁸ Ẽbe li vole, i li hete djibut i li kumase maxe. Aphue li ãthe lãdã Kaz-la ke ie, ka maxe i vole i ka humiasi Bõdje. ⁹ Tut ban mun-iela ue om-la te ka vole i adohe Bõdje. ¹⁰ Kã, ie piasuve, ki sa om-la a te ïvalid-la ki te Ka hete asi phox obo lapot "Formosa" dji Kaz dji Adohasiõ-la, ie hete susphan i pe, ke sa ki te fet. ¹¹ Om ki te djiehi-la, suiv Pie i Jã. Tut mun-iela te hete susphan, ie kuhi pu un pedas dji Kaz dji Adohasiõ-la ki ie k'aple *Alpendre(plas ki hix) dji Salomão, kote ie te fika. ¹² Kã, Pie ue sa, li dji pu mun-iela: Pov dji Ishael, pukisa zot hete susphan? Pukisa zot ka gade pu no, komsi a no ki fe sa om-la maxe palakos dji no phop povua, o palakos dji no dedjikasiõ pu Bõdje. ¹³ Bõdje dji no ãtepase-iela, Bõdje dji Abhaão, Bõdje dji Izake, i Bõdje dji Jako, a li ki bai "Gloria pu so *siavito Jezi, mẽ zot hãde'l, i kuiẽnẽ'l djivã Pilatos, i kã li te deside libiate Jezi, zot pa te le. ¹⁴ Jezi te bõ, li te ka dedjike pu Bõdje, pu zot te dumãde pu ie libiate'l, zot dumãde pu Pilatos un bãdji. ¹⁵ Kõsa, zot txue sa ki fe lavi-la; mẽ Bõdje hesusite'l ãko, i no sa tẽmuẽ djisã. ¹⁶ A povua dji nõ dji Jezi ki bai fos pu sa om-la. Sa ki zot ka ue i save fet palakos dji espua lasu nõ dji Jezi, a espua lasu Jezi ki djiehi sa om-la djivã zot tut. ¹⁷ Ato, mo fue-iela, mo save akisa zot, i zot lidehãs-iela fe ke Jezi, zot pa te save akisa zot ka fe. ¹⁸ Mẽ, Bõdje kõphui kõsa ki li te ãnüsie boku tã pu phofet-iela, ki * Messias, ki li te xuezi, te gãiẽ pu sufui. ¹⁹ Zot, hepãtxi i tonẽ pu Bõdje, pu li padõnẽ zot pexe-iela. ²⁰ I osi pu nov tã i nov fos dji Lesphui, vinï dji Sẽie, i li ke voie Jezi, ki li te xuezi pu sa zot Messias. ²¹ Jezi buẽzẽ hete lahosiel, juk kã hive tã, pu tut bagaj-iela hete nov, kumã Bõdje ãnüsie boku tã, pu so phofet-iela. ²² Moises dji: "Dji lamitã dji zot Sẽie Bõdje ke xuezi i li ke voie pu zot un phofet, kõsa kumã li voie mo. Zot obei tut sa ki li ke dji pu zot. ²³ Mun ki pa obei, ie ke hete sepahe dji pov dji Bõdje i ie ke hete dethi. ²⁴ Samuel i tut phofet-iela ki vinï aphue dji li, ie pale a hespek dji sa ju-iela. ²⁵ Phomes-iela ki Bõdje fe palakos dji phofet-iela, a pu zot, i zot ka fe pedas dji sa kõtha, ki Bõdje fe ke zot ãtepase-iela, kã li dji pu Abhaão: palakos dji u pitxit-iela mo ke bẽnï tut nasiõ-iela dji tã-la. ²⁶ Kõsa Bõdje xuezi so Siavito, i li voie'l phõmiẽ pu zot, pu bẽnï zot i pu xakẽ un dji zot ãbãdõnẽ zot pexe-iela.