1
Kã hive ju dji lapẽtkot, tut mun-iela te hasãble selmã un kote.
2
Djinku vinï dji lahosiel un thẽ sãble un vã ki boku fo sa thẽ-la plẽ tut kaz-la kote ie te asi.
3
Ie tut ue un bagaj sãble labhues djife, ki te ka kate kumã lãg dji djife lasu ie xakẽ un mun te ka koze un lãg.
4
Tut mun hete plẽ ke Sẽtesphui ie kumase koze uot lãg sosulõ sa ki Sẽtesphui te ka bai pu xakẽ un mun.
5
Te ka hete laba la jehuzalem judeu ki te vinï dji boku nasiõ dji tã-la.
6
Kã ie tãde sa thẽ-la, boku dji ie patxizã hasãble, i ie tut hete susphan, pase xakẽ un te puve kõphan la ie phop lãg sa ki djisip-iela dji Jezi te ka koze.
7
Mun-iela hete susphan ie te ka koze: _sa mun-iela ki ka koze Kõsa ie sa dji Galileia!
8
Kumã xak un dji no ka tãde ie ka koze la no phop lãg?
9
No sa mun dji Pahtxia, dji Medjia, dji Elão, dji Mezopotamia, dji Judeia, dji kapadosia, dji Azia,
10
dji Fhijia, dji Pãfilia, dji Ejito, i dji hejiõ dji Libia ki ka hete obo Sirene. Un de sa dji Homa.
11
Gãiẽ ki sa judeu, i uot ki a patxizã dji (judaismo).
Gãiẽ ki sa dji Kheta, i uot dji Ahabia. I kumã no tut ka kute kumã sa mun-iela ka koze la no phop lãg a hespek djisa ghã bagaj ki Bõdje te fe?
12
Ie tut hete susphan sã save akisa pu ie majinẽ, ie te ka dumãde un dji uot.
_akisa sa ka signifike?
13
Mẽ gãiẽ uot ki te ka futan, ie te ka dji :
_sa mun-iela su!
14
Ẽbe Pie djibut, obo õz *apostolo-iela li kumase koze fo pu mun-iela :
_ãtẽsiõ mo kamahad-iela judeu i zot tut ki ka hete la Jehuzalem, zot kute sa ki mo ke dji pu zot.
15
_Sa mun-iela pa su kumã zot ka majinẽ, li selmã neve dji bõmãtẽ.
16
Sa ki ka hive esi a sa ki phofet Joel te dji.
17
"A sa ki mo ke fe lãdã diãiẽ ju-iela_ Bõdje dji: _Mo ke devide mo Lesphui lasu tut mun.
Zot pitxit-iela ke phofetxize;
jon-iela ke gãiẽ viziõ i ghã-mun-iela ke heve
18
_ui, mo ke devide mo Lesphui lasu mo pitxit-iela, i lãdã sa ju-iela ie ke ãnüsie mo pahol osi.
19
Mo ke fe pahet ghã bagaj lahosiel, i ghã mihak lasu late, ke gãiẽ djife , djisã i gho nuaj dji lafimẽ;
20
Solei-la ke hete suku i lalin-la pa ke bai so klehite, ãvã hive sa ghã ju dji Sẽie.
21
Ẽbe tut sa ki dumãde pu Bõdje ide ie ke puve sove".
22
Pie kõtxinẽ:
_Om-iela dji Izhael, zot kute sa ki mo ke dji.
Bõdje mõthe pu zot ki Jezi dji nazare a te un Om ki li kõtã. Pase, palakos dji Jezi, Bõdje fe ghã mihak i ghã bagaj ki joli la zot mitã, kumã zot biẽ save.
23
Bõdje, pu so phop volõte i ïtelijãs li te deha deside ki li te ke hãde Jezi Khi la zot lãmẽ. I zot mem txue'l pu lãmẽ dji om ki mixã-iela, ki klue'l lãdã lakhue.
24
Mẽ Bõdje hesusite Jezi, li delivue'l dji povua dji lamo-la, pase te ïposib pu lamo-la te dominẽ'l.
25
Davi te koze a hespek dji Jezi Kõsa:
"Mo te ka ue Bõdje tut tã ke mo, pase li te la mo go adhet, pu ãiẽ pa te sukuie mo.
26
A pu sa mo txo kõtã i mo pahol-iela a dji kõtãtmã; i mo un mun ki ka muhi, mo ke ale poze plẽ ke espehãs.
27
Pase u Sẽie, pa ke ãbãdõnẽ mo la tã dji mun muhi-iela. Mo siavi u vuemã pu sa u pa ke lese mo puhi lãdã mo tom.
28
U mõthe mo ximẽ ki ka pote pu lavi, i u phuezãs ke plẽ mo ke kõtãtmã.
29
Pie dji ãko:
_Mo fue-iela, Mo buẽzẽ pale biẽ kle ke zot a hespek dji Davi. Sa ghã lidehãs-la muhi i li ãtehe, i so tom la juk jodla.
30
Li te sa phofet, li te save ki Bõdje te phomet ki un dji so pitxit-iela te ke sa vue.
31
Davi te save, ki Bõdje te ke fe, a pu sa li kose a hespek dji hesuheisiõ dji *Messias.
Davi dji: "Li pa hete ãbãdõnẽ lãdã tã dji mun muhi-iela, i so ko pa puhi lãdã tom-la ".
32
Bõdje hesusite sa Jezi-la, i no tut sa tẽmuẽ djisã.
33
Pase Jezi ale pu asi bo adhet dji Bõdje, so papa, sa ki bai Sẽtesphui, kumã li te phomet. I Jezi devide lasu no sa Lesphui-la, kofom zot ka ue tãde ato.
34
Pase Davi pa mõte pu lahosiel, mẽ li mem afihmẽ:
"Sẽie Bõdje dji pu mo Sẽie: asi la mo bo adhet,
35
juk kã mo mete u elmi-iela, ãba u pie-iela".
36
Tut pov dji Ishael djivet, hete biẽ save, ki sa Jezi ki zot klue lãdã lakhue a li ki Bõdje tonẽ Sẽie i Messias.
37
Kã ie tãde sa, ie tut hete thakase i ie dumãde dji Pie i uot djisip-iela :
_fue-iela, akisa no djivet fe?
38
Pie hepon: zot hepãtxi, i xakẽ un dji zot batxize lasu nõ dji Jezi Khi, pu zot pexe-iela puve padõnẽ, i zot ke husuve dji Bõdje Sẽtesphui.
39
Pase sa phomes-la a pu zot, pu zot pitxit-iela i pu tut sa ki luẽ-iela, pu tut sa ki Sẽie, no Bõdje, aple.
40
Pie kõtxinẽ bai so tẽmuẽ, i ke boku uot esplikasiõ, li te ka dji pu ie: Sotxi dji lamitã dji lamitã dji sa mun ki mixã-iela, i zot sove zot ko!
41
Boku khe lasu mẽsaj dji Pie i ie batxize. Lãdã sa ju-la phox thoa mil mun batxize, i ie hasãble ãsam ke Jezi so djisip-iela .
42
I ie tut kõtxinẽ fiam, ie te ka suiv sa ki djisip-iela te ka mõthe, ie te ka viv lãdã kõtãtmã i kumuniõ dji Jezi, kã ie te ka pataje djipẽ i ka ie te ka phuie.
43
I djisip-iela te ka fe boku mihak, i boku bagaj ki joli, pu sa tut mun-iela te plẽ ke kõtãtmã.
44
Tut ki te ka khe-iela te ãsam, i ie te ka pataje un ke uot sa ki ie te gãiẽ.
45
Ie te ka vãde ie hixez-iela i uot bagaj i ie te ka pataje ie lajã ke tut, sosulõ nesesite dji xakẽ un.
46
Tut ju-iela, ie te ka kõtxinẽ hasãble obo "kaz dji Adohasiõ ".
Ie te ka pataje djipẽ lãdã ie kaz-iela, i ãsam ie te ka mãje, ke kõtãtmã lãdã ie txo.
47
Ie te ka lue Bõdje pu tut, i tut pov-la te kõtã ie. I xak ju Sẽie-la te ka pote pu patxizã-la mun ki te ke sove-iela.