¹ Kã hive lokaziõ-la, no bake pu Italia. Ẽbe ie hãde Pol i uot phuiziõne-iela pu Julio, un ofisial dji Roma, ki a te dji patxizã ki k'aple "patxizã dji Imperador Augusto". ² No bake lãdã un gho bato dji vil dji Adramitio, ki te phuepahe pu navidje pu un de kote dji hejiõ dji Asia. I kõsa no kumase voiaje. Aristarco, un mun dji Macedonia dji vil dji Tessalonica, te ke no. ³ Lãdã uot ju-la no hive la Sidon. Julio te ka thete Pol biẽ, i li lese'l ale ue so kamahad-iela i pu husuve dji ie sa ki li te bẽzuẽ. ⁴ Aphue ki no sotxi dji Sidon, no navidje pu *Norte dji zile dji Chipre, pu no pa te kõthe gho vã ki te ka sufle kõt no. ⁵ No jãbe ghã lãme djivã dji hejiõ dji Cilicia i Panfilia i no hive la Mirra, un vil dji phovïs dji Licia. ⁶ Laba ofisial dji Roma kõthe un gho bato dji vil dji Alexandria, ki te k'ale pu Italia, i li fe no bake lãdã'l. ⁷ No navidje biẽ dusumã boku ju, ke ghã djifikute no hive djivã vil dji Cnido. Kumã vã-la pa te la lese no kõtxinẽ pu djivã, no navidje pu Cabo dji Salmona dji zile dji Creta i no suiv voiaj-la bo *Sul dji zile-la kote pa te gãiẽ gho vã. ⁸ Kõsa no ale ka navidje biẽ phox dji obo ghã lãme-la, i tuju te gãiẽ djifikute, no hive un kote ki ie k'aple *Bõ Degha "Bons Portos", phox dji vil dji Laseia. ⁹ No hete laba boku tã, te dãjehe kõtxinẽ voiaj-la, pase sezõ lapli-la te ka hive. Ẽbe Pol viatxi: ¹⁰ Om-iela, mo ka ue ki dji esi pu djivã no voiaj ke boku dãjehe. Ke gãiẽ ghã phoblem nõ selmã ke bato-la i ke so xaj-iela, mẽ osi ke gãiẽ mun ke piad ie lavi. ¹¹ Mẽ ofisial dji Roma-la te gãiẽ kõfiãs lasu kapiten i lasu met dji bato-la pase lasu Pol. ¹² I kumã degha-la pa te bõ pu pase sezõ lapli. Pu sa pi boku dji ie te ka thuve ki no te djivet sotxi dji laba i seie hive la degha dji Fenix. La Creta ki gãiẽ un bo pu (sudoeste) i uot bo pu (noroeste). Ie te ka thuve ki no te puve pase sezõ lapli laba. ¹³ Kumase sufle dji (Sul) un vã feb, i pu sa ie majinẽ ki ie te puve fe sa ki a te ie itẽsiõ. No leve pies dji fe(ancora) dji bato-la ki te ofõ djilo i no navidje pi phox posib dji obo zile dji Creta. ¹⁴ Mẽ, djinku un vã boku fo, ki ie k'aple "Nordeste " vinï dji zile-la ¹⁵ phã bato-la dji un tel mãiẽ, ki no pa te puve fe bato-la ale lãdã djihesiõ jis. Pu sa no lage dji lãmẽ i no lese vã-la ale ke no. ¹⁶ Pu no xape dji vã-la, no pase pu (Sul) dji un txizile ki ie k'aple Cauda.Laba ke boku djifikute, no hesi txẽbe txibato sove lavi ki te mahe deie gho bato-la. ¹⁷ *Mun-iela(marinheiro) dji bato-la leve txibato-la pu ãdjidã gho bato-la i ie mahe gho bato-la ke gho kod. Ie te pe veie Bato-la ale pu ban sab ki te ka hete phox obo Libia. Ẽbe ie desan lavuel-iela i ie lese ki vã-la ale ke bato-la. ¹⁸ I gho move tã-la, gho vã-la kõtxinẽ. Lãdã uot ju-la ie kumase jite xaj-iela dji bato-la ¹⁹ I lãdã thoazem ju-la, no mem ke no phop lãmẽ, no jite la djilo un pedas dji ekipamã dji bato-la. ²⁰ Dehãtxi boku ju no pa te puve ue solei-la, nẽ zetuel-iela, i vã-la te ka kõtxinẽ sufle fo. Finalmã no piad tut espehãs dji sove no ko. ²¹ Te ka fe boku tã ki ie pa te ka mãje ãiẽ. Ẽbe Pol hete djibut lamitã dji ie i li dji: __ Om-iela, zot te djivet kute sa ki mo te dji i pu no te hete la Creta; kõsa no pa te ke gãiẽ phoblem i no pa te ke piad ãiẽ. ²² Mẽ, ato mo ka dumãde pu zot gãiẽ kohaj. Pies mun pa ke muhi; no ke piad selmã bato-la. ²³ Mo ka koze sa pase ki, lãdã nuit ki pase un zãj dji Bõdje dji mun ki mo ka fe pa, i ki mo ka siavi pahet pu mo ²⁴ li dji: "Pol, pa hete pe! U bẽzuẽ ale juk la phuezãs dji Cezar. I Bõdje lãdã so volõte, deha bai lavi dji tut ki ka voiaje ke u". ²⁵ Pu sa, om-iela zot gãiẽ kohaj ! mo gãiẽ kõfiãs lasu Bõdje i mo jis ki li ke fe sa ki li dji pu mo. ²⁶ Vã-la ke ale ke no pu un kek zile. ²⁷ De simen aphue, nãnuit, vã-la te ka kõtxinẽ ale ke no lãdã ghã lãme *Mediterraneo. Munuï, mun-iela(marinheiro) dji bato-la piasuve ki no te ka hive phox dji late-la ²⁸ Ẽbe ie jite lãdã ghã lãme-la un kod ke un pezãto lãdã so put i ie ue ki djilo-la laba te gãiẽ *thãt sis(36m) met dji fõdo. Pi djivã ie mizuhe, i bai *vẽt set(27m) met dji fõdo. ²⁹ Ie hete pe boku veie bato-la te fape kõt hox-iela. Pu sa ie jite *kat(4) *pies dji fe(ancora ) dji deie bato-la i ie phuie pu li ju vit. ³⁰ Djila mun-iela(marinheiro) dji bato, seie xape dji bato-la. Ie bese txibato sove lavi lãdã lãme-la, ie fe ki ie te ke jite pies dji fe-iela (ancoras) dji djivã bato-la. ³¹ Ẽbe Pol dji pu ofisial-la i soda-iela: __ si mun-iela(marinheiro) dji bato-la pa hete lãdã bato-la, zot pa ke puve sove. ³² Soda-iela kupe kod-iela ki te la txẽbe txibato-la i ie lage'l lãdã lãme-la. ³³ Ãvã ju, Pol dumãde dji tut pu ie mãje un kek bagaj li dji: _ deha ka fe *katoz(14) ju ki zot ka ãtan i dehãtxi sa tã-la zot pa mãje ãiẽ. ³⁴ Ato zot mãje un kek bagaj. Zot bẽzuẽ mãje pu zot puve kõtxinẽ viv. Pase pies mun pa ke piad nẽ mem u fil dji xive. ³⁵ Aphue Pol phã djipẽ-la i li humiasi Bõdje djivã tut. Aphue li pataje djipẽ-la I li kumase mãje. ³⁶ Ẽbe ie hete ke boku kohaj i osi ie mãje. ³⁷ Lãdã bato-la te gãiẽ *desã soasãt zes* *(270) mun pu tut. ³⁸ Aphue ki ie tut mãje ie jite, fahin fãs lãdã ghã lãme-la pu bato-la hete pi leje ³⁹ Kã ju bõmãtẽ, mun-iela (marinheiro) dji bato-la, pa hukonet late-la mẽ ie ue un lag kote te gãiẽ un plaj ie deside fe posib pu ãthe ke bato-la laba. ⁴⁰ Ie kupe kod-iela dji *pies dji fe-iela (ancoras) i ie lage pies-iela lãdã lãme-la, ie demahe *apahe ki ka bai djihesiõ (leme) pu bato-la. Djila ie lage lavuel dji bo adhet, pu ie puve ale djihesiõ dji plaj-la. ⁴¹ Mẽ bato-la fape lasu ban sab i li hete xue. Djivã dji bato-la hete phui, i deie bato-la kumase xakaia ke fos dji lãme-iela. ⁴² Soda-iela Kõbinẽ pu txue tut phuiziõne-iela, pu pies un pa hive la plaj-la i mahõ. ⁴³ Mẽ ofisial-la te le sove Pol li pa lese ie fe sa. Li voie ki tut ki te konet naje, ale phõmiẽ la djilo pu naje juk la plaj-la. ⁴⁴ Li voie osi ki uot-iela sove ie ko, ka txẽbe lãdã pedas plãx o lãdã pedas dji bato-la. I kõsa ki no tut hive la late-la i no sove.