¹ Kã no te deha lãdã late-la i sove, no hete save ki ie te k'aple zile-la Malta. ² Mun-iela ki te ka hete laba thete no boku biẽ. Kumã lapli-la te ka tõbe i te ka fe boku fuedji, ie limẽ un gho djife . ³ Ẽkãt Pol te ka hamase txibua sek pu te mete lãdã djife-la, kã un siapã, ki te ka mahõ dji xalo djife-la mode'l la so lãmẽ. ⁴ Mun-iela ki te ka hete lãdã zile-la ue siapã-la pãdhie la lãmẽ dji Pol ie dji un pu uot: _ Sa om-la djivet sa un *depote (assassino). Li sove dji ghã lãme-la, mẽ mem kõsa justxisdji Bõdje pa ke lese'l viv. ⁵ Mẽ Pol sukuie siapã-la pu ãdjidã djife-la li pa sãtxi ãiẽ. ⁶ Ie majinẽ ki li te ke hete ãfle o li te ke tõbe muhi djinku. Mẽ, aphue dji ãtan boku tã, ie ue ki pa te ke fet ãiẽ, ie xãje dji lide i ie kumase dji ki li te sa un bõdje. ⁷ Phox djisa kote-la te gãiẽ un de late ki a te dji xef dji zile-la, so nõ a te Publio. Li husuve no boku biẽ, i dehãtxi thoa ju no hete la so kaz. ⁸ So papa te kuxe lãdã bukã, malad ke lafiev i kut van. Pol ãthe lãdã xam-la li phuie, li poze so lãmẽ lasu'l i li djiehi'l. ⁹ Aphue djisa uot mun malad-iela dji zile-la vinï i osi ie hete djiehi. ¹⁰ Ie mõthe boku hespek pu no i, kã no bake, ie mete lãdã bato-la tut sa ki no te bẽzuẽ pu voiaj-la. ¹¹ Aphue dji no te hete thoa mua lãdã zile-la, no bake lãdã un bato dji vil dji Alexandria, ki te gãiẽ djivã bato-la pothe dji bõdje hoho-iela Castor i Polux. Bato-la te pase sezõ lapli lãdã zile-la. ¹² No hive lãdã vil dji Siracusa, kote no hete thoa ju. ¹³ Dji laba no kõtxinẽ voiaje i no hive lãdã vil dji Regio. Lãdã uot ju-la vã-la kumase sufle dji (sul), i lãdã de(2) ju no hive la Poteoli. ¹⁴ Lãdã sa vil-la no kõthe un de khẽtxiẽ ki dumãde pu no hete ke ie un simen. Aphue no ale pj Roma. ¹⁵ Fue-iela dji Roma te phã nuvel ki no te hive i ie ale kõthe ke no lãdã *Plas dji *Apio i dji *Thoa Vãde(três Vendas). Kã Pol ue da fue-iela, li hete kõtã i li humiasi Bõdje. ¹⁶ Kã no hive la Roma, husuve piamisiõ dji gãiẽ so phop kaz, i un soda pu veie'l. ¹⁷ Thoa ju aphue, Pol ẽvite lidehãs dji judeu-iela dji Roma pu kõthe ke li. Kã ie te hasãble li dji: __ Mo fue-iela, mo pa fe ãiẽ kõt no pov, nẽ kõt labitxuid-iela ki no husuve dji no ãtepase-iela. Mem kõsa ie phui mo la Jehuzalem i ie hãde mo pu romano-iela. ¹⁸ Romano-iela dumãde mo i ie te le libiate mo, pase ie pa kõthe ãiẽ pu kõdãnẽ mo pu lamo. ¹⁹ Mẽ judeu-iela pa te le ie libiate mo. A pu sa mo dumãde pu Cezar deside mo phoblem, mem kõsa pa gãiẽ pies akuzasiõ pu mo fe kõt mo phop pov. ²⁰ A pu sa mo ẽvite zot pu mo ue zot i pu no bladje. Mo phui ke sa xen-iela dji fe palakos djisa mun ki pov dji Izhael ka ãtan. ²¹ Ẽbe ie dji: _ No pa husuve pies let dji Judeia a hespek dji u. Osi pies un dji no fue-iela vinï dji laba ke nẽpot nuvel o pu koze mal dji u. ²² Mẽ no te le kute u koze akisa u ka majinẽ, pase no save ki, vuemã, lãdã kote-iela ie ka pale kõt djisa patxizã ki u ka fe. ²³ Ẽbe ie make un ju ke Pol. Lãdã sa ju-la, boku dji ie ale kote Pol te fika. Djipi bõmãtẽ ,juk nãnuit li ãnüsie pu ie i esplike mẽsaj lasu *Lasosiete dji Bõdje. I pu lalua dji Moises i dji liv dji phofet-iela, li sase fe ie asekte Jezi. ²⁴ Un de asekte so pahol-iela, mẽ uot-iela pa khe. ²⁵ Ẽbe ie tut ale, ka koze ãt ie. Mẽ, ãvã ie sotxi, Pol dji tuju pi un bagaj: __ Sẽtesphui te gãiẽ hezõ kã li pale pu phofet Isaias dji pu zot ãtepase-iela: ²⁶ Li dji pu Isaias: "ale i dji pu sa mun-iela: Zot ke tãde, mẽ zot pa ke kõphan; Zot ke gade, mẽ zot pa ke ue ãiẽ; ²⁷ Pase mẽmua djisa pov-la fõmẽ; ie buxe ie zohe-iela i ie fõmẽ ie uei-iela. Si ie pa te fe sa, ie uei-iela te puve ue, i ie zohe-iela te puve tãde; ie mẽmua te puve kõphan, i ie te ke tonẽ pu mo, i mo te ke djiehi ie _ Bõdje dji". ²⁸ I Pol finï koze kõsa: __ Zot hete save ki Bõdje voie sa mẽsaj dji salvasiõ-la pu nõ-Judeu-iela! I ie ke kute ²⁹ (Aphue ki Pol koze sa, judeu-iela ale ka djiskite ke violãs). ³⁰ Dehãtxi de(2) ãnẽ Pol hete laba lãdã un kaz ki li te ka lue i li te ka husuve tut sa ki te k'ale ue'l. ³¹ Li te ka ãnüsie Lasosite dji Bõdje i li te ka mõthe a hespek dji Sẽie Jezi Khi, li te ka pale ke tut kohaj i libiate.