¹ Agripa dji pu Pol: _ U puve phuezãte u pahol pu defie u ko. Ẽbe Pol fe sin ke so lãmẽ i li kumase defie so ko, li dji kõsa: ² Vue Agripa, mo boku kõtã jodla kumã mo puve defie mo ko djivã u dji tut sa ki judeu-iela ka akuze mo. ³ I mo kõtã pase ki u konet biẽ tut labitxuid i kestxiõ dji judeu-iela. ⁴ Tut judeu-iela save kumã mo viv lamitã dji i osi la Jehuzalem, djipi dji mo jõnes juk jodla. ⁵ Ie tuju save, i ie puve bai laphuev djisa si ie le _ ki djipi Kumasmã mo te sa mun dji patxizã dji fahizeu-iela, patxizã ki te plis hed dji no helijiõ. ⁶ I ato ie ka kõdãnẽ mo pase ki mo gãiẽ espehãs lãdã phomes ki Bõdje fe pu no ãtepase-iela. ⁷ Tut thib-iela dji no pov ki ka adohe Bõdje nuit i jonẽ, osi ka ãtan ue sa phomes-la kõphui. A palakos djisa espehãs-la vue, Ki judeu-iela ka akuze mo. ⁸ Pukisa ki zot, judeu-iela, ka thuve ïposib khe ki Bõdje ka hesusite mun muhi-iela? ⁹ Pol dji ãko: Mo mem te ka majinẽ Ki mo te djivet fe tut sa ki mo te puve kõt thavai dji Jezi dji Nazahe. ¹⁰ ki, vuemã mo fe la Jehuzalem. Mo husuve otohizasiõ dji xef dji sasedotxi-iela i mo phui boku mun ki te ka suiv Jezi. Kã ie te k'ale kõdãnẽ pu lamo, mo osi te ka vote kõt ie. ¹¹ Dehãtxi boku tã mo fe ie pase pu pinitãs lãdã tut sinagog-iela I mo fose ie kuiẽnẽ ie phop espua. Mo te hai ie boku, ki mo ale juk uot vil-iela pu fe ie pase pinitãs. ¹² I Pol kõtxinẽ: __ A pu sa ki mo voiaje pu vil dji Damasco, mo ale ke otohizasiõ i zod dji xef dji lalua-iela. ¹³ Mẽ hive vue, ki lãdã esthad-la midji, vinï dji siel-la un klehite ka pi klehe pase solei-la, ki klehe lasu mo i mo kõpãiẽ-iela ki te ka voiaje ke mo. ¹⁴ No tut tõbe ate, i mo tãde un vue dji pu mo ã *hebraico: "Saulo, Saulo! Pukisa u ka fe mo pase pu pinitãs? Pa gãiẽ nesesite u bhuiga kõt mo". ¹⁵ Ẽbe mo dumãde: "Akimum ki a u Sẽie"? __ i Sẽie-la hepon: Mo sa Jezi, sa ki u ka fe pase pu pinitãs. ¹⁶ Mẽ leve i hete djibut. Mo pahet pu u pu xuezi u kumã mo siavito* , pu u hakõte pu uot-iela akisa u ue jodla i ãnüsie sa ki mo ke mõthe pu u aphue . ¹⁷ Mo ke delivue u dji judeu-iela i nõ-judeu-iela. Pu kimun mo ke voie u. ¹⁸ U ke luvui ie uei-iela pu ie sotxi dji gho suku-la pu klehite-la, i dji povua dji Djab pu Bõdje. Ẽbe, pu espua ki ie me gãiẽ lasu mo, ie pexe-iela ke padõnẽ i ke pase fe pa dji pov ki Bõdje xuezi. ¹⁹ I Pol finï dji kõsa: Vue Agripa, mo pa dezobei viziõ ki vinï dji siel-la. ²⁰ Mo ãnüsie Pahol-la phõmiẽ la Damasco i aphue la Jehuzalem, lãdã tut hejiõ dji judeia i ãt nõ-Judeu-iela. Mo te ka dji pu ie tut ki ie te bẽzuẽ lese ie pexe-iela, i tonẽ pu Bõdje i fe bagaj ki pu mõthe ki ie te, vuemã hepãtxi. ²¹ A pu sa ki un de judeu txẽbe mo kã mo te la Kaz dji Adohasiõ-la i ie te le txue mo. ²² Mẽ juk jodla Bõdje ide mo, i a pu sa mo esi ka pote so mẽsaj pu tut, pu mun ki pi sẽp juk mun ki pi ïpohtã. Mo ka dji mem bagaj ki phofet-iela i Moises te dji ki te ke fet. ²³ Ie afihmẽ ki *Messias-la te bẽzuẽ sufui i sa phõmiẽ mun pu hesusite, pu ãnüsie klehite dji salvasiõ-la pu judeu kumã pu nõ-judeu-iela. ²⁴ Kã Pol te ka defie so ko kõsa, Festo hele: __ Pol u fu! U lekol boku, ki u piad u hezõ! ²⁵ Pol hepon: __ Mo pa fu, guvelmã; mo lãdã mo pi biẽ hezõ i mo ka pale lavehite. ²⁶ Mo puve koze djivã vue Agripa ke tut kohaj, pase ki mo asihe ki li konet tut sa bagaj-iela boku biẽ, pase ie pa fet lãdã pies kote ãseghe. ²⁷ Ẽbe Pol dji pu vue-la: __ vue Agripa, u ka khe lasu phofet-iela? mo save ki u ka khe! ²⁸ Agripa hepon: __ u ka majinẽ ki a kõsa ki lãdã tximoso tã, u ke tonẽ mo kumã khẽtxiẽ? ²⁹ Pol dji: "lãdã tximoso tã o lãdã boku tã, mo ke dumãde pu Bõdje ki nõ selmã u kumã uot-iela ki esi ki tonẽ sãble mo, mẽ sã sa xen-iela. ³⁰ Djila vue Agripa, guvelmã-la, Berenice i tut ki te laba ie leve ³¹ i ie sotxi ,ka koze: __ Sa om-la pa fe ãiẽ pu mehite muhi, nẽ pu hete phui. ³² Ẽbe Agripa dji pu Festo: Li te deha puve hete lib si lj pa te dumãde pu Cezar deside so phoblem.